Sinaxario · Tikimt
12 de Tikimt
አመ፡፲ወ፪፡ለጥቅምት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፪፡ለጥቅምት፡በዛቲ፡ዕለት፡ተዝካረ፡በዓሉ፡ለመልአክ፡ክቡር፡ሚካኤል፡ሊቀ፡መላእክት፡እስመ፡በዛቲ፡ዕለት፡ፈነዎ፡እግዚአብሔር፡ኀበ፡ሳሙኤል፡ነቢይ፡ወአዘዞ፡ከመ፡ይሑር፡ኀበ፡ቤተ፡ዕሤይ፡አቡሁ፡ለዳዊት፡ዘቤተ፡ልሔም፡ከመ፡ይቅብዖ፡ለዳዊት፡ወልዱ፡ይንግሥ፡ላዕለ፡ደቂቀ፡እስራኤል፡እምድኅሬሁ፡ለሳኦል፡ወልደ፡ቂስ።
2ወሖረ፡ሳሙኤል፡ኀበ፡ዕሤይ፡ወይቤሎ፡አቅርብ፡ሊተ፡ኵሎ፡ውሉደከ፡ወአምጽኦሙ፡ሎቱ፡ለኵሎሙ፡ውሉዱ፡ዘእንበለ፡ዳዊት፡እስመ፡ውእቱ፡ኮነ፡የዓቅብ፡አባግዐ፡ውስተ፡ገራህቱ። ወሶበ፡አልዓለ፡ሳሙኤል፡ቀርነ፡ቅብዕ፡ዘነገሥት፡ላዕለ፡አርእስቲሆሙ፡ለውሉደ፡ዕሤይ፡ወኢሠምረ፡ቦሙ፡እግዚአብሔር።
3ወይቤሎ፡ሳሙኤል፡ለዕሤይ፡ኢተርፈኑ፡እምውሉድከ። ወይቤሎ፡ተርፈ፡ወሬዛ፡ዘይንእስ፡እምኔሆሙ፡እስመ፡ውእቱ፡የዓቅብ፡አባግዐ፡ወይቤሎ፡ሳሙኤል፡አምጽኦ፡ሊተ፡ወአቅረበ፡ሎቱ፡ዳዊትሃ፡ወሶቤሃ፡ነሥአ፡ቀርነ፡ቅብዕ፡ዘነገሥት፡ወቀብዖ፡ለዳዊት፡ወሠምረ፡ቦቱ፡እግዚአብሔር፡ወነግሠ፡ላዕለ፡ደቂቀ፡እስራኤል።
4ወበዛቲ፡ዕለት፡ካዕበ፡ፈነዎ፡እግዚአብሔር፡ለሚካኤል፡ሊቀ፡መላእክት፡ኀበ፡ዳዊት፡ነቢይ፡ወረድኦ፡ወወሀቦ፡ኀይለ፡እስከ፡ቀተሎ፡ለጎልያድ፡ረዓይታዊ፡ኢሎፍላዊ፡ወአድኃኖሙ፡ለደቂቀ፡፳ኤል።
5ወበእንተዝ፡አዘዙ፡መምህራነ፡ቤተ፡ክርስቲያን፡ወሠርዑ፡ከመ፡ንግበር፡ተዝካረ፡በዓሉ፡ለሚካኤል፡ሊቀ፡መላእክት፡አመ፡፲ወ፪፡ለለወርኁ። ትንብልናሁ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለከ፡ዘገነተ፡ሰማይ፡ፆፍ፤ምሕረተ፡ኀጥአን፡ዘትነቁ፡በዘኢያረምም፡አፍ፤ሚካኤል፡ክድነኒ፡ወሕቀፈኒ፡በክንፍ፤ኢይትከየድ፡በዕበድየ፡ግዕዘ፡ልስሐተ፡ፄው፡ግዱፍ፤ወኢይደቅ፡እምክብርየ፡ከመ፡ጽጌ፡ንጉፍ።
