Sinaxario · Tikimt
25 de Tikimt
አመ፡፳ወ፭፡ለጥቅምት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፭፡ለጥቅምት፡በዛቲ፡ዕለት፡አዕረፈ፡አባ፡ቡላ፡ዘተሰምየ፡አቢብ።
2ለዝንቱ፡ቅዱስ፡ኮነ፡ስመ፡አቡሁ፡አብርሃም፡ወስመ፡እሙ፡ሐሪክ፡ወኮኑ፡እምሀገረ፡ሮሜ፡እምአድያመ፡ሉፊ።
3ወሶበ፡ኮነ፡ስደት፡በመዋዕለ፡መክስምያኖስ፡ንጉሥ፡ወነበሩ፡እንዘ፡ይጐይዩ፡እም፡ሀገር፡ለሀገር።
4ወእሙንቱ፡አልቦሙ፡ውሉድ፡ወይስእሉ፡ኀበ፡እግዚአብሔር፡በጾም፡ወበጸሎት፡ከመ፡የሀቦሙ፡ወልደ፡ወአስተርአዮሙ፡በሕልም፡መልአከ፡እግዚአብሔር፡ወመጠዎሙ፡አስካለ፡ዘምሉእ፡ፍሬ።
5ወሶበ፡ተፀንሰ፡ዝንቱ፡ቅዱስ፡በቈለ፡በዓውደ፡ቤቶሙ፡ዓቢይ፡ኦም፡ወጽሑፍ፡ውስተ፡አቍጽሊሁ፡በነገረ፡ዕብራይስጥ፡ዘይብል፡ቡላ፡ገብሩ፡ለእግዚአብሔር፡ወቅዱሱ፡ለአምላከ፡ያዕቆብ፡ዘየኀድር፡ውስተ፡ጽዮን።
6ወሶበ፡ተወልደ፡ኣንበርዎ፡ዓመተ፡ፍጽምተ፡ዘእንበለ፡ያብእዎ፡ክርስትና። ወእምዝ፡አስተርአየቶ፡እግዝእትነ፡ማርያም፡ለአልብስትርዮስ፡ሊቀ፡ጳጳሳት፡ዘሮሜ፡ወአዘዘቶ፡ከመ፡ይሑር፡ኀበ፡ቤተ፡አብርሃም፡ወያጥምቆ፡ለሕፃን። ወበጺሖ፡አብኦ፡ክርስትና፡ወሰመዮ፡ቡላ።
7ወሰሚፆሙ፡አቡሁ፡ወእሙ፡አስተዓፀቡ፡በእንተ፡ዘሰመዮ፡ቡላ፡ዘእንበለ፡ይንግርዎ።
8ወሶበ፡ጸለየ፡ሊቀ፡ጳጳሳት፡ወረደ፡እምሰማይ፡ኀብስተ፡ቍርባን፡ወጽዋዓ፡ወይን፡ወቀዲሶ፡መጠዎሙ፡ምሥጢራተ፡ቅድሳት።
9ወሶበ፡ኮኖ፡ለሕፃን፡ዓመተ፡ፍጽምተ፡ነበበ፡እንዘ፡ይብል፡፩፡አብ፡ቅዱስ፡፩፡ወልድ፡ቅዱስ፡፩፡ውእቱ፡መንፈስ፡ቅዱስ።
10ወእምድኅረ፡ኅዳጥ፡መዋዕል፡አዕረፉ፡አቡሁ፡ወእሙ፡አመ፡፲ወ፯፡ለወርኀ፡ኅዳር። በረከቶሙ፡ይኩን፡ምስሌነ፡ለዓለም፡አሜን።
11ወሶበ፡ኮኖ፡ለሕፃን፡፲ተ፡ዓመተ፡በጽሐ፡መኰንን፡ዓላዊ፡ዘይኤዝዝ፡ሰጊደ፡ለጣዖት፡ወሰሚዖ፡አባ፡ቡላ፡ሖረ፡ኀበ፡መኰንን፡ወረገመ፡አማልክቲሁ፡ርኩሳነ፡ወርእዮ፡መኰንን፡አንከረ፡ናእሰ፡ኣካሉ፡አንከረ፡ጥቀ።
