ግዕዝ
Home Formaciones Libros Biblioteca Ge'ez Contacto
Sinaxario · Tikimt

26 de Tikimt

አመ፡፳ወ፮፡ለጥቅምት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፮፡ለጥቅምት፡በዛቲ፡ዕለት፡ኮነ፡ሰማዕተ፡ቅዱስ፡ጢሞና፡ሐዋርያ፡ወሰማዕት፡እምኍልቈ፡፸ወ፪፡አርድእት።
2ወለዝንቱ፡ረድእ፡ኀረዮ፡እግዚእነ፡ምስለ፡፸ወ፪፡አርድእት፡ወወሀቦሙ፡ሥልጣነ፡ከመ፡ይፈውሱ፡ኵሎ፡ደዌ፡ወኵሎ፡ሕማመ፡ወያውፅኡ፡አጋንንተ፡እምላዕለ፡ሰብእ።
3ወነሥአ፡ዝንቱ፡ቅዱስ፡ጢሞና፡ጸጋ፡ሰማያዊተ፡ወበይእቲ፡ኃይል፡ፈወሶሙ፡ለብዙኃን፡ድውያን፡ወገረሩ፡ሎቱ፡አጋንንት።
4ወለእግዚእነ፡ኢየሱስ፡ክርስቶስ፡ሎቱ፡ስብሐት፡ተልእኮ፡አመ፡ሥጋዌሁ።
5ወእምድኅረ፡ዐርገ፡እግዚእነ፡ውስተ፡ሰማይ፡ኮነ፡ዝንቱ፡ቅዱስ፡ይትለአኮሙ፡ለሐዋርያት፡ወትረ፡ከመ፡ገብር፡ወወረደ፡ላዕሌሁ፡ጸጋ፡መንፈስ፡ቅዱስ፡ምስለ፡ሐዋርያት፡በበዓለ፡፶ሳ።
6ወእምድኅረዝ፡ኀረይዎ፡ሐዋርያት፡ምስለ፡፯፡ዲያቆናት፡እለ፡ሤምዎሙ፡ዘኮነ፡ስምዐ፡መጽሐፍ፡በእንቲአሆሙ፡ከመ፡እሙንቱ፡ምሉኣነ፡መንፈስ፡ቅዱስ፡ወጥበብ።
7ወእምድኅረዝ፡ተልእከ፡በመልእክተ፡ዲያቆን፡ኀዳጠ፡መዋዕለ፡ሤምዎ፡ቀሲሰ። ወእምዝ፡ሤምዎ፡ኤጲስቆጶስ፡ላዕለ፡ሀገረ፡ብስራ፡ዘብሔረ፡ብልቃ፡ወሰበከ፡ውስቴታ፡በስመ፡እግዚእነ፡ኢየሱስ፡ክርስቶስ፡ሎቱ፡ስብሐት። ወአጥመቆሙ፡ለብዙኃን፡እምነ፡ዮናናውያን፡ወአይሁድ።
8ወሶበ፡ሰምዐ፡ዘንተ፡መኰንነ፡ዛቲ፡ሀገር፡አኀዞ፡ለቅዱስ፡ጢሞና፡ወኰነኖ፡ኵነኔ፡ዐቢየ፡ወአውዓዮ፡በእሳት፡ወፈጸመ፡ስምዖ፡ወነሥአ፡አክሊለ፡ስምዕ፡በመንግሥተ፡ሰማያት። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለጢሞና፡እምኍልቈ፡፸ወ፪፡አርድእት፤ወእም፡፯፡ዲያቆናት፤ዘፈጸመ፡ስምዖ፡በዋዕየ፡እሳት፤ወካዕበ፡ዓዲ፡በዛቲ፡ዕለት፤ሰላም፡እብል፡ለሁራስ፡ሰማዕት።
9ወበዛቲ፡ዕለት፡ተዝካሩ፡ለያዕቆብ፡ሐዋርያ፡እኍሁ፡ለእግዚእነ፡ወሁራስ፡ሰማዕት። በረከቶሙ፡ወትንብልናሆሙ፡ይኩነነ፡ባላሂ፡ለዓለመ፡ዓለም፡አሜን።
ወበዛቲ፡ዕለት፡ኮነ፡ዕረፍቶሙ፡ለፊልጶስ፡ወስንጣውስ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።