6ወበዛቲ፡ዕለት፡ኮነ፡ሰማዕተ፡ቅዱስ፡ማቴዎስ፡ወንጌላዊ፡ሐዋርያ፡ዘእም፲ወ፪ቱ፡ሐዋርያት።
7ወውእቱ፡ሰበከ፡ውስተ፡አህጉረ፡ካህናተ፡አጵሎን፡ወሜጠሙ፡ውስተ፡አእምሮ፡እግዚአብሔር።
8ውእቱኬ፡ሶበ፡ፈቀደ፡ይባእ፡ውስተ፡ሀገረ፡ካህናተ፡ጣዖት፡ወረከበ፡አሐደ፡ወሬዛ፡ወይቤሎ፡አንተሰ፡ኢትክል፡ከመ፡ትባእ፡ውስተ፡ዛቲ፡ሀገር፡ዘእንበለ፡ትላፂ፡ሥዕርተ፡ርእስከ፡ወጽሕመከ፡ወትነሥእ፡በእዴከ፡ሆሣዕና፡ወገብረ፡በከመ፡አዘዞ፡ውእቱ፡ወሬዛ።
9ወእንዘ፡ውእቱ፡ይሔሊ፡ወይቴክዝ፡በእንተ፡ዝንቱ፡ናሁ፡አስተርአዮ፡እግዚእነ፡ኢየሱስ፡ክርስቶስ፡ሎቱ፡ስብሐት። ወናዘዞ፡ወእምዝ፡ተሠወረ፡እምኔሁ።
10ወሶበ፡ቦአ፡ቅዱስ፡ማቴዎስ፡ውስተ፡ይእቲ፡ሀገር፡ወአስተርአየ፡ሎሙ፡በአምሳለ፡፩፡እምካህናቲሆሙ፡ወሖረ፡ኀበ፡ምኵራበ፡አጵሎን፡ወረከቦ፡ለሊቀ፡ካህናቲሆሙ፡ወተናገረ፡ምስሌሁ፡በእንተ፡አማልክት፡ወአጠየቆ፡ቅዱስ፡ማቴዎስ፡ከመ፡እሙንቱ፡ኢኮኑ፡አማልክተ፡ወገብረ፡በቅድሜሁ፡ተአምራተ፡ወመንክራተ፡ወሠረቀ፡ላዕሌሆሙ፡ብርሃን፡ወወረደ፡ኀቤሆሙ፡ማእድ፡እምሰማይ።
11ወሶበ፡ርእየ፡አርሚስ፡ሊቀ፡ካህናተ፡ጣዖት፡ዘንተ፡መንክረ፡ይቤሎ፡ለቅዱስ፡ማቴዎስ፡መኑ፡ስሙ፡ለአምላክከ። አውሥኦ፡ማቴዎስ፡ሐዋርያ፡ወይቤሎ፡ስሙሰ፡ለአምላኪየ፡ኢየሱስ፡ክርስቶስ፡ሎቱ፡ስብሐት። ወሶቤሃ፡አምነ፡በእግዚእነ፡ዝንቱ፡አርሚስ፡ካህነ፡ጣዖት፡ወብዙኃን፡ሕዝብ፡አምኑ፡ምስሌሁ።
12ወሶበ፡ሰምዐ፡ንጉሠ፡ሀገር፡ዘንተ፡ኣዘዘ፡ያውዕይዎሙ፡በእሳት፡ወውእተ፡ጊዜ፡ግብተ፡ሞተ፡ወልዱ፡ለንጉሥ፡ወሰአሎ፡ቅዱስ፡ማቴዎስ፡ለእግዚእነ፡ወአንሥኦ፡ለወልደ፡ንጉሥ፡እምነ፡ሞት።
