ግዕዝ
Home Formaciones Libros Biblioteca Ge'ez Contacto
Sinaxario · Tikimt

27 de Tikimt

አመ፡፳ወ፯፡ለጥቅምት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፯፡ለጥቅምት፡በዛቲ፡ዕለት፡አዕረፈ፡አብ፡ቅዱስ፡ወብፁዕ፡አባ፡መቃርስ፡ኤጲስ፡ቆጶስ፡ዘሀገረ፡ቃው።
2ወለዝንቱ፡ቅዱስ፡ተፈጸመ፡ላዕሌሁ፡ቃለ፡ትንቢተ፡ዳዊት፡ነቢይ፡ዘይቤ፡“ብፁዕ፡ብእሲ፡ዘኢሖረ፡በምክረ፡ረሲዓን፡ወዘኢቆመ፡ውስተ፡ፍኖተ፡ኃጥአን፡ወዚኢነበረ፡ውስተ፡መንበረ፡መስተሣልቃን፡ዘዳዕሙ፡ሕገ፡እግዚአብሔር፡ሥምረቱ። ወዘሕጎ፡ያነብብ፡መዓልተ፡ወሌሊተ።”
3እስመ፡ዝንቱ፡አባ፡መቃርስ፡ዓቀበ፡ዘንተ፡ትእዛዘ፡እግዚአብሔር፡ወነገደ፡በመክሊት፡ረባን።
4ወእስፍንተ፡ጊዜያተ፡ዘገብረ፡ተአምራተ፡ወመንክራተ፡ዐበይተ፡እግዚአብሔር፡በላዕለ፡እደዊሁ።
5ወተብህለ፡በእንቲአሁ፡እንዘ፡ሀሎ፡በሀገረ፡ቃው፡ወኮነ፡ለለኵሉ፡ጊዜ፡ይበኪ፡እንዘ፡ይነብር፡ዲበ፡መንበር፡ከመ፡ይምህሮሙ፡ለሕዝብ፡ወአሐዱ፡እምአርዳኢሁ፡ዘያፈቅሮ፡አምሐሎ፡ወይቤሎ፡ሎምዓት፡ትበኪ፡ኦ፡ኣቡየ፡ንግረኒ።
6ወበእንተ፡መሐላ፡አውሥአ፡ወይቤሎ፡አንሰ፡እበኪ፡ሶበ፡እኔፅር፡ኃጣውኢሆሙ፡ለሕዝብየ፡ወምግባሮሙ፡እኪተ፡ከመ፡ይትረአይ፡ዘይት፡ውስተ፡ማህው።
7ወካልእተ፡ጊዜ፡ርእዮ፡ለእግዚእነ፡ኢየሱስ፡ክርስቶስ፡ሎቱ፡ስብሐት። እንዘ፡ይነብር፡ዲበ፡ምሥዋዕ፡ወመላእክት፡እንዘ፡ያቄርቡ፡ሎቱ፡ምግባራቲሆሙ፡ለሰብእ፡ለለ፡፩፡፩፡እምኔሆሙ።
8ወሰምዐ፡ቃለ፡ዘይብል፡ኦ፡ኤጲስቆጶስ፡ለምንት፡ትትዔወር፡እምነ፡ሕዝብከ፡ወኢትጌሥፆሙኑ፡ወኢትሜህሮሙኑ። ወይቤ፡ኦ፡እግዚኦ፡እሙንቱሰ፡ኢይትዌከፉ፡ቃልየ፡ወይቤሎ፡ካዕበ፡ይደልዎ፡ለኤጲስ፡ቆጶስ፡ይገሥፅ፡ወይምህር፡ሕዝቦ፡ወለእመ፡ኢተወክፉ፡ቃሎ፡ደሞሙ፡ላዕለ፡ርእሶሙ።
9ወእምድኅረዝ፡ፀውዕዎ፡ከመ፡ይሑር፡ምስለ፡ቅዱስ፡ዲዮስቆሮስ፡ኀበ፡ጉባኤ፡ኬልቄዶን፡ዘአስተጋብአ፡መርቅያኖስ፡ዓላዊ፡ንፉት።
10ወሶበ፡በጽሐ፡ኀበ፡ጽርሐ፡ንጉሥ፡ኢኀደግዎ፡ሐራ፡ከመ፡ይባእ፡በእንተ፡አልባሲሁ፡ኅሡራት፡ወተናገረ፡ሎቱ፡አባ፡ዲዮስቆሮስ፡ከመ፡ውእቱ፡ኤጲስ፡ቆጶስ፡ወበዊኦ፡ሶበ፡ሰምዐ፡ቃሎሙ፡በእንተ፡እግዚእነ፡ኢየሱስ፡ክርስቶስ፡እንዘ፡ይፈልጥዎ፡እመለኮቱ፡ወይሬስይዎ፡፪ተ፡ጠባይዓተ።
11ወተምዐ፡ዝንቱ፡ቅዱስ፡ወአውገዞሙ፡ምስለ፡አብ፡ዲዮስቆሮስ፡ለንጉሥኒ፡ወለማኀበር፡ዘእንበለ፡ፍርሃት፡እስመ፡እሙንቱ፡ምጥዋን፡ለሞት፡በእንተ፡ሃይማኖት፡ርትዕት።
