ግዕዝ
Home Formaciones Libros Biblioteca Ge'ez Contacto
Sinaxario · Sene

3 de Sene

አመ፡፫፡ለሰኔ
1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፫፡ለሰኔ፡በዛቲ፡ዕለት፡አዕረፈት፡ቅድስት፡ወመስተጋድልት፡ተሐራሚት፡ወንጽሕት፡ማርታ። ወዛቲ፡ቅድስት፡ኮነት፡እምውሉደ፡ሀገረ፡ምስር፡ወኮኑ፡አበዊሃ፡ብዑላነ፡ፈድፋደ።
2ወይእቲ፡ኮነት፡ዘታፈቅር፡ፈድፋደ፡ዝሙተ፡ወርኵሰተ፡እምንእሳ፡ወይመጽኡ፡ውሉደ፡ልኂቃነ፡ሀገር፡ኀቤሃ፡በኅቡእ፡ወይዜምዉ፡ምስሌሃ።
3ወሶበ፡ተከሥተ፡ግብራ፡አግሀደት፡ዝሙታ፡ፈድፋደ።
4ወሶበ፡ኮነ፡በዓለ፡ልደት፡ቅዱስ፡ዘእግዚእነ፡ኢየሱስ፡ሎቱ፡ስብሐት። ሖረት፡ኀበ፡ቤተ፡ክርስቲያን፡ወፈቀደት፡ትባእ፡ወከልኣ፡ዓቃቤ፡ቤተ፡ክርስቲያን፡ወይቤላ፡አንቲሰ፡ኢይደልወኪ፡ትባኢ፡ውስተ፡ቤተ፡እግዚአብሔር፡እስመ፡አንቲ፡ርኵስት። ወአገበረቶ፡ብዙኀ፡ከመ፡ትባእ። ውእቱሰ፡ከልኣ፡ወበእንተዝ፡ኮነ፡ጽልእ፡ማእከሎሙ።
5ወሶበ፡ሰምዐ፡ኤጲስቆጶስ፡ክላሐ፡ተንሥኣ፡ወበጽሐ፡ኀበ፡ኆኅተ፡ቤተ፡ክርስቲያን፡ከመ፡ይርአይ፡ዘኮነ።
6ወሶበ፡ርእያ፡ኤጲስቆጶስ፡ለማርታ፡ይቤላ፡አኮኑ፡አንቲ፡ተአምሪ፡እስመ፡ቤቱሰ፡ለእግዚአብሔር፡ንጹሕ፡ወቅዱስ፡ወአንቲ፡ርኵስት፡ወኢይደልወኪ፡ትባኢ። ወትቤሎ፡እንዘ፡ትበኪ፡ኢይትመየጥ፡እምዝ፡ዳግመ፡ኀበ፡ዝንቱ፡ግብር፡ርኩስ፡ለእመ፡አንተ፡ተወከፍከኒ፡ወእኔስሕ፡ወእከውን፡መነኮሳይተ።
7ወይቤላ፡ኤጲስቆጶስ፡ኢየአምነኪ፡ለእመ፡ኢያምጻእኪ፡ብዕለኪ፡ወኵሎ፡ሠርጎኪ፡ወጥሪተኪ፡ከመ፡ናውዕዮ፡በእሳት፡በቅድሜኪ።
8ወሖረት፡ፍጡነ፡ውስተ፡ቤታ፡ወአምጽአት፡ኵሎ፡ጥሪታ፡ወሠርጓቲሃ፡ዘብዙኅ፡ሤጦሙ። ወአብጽሐቶ፡ኀበ፡ኤጲስቆጶስ፡ውእቱኒ፡አዘዘ፡ከመ፡ያውዕዩ፡በቅድሜሃ፡ኵሎ፡ጥሪታ፡ወኣውዓይዎሙ፡በቅድሜሃ።
9ወእምዝ፡ላጸያ፡ሥዕርተ፡ርእሳ፡ወአውፅአ፡አልባሲሃ፡እምላዕሌሃ፡ወአልበሳ፡ልብሰ፡ፀጕር። ወአመንኰሳ፡ወፈነዋ፡ኀበ፡ደብረ፡ደናግል፡ወተጋደለት፡ተጋድሎ፡ዓቢየ፡ውስተ፡ውእቱ፡ደብር።
10ወኮነት፡ወትረ፡ትጌሥፅ፡ነፍሳ፡ወትብል፡ለእመ፡ኢኃደጉኪ፡ትባኢ፡ውስተ፡ዝንቱ፡መካን፡ዘሕኑዕ፡በአእባን፡ወዕፀው፡ወበፅቡር፡እፎኑ፡ትከውኒ፡በኀበ፡ማኅደር፡ዘብርሃን፡ምንተ፡ዘእገብር፡ወመኑ፡ውእቱ፡ዘይትወሐሰኒ፡በህየ። ወመኑ፡ውእቱ፡ዘይተነብል፡በእንቲአየ።