12ወባሕቱ፡አዘዘ፡ይቅንውዎ፡በቅንዋት፡ወይሥትሩ፡ሥጋሁ፡ወይዝኀቁ፡አምዕስቲሁ፡ወይግዝዝዎ፡በመጋዝዕ፡እገሪሁ፡ወእደዊሁ፡ወይቅሥፉ፡ዘባኖ፡ወይደይዎ፡ውስተ፡መንኰራኵር፡ማእከለ፡አስይፍት፡ወኰያንው፡ወይስሐብዎ፡ውስተ፡ፍኖተ፡ሀገር፡ወመጽአ፡ቅዱስ፡ሚካኤል፡ሊቀ፡መላእክት፡አድኀኖ፡ወፈወሶ።
13ወእምዝ፡ሖረ፡ኀበ፡ካልእ፡መኰንን፡ዓላዊ፡ወፀረፈ፡ላዕሌሁ፡ወላዕለ፡አማልክቲሁ፡ወተምዐ፡መኰንን፡ወመተረ፡ርእሶ፡በሰይፍ፡አመ፡፲ወ፰፡ለሚያዝያ፡ወወረደ፡ቅዱስ፡ሚካኤል፡ወአንሥኦ፡እሙታን፡ዘእንበለ፡ሙስና። ወወሰዶ፡ውስተ፡ገዳም፡ወአልበሶ፡አልባሰ፡ምንኵስና፡ወወሀቦ፡አስኬማ፡በአርአያ፡ትእምርተ፡መስቀል። ወይቤሎ፡አዘዘከ፡እግዚአብሔር፡ከመ፡ትኩን፡ሱታፌሆሙ፡ለቅዱሳን።
14ወእምዝ፡ዐርገ፡ቅዱስ፡አባ፡ቡላ፡መልዕልተ፡ኦም፡ይቡስ፡ወነበረ፡ላዕሌሃ፡እንዘ፡ይትጋደል፡ዘእንበለ፡አፅርፆ፡ወሶበ፡ይዜከር፡ሕማሞ፡ወስቅለቶ፡ለእግዚእነ፡ይትዌረው፡እምላዕለ፡ውእቱ፡ኦም፡ኵሎ፡ጊዜ።
15ወአሐተ፡ዕለተ፡ሶበ፡ተወርወ፡ጸንዐ፡ሰይጣን፡ለቀቲሎቱ፡ወቀተሎ፡ወመጽአ፡ሶቤሃ፡መድኀኒነ፡ወአንሥኦ።
16ወይቤሎ፡እምይእዜሰ፡ኢይኩን፡ስምከ፡ቡላ፡ባሕቲቱ፡አላ፡ይኩን፡አቢብሃ፡እስመ፡አንተ፡ትከውን፡አበ፡ብዙኀን።
17ወወሰከ፡ፍቅሮ፡ለክርስቶስ፡ወነበረ፡እንዘ፡ይጸፍዕ፡ገጾ፡ወይመትር፡ሥጋሁ፡በበግማድ፡ወይቀሥፍ፡ዘባኖ፡፯ተ፻ተ፡ጊዜያተ፡ወበዝ፡ግብር፡ሞተ፡፫ተ፡ጊዜ፡ወያነሥኦ፡መድኀኒነ።
18ወለሊሁ፡ያስተርኢ፡ሎቱ፡ዘከመ፡ተወልደ፡እምድንግል፡ወዘከመ፡ተእኅዞቱ፡ወሕማማቲሁ፡እምነ፡አይሁድ፡ወበእንተዝ፡ነበረ፡እንዘ፡ኢይበልዕ፡ወኢይሰቲ፡፵ወ፪፡ዓመተ፡ወኢይሰክብ፡በቢሁ፡፷ወ፯ተ፡ዓመተ።
19ወካዕበ፡ተተክለ፡በርእሱ፡፲ወ፪ተ፡ዓመተ፡ወ፯፡አውራኀ፡እስከ፡ኀልቀ፡ናላሁ።