13ወሶቤሃ፡አምነ፡ንጉሥ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወኵሎሙ፡ሰብአ፡ሀገር፡አምኑ፡ወሤመ፡ሎሙ፡ኤጲስ፡ቆጶሳተ፡ወካህናተ፡ወሐነፀ፡ሎሙ፡አብያተ፡ክርስቲያናት።
14ወእምዝ፡ወፅአ፡እምሀገር፡አፍአ፡ወመሀረ፡ወሜጦሙ፡ለብዙኃን፡ውስተ፡አእምሮ፡እግዚአብሔር።
15ወእምቅድመ፡ዝንቱ፡ሖረ፡ሀገረ፡ብፁዓን፡ወርእዮ፡ለእግዚእነ፡እንዘ፡ይመጽእ፡ኀቤሆሙ፡ኵሎ፡ጊዜ፡ወምስሌሁ። ነፍሳተ፡ሕፃናት፡ዘኍልቆሙ፡፲ወ፬፡እልፍ፡ወ፵፻፡ወኵሎ፡አሚረ፡ይመጽእ፡ለለበዓል፡ኀቤሆሙ፡እግዚእነ፡ክርስቶስ፡ወምስሌሁ፡መላእክቲሁ፡ወእሙንቱሰ፡ብፁዓውያን፡ዘሖረ፡ኀቤሆሙ፡ዘሲማስ፡ቀሲስ፡ገዳማዊ፡ዘኮነ፡ስምዐ፡በገድሎሙ፡ወበምግባሮሙ፡ዘመንክር።
16ወእምድኅረዝ፡ወፅአ፡ቅዱስ፡ማቴዎስ፡ሐዋርያ፡ኀበ፡ሀገረ፡ኢየሩሳሌም፡ወምድረ፡ይሁዳ፡ወጸሐፈ፡ወንጌለ፡በልሳነ፡ዕብራይስጥ።
17ወእምዝ፡ወፅአ፡እምሀገር፡አፍአ፡ወረከበ፡፩ደ፡ሙቁሐ፡እስመ፡ውእቱ፡ኮነ፡ይሔውዖሙ፡ለሙቁሐን፡ወቦቱ፡ዕዳ፡ዘይፈድዮ፡ለእግዚኡ፡ዘወሀቦ፡ከመ፡ይንግድ፡ቦቱ፡ወይርባነ፡ውእቱሰ፡ወገሮ፡ውስተ፡ባሕር፡ወአጥፍኦ።
18ወይቤሎ፡ቅዱስ፡ማቴዎስ፡ሐዋርያ፡ለውእቱ፡ሙቁሕ፡ሑር፡ኀበ፡መካነ፡እገሌ፡ወዘትረክብ፡ውስቴቱ፡ንሣእ፡ወሀቦ፡ለእግዚእከ፡ወሶበ፡ሖረ፡ውእቱ፡ብእሲ፡ወረከበ፡ጽፍነተ፡ዘምሉእ፡ወርቀ፡ወነሢኦ፡ወሀቦ፡ለእግዚኡ፡ወድኅነ፡ወተሰምዐ፡ዜናሁ፡ለቅዱስ፡ማቴዎስ፡ውስተ፡ይእቲ፡ሀገር፡ወብዙኃን፡እለ፡ኣምኑ፡በእግዚእነ፡ኢየሱስ፡ክርስቶስ፡ሎቱ፡ስብሐት።
19ወሶበ፡ሰምዐ፡ዮስጦስ፡መኰንነ፡ይእቲ፡ሀገር፡ከመ፡ብዙኃን፡ሰብእ፡አምኑ፡በእግዚእነ፡ተምዐ፡ጥቀ፡ወአዘዘ፡ከመ፡ይምትሩ፡ርእሶ፡በሰይፍ፡ለቅዱስ፡ማቴዎስ፡ወይውግሩ፡ሥጋሁ፡ለአዕዋፍ፡ወመተሩ፡ርእሶ፡በሰይፍ።