11ወኮነት፡ዘትብል፡ኦ፡እግዚኦ፡እግዚእየ፡ለእመ፡ኢተክህለኒ፡ከመ፡እፁር፡ኀፍረተ፡እምዓቃቤ፡ቤተ፡ክርስቲያን፡ወአንሰ፡እስእለከ፡እግዚእየ፡ከመ፡ኢታስተኀፍረኒ፡በቅድመ፡መላእክቲከ፡ወቅዱሳኒከ።
12ወነበረት፡ዛቲ፡ቅድስት፡እንዘ፡ትትጋደል፡፳ወ፭፡ዓመተ፡እስከ፡ሞዓቶ፡ለሰይጣን፡ወኢወፅአት፡እምአንቀጸ፡ደብር። በመጠነ፡ዝንቱ፡ኵሉ፡መዋዕል፡እስከ፡አዕረፈት። ጸሎታ፡ወበረከታ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለማርታ፡ጥዕምተ፡ዝክር፡ወዜና፣ዘተዓፅፈት፡ሠቀ፡አልባሰ፡ወርቅ፡መኒና፣አመ፡ገሠፃ፡ኢትባእ፡ውስተ፡ቤተ፡መቅደስ፡በኢንጽሕና፣እስከ፡ሞዓቶ፡ለእኩይ፡ሕሊና፣ዓቃቤ፡ኆኅት፡ምክንያተ፡ኮና።
13ወበዛቲ፡ዕለት፡ኮነ፡ሰማዕተ፡ኢላርዮን፡ኤጲስቆጶስ። እስመ፡ዝንቱ፡ቅዱስ፡ገፆ፡ለዮላንኪዮስ፡ንጉሥ፡ከሐዲ፡በእንተ፡አምልኮቱ፡ጣዖተ።
14አውሥአ፡ዮላንኪኖስ፡ከሐዲ። ወይቤሎ፡አንተሰ፡ትሰምየኒ፡ከሐዴ፡ሶበ፡ኢያምለክዎ፡ለዘተሰቅለ፡በእደ፡አይሁድ። ወናሁ፡አነ፡እሬስየከ፡እምብዝኀ፡ኵነኔ፡ወምንዳቤ፡ድግ፡አምልኮቶ፡ለዘተሰቅለ።
15ወዘንተ፡ብሂሎ፡መጠዎ፡ለ፩፡እመኳንንቲሁ፡ወአዘዞ፡ከመ፡ይኰንኖ፡ኵነኔ፡ዓቢየ፡ኵሎ፡አሚረ፡ዘእንበለ፡ፅርዓት፡ወኢይምሐኮ፡ምንተኒ።
16ወነሥኦ፡ውእቱ፡መኰንን፡ወአኀዘ፡ይኰንኖ፡በዘዘዚአሁ፡ኵነኔ። ወነበረ፡እንዘ፡ይኴንኖ፡መጠነ፡አሐቲ፡ዓመት፡ፍጽምት፡ወኢያፅርዓ፡እምላዕሌሁ፡ኵነኔ፡አሐተ፡ዕለተ፡ግሙራ።
17ወእምዝ፡ወዢዎ፡ውስተ፡እሳት፡ወቆመ፡ውስቴታ፡እንዘ፡ይሴብሖ፡ለእግዚአብሔር፡ወይቄድሶ፡ወበእንተ፡ዛቲ፡ትእምርት፡አምኑ፡ብዙኀን፡ሰብእ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወኮኑ፡ሰማዕተ።
18ወእምድኅረዝ፡አውፅእዎ፡እምውስተ፡እሳት፡ከመ፡ዘይወፅእ፡እምውስተ፡ገነት። ወሶበ፡ደክመ፡መኰንን፡እምኵነኔሁ፡ወኀጥአ፡ከመ፡ምንተ፡ዘይገብር፡ቦቱ፡አዘዘ፡ከመ፡ይምትሩ፡ርእሶ፡በሰይፍ፡ወነሥአ፡አክሊለ፡ስምዕ፡በመንግሥተ፡ሰማያት። በረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለኢላርዮን፡ዘተዓገሠ፡ሥቃያተ፣መጠነ፡፩፡ዓመት፡ዘአልቦ፡ሕፀተ፣እንዘ፡ኢይፈርህ፡ምንተ፡ዘያንበለብል፡እሳተ፣ማእከለ፡እቶን፡ቀዊሞ፡ጸለየ፡ጸሎተ፣እስከ፡ብዙኀን፡አምኑ፡ወኮኑ፡ሰማዕተ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።