20ወአሐተ፡ዕለተ፡ሶበ፡ተዘከረ፡ሕማሞ፡ለእግዚእነ፡ተከለ፡ሰይፈ፡መንፀሮ፡ወወድቀ፡ላዕሌሁ፡ወሞተ፡ወመጽአት፡እግዝእትነ፡ማርያም፡ምስለ፡መላእክት፡ኀበ፡ሀሎ፡በድኑ፡ወትቤሎ፡ሰላም፡ለከ፡ፍቁርየ። ወነበበ፡በድኑ፡ወይቤላ፡ሰላም፡ለኪ፡ኦ፡ንግሥተ፡ኵሉ፡ዓለም፡ወረሰየት፡እደዊሃ፡ዲበ፡ሥጋሁ፡ወአንሥአቶ፡እሞት።
21ወሶበ፡ቀርበ፡መዋዕሊሁ፡ከመ፡ይፍልስ፡እምዝንቱ፡ዓለም፡አስተርአዮ፡እግዚእነ፡ኢየሱስ፡ክርስቶስ፡ሎቱ፡ስብሐት። እንዘ፡ውስተ፡እዴሁ፡አክሊላት፡ዘአዕናቍ፡ብዑዳት፡ወአልባሳት፡ብሩሃት፡ወይቤሎ፡ነዓ፡ኀቤየ፡ኦ፡ፍቁርየ፡አቢብ፡ከመ፡አስተፍ፡ሥሕከ፡በፍሥሐ፡ዘኢየኀልቅ።
22መሐልኩ፡በርእስየ፡ከመ፡ለኵሉ፡ዘይጼውዕ፡ስመከ፡ከመ፡እሠሪ፡ሎቱ፡ኃጢአቶ፡ወኵሉ፡ዘይገብር፡ተዝካረከ፡አው፡ዘይምሕር፡ነዳየ፡አው፡ዘያለብስ፡ዕሩቀ፡አው፡ዘያጸግብ፡ርኁበ፡አው፡ዘያሰቲ፡ጽሙኣ፡ኣው፡ዘየሐንፅ፡መርጡለከ፡አው፡ዘይጽሕፍ፡ገድለከ፡አው፡ዘያነብቦ፡አው፡ዘይሰምዖ፡እሠሪ፡ኃጢአቶ፡እስከ፡፲ቱ፡ትውልድ።
23ወዘንተ፡ብሂሎ፡ሰዓሞ፡አፉሁ፡ወፆሮ፡በእንግድዓሁ፡ወአዕረጎ፡ውስተ፡አየር፡ወሶበ፡ሰምዓት፡ነፍሱ፡ስብሐተ፡መላእክት፡ተፈልጠት፡እምሥጋሃ፡ወቦአት፡ውስተ፡ኢየሩሳሌም፡ሰማያዊት። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለአቢብ፡ዘአስተጋብአ፡አሐተኔ፤ምግባረ፡ጽድቅ፡በገዳም፡ወምግባረ፡ሰማዕት፡ውስተ፡ኵርጓኔ፤እስከ፡ይቤሎ፡አምላክ፡በቃለ፡አኰቴት፡ወምዝጋኔ፤ረሰይከኑ፡ለባሕቲትከ፡ኵነኔ፤እንዘ፡መጠነዝ፡ታፃሙ፡ሥጋከ፡በቅኔ።ተዘኪረከ፡ክርስቶስ፡ሥቃያተ፡አቢብ፡ብዙኀ፤ወርህጸተ፡ነፍሱ፡ፍሉሐ፤ኢታጽንዕ፡ብየ፡ልበከ፡ርኅሩኀ፤እስከ፡እትመየጥ፡መንገሌከ፡ጽንሐኒ፡ጸኒሐ፤እስመ፡እምድኅረ፡ሞቱ፡ለሰብእ፡አልቦቱ፡ንስሐ።ሰላም፡እብል፡፲ወ፪ተ፡አምአተ፤፵ዓወ፫ተ፡ተባዕተ።፫ተ፡፻ተ፡ወ፷፡አንስተ፤ሶበ፡ርእዩ፡በውስተ፡ዓውድ፡ዘአቢብ፡ጥብዓተ፤እለ፡ተጋደሉ፡ወኮኑ፡ሰማዕተ።
24ወበዛቲ፡ዕለት፡ኮነ፡ተዝካሩ፡ለአባ፡ዕብሎይ፡አምሳለ፡መላእክት።
