Sinaxario · Sene
4 de Sene
አመ፡፬፡ለሰኔ1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፬፡ለሰኔ፡በዛቲ፡ዕለት፡ኮነ፡ሰማዕተ፡ቅዱስ፡ሳኑሲ፡ዘእምሀገረ፡በል፡ኪም።
2ወዝንቱ፡ቅዱስ፡እንዘ፡ወሬዛ፡ውእቱ፡የዓቅብ፡አባግዓ፡አቡሁ። ወኮነ፡ዘይሁብ፡ሲሳዮ፡ለወራዙት፡ኖሎት፡አብያፂሁ፡ኵሎ፡አሚረ። ወውእቱ፡ይጸውም፡እስከ፡ምሴት። ወይሔ፡ውፆሙ፡ለድውያን፡ወለሙቁሐን።
3ወበአሐቲ፡ዕለት፡አስተርአዮ፡ሌሊተ፡መልአከ፡እግዚአብሔር። ወይቤሎ፡ኦ፡ሳኑሲ፡ተንሥእ፡ወሑር፡ኀበ፡መኰንን፡ወተአመን፡በስሙ፡ለአምላክከ፡ከመ፡ትንሣእ፡አክሊለ፡ስምዕ።
4ወሶበ፡ነቅሐ፡አይድዓ፡ለእሙ፡ዘከመ፡አስተርአዮ፡መልአከ፡እግዚአብሔር፡ኃዘነት፡ወበከየት፡ወኢተክህላ፡ከመ፡ተአኀዞ።
5ወእምዝ፡ሰምዐ፡በእንተ፡ብእሲት፡ቅድስት፡በውስተ፡ሀገረ፡ሳብራ፡እንተ፡ስማ፡ማርታ፡ወይእቲ፡ዘኮነት፡ትትዌከፎሙ፡ለፈላስያን፡ለነዳያን፡ወለምስኪናን፡ወትገብር፡ሎሙ፡ምሕረተ፡ብዙኀ፡ወሖረ፡ኀቤሃ፡ወተሠነዓወ፡ምስሌሃ፡ከመ፡ይንሥኡ፡አክሊለ፡ስምዕ።
6ወሖሩ፡ኀቡረ፡ኀበ፡መኰንን፡ዘስሙ፡አርሳኖስ፡ወረከብዎ፡በውስተ፡ሐመር፡ኀበ፡ሐይቀ፡ባሕር፡ዘምስር፡ወጸርሑ፡ቅድሜሁ፡እንዘ፡ይብሉ፡ንሕነ፡ክርስቲያን፡ገሀደ። ወአዘዘ፡ይኰንንዎሙ፡በዘዘዚአሁ፡ኵነኔ፡ወቅድስት፡ማርታ፡መጠወት፡ነፍሳ፡እንዘ፡ሀለወት፡ውስተ፡ኵነኔ፡ወነሥአት፡አክሊለ፡ስምዕ።
7ወቅዱስሰ፡ሳኑሲ፡ኮነ፡ይትዔገሥ፡በኃይለ፡እግዚእነ፡ኢየሱስ፡ክርስቶስ፡ዘኀዱር፡ላዕሌሁ።
8ወሶበ፡ደክመ፡መኰንን፡እምኵነኔሁ፡ፈነዎ፡ምስለ፡ሰማዕታት፡ብዙኀን፡ሙቁሐን፡ኀበ፡መኰንነ፡እንዴናው። ወውእቱኒ፡ኰነና፡ኵነኔ፡ዓቢየ፡ወአዘዘ፡ከመ፡ይስቍሩ፡ሰኰናሁ፡ወያብኡ፡ሐብለ፡ወይስሐብዎ፡ውስተ፡ሀገር። ወገብሩ፡ቦቱ፡በከመ፡አዘዞሙ፡መኰንን፡ወኢበጽሖ፡ምንተኒ፡እሙስና።
