ግዕዝ
Home Formaciones Libros Biblioteca Ge'ez Contacto
Sinaxario · Tikimt

24 de Tikimt

አመ፡፳ወ፬፡ለጥቅምት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፬፡ለጥቅምት፡በዛቲ፡ዕለት፡አዕረፈ፡አባ፡አብላርዮስ፡መስተጋድል፡መነኮስ፡ባሕታዊ።
2ወዝንቱ፡ቅዱስ፡ኮነ፡እምሀገረ፡ጋዛ፡ወኮኑ፡አበዊሁ፡አረማውያነ፡ወመሀርዎ፡ኵሎ፡ትምህርተ፡ዮናናውያን፡ወጥበቦሙ፡ወተለዓለ፡ፈድፋደ፡በጥበቡ፡ላዕለ፡ብዙኃን፡አብያፂሁ፡ወኮነ፡ለጥበብ፡የኀድራ፡ውስተ፡ነፍሱ።
3ወፈነዎ፡አቡሁ፡ዳግመ፡ከመ፡ያጽንዕ፡ጥበበ፡ዘአፍአ፡ወዘኢኮነ፡ውስተ፡ሀገሩ፡ወይፈጽም፡ሎቱ። ኵሎ፡ዘይፈቅድ፡ወተንሥአ፡ወሖረ፡ኀበ፡ሀገረ፡እስክንድርያ፡ወቦአ፡ኀበ፡መካን፡ኀበ፡ይነብሩ፡ኵሎሙ፡መምህራን፡ወተምህረ፡እምኔሆሙ።
4ወእምዝ፡ተሀውከ፡ውስተ፡ልቡ፡ሁከት፡መንፈሳዊ፡ከመ፡ይትመሀር፡ትምህርተ፡ቤተ፡ክርስቲያን፡ወኀሠሠ፡መጻሕፍተ፡ቤተ፡ክርስቲያን፡ወረኪቦ፡ኪያሆሙ፡አንበቦሙ፡ወለበዎሙ፡ወኮነ፡አባ፡እለእስክንድሮስ፡ሊቀ፡ጳጳሳት፡ዘእስክንድርያ፡ይከሥት፡ወይተረጕም፡ሎቱ፡ዘኅቡእ፡ውስተ፡መጻሕፍት፡ወያለብዎ።
5ወእምዝ፡እምነ፡በእግዚእነ፡ኢየሱስ፡ክርስቶስ፡ወተጠምቀ፡ጥምቀተ፡ክርስትና፡በእደ፡እለእስክንድሮስ።
6ወእምድኅረዝ፡ተጋደለ፡ተጋድሎ፡ዓቢየ፡ወመንኰሰ፡ወተፀምደ፡ውስተ፡ፍኖተ፡ምንኵስና።
7ወእምዝ፡ሖረ፡ኀበ፡ቅዱስ፡አባ፡እንጦንዮስ፡ወነበረ፡ኀቤሁ፡ብዙኃ፡መዋዕለ፡እንዘ፡ይትሜሀር፡እምኔሁ፡ፍኖተ፡ጽድቅ።
8ወእምድኅረዝ፡ሰምዐ፡ከመ፡አበዊሁ፡ዘሥጋ፡ሞቱ፡ሖረ፡ኀበ፡ሀገሩ፡ወነሥአ፡ንዋየ፡ዘኀደጉ፡ሎቱ፡አበዊሁ፡ወወሀበ፡ለነዳያን፡ወለ፡ፅኑሳን።
9ወእምዝ፡ቦአ፡ውስተ፡ደብር፡እምአ፡ድባራተ፡ሀገረ፡ሶርያ፡ወተጋደለ፡ተጋድሎ፡ዐቢየ፡ወተፀምደ፡በጾም፡ወበጸሎት፡በሰጊድ፡ወበትጋህ።
10ወኮነ፡ይጸውም፡በበ፯፡መዓልት፡ወይሴሰይ፡ሣዕረ፡ገዳም።
11ወበርሀ፡ልቡ፡ወወሀቦ፡እግዚአብሔር፡ጸጋ፡ትንቢት። ወገብረ፡ተአምራተ፡ወመንክራተ።
12ወእምድኅረ፡ነበረ፡ብዙኀ፡መዋዕለ፡መንኮሰ፡ውስተ፡ውእቱ፡ደብረ፡ኤጲፋንዮስ፡ወመጠዎ፡አበ፡ምኔት፡ኤጲፋንዮስሃ፡ለዝንቱ፡አባ፡አብላርዮስ፡ወመሀሮ፡ትምህርተ፡ምንኵስና፡ወሕገ፡ቤተ፡ክርስቲያን። ወተነበየ፡ላዕሌሁ፡ከመ፡ውእቱ፡ይከውን፡ኤጲስ፡ቆጶሰ፡ወኮነ፡በከመ፡ትንቢቱ።
13ወኮነ፡ሎቱ፡መዋዕሊሁ፡ለዝንቱ፡አብ፡፹፡ዓመተ፡ወእምዝንቱ፡፲ቱ፡ዓመት፡በውስተ፡ቤተ፡አቡሁ፡ወ፯፡ዓመት፡ውስተ፡ሀገረ፡እስክንድርያ፡፷፫፡ዓመት፡በምንኵስና፡ወበገድል፡ወአሥመሮ፡ለእግዚአብሔር፡ወአዕረፈ፡በርስዕና፡ሠናይ፡ወወደሶ፡ቅዱስ፡ዮሐንስ፡አፈወርቅ፡ለዝንቱ፡አብ፡ወካዕበ፡ወደሶ፡ቅዱስ፡ባስልዮስ፡በመጻሕፍቲሁ። በረከቱ፡ተሀሉ፡ምስሌነ፡ለዓለመ፡ዓለም፡ኣሜን።
ሰላም፡ለአብላርዮስ፡ለከርሡ፡ዘሠርዐ።ማየ፡ባሕር፡ስቴ፡ወሣዕረ፡ገዳም፡መብልዐ።በዕለተ፡አዕረፈ፡ዮም፡እንዘ፡ይብል፡አኅድዓ።ኢትፍርሂ፡ነፍስየ፡እምነ፡ሥጋ፡ወጺአ።እስመ፡ተቀነይኩ፡ለክርስቶስ፡ዓመታተ፡ሰብዓ።
14ወበዛቲ፡ዕለት፡ኮነ፡ተዝካሩ፡ለለንጊኖስ፡ሰማዕት፡ወዘይና፡ወተዝካሮሙ፡ለአውስያ፡ወቈስጠንጢኖስ፡ወጸበለ፡ማርያም፡ተኀራሚት። ጸሎቶሙ፡ወበረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለጳውሎስ፡ወለለንጊኖስ፡ቢጹ።እምፍኖተ፡ስምዕ፡ዘኢገገጹ።ወለዘይና፡ሰማዕት፡ፈጻሚተ፡ገድል፡ዘበበገጹ።እምእለ፡መከሩ፡መከየድየ፡ያዕቅጹ።ለዓቂቦትየ፡እምሰማይ፡ይቅንጹ።ሰላም፡ለኪ፡ጸበለ፡ማርያም፡ተሐራሚት።እምወይነ፡መዓዛ፡ወእክለ፡ወራዙት።ተውላጠ፡ሕማምኪ፡ዘመጠነ፡ኀምሳ፡ዓመት።በገነተ፡ጽጌ፡ኀበ፡ተነጽፈ፡ዕረፍትከመ፡ንባእ፡አኃውኪ፡አስተብቊዒ፡እኅት።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።