25ወለዝንቱ፡ቅዱስ፡ኮነ፡ስመ፡አቡሁ፡አሞኒ፡እምሰብአ፡ሀገረ፡አክሚም፡ወስማ፡ለእሙ፡ሙስያ፡ወኮኑ፡፪ሆሙ፡ጻድቃነ፡በቅድመ፡እግዚአብሔር፡ወየሐውሩ፡ውስተ፡ፍኖቱ፡ወያፈቅርዎሙ፡ለፈላስያን፡ወባሕቱ፡ኢኮነ፡ሎሙ፡ወልድ፡ግሙራ።
26ወርእየት፡እሙ፡ሙስያ፡በራእየ፡ሌሊት፡ከመ፡፩፡ብእሲ፡ብርሃናዊ፡ወምስሌሁ፡ዕፅ፡ወተከለ፡ውእተ፡ዕፀ፡ውስተ፡ቤታ፡ወሶቤሃ፡ሠረፀ፡ወፈረየ፡ወይቤላ፡ብልዒ፡ኵሉ፡ዘይበልዕ፡እምዝንቱ፡ፍሬ፡የሐዩ፡ለዓለም። ወነሥአት፡እሙ፡ሙስያ፡እምውእቱ፡ፍሬ፡ወበልዓት፡ወኮነ፡ጥዑመ፡ውስተ፡አፉሃ።
27ወትቤ፡በልባ፡ቦኑ፡ይከውነኒ፡ሊተ፡ፍሬ፡ወሶበ፡ነቅሐት፡እምንዋማ፡ነገረቶ፡ለምታ፡ዘከመ፡ርእየት፡ወውእቱኒ፡ካዕበ፡አይድዓ፡ዘርእየ፡ዘከመ፡ርእየት፡ይእቲ፡ወሰብሕዎ፡ለእግዚአብሔር፡ስቡሕ፡መሰኩ፡ገቢረ፡ጽድቅ፡ወተጋድሎ፡ሠናየ፡ወኮኑ፡ይጸው፡በበ፪ቱ፡መዐልት፡ወሲሳዮሙ፡ኅብስት፡ወሄው።
28ወሶበ፡ፀንሰቶ፡እሙ፡ለዝንቱ፡ቅዱስ፡አባ፡ዕብሎይ፡ኮነት፡ትጼሊ፡ጸሎታተ፡ብዙኀ፡ወትመጸውት፡ብዙኀ፡ወኮነት፡ትሰግድ፡ኵሎ፡ሌሊተ፡፲ተ፻ተ፡ስግደታተ። ወበመዓልት፡፭ተ፻ተ፡ስግደተ፡መጠነ፡፱፡አውራኅ፡እስከ፡ወለደቶ፡ለሕፃን፡ወሶበኒ፡ተወልደ፡ሰመይዎ፡ዕብሎይ።
29ወሶበ፡ኮነ፡ዕብሎይ፡ወሬዛ፡ፈተወ፡ይልበስ፡አልባሰ፡ምንኵስና፡ወነበረ፡ከመዝ፡እስከ፡ይረክብ፡ምክንያተ፡ወቦቱ፡ዓርክ፡ዘስሙ፡አቢብ፡ነሥኦ፡ምስሌሁ፡ወወጽኡ፡በሌሊት፡ወሖሩ፡ወቦኡ፡ውስተ፡፩፡ደብር፡እምነ፡አድባራት፡ዘላዕላይ፡ግብፅ፡ወመንኰሱ፡ወኮኑ፡ይፀመዱ፡ወይትጋደሉ፡ተጋድሎ፡ዐቢየ።
30ወእምድኅረዝ፡አዕረፈ፡አባ፡አቢብ፡አመ፡፳ወ፭፡ለወርኀ፡ጥቅምት፡ኣሜሃ፡ሖረ፡አባ፡ዕብሎይ፡ኀበ፡ደብረ፡አብሎግ፡ወተጋብኡ፡ኀቤሁ፡ብዙኃን፡ሰብእ፡ወኮነ፡ይሜህሮሙ፡ፈሪሃ፡እግዚአብሔር፡በአምልኮ፡ሠናይ።