9ወእምድኅረዝ፡አምጽኡ፡መሠርየ፡እምድረ፡አክሚም፡ወሠረየ፡ሎቱ፡በውስተ፡ጽዋዕ፡ዘምሉእ፡ኀምዘ። ወወሀቦ፡ይስተይ፡ወዓተቦ፡በትእምርተ፡መስቀል፡ወሰትዮ፡ወኢበጽሖ፡ምንተኒ፡እሙስና። ወርእዮ፡መሠርይ፡ዘንተ፡መንክረ፡አምነ፡በእግዚእነ፡ወኮነ፡ሰማዕተ፡ወነሥአ፡አክሊለ፡ስምዕ።
10ወሶበ፡ደክመ፡መኰንን፡እምኰን፡ኖቱ፡አዘዘ፡ከመ፡ይምትሩ፡ርእሶ፡በሰይፍ፡ወነሥአ፡አክሊለ፡ስምዕ፡ዘኢይማስን። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለሳኑሲ፡ምቱረ፡አብራክ፡ወእድ፣ወኀርው፡ሰኰናሁ፡አምሳለ፡ጕንድ፣ወለማርታ፡ሰላም፡መፍቀሪተ፡ነግድ፣ዘኰነንዋ፡ምስሌሁ፡ወሣቀይዋ፡በዓውድ፣ምስለ፡መሠርይ፡ኅቡረ፡ዘአምነ፡በወልድ።
11ወበዛቲ፡ዕለት፡ስምዐ፡ኮነ፡ዮሐንስ፡ዘእምሀገረ፡ሐራቅሊ። ወለዝንቱ፡ቅዱስ፡ኮነ፡ስመ፡አቡሁ፡ዘካርያስ፡መኰንነ፡ሀገረ፡አንጦ፡ፒሳን፡ወአብልያ፡ወስመ፡እሙ፡ኤልሳቤጥ።
12ወእሙንቱ፡ሶበ፡ተጸገዉ፡ዘንተ፡ወልደ፡አመ፡፭፡ለዝንቱ፡ወርኅ፡ሰመይዎ፡ስሞ፡ዮሐንስሃ፡እስመ፡እሉ፡ኮኑ፡ኀቡራነ፡ስም፡ምስለ፡ኣቡሁ፡ወእሙ፡ለዮሐንስ፡መጥምቅ።
13ወእምዝ፡አልኀቅዎ፡በተግሣፅ፡ወበፈሪሃ፡እግዚአብሔር፡ወመሀርዎ፡መጻሕፍተ፡ቤተ፡ክርስቲያን፡ወሐሳባተ፡ወኵሎ፡ጥበበ።
14ወነበረት፡እሙ፡እንዘ፡ታመኃፅኖ፡በመጠነ፡ኵሉ፡መዋዕሊሃ፡ከመ፡ኢይድሐፅ፡እምፍኖተ፡እግዚአብሔር፡ወአቡሁኒ፡ይጌሥፆ፡ከመዝ።
15ወእምድኅረዝ፡አዕረፈ፡አቡሁ፡ወኀደጎ፡እንዘ፡ወልደ፡፳፡ዓመት። ወውእቱ፡ኮነ፡መስፍነ፡ህየንተ፡አቡሁ። ወነበሩ፡እንዘ፡ይትኤዘዙ፡ሎቱ፡ኵሉ፡በሐውርተ፡ጳንጦስ፡ወሐረቅሊ፡ወካልኣት፡ኣህጉር።
16ወእንዘ፡ከመዝ፡ሀሎ፡በአሐቲ፡ሌሊት፡አስተርአዮ፡ሰይጣን፡በአምሳለ፡መልአክ፡ወይቤሎ፡ከመዝ፡ይቤለከ፡እግዚእ፡እግዚአብሔር፡ሑር፡ሀገረ፡አንጾኪያ፡ወአውስብ፡ወለተ፡ንጉሥ፡ኑማርዮስ፡ከመ፡ትንግሥ፡ወሐለየ፡ቅዱስ፡ወይቤ፡ቦኑ፡ዝንቱ፡መልአክ፡አው፡ሰይጣን፡ወባሕቱ፡እምከመ፡ሰማዕኩ፡ስመ፡እግዚአብሔር፡እምአፉሁ፡አሐውር፡ሀገረ፡አንጾኪያ።
