ግዕዝ
Home Formaciones Libros Biblioteca Ge'ez Contacto
Sinaxario · Tikimt

10 de Tikimt

አመ፡፲፡ለጥቅምት
1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፲፡ለጥቅምት፡በዛቲ፡ዕለት፡አዕረፈ፡ድንግል፡ወንጹሕ፡አባ፡አውማንዮስ፡ሊቀ፡ጳጳሳት፡ዘእስክንድርያ፡ወውእቱ፡ሳብዕ፡እማርቆስ፡ወንጌላዊ፡ወሐዋርያ።
2ለዝንቱ፡አብ፡ሤሞ፡አብርምዮስ፡አብ፡ዲያቆነ፡ወነበረ፡በሢመተ፡ዲቁና፡፲፡ዓመተ።
3ወሶበ፡ተሠይመ፡ዮስጦስ፡ሊቀ፡ጳጳሳት፡ርእየ፡ትሩፋቲሁ፡ወሃይማኖቶ፡ርትዕት፡ወአእምሮቶ፡ሤሞ፡ቀሲሰ፡ወአዘዞ፡ከመ፡ይምሀሮሙ፡ለመሃይምናነ፡ቤተ፡ክርስቲያን፡ዘእስክንድርያ፡ሥርዓተ፡ቤተ፡ክርስቲያን።
4ወሶበ፡አዕረፈ፡ቅዱስ፡ዮስጦስ፡ተሠይመ፡ዝንቱ፡አብ፡ሊቀ፡ጳጳሳት፡ወመጠወ፡ግብረ፡አብያተ፡ክርስቲያናት፡ወትምህርተ፡መሃይምናን፡ለአብ፡ወርክያኖስ።
5ወኮነ፡ወትረ፡ይትዋሥኦሙ፡ለዓላውያን፡ወይመውፆሙ፡ወይመይጦሙ፡ለኃጥአን፡እምስሕተቶሙ፡ወይከሥትሎሙ፡መለኮቶ፡ለእግዚእነ፡ኢየሱስ፡ክርስቶስ፡ወያጤይቆሙ፡ከመ፡ውእቱ፡ዕሩይ፡ምስለ፡፩፡መለኮት፡ወ፩፡አብ፡ወመንፈስ፡ቅዱስ፡ህላዌ።
6ወነበረ፡በሢመቱ፡፲ወ፫፡ዓመተ፡ወአዕረፈ፡እመ፡፲፡ለወርኀ፡ጥቅምት፡በ፯፡ዓመተ፡መንግሥቱ፡ለአንስጣስዮስ፡ንጉሥ። ወበመዋዕሊሁ፡ኮነት፡ስምዐ፡ቅድስት፡ሶፍያ፡ወ፫፡ደቂቃ፡በዛቲ፡ዕለት። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለአውማንዮስ፡ለሠናይት፡ዘሐረያ፣ወለግብረ፡እከይ፡ዘተኀየያ፤እስከ፡ደለዎ፡ይሠየም፡በመንበረ፡ማርቆስ፡እስክንድርያ፤በመዋዕሊሁ፡ለዝንቱ፡ሐዋርያ፤አዋልዲሃ፡ለስምዕ፡መጠወት፡ሶፍያ።ወበዛቲ፡ዕለት፡ኮነ፡ሰማዕተ፡ቅዱስ፡ሠርጊስ፡ቢጹ፡ለቅዱስ፡ባኮስ፡ወዝንቱ፡ቅዱስ፡ኮነ፡እምዕርጋትያ፡ዘእምጽርሐ፡ንጉሥ፡መክስምያኖስ።
7ወእምድኅረ፡ኰነኖሙ፡ንጉሥ፡ለቅዱሳን፡ሰርጊስ፡ወባኮስ፡ፈነዎሙ፡ኀበ፡አንጥያኮስ፡መኰንነ፡ሶርያ፡ወውእቱ፡መኰንን፡ለቅዱስ፡ባኮስ፡ኰነኖ፡ወቀፎ፡መቅሠፍተ፡ዐቢየ፡እስከ፡መጠወ፡ነፍሶ። ወአዘዘ፡ከመ፡ይውግሩ፡ሥጋሁ፡ውስተ፡ባሕረ፡ኤፍራጥስ፡ወእግዚእነሰ፡ሠወሮ፡ወአብጽሖ፡ውስተ፡ባሕር፡ኀበ፡ሐይቅ።
8ወአዘዘ፡እግዚእነ፡አንበሳ፡ወተኵላ፡ወአዕቀቦሙ፡ሥጋሁ፡ለቅዱስ፡ወእምዝ፡አዘዞሙ፡ለቅዱሳን፡እለ፡ሀለዉ፡በቅሩበ፡ውእቱ፡ሐይቅ፡ወመጽኡ፡ወነሥኡ፡ሥጋሁ፡ለቅዱስ፡ባኮስ፡ወአንበርዎ፡ኀቤሆሙ።