20ወመጽኡ፡ሰብእ፡መሃይምናን፡ወነሥኡ፡ሥጋሁ፡ወአንበርዎ፡ውስተ፡መካን፡ቅዱስ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለማቴዎስ፡በደመና፡ሰማይ፡ዘተመጥቀ፤ኅሩያነ፡ይርአይ፡ወብፁዓነ፡ደቂቀ፤ወያሰስል፡እምላዕለ፡ሰብእ፡ምንዳቤ፡ወጻዕቀ፤በሥልጣነ፡ቃሉ፡ኣዘዘ፡ማዕምቀ፤ከመ፡ያውፅእ፡ሎቱ፡ዘተሠጥመ፡ወርቀ።ሰላም፡ለጳውሎስ፡ተዋራሲ፡ሐዲስ፡ስሙ፤ለልሳነ፡ዕፍረት፡ጳውሎስ፡ዘቀዲሙ፤መጠነ፡ዓመታት፡፶፡እስከ፡ይትፌጸሙ፤አእጋሪሁ፡ከዋዋት፡አመ፡ለጸሎት፡ቆሙ፤እፎ፡እፎ፡እፎኑመ፡ኢደክሙ።
21ወበዛቲ፡ዕለት፡አዕረፈ፡አብ፡ቅዱስ፡ድንግል፡ወንጹሕ፡ወመስተጋድል፡ወመዋዔ፡ፍትወት፡ዘጠባይዓት፡አባ፡ድሜጥሮስ፡ሊቀ፡ጳጳሳት፡ዘሀገረ፡እስክንድርያ፡እምኍልቆሙ፡ለአበው፡ሊቃነ፡ጳጳሳት፡፲ወ፪ቱ።
22ወዝንቱሰ፡ሕዝባዊ፡ዘኢተምህረ፡ምንተኒ፡ወመስተገብር፡ውእቱ፡ወቦ፡ዓፀደ፡ወይን።
23ወአበዊሁኒ፡አስተዋሰብዎ፡ሎቱ፡ብእሲተ፡እምንእሱ፡ወነበረ፡ምስሌሃ፡፵ወ፰ተ፡ዓመታተ፡እንዘ፡ንጹሐን፡፪ሆሙ፡በድንግልና፡ወአልቦ፡ዘየአምር፡ዘእንበለ፡እግዚአብሔር፡ማእምረ፡ኅቡአት።
24ወሶበ፡ቀርበ፡ጊዜ፡ዕረፍቱ፡ለቅዱስ፡ዮልያኖስ፡ሊቀ፡ጳጳሳት፡ዘእምቅድሜሁ፡አስተርአዮ፡ሎቱ፡መልአከ፡እግዚአብሔር፡ወአጠየቆ፡ከመ፡እምድኅሬሁ፡ዘይከውን፡ሊቀ፡ጳጳሳት፡ቅዱስ፡ድሜጥሮስ፡ውእቱ፡ወወሀቦ፡ትእምርተ፡በእንቲአሁ፡እንዘ፡ይብል፡በሣኒታ፡ይመጽእ፡ብእሲ፡ኀቤከ፡ወምስሌሁ፡አስካለ፡ወይን፡እኂዞ፡ወጸሊ፡ላዕሌሁ፡ወሢሞ፡ሊቀ፡ጳጳሳት።
25ወሶበ፡ነቅሐ፡እምንዋሙ፡ነገሮሙ፡ለኤጲስ፡ቆጶሳት፡ወለካህናት፡እለ፡ነበሩ፡ምስሌሁ፡ዘርእየ፡ወዘከመ፡ይቤሎ፡መልአክ፡በእንተ፡ቅዱስ፡ድሜጥሮስ።