17ወእምዝ፡ሖረ፡ወተራከቦ፡ለዲዮቅልጥያኖስ። ወዲዮቅልጥያኖስሰ፡ኣፍቀሮ፡ፈድፋደ፡ወአክበሮ፡አመ፡ዕለተ፡ርእዮ።
18ወበሣኒታ፡እንዘ፡ሀሎ፡ምስሌሁ፡ውስተ፡ምሳሕ፡ኣዘዘ፡ያምጽእዎ፡ለአጵሎን፡ቅድሜሁ፡ወሶበ፡አምጽእዎ፡ርእዮ፡ቅዱስ፡ዮሐንስ፡አስተሐቀሮ፡ወጸዓሎ፡ወረገሞ፡ለውእቱ፡ጣዖት። ወለንጉሥኒ፡ወሰሚዖ፡ንጉሥ፡ተምዐ፡ዓቢየ፡መዓተ፡ወአሰሮ፡ውስተ፡ቤተ፡ሞቅሕ።
19ወእንዘ፡ሀሎ፡ውስተ፡ቤተ፡ሞቅሕ፡አስተርአዮ፡እግዚእነ፡ኢየሱስ፡ሎቱ፡ስብሐት። ነቢሮ፡ዲበ፡ሠረገላ፡ብርሃን፡ወምስሌሁ፡መላእክት፡ቅዱሳን፡ወሰዓሞ፡ወአወፈዮ፡ብዙኀ፡ኪዳናተ።
20ወአመ፡ሣኒታ፡ፈነወ፡ዲዮቅልጥያኖስ፡ወአውፅኦ፡እምቤተ፡ሞቅሕ፡ወይቤሎ፡ነዐ፡ስግድ፡ለአጵሎን፡ወለአርዳሚስ። ወቅዱስሰ፡ኣበዮ፡ወይቤ፡እፎ፡እስግድ፡ለግቡራን፡በእድ፧ ወንጉሥኒ፡ተናገሮ፡በብዙኅ፡ኂጣነ፡ነገር፡እንዘ፡ይፈቅድ፡ተዓርቆ፡ምስሌሁ።
21ወእምዝ፡ፈነዎ፡ብሔረ፡ግብፅ፡ያስተዋፅእ፡ሎቱ፡ጸባሕተ፡ወጸሐፈ፡በእንቲአሁ፡ኀበ፡ሠርያቆስ፡መኰንን፡እንዘ፡ይብል፡ወሀብክዎአ፡ሥልጣንአ፡ለዮሐንስ፡ዘሐራቅሊ፡ላዕለ፡ኵሉ፡ጸባሕት፡እምኢየሩሳሌም፡እስከ፡ኢትዮጵያ፡ወአብያተ፡አማልክትሂ፡ያንህል፡ወይሕንፅ፡በሠናይ። ወቅዱስሰ፡ነሢኦ፡ዘንተ፡ምክንያተ፡አንሀለ፡ኵሎ፡አብያተ፡ጣዖታት፡ወረሰዮሙ፡ምዝቡራነ።
22ወእምድኅረ፡ዝንቱ፡መዋዕል፡ነበረ፡ሰርያቆስ፡መኰንን፡ውስተ፡ዓውደ፡ምኵናን፡ከመ፡የአዝዝ፡መቲረ፡አርእስቲሆሙ፡ለሰማዕት።
23ወሶቤሃ፡መጽኡ፡ሰብእ፡እምስዒድ፡እለ፡ይብልዎሙ፡ዲዮስቆሮስ፡ወቢፋሞን፡ወአኅራጋኖስ፡ወኪሮን፡ወዮልዮስ፡ወእለስክንድሮስ፡ወዮሴፍ፡ወይስሐቅ፡ወእስጢፋኖስ፡እሉ፡ኵሎሙ፡ከልሑ፡እንዘ፡ይብሉ፡ክርስቲያን፡ንሕነ፡ገሀደ። አሜሃ፡ተምዐ፡መኰንን፡ወኰነኖሙ፡እንበለ፡ምሒክ።