31ወበዕለተ፡ዕረፍቱ፡ለቅዱስ፡አባ፡አቢብ፡እንዘ፡ይገብሩ፡ተዝካሮ፡ይቤሎሙ፡አባ፡ዕብሎይ፡ኦ፡አኀውየ፡ዘይጼሊ፡ጸሎተ፡ዮም፡በስሙ፡ለአባ፡አቢብ፡ይሠሪ፡ሎቱ፡እግዚአብሔር፡ኀጢአቶ፡እስመ፡ተካየዶ፡እግዚእነ፡በዝንቱ፡ኪዳን፡እንዘ፡ይብል፡ኦ፡ኀሩይየ፡አቢብ፡ኵሉ፡ዘይጼሊ፡በዕለተ፡ተዝካርከ፡አሐተ፡ጸሎተ፡ወይቤ፡አምላኩ፡ለቅዱስ፡አቢብ፡ሥረይ፡ሊተ፡ኵሎ፡ኃጢአትየ፡አነ፡አኀድግ፡ሎቱ፡ኵሎ፡ኀጢአቶ፡በእንተ፡ስምከ።
32ወበይእቲ፡ሰዓት፡አዕረፈ፡፩፡እም፡አኀው፡በጊዜ፡ይቤ፡አባ፡ዕብሎይ፡ዘንተ፡ቃለ፡ወእሙንቱ፡ይቀውሙ፡ወይገንዝዎ፡ናፈቀ፡አሐዱ፡እምአኃው፡መነኮሳት፡በእንተ፡ዘይቤ፡አባ፡ዕብሎይ፡ወእምዝ፡ተንሥአ፡ውእቱ፡ምውት፡ወአኀዘ፡ይትናገር፡ወይቤሎሙ፡ለምንት፡ትናፍቁ፡በእንተ፡ቃሉ፡ለአባ፡ዕብሎይ፡እስመ፡ተካየዶ፡እግዚአብሔር፡በዝንቱ፡ኪዳን፡ለአባ፡አቢብ።
33ወሶበ፡ይቤ፡ከመዝ፡ተመይጠ፡ወሰከበ፡ወአንከሩ፡አኀው፡ወሰብሕዎ፡ለእግዚአብሔር፡ወተፈሥሑ፡ፈድፋደ።
34ወሐይወ፡አባ፡ዕብሎይ፡ብዙኅ፡ዓመታተ፡ወኮና፡ሎቱ፡ብዙኃት፡አድባራት፡ወውሉድ፡ብዙኀን።
35ወበመዋዕሊሁ፡ሀሎ፡አባ፡መቃርስ፡ዘየዐቢ፡ወሶበ፡ሰምዐ፡ዜናሁ፡አባ፡መቃርስ፡ተፈሥሐ፡ቦቱ፡ፈድፋደ፡ወጸሐፈ፡ሎቱ፡መልእክተ፡እንዘ፡ይናዝዞ፡ኪያሁ፡ወውሉዶ፡መነኮሳተ፡ከመ፡ይፅንዑ፡ውስተ፡ገቢረ፡ሥምረቱ፡ለእግዚኣብሔር።
36ወእንዘ፡አባ፡መቃርስ፡ይጽሕፍ፡ዘንተ፡መልእክተ፡በገዳመ፡አስቄጥስ፡አእመረ፡አባ፡ዕብሎይ፡በመንፈስ፡ቅዱስ፡እንዘ፡ሀሎ፡በላዕላይ፡ግብፅ፡ወይቤሎሙ፡ለመነኮሳት፡እለ፡የዓውድዎ፡እስመ፡ናሁ፡አባ፡መቃርስ፡ጸሐፈ፡ለነ፡መልእክተ፡እንተ፡ምልእት፡ኑዛዜ።
37ወእምድኅረ፡ተናገረ፡ዘንተ፡በጽሐ፡፩፡መነኮስ፡ወምስሌሁ፡መልእክቱ፡ለአባ፡መቃርስ፡ወወፅኡ፡መነኮሳት፡ወተቀበልዎ፡በፍሥሐ፡ዓቢይ። ወአንበብዋ፡በቅድመ፡ኵሎሙ፡መነኮሳት፡ወተፈሥሑ፡ዓቢየ፡ፍሥሐ።
38ወዝንቱ፡ቅዱስ፡አባ፡ዕብሎይ፡ውእቱ፡ዘሖረ፡ኀበ፡አባ፡አሞንዮስ፡ወርእያ፡ለይእቲ፡ብእሲት፡ቅድስት፡እንተ፡ስማ፡የዋሂት፡ትነብር፡በኀቤሁ።
39ወሶበ፡ፈቀደ፡እግዚእነ፡ከመ፡ያዕርፎ፡እምፃማ፡ዝንቱ፡ዓለም፡ወሀቦ፡ኪዳነ።