26ወሶበ፡ኮነ፡ጽባሐ፡ረከበ፡ዝንቱ፡ቅዱስ፡ድሜጥሮስ፡አስካለ፡ወይን፡ዘእንበለ፡ጊዜሁ፡ወነሥአ፡ዛተ፡አስካለ፡ወይን፡ወወሰዳ፡ኀበ፡ዮልዮስ፡ሊቀ፡ጳጳሳት፡ከመ፡ይትባረክ፡እምኔሁ። ወሶቤሃ፡አኀዞ፡ቅዱስ፡ዮልያኖስ፡በእዴሁ፡ወይቤሎሙ፡ለኤጲስ፡ቆጶሳት፡ወለኵሉ፡ሕዝብ፡ዝንቱ፡ውእቱ፡ሊቀ፡ጳጳሳቲክሙ፡ዘእምድኅሬየ፡ወእምዝ፡ጸለየ፡ላዕሌሁ፡አኀዝዎ፡ወአንበርዎ፡በህየ፡እስከ፡አመ፡አዕረፈ፡አባ፡ዮልያኖስ፡ሊቀ፡ጳጳሳት።
27ወእምድኅረ፡አዕረፈ፡ፈጸሙ፡ሎቱ፡ሥርዓተ፡ጸሎተ፡ሢመት፡ወሤምዎ፡ሊቀ፡ጳጳሳት፡ወተመልዐ፡እምጸጋ፡አምላካዊት፡ወተምህረ፡ኵሎ፡መጻሕፍተ፡ቤተ፡ክርስቲያን፡እስከ፡ኮነ፡ፍጹመ።
28ወውእቱ፡ሠርዐ፡ሐሳበ፡አበቅቴ።
29ወኮኑ፡ሕዝበ፡ክርስቲያን፡ይገብሩ፡ቀዳሚ፡በዓለ፡ጥምቀቱ፡ለመድኃኒነ፡ወበሣኒታሁ፡ይእኀዙ፡ጾመ፡፵፡ቅድስተ፡ወበጊዜ፡ሰሙነ፡ሕማማትሂ፡ይገብሩ፡በዓለ፡ሕማማቲሁ፡ወትንሣኤሁ፡ባሕቲቶ።
30ወከመዝ፡ይገብሩ፡እመዋዕለ፡ሐዋርያ፡እስከ፡መዋዕሊሁ፡ለዝንቱ፡አብ።
31ወሶበ፡ተሠይመ፡ቅዱስ፡አባ፡ድሜጥሮስ፡ነበበ፡ወአሰተዳለወ፡ሐሳበ፡አበቅቴ፡በመንፈስ፡ቅዱስ፡ዘአጽዋማት፡ወዘበዓላት፡ወፈነዋ፡ኀበ፡ኵሎሙ፡ሊቃነ፡ጳጳሳት፡ለለ፩፩፡ቦ፡እምኔሆሙ፡ለሀገረ፡ሮሜ፡ወለሀገረ፡ኤፌሶን፡ወለሀገረ፡አንጾኪያ፡ወለሀገረ፡ኢየሩሳሌም። ወተፈሥሑ፡ቦቱ፡ወተሠርዐ፡ዝንቱ፡ውስተ፡ኵሉ፡ምድር፡እስከ፡ዛቲ፡ዕለት።
32ወኮነ፡እግዚአብሔር፡ምስለ፡ዝንቱ፡አብ፡ጻድቅ፡ቅዱስ፡ድሜጥሮስ፡በእንተ፡ንጽሕናሁ፡ወኮነ፡ወትረ፡ይኔፅሮ፡ለእግዚእነ፡ኢየሱስ፡ክርስቶስ፡በጊዜ፡ቅዳሴ፡ቍርባን፡እንዘ፡ይሜጥዎሙ፡በእዴሁ፡ምሥጢራተ፡ቅድሳት፡ለእለ፡ይደልዎሙ። ወለእለሰ፡ኢይደልዎሙ፡ይከልኦሙ።
33ወበእንተዝ፡ኮነ፡ቅዱስ፡ድሜጥሮስ፡ይብሎሙ፡ለእለ፡ኢኮኑ፡ድልዋነ፡ለነሢአ፡ምሥጢረ፡ቅድሳት፡አንትሙሰ፡ሑሩ፡ወነስሑ፡ወእምድኅሬሁ፡ንዑ፡ትንሥኡ፡ምሥጢረ፡ቅድሳት፡ዳዕሙ፡ኢትንሥኡ፡እንዘ፡ሀሎክሙ፡በኃጢአትክሙ፡ከመ፡ኢትትሐጐሉ፡በውስተ፡ገሀነም።