24ወሶበ፡ርእየ፡ቅዱስ፡ዮሐንስ፡ዘንተ፡ኀደገ፡ምስፍናሁ፡ወጸርሐ፡እንዘ፡ይብል፡አነሂ፡ክርስቲያናዊ፡ገሀደ። ወተምዐ፡መኰንን፡ወአዘዘ፡ይእስርዎ፡በመዋቅሕተ፡ሐፂን፡ወፈነዎ፡ኀበ፡ሀገረ፡እንፅና፡ኀበ፡አርያኖስ። ወውእቱኒ፡ሐተቶ፡በእንተ፡ኵሉ፡ዘኮነ፡ወነገሮ፡ኵሎ፡ዘገብረ፡ወተምዐ፡እምሰሚዓ፡ቃሉ፡ወአዘዘ፡ይስቅልዎ፡ዲበ፡ኀንባዝ፡ወየዓፅርዎ፡በመንኰራኵር።
25ወእምዝ፡አዘዘ፡ያውርድዎ፡እምዲበ፡ኅንባዝ፡ወይቅሥፍዎ፡በአስዋጥ፡ከርሦ፡ወርእሶ፡እስከ፡ተመስወ፡ሥጋሁ፡ወተመልአት፡ምድር፡እምደሙ፡ወወደይዎ፡ውስተ፡ቤተ፡ሞቅሕ።
26ወእምድኅረ፡ኅዳጥ፡መዋዕል፡አዘዘ፡ከመ፡ይጥብሑ፡አነዳሁ፡በመጥባሕት፡ወይመ፡ዝምዝዎ፡በሠቀ፡ፀጕር፡ቍስላቲሁ። ወዓዲ፡ነፀፉ፡ሎቱ፡ታሕተ፡ገበዋቲሁ፡ሐመደ፡ወአፍ፡ሐመ፡እሳት።
27ወካዕበ፡አዘዘ፡ያምጽኡ፡ቅንዋተ፡እለ፡ርሱናት፡በእሳት፡ወይቀንውዎ፡ውስተ፡ገጹ፡ወዕዘኒሁ፡ወገብሩ፡ቦቱ፡ከመዝ፡ወወደይዎ፡ውስተ፡ቤተ፡ሞቅሕ።
28ወእምዝ፡በይእቲ፡ሌሊት፡አስተርአዮ፡መልአከ፡እግዚአብሔር። ወአጽንዖ፡ወወሀቦ፡ሰላመ።
29ወበሣኒታ፡አውፅእዎ፡እምቤተ፡ሞቅሕ፡ወኰነንዎ፡በአብትረ፡ሐፂን፡ርሱናት፡ወአሰርዎ፡እደዊሁ፡ወእገሪሁ፡በአሕባል፡ወሰቀልዎ፡በዘነበ፡ፈረስ፡ወገጹ፡ግዱፍ፡ውስተ፡ምድር። ወመጽአ፡ሰያፊ፡ወመተረ፡እደዊሁ፡ወእገሪሁ፡ወርእሶሂ፡መተረ፡ዳግመ፡ወከመዝ፡ፈጸመ፡ገድሎ፡ሠናየ፡ወለ፪ቱ፡ዕደውሂ፡እለ፡ነበሩ፡ምስሌሁ፡መተርዎሙ። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለዮሐንስ፡ምክሐ፡ሐራቅሊ፡ወአድያሙ፣ፈዋሴ፡ድውያን፡በዓፅሙ፣ወለእለ፡ምስሌሁ፡ሰላም፡ዘተጋደሉ፡ቀዲሙ፣ወሰላም፡ለዘድኅሬሁ፡ዘተክዕወ፡ደሙ፣ለእኅወ፡እሙ፡ቢፋሞን፡ስሙ።
30ወበዛቲ፡ዕለት፡ኮኑ፡ስምዐ፡አቅሮንዮስ፡ወዲሙናስያ፡እኅቱ፡አሞኒ፡ወሚናስ፡ግብፃውያን፡ወሐራ፡ዘንጉሥ፡ዲዮቅልጥያኖስ።
31ወለእሉ፡ቅዱሳን፡ሶበ፡ወደሙ፡ንጉሥ፡ውስተ፡ግበ፡አናብስት፡ምስለ፡አባ፡ብሶይ፡ወመጽአ፡ገብርኤል፡ሊቀ፡መላእክት፡ወአውፅኦሙ፡እምግበበ፡አናብስት።