12ወሰደድዎ፡ምስለ፡አብ፡ዲዮስቆሮስ፡ኀበ፡ደሴተ፡ጋግራ።
13ወእምህየ፡ፈነዎ፡አባ፡ዲዮስቆሮስ፡ምስለ፡ብእሲ፡መሃይምን፡ኀበ፡ሀገረ፡እስክንድርያ፡እስመ፡ተነበየ፡ሎቱ፡ወይቤሎ፡አንተሰ፡ሀለወከ፡ከመ፡ትንሣእ፡አክሊለ፡ስምዕ፡በሀገረ፡እስክንድርያ።
14ወሶበ፡በጽሐ፡ሀገረ፡እስክንድርያ፡ወበውእቱ፡ጊዜ፡በጽሐ፡መልእክቱ፡ለንጉሥ፡መርቅያን፡ንፉቅ፡ዘጽሑፍ፡ውስቴታ፡ሃይማኖቱ፡እኪት፡ዘትሬስዮ፡ለክርስቶስ፡፪ተ፡ጠባይዓተ።
15ወመርቅያን፡አዘዞ፡ለላእኩ፡ወይቤሎ፡ዘጸሐፈ፡ቀዳሚ፡በዝንቱ፡መጽሐፍ፡ወአምነ፡በሃይማኖትነ፡ሢሞ፡ሊቀ፡ጳጳሳት።
16ወሀሎ፡በሀገረ፡እስክንድርያ፡፩፡ብእሲ፡ሊቀ፡ቀሳውስት፡ዘስሙ፡አብሮታሪ፡ነሥአ፡ውእተ፡መጽሐፈ፡ርኩሰ፡ወፈቀደ፡ከመ፡ይጽሐፍ፡ውስቴቱ፡ቅድመ።
17ወይቤሎ፡ቅዱስ፡አባ፡መቃርስ፡ለአብሮታሪ፡ተዘከር፡ቃሎ፡ዘነገረከ፡አባ፡ዲዮስቆሮስ፡በጊዜ፡ሖረ፡እምሀገረ፡እስክንድርያ፡እንዘ፡ይብለከ፡ከመ፡አንተ፡ትከውን፡ሥሉጠ፡ላዕለ፡ቤተ፡ክርስቲያን፡እንተ፡እምድኅሬየ፡ወውእተ፡ጊዜ፡ተዘከረ፡ቃሎ፡ወኢፈቀደ፡ይጽሐፍ፡ውስተ፡ውእቱ፡መጽሐፍ፡ርኩስ።
18ወሶበ፡አእመረ፡ላእኩ፡ለንጉሥ፡መርቅያኖስ፡ከመ፡ኤጲስ፡ቆጶስ፡አባ፡መቃርስ፡ኢየአምን፡በሃይማኖቱ፡ለንጉሥ፡ተንሥአ፡በመዐት፡ወረገፆ፡ለቅዱስ፡አባ፡መቃርስ፡ውስተ፡መለያልይሁ፡ዘነብእት፡ወአዕረፈ፡ሶቤሃ፡ወነሥአ፡አክሊለ፡ስምዕ።
19ወፆሩ፡ሥጋሁ፡መሃይምናን፡ወረሰይዎ፡ምስለ፡ሥጋሆሙ፡ለቅዱስ፡ዮሐንስ፡መጥምቅ፡ወኤልሳዕ፡ነቢይ።
20እስመ፡ዝንቱ፡ቅዱስ፡አባ፡መቃርስ፡ርእየ፡በራእይ፡ቀዳሚ፡ዘከመ፡ይቤልዎ፡ቅዱሳን፡ዮሐንስ፡ወኤልሳዕ፡እስመ፡ሥጋከ፡ይከውን፡ምስለ፡ሥጋነ፡ወዓዲ፡ኮነ፡ምስለ፡ሥጋ፡አባ፡መቃርስ፡ዘየዓቢ፡ወአባ፡መቃርስ፡እስክንድራዊ፡በደብረ፡አስቄጥስ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላመ፡እዘብጥ፡በልሳንየ፡ድኀንፃ፤ለመሰንቆ፡መዝሙርከ፡እንተ፡ያስተፌሥሕ፡ድምፃ፤ለመፍቀሬ፡ጽድቅ፡መቃርስ፡ዘትፀልእ፡ሕገ፡ዓመፃ፤እደ፡ገሢሠከ፡ሶበ፡አንበርከ፡በገጻ፤ብእሲተ፡መኰንን፡ሐይወት፡ወነጽሐት፡እምለምፃ።ሰላም፡ሰላም፡ለፈያታዊ፡ዘቀደሶ።ሀገረ፡ጽጌ፡የአኅዝ፡ምስለ፡ጻድቃን፡በተዋርሶ።ተዘከረኒ፡ክርስቶስ፡አመ፡ትመጽእ፡ለተዋቅሶ።በእንተ፡መቃርስ፡ጻድቅ፡እንተ፡መጠወ፡ነፍሶ።ወበበትረ፡መስቀል፡ዘይዘብጥ፡ርእሶ።
21ወበዛቲ፡ዕለት፡ተዝካሩ፡ለጳውሎስ፡ዘዖማዕት፡ወዮልያኖስ፡ወእለ፡ምስሌሁ፡ሰማዕታት። በረከቶሙ፡የሀሉ፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።