34ወኮነ፡ቅዱስ፡ይከሥት፡ሎሙ፡ኃጣውኢሆሙ፡ለሕዝብ፡እለ፡ይገብሩ፡በኅቡዕ፡ወይጌሥፆሙ፡በእንተ፡ኀጢአት፡ዘገብሩ።
35ወበእንተዝ፡ፈርሁ፡መሃይምናን፡እምኔሁ፡ወኮኑ፡ዘይትዓቀቡ፡እምኃጢአት።
36ወቦ፡እምነ፡ሕዝብ፡ዘኮነ፡ይጌሥፆሙ፡በእንተ፡ኃጢአቶሙ፡ተበሃሉ፡በበይናቲሆሙ፡እንዘ፡ይብሉ፡ዝንቱ፡ብእሲ፡አውሰበ፡ወብእሲቱሂ፡ምስሌሁ፡እስከ፡ይእዜ፡እፎ፡ይጌሥፀነ፡ኪያነ። ወዝንቱኒ፡መንበረ፡ማርቆስ፡ወንጌላዊ፡ኢይሠየም፡ዲቤሁ፡ዘእንበለ፡ድንግል፡ዝንቱሰ፡እንዘ፡ቦ፡ብእሲት፡ተሠይመ፡ዲበ፡መንበረ፡ማርቆስ፡አቡነ።
37ወበአሐቲ፡ሌሊት፡መጽአ፡ኀቤሁ፡መልአከ፡እግዚአብሔር፡ወይቤሎ፡ኦ፡ድሜጥሮስ፡ኢትኅሥሥ፡አድኅኖተ፡ርእስከ፡ባሕቲቶ፡ወኢትኅድጎ፡ለቢጽከ፡ይትሐጐል፡ወተዘከር፡ዘይቤ፡እግዚእነ፡ክርስቶስ፡በወን፡ጌል፡ቅዱስ፡ከመ፡ኖላዊ፡ኄር፡ይሜጡ፡ነፍሶ፡በእንተ፡መርዔቱ።
38ወይቤሎ፡ድሜጥሮስ፡ለመልአክ፡ምንት፡ውእቱ፡ዘትቤለኒ፡ኦ፡እግዚእየ፡ወይቤሎ፡ክሥት፡ምሥጢረ፡ዘማእከሌከ፡ወማእከለ፡ብእሲትከ፡ለሕዝብከ፡ከመ፡ኢይትሐጐሉ፡ብከ።
39ወበሣኒታሁ፡ኮነ፡በዓለ፡፶፡ወቀደሰ፡ዝንቱ፡አብ፡ድሜጥሮስ፡ቅዳሴ፡ቍርባን፡ወአዘዞ፡ለሊቀ፡ዲያቆናት፡ከመ፡ይንግሮሙ፡ለካህናት፡ወለኵሎሙ፡ሕዝብ፡ከመ፡ኢይፃኡ፡እምቤተ፡ክርስቲያን፡አላ፡ይትጋብኡ፡አሐተኔ። ወገብረ፡ሊቀ፡ዲያቆናት፡በከመ፡አዘዞ፡ሊቀ፡ጳጳሳት።
40ወሶበ፡ተጋብኡ፡አዘዘ፡ያስተጋብኡ፡ዕፀወ፡ብዙኀ፡ወያንድዱ፡እሳተ፡ወገብሩ፡በከመ፡ቃሉ። ወተንሥአ፡ሶቤሃ፡ወቆመ፡ማእከለ፡እሳት፡ዘይነድድ፡ወኵሎሙ፡እንዘ፡ይኔፅርዎ፡ወጸለየ፡ጸሎተ፡ነዋኀ፡ወሰፍሐ፡ኩፋሮ፡ወነሥአ፡በእዴሁ፡እምእሳት፡እምነ፡ፍሕም፡ወረሰዮ፡ውስተ፡ኩፋሩ።