32ወበጺሖሙ፡ኀበ፡ንጉሥ፡ረገምዎ፡ወይቤልዎ፡ለምንት፡ትትሀከይ፡እምዕለት፡ዕለተ፡ወኢትጽሕፍ፡ፍጻሜ፡ስምዕነ። ወሰሚዖ፡ንጉሥ፡ተምዐ፡ወአዘዘ፡ይምትሩ፡አርእስቲሆሙ፡በሰይፍ፡ወያውዕዩ፡ሥጋሆሙ። ወከመዝ፡ፈጸሙ፡ስምዖሙ፡ወነሥኡ፡አክሊለ፡ስምዕ፡በመንግሥተ፡ሰማያት። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለአቆሮንዮስ፡ወለዲሙናስያ፡እኅቱ፣አሞኒ፡ወሚናስ፡ለእግዚአብሔር፡ሰማዕቱ፤አመ፡ወደዮሙ፡ንጉሥ፡ውስተ፡ግበ፡እሳት፡ለኃምስቱ፣ያድኅኖሙ፡መጽአ፡እምሰማይ፡መድኃኒተ፡ደቂቅ፡ሠለስቱ፤መልእክ፡ፍሥሐ፡ገብርኤል፡ዘፍጡን፡ረድኤቱ።
33ወበዛቲ፡ዕለት፡ካዕበ፡ኮነት፡ስምዐ፡ቅድስት፡ወመስተጋድልት፡ፈድፋደ፡ሶፍያ፡ወእኁሃ፡አሞንዮስ፡በመዋዕሊሁ፡ለዲዮቅልጥያኖስ፡ከሐዲ።
34እስመ፡ለዛቲ፡ቅድስት፡ኮኑ፡አበዊሃ፡ክርስቲያነ፡ወሶበ፡ወለድዋ፡ሐፀንዋ፡ሠናየ፡ሕፅነተ፡በፈሪሃ፡እግዚአብሔር፡ወመሀርዋ፡መጻሕፍተ፡ቤተ፡ክርስቲያን፡ወኵሎ፡ሥርዓተ፡ሐዋርያት፡አበዊነ።
35ወእምዝ፡ሶበ፡ልኅቀት፡ፈቀዱ፡ያስተዋስብዋ፡ለ፩፡ብእሲ፡እመኳንንተ፡ሀገር።
36ወአእሚራ፡ቅድስት፡ሶፍያ፡ተንሥአት፡እምኀበ፡ትነብር፡ወሜጠት፡ገጻ፡መንገለ፡ምሥራቅ፡ወሰገደት፡ምእተ፡ስግደተ፡ቆመት፡ወጸለየት፡ጸሎተ፡ነዊኅ፡ወትቤ፡እግዚእየ፡ኢየሱስ፡ክርስቶስ፡ወልደ፡እግዚአብሔር፡ዘስብሐቲከ፡ብዙኅ፡ወመንክር፡ምርሐኒ፡ለዓመትከ፡ኀበ፡እበጽሕ፡ኀቤከ፡ወኢትኅድገኒ፡እዒል፡ውስተ፡ፍኖት፡ጠዋይ፡እንተ፡ትወስድ፡ውስተ፡ሐጕል፡ወኢትኅድጎ፡ለልብየ፡የሐሊ፡ፍኖተ፡ዓለም፡ማሳኒ፡ወኵሎ፡ፍትወተ፡ርኩሰ፡እንተ፡ይመክሩ፡ብየ፡አበውየ።
37ወኢትኅድገኒ፡እግዚእየ፡ለአመትከ፡እኩን፡አመተ፡ኃጢአት፡ወኢትኅድገኒ፡እፁር፡ወእሰከም፡ፆረ፡ፍትወተ፡ዓለም፡ክቡደ፡አላ፡ረስየኒ፡እድንን፡ወእሰከም፡አርዑተ፡ትእዛዝከ፡ቀሊለ።
38ወእምድኅረ፡ፈጸመት፡ጸሎታ፡ነበረት፡ዲበ፡ዓራታ፡ወጐንድያ፡ሕቀ፡መጽኣ፡ሕሊና፡ዘይብል፡እትነሣእ፡ወእፃእ፡በኅቡእ፡ወእሑር፡ፍኖተ፡ርኁቀ፡ወእባእ፡ውስተ፡ውሣጤ፡ገዳም፡ወእፀመድ፡ለልዑል፡በህየ።