9ወቅዱስሰ፡ሰርጊስ፡የኀዝን፡ወይበኪ፡በእንተ፡እኍሁ፡ባኮስ፡ወእምዝ፡ርእየ፡ራእየ፡በሌሊት፡ከመ፡እኍሁ፡ባኮስ፡ውስተ፡ጽርሕ፡ሠናይ፡እንዘ፡ያበርህ፡ፈድፋደ፡ወተናዘዘት፡ቦቱ፡ነፍሱ፡በእንተ፡ዝንቱ፡ራእይ።
10ወእምዝ፡አዘዘ፡መኰንን፡ከመ፡ይቅንውዎ፡ሥጋሁ፡በቅንዋተ፡ሐፂን፡ነዊኀት፡ውስተ፡እገሪሁ፡ለቅዱስ፡ሰርጊስ፡ወፈነውዎ፡ኀበ፡ሀገረ፡ሩፃፋ፡ምስለ፡ሰብአ፡አፍራስ፡እንዘ፡ያረውፅዎ፡ወደሙ፡ይውኅዝ፡ዲበ፡ምድር።
11ወረከበ፡በፍኖት፡ወለተ፡ድንግለ፡ወሰትየ፡እምኔሃ፡ማየ፡ወይእቲሰ፡ተሣሃለት፡ላዕሌሁ፡ወመሐከት፡ውርዙቶ፡ወሠናይ፡አርአያሁ፡ውእቱኒ፡ይቤላ፡ንዒ፡ትልውኒ፡ኀበ፡ሀገረ፡ሩፃፋ፡ከመ፡ትንሥኢ፡ሥጋየ፡ወተለወቶ፡ይእቲ፡ድንግል፡እስከ፡ሀገረ፡ሩፃፋ።
12ወጸሐፈ፡መኰንን፡እንዘ፡ይብል፡እመ፡ኢሰምዐ፡ሰርጊስ፡ትእዛዝየ፡ወኢሦዐ፡ለአማልክት፡ይምትሩ፡ርእሶ፡በሰይፍ፡ወውእቱ፡መኰንን፡ዓርኩ፡ውእቱ፡ለቅዱስ፡ሰርጊስ፡ቀዳሚ፡እስመ፡በእንቲአሁ፡ነሥኣ፡ለይእቲ፡ሢመት።
13ወሶበ፡መተርዎ፡ቀርበት፡ይእቲ፡ወለት፡ድንግል፡ኀበ፡ቅዱስ፡ወምስሌሃ፡ሠቀ፡ፀምር፡ወነሥአት፡ውስቴቱ፡ደሞ፡ለቅዱስ፡ዘውኅዘ፡እምክሣዱ፡ወሥጋሁሰ፡ዓቀቡ፡መሃይምናን፡እስከ፡ተፍጻሜተ፡መዋዕለ፡ስደት፡ወሐነፁ፡ቤተ፡ክርስቲያን፡ሠናይተ፡በሀገረ፡ሩፃፋ። ወቀደስዋ፡፲ወ፭ቱ፡ኤጲስ፡ቆጶሳት፡ወአንበሩ፡ሥጋሁ፡ቅዱስ፡ውስቴታ።
14ወኮኑ፡እምኔሃ፡ተአምራት፡ወመንክራት፡ዐበይት፡ወሀለወት፡ይእቲ፡ቤተ፡ክርስቲያን፡እስከ፡ይእዜ፡ወሥጋሁኒ፡ለቅዱስ፡ሰርግዮስ፡ሀሎ፡ውስቴታ፡እንዘ፡ይውኅዝ፡እምኔሁ፡ቅብዐ፡ዕፍረት፡ዘምዑዝ፡ፄናሁ፡ፈድፋደ፡ውስተ፡ሣፁን፡ዘመርመር፡ወኮነ፡ፈውሰ፡ለኵሎሙ፡ድውያን። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለሠርጊስ፡እንተ፡ላዕሌሁ፡ኀለፋ፤መዋግደ፡ሥቃይ፡ኵሉ፡በምድረ፡ፎራት፡ወቅፅረ፡ሩፃፋ፤መጥባሕተ፡ሐራዊ፡በሊሕ፡አመ፡ለርእሱ፡ሰየፋ፤ከመ፡ተመነየ፡ወተሰፈወ፡ተስፋ፤እግዚአብሔር፡ለነፍሱ፡ተወከፋ።
15ወበዛቲ፡ዕለት፡ዕረፍቱ፡ለዮሐንስ፡ቀሲስ፡መስተጋድል፡ወእምብዝኃ፡ጽድቁ፡ሶበ፡ይትላፀይ፡ርእሶ፡ኢያርሕስ፡በማይ፡እስመ፡ውእቱ፡አቡሁ፡ለአባ፡ገብረ፡ናዝራዊ፡ዘቀወት፡በረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለዮሐንስ፡እንተ፡አፃመወ፡ነፍሶ፤እምፍትወተ፡ዓለም፡ዘበተግኀም፤ዝንቱ፡ጻድቅ፡አክሊለ፡ምዝጋና፡ኀሢሦ፤ምንተኒ፡በማይ፡እንበለ፡ያርሕስ፡ይበሶ፤በአፈ፡መላፂ፡ይትላፀይ፡ወይትቀረፅ፡ርእሶ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።