41ወጸውዓ፡ለብእሲቱ፡ድንግልት፡ወበጺሓ፡ኀቤሁ፡ወይቤላ፡ስፍሒ፡ዓጽፈኪ፡ዘፀምር፡ወወደየ፡ላቲ፡ፍሕመ፡ውስተ፡ዓጽፋ። ወይቤላ፡ንዒ፡ከመ፡ንጸሊ፡ወኮነ፡እሳት፡ይነድድ፡ውስተ፡ዓጽፋ፡ወኢያውዓያ፡ወጐንደዩ፡እንዘ፡ይጼልዩ፡ውስተ፡እሳት፡ነዋኀ፡ሰዓተ።
42ወእምድኅረዝ፡ሰአልዎ፡ካህናት፡ወሕዝብ፡ወይቤልዎ፡ነኀሥሥ፡እምነ፡ቅድስናከ፡ኦ፡አቡነ፡ከመ፡ታጠይቀነ፡ዘንተ፡ዐቢየ፡ምሥጢረ።
43ወይቤሎሙ፡ኢገበርኩ፡ዘንተ፡እንዘ፡አኀሥሥ፡ክብረ፡ብጡለ፡እምሰብእ፡አላ፡ገበርኩ፡ዘንተ፡ከመ፡ትድኃኑ፡አንትሙ፡ወአነ፡ነበርኩ፡ምስለ፡ዛቲ፡ብእሲትየ፡ወ፰ተ፡ዓመተ፡እስከ፡ዛቲ፡ዕለት፡ዘትሬእይዎ፡አንትሙ። ወይእቲ፡ወለተ፡እኅወ፡አቡየ፡ወሞቱ፡ሰብአ፡ዚአሃ፡አመ፡ነኣስ፡ይእቲ፡ወተሐፅነት፡ምስሌየ፡ውስተ፡ቤተ፡አቡየ፡ወሶበ፡ኮና፡፲ወ፭፡ዓመተ፡አስተዋሰበኒ፡ኣቡየ፡ኪያሃ።
44ወሶበ፡ቦእነ፡ውስተ፡ጽርሐ፡ማኅደርነ፡ዘቤተ፡መርዓ፡ትቤለኒ፡እፎ፡አስተዋሰቡኒ፡ለከ፡እንዘ፡አነ፡እኅትከ፡ወእቤላ፡ትፈቅዲኑ፡ከመ፡ንንበር፡ውስተ፡፩፡ቤት፡ወኢንትፋለጥ፡ግሙራ። ወእንዘ፡ነዓቅብ፡ድንግልናነ፡በንጽሕ፡ወኢያእምር፡መኑሂ፡ምሥጢረ፡ዘማእከሌነ፡ወትቤለኒ፡እወ።
45ወነበርነ፡ኅቡረ፡ውስተ፡፩፡መካን፡፵ወ፰ተ፡ዓመተ፡ወእንዘ፡ንሰክብ፡ውስተ፡፩፡ዓራት፡ወዲበ፡፩፡መንጸፍ፡ወእንዘ፡ንትከደን፡፩ደ፡ክዳነ፡ወእግዚአብሔር፡አምላክ፡ዘየአምር፡ኅቡአተ፡ውእቱ፡ባሕቲቱ፡የአምር፡ኅቡአቲነ።
46ወመጠነ፡ዝንቱ፡መዋዕል፡እንዘ፡ንነብር፡ኅቡረ፡ኢየአምር፡አንሰ፡ከመ፡ይእቲ፡ብእሲት። ወይእቲኒ፡ኢተአምር፡ከመ፡አነ፡ብእሲ።
47ወሶበ፡ንትነሣእ፡እምስካብነ፡ንሬኢ፡ዘከመ፡አምሳለ፡ገጸ፡ንሥር፡ዘይሰክብ፡ውስተ፡ምስካቢነ፡ማእከሌነ፡ወይሬሲ፡ክንፎ፡ዘየማን፡ላዕሌየ። ወጸጋማየ፡ክንፎ፡ላዕሌሃ፡እምጊዜ፡ንሰክብ፡እስከ፡ንትነሣእ፡በጽባሕ። ወእምዝ፡ይትኀባእ፡ወከመዝ፡ይገብር፡ለለኵሉ፡ዕለት።
