Sinaxario · Tikimt
11 de Tikimt
አመ፡፲ወ፩፡ለጥቅምት1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፲ወ፩፡ለጥቅምት፡በዛቲ፡ዕለት፡አዕረፈ፡አብ፡ቅዱስ፡አባ፡ያዕቆብ፡ሊቀ፡ጳጳሳት፡ዘሀገረ፡አንጾኪያ።
2ወለዝንቱ፡አብ፡በጽሖ፡ምንዳቤ፡ወስደት፡ብዙኅ፡በእንተ፡ሃይማኖት፡ርትዕት፡ወነበረ፡ውስተ፡ስደት፡ብዙኀ፡መዋዕለ።
3ወእምዝ፡ተጋብኡ፡ሰብአ፡ሀገረ፡አንጾኪያ፡ወፈነዉ፡መልእክተ፡ወአብጽሕዎ፡ኀበ፡መንበረ፡ሢመቱ፡ወነበረ፡ኅዳጠ፡መዋዕለ።
4ወእምዝ፡ኣውፅእዎ፡ካዕበ፡ወሰደድዎ፡ሰብአ፡አርዮስ፡ወነበረ፡በስደት፡ዳግመ፡፯ተ፡ዓመተ፡ህየ፡ወአዕረፈ፡በሰላም። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለያዕቆብ፡ለአንጾኪያ፡ማኅቶታ፤ወሊቀ፡ጳጳሳት፡መጋቤ፡ሥርዓታ፤እምድኅረ፡በጽሖ፡ምንዳቤ፡ወስደት፡ዘበበፆታ፤ተውህበቶ፡ርስት፡ዘኢክህለ፡ዓይነ፡ንስር፡ርእዮታ፤ወዘኢኀለፈ፡አንበሳ፡ውስቴታ።
5ወበዛቲ፡ዕለት፡አዕረፈት፡ቅድስት፡ጲላግያ፡ወዛቲ፡ቅድስት፡ኮነት፡እምሀገረ፡ኣንጾኪያ፡ወኮኑ፡አበዊሃ፡ከሐድያን።
6ወይእቲ፡አጥረየት፡ምስለ፡ርኩስ፡ሃይማኖታ፡ዓስበ፡ደነስ፡እስመ፡ይእቲ፡ትነብር፡ውስተ፡ተውኔት፡እንዘ፡ትትዋነይ፡ወትዜሙ፡ወትሣለቅ፡ወትዘፍን።
7ወረከባ፡፩፡ብእሲ፡ኄር፡ዘስሙ፡ጳውሎስ፡ኤጲስቆጶስ፡ወገሠፃ፡ወአዘከራ፡እሳተ፡ገሃነም፡ወኵነኔ፡ዘለዓለም።
8ወቦአ፡ውስተ፡ልባ፡ተግሣፁ፡ወእምነት፡በእግዚእነ፡ኢየሱስ፡ክርስቶስ፡ሎቱ፡ስብሐት። ውእቱኒ፡መሀራ፡ወአጽንዓ፡ልባ።
9ወእምዝ፡አጥመቃ፡በስመ፡አብ፡ወወልድ፡ወመንፈስ፡ቅዱስ፡ወበርሃት፡በጸጋ፡ዘጥምቀት።
10ወእምዝ፡ቦአት፡ውስተ፡ንስሐ፡በልብ፡ጽኑዕ፡ወሕሊና፡ንጹሕ፡ወኣፃመወት፡ሥጋሃ፡ወአኅሠረቶ።
11ወለብሰት፡አልባሰ፡ዕደው፡ወሖረት፡ኢየሩሳሌም፡ወሰገደት፡ውስተ፡ኵሎን፡መካናት፡ቅዱሳት፡ወቦአት፡ኀበ፡አባ፡እለእስክንድሮስ፡ሊቀ፡ጳጳሳት፡ወፈነዋ፡ውእቱኒ፡ኀበ፡፩፡እምነ፡አድባራት፡ዘደናግል፡ዘሀገረ፡ኢየሩሳሌም፡ወነበረት፡በህየ፡ወለብሰት፡አልባሰ፡ምንኵስና፡ተፀምደት፡ወተጋደለት፡መጠነ፡፵፡ዓመት፡ወአሥሠረቶ፡ለእግዚአብሔር። ወአዕረፈት፡በሰላም፡በረከታ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለጲላግያ፡እንተ፡አፍቀረት፡ትዴግኖ፤ለጳውሎስ፡አብ፡ሶበ፡አጽምዓት፡ምዕዳኖ፤ኃየለት፡ፍጹመ፡ወአጥብዓት፡ለተኰንኖ፤ላሕመ፡ብርት፡ውዑይ፡እስከ፡ለላህያ፡አርሰኖ፤እንዘ፡ዓይነ፡ልባ፡ይሬኢ፡ለክርስቶስ፡ብርሃኖ።ተወክፎ፡እንግዳ፡አብደርከ፡ለዕጣን፡እምዕርገቱ፤ምንዳቤ፡ረኀብ፡ወጽምዕ፡ዘፈድፈደ፡ቦቱ፤ፍሬ፡ሚካኤል፡ይብሉከ፡ዝንቱ፤ከመ፡በእንተ፡ጽጉባነ፡ስብሐት፡ይኩኖ፡ለተዝካር፡እስከነ፡ሰማያት፡፯ቱ፤አንተኑ፡ቆርኔሌዎስ፡ዘዐርገ፡መሥዋዕቱ።
12ወበዛቲ፡ዕለት፡ኮነ፡ተጋድሎቱ፡ለሰማዕት፡አርማሚ። በረከቱ፡ትኩን፡ምስሌነ፡ለዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።