40ወእምዝ፡አዕረፈ፡አመ፡፭፡ለወርኀ፡የካቲት፡ወንሕነሰ፡ጸሐፍነ፡ዜናሁ፡ለአባ፡ዕብሎይ፡ምስለ፡ዜና፡ዓርኩ፡አባ፡አቢብ፡አመ፡፳ወ፭፡ለጥቅምት። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
41ወበዛቲ፡ዕለት፡ኮነ፡ቅዳሴሃ፡ለቤተ፡ክርስቲያን፡ዘቅዱስ፡ዮልዮስ፡ሰማዕት፡ዘሀገረ፡አቅፋሐስ።
42እስመ፡ቅዱስ፡ዮልዮስ፡ኮነ፡ሰማዕተ፡በሀገረ፡ጥዋ፡በከመ፡ጽሑፍ፡በገድሉ፡ወውእቱኬ፡እምድኅረ፡ጥፍአቱ፡ለዲዮቅልጥያኖስ፡ከሐዲ፡ወሶበ፡ነግሠ፡ቈስጠንጢኖስ፡ጻድቅ፡ተጠምቀ፡ጥምቀተ፡ክርስትና፡ተለዓለ፡ቀርነ፡መንግሥት፡ዘክርስቲያን፡ወተሐንፃ፡አብያተ፡ክርስቲያናት፡በስሞሙ፡ለሰማዕታት፡ቅዱሳን፡እለ፡ቀተልዎሙ፡ነገሥት፡ከሐድያን።
43ወሶበ፡ሰምዐ፡ንጉሥ፡ቈስጠንጢኖስ፡ዜናሁ፡ለቅዱስ፡ዮልዮስ፡ወዘከመ፡አቀሞ፡ወዓቀቦ፡እግዚአብሔር፡ከመ፡የሐሊ፡ለሥጋሆሙ፡ለሰማዕታት፡ቅዱሳን፡ውእቱ፡ወአግብርቲሁ፡ወይፁር፡ሥጋሆሙ፡ወይግንዞሙ፡ወይጽሐፍ፡ገድሎሙ። ወእምድኅረዝ፡ሶበ፡ኮነ፡ሰማዕተ፡ወደሶ፡ቈስጠንጢኖስ፡ለዝንቱ፡ቅዱስ፡እስመ፡ገድሉ፡ሠናይ፡ውእቱ፡ፈነወ፡ንዋየ፡ብዙኀ፡ኀበ፡ብሔረ፡ግብፅ፡ወአዘዘ፡ከመ፡ይሕንፁ፡ቤተ፡ክርስቲያን፡ሠናይተ፡ወያፍልሱ፡ሥጋሁ፡ውስቴታ፡ወበሩ፡በከመ፡አዘዘ፡ንጉሥ፡ወቀደሳ፡ሊቀ፡ጳጳሳት፡አባ፡እለእስክንድሮስ፡ምስለ፡ኤጲስ፡ቆጶሳቲሁ።
44ውብረ፡በዓለ፡በከመ፡ዛቲ፡ዕለት፡ወኮነ፡እምሥጋሁ፡ተአምራት፡ወመንክራት፡ዐበይት። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለቅዳሴ፡ቤትከ፡በጉባኤ፡ሕዝብ፡ክቡድ፤ወለተአምሪከ፡ዓዲ፡ዘኍላቌሆን፡ፍድፉድ፤አመ፡ዓገትዎ፡ፀሩ፡አምሳለ፡ማእድ፤በከመ፡መጠቆ፡ለቈስጠንጢኖስ፡በእድ፤መንገለ፡ጥበብ፡ምጥቀኒ፡ዮልዮስ፡ለዓብድ።
45ወበዛቲ፡ዕለት፡ኮነ፡ተዝካሩ፡ለአባ፡አቤል፡ወደሊላ፡ድንግል። ጸሎቶሙ፡ወበረከቶሙ፡የሀሉ፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።