48ወኢተሐልዩኬ፡ዘገበርኩ፡ዘንተ፡ኀሢሥየ፡ውዳሴ፡ዘይፈቅድዎ፡ሰብእ፡ውስተ፡ዝንቱ፡ዓለም። አላ፡ውእቱ፡እግዚአብሔር፡አዘዘኒ፡ከመ፡እክሥት፡ለክሙ፡ዘንተ፡ምሥጢረ፡ከመ፡ትድኀኑ፡አንትሙ፡እምስሕተት፡ውእቱ፡ኢይፈቅድ፡እስመ፡መኑሂ፡ይትሐጐል።
49ወበመዋዕሊሁ፡ለዝንቱ፡አብ፡አስተርአዩ፡ዓላውያን፡ሰብእ፡እለ፡ስሞሙ፡ቀሌምስ፡ወአጋኖስ፡ወአርያኖስ፡ወካልአን፡ምስሌሆሙ፡ወጸሐፉ፡መጽሐፈ፡ሐሰት፡ወአውዝዞሙ፡ዝንቱ፡አብ፡ወረገሞሙ።
50ወኮነ፡ይሜህሮሙ፡ለሕዝብ፡ወያጸንዖሙ፡ወይምዕዶሙ፡ዘእንበለ፡ዕርዓት፡ኵሎ፡አሚረ።
51ወሶበሂ፡ልኅቀ፡ወደክመ፡እምርስዕናሁ፡ይፀውርዎ፡በዓራት፡ወያነብርዎ፡ውስተ፡ቤተ፡ክርስቲያን፡ወይሜህሮሙ፡እምጽባሕ፡እስከ፡ምሴት፡ወኵሎሙ፡ሰብእ፡ይጸዓቁ፡ከመ፡ይስምዑ፡ትምህርቶ።
52ወኮነ፡ኵሉ፡መዋዕሊሁ፡፻ወ፶፡ወአዕረፈ፡በሰላም። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለድሜጥሮስ፡ሐጋጌ፡አጽዋም፡እምነ፡ስቴ፤ወሠራዔ፡መብልዕ፡በጰንጠቈስቴ፤ሶበ፡ኢኮነ፡ለሊሁ፡በመንፈስ፡ቅዱስ፡ከሣቴ፤እፎ፡እምኢተከሥተ፡ወእምኢተረክበ፡በአይቴ፤ሐሳበ፡አዝማን፡ዘስሙ፡አበቅቴ።
53ወበዛቲ፡ዕለት፡ተዝካሮሙ፡ለጻድቃን፡ጴጥሮስ፡ወደዎኖስ፡ያዕቆብ፡ወአቡጥፋ፡ወቴዎድሮስ፡ወአሚኖስ። ጸሎቶሙ፡ወበረከቶሙ፡የሀሉ፡ምስሌነ፡ለዓለመ፡ዓለም፡አሜን።
54ወበዛቲ፡ዕለት፡ኮነ፡ተዝካሩ፡ለአብ፡ክቡር፡አባ፡ያዕቆብ፡አበምኔት፡ዘደብረ፡ሊባኖስ፡ወውእቱ፡እምኍልቆሙ፡ለአበው፡መምህራን፡፲ወ፪ቱ።
55ወዝንቱ፡አብ፡ኮነ፡ራትዐ፡ወጠቢበ፡እምንእሱ፡ወፍጹም፡በአእምሮ፡ወበትዕግሥት፡ወንጽሕ፡ወተጋደለ፡ገድለ፡ሠናየ፡ወአሥመሮ፡ለእግዚአብሔር፡ወአዕረፈ፡በዛቲ፡ዕለት። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።