39ወእምዝ፡ጸውዓታ፡ለአመታ፡ዘወሀብዋ፡አበዊሃ፡ከመ፡ትትለአካ። ወአዘዘታ፡ታምጽእ፡ወይነ፡ወታስትያ፡ወሶበ፡አምጽአት፡ላቲ፡ወጥዒማ፡ንስቲተ፡አዘታ፡ለቍልዔሃ፡ከመ፡ትስተይ፡እስከ፡የኀልቅ፡ዘአምጽአቶ፡ወይን፡ወሰትየት፡ወሰክረት፡ወሶቤሃ፡ትቤላ፡አምጽኢ፡ልብሰኪ፡ወንሥኢ፡ልብሰ፡ዚአየ፡ወወሀበታ፡ወካዕበ፡ኣዘዘታ፡ከመ፡ትኑም፡እስመ፡አንበዘ፡ልባ፡እምነ፡ስካር።
40ወሶበ፡ከብዳ፡ንዋም፡ለአመታ፡ወፅአት፡በኅቡእ፡ወአልቦ፡ዘርእያ፡እስመ፡ርኁቅ፡ማኅደራ፡እምአበዊሃ።
41ወሶበ፡ሖረት፡ርኁቀ፡በጽሐት፡ኀበ፡ኣሐቲ፡ፍኖት፡ወረከበት፡ሰብአ፡እለ፡ይጐይዩ፡እምነ፡ዲዮቅልጥያኖስ፡ከሐዲ፡በእንተ፡ሃይማኖት፡ወይትኀብኡ፡ይፈቅዱ፡ውስተ፡አድባር፡ወበዓታት፡ተሰአለቶሙ፡ወትቤሎሙ፡እምአይቴ፡አንትሙ፧ ወነገርዋ፡ለለሀገሮሙ፡ወትቤሎሙ፡አይቴ፡ተሐውሩ፧ ወአይድዕዋ፡ኵሎ፡ዘኮነ፡እምኀበ፡ዲዮቅልጥያኖስ፡በእንተ፡ሃይማኖት፡ርትዕት። ወትቤሎሙ፡ቦኑ፡ታበጽሐኒ፡ዛቲ፡ፍኖት፡ኀቤሁ፧ ወይቤልዋ፡እወ።
42ወሐዊራ፡ንስቲተ፡ቆመት፡ወጸለየት፡ጸሎተ፡ነዋኀ፡ወእምዝ፡ሖረት፡ወበጽሐት፡ኀበ፡ዲዮቅልጥያኖስ፡ወተአመነት፡በእግዚአነ፡ክርስቶስ፡ሎቱ፡ስብሐት። ወሰሚዖ፡ንጉሥ፡ስመ፡ክርስቶስ፡ዘሎቱ፡ስብሐት። ተምዐ፡ጥቀ፡ወአዘዘ፡ያቅርብዋ፡ቅድሜሁ፡ወይቤላ፡ስግዲ፡ለአጵሎን፡ወትቤሎ፡እፎ፡እሰግድ፡ለግብረ፡እደ፡ሰብእ፡ለጣዖት፡ርኩስ። ወሰሚዖ፡ተምዐ፡ወአዘዘ፡ይቅሥፍዋ፡በአስዋጠ፡ሐፂን፡ወአዘዘ፡ካዕበ፡ይደዩ፡ውስተ፡ክሣዳ፡እብነ፡ክቡደ፡ወይስሐብዋ፡ላዕለ፡ኆፃ፡እስከ፡ይትነተፍ፡ሥጋሃ። ወእምዝ፡ወደይዋ፡ውስተ፡ቤተ፡ሞቅሕ።
43ወበሣኒታ፡አዘዘ፡ያምጽእዋ። ወይቤላ፡ሡዒ፡ለአጵሎን፡ከመ፡ኢትሙቲ፡እኩየ፡ሞተ፡አውሥአቶ፡እኩይሰ፡ሞት፡ለከ። ሊተሰ፡ሞትየ፡ሕይወት፡ውእቱ፡በኀበ፡አምላኪየ፡ወይቤላ፡እምድኅረ፡አሞትኩኪ፡ተሐይዊኑ፧ ወትቤሎ፡ኦ፡ዓብድ፡ኀድግሰ፡ሊተ፡ለከኒ፡ትንሣኤ፡ጽኑሕ፡ወባሕቱ፡ትንሣኤከ፡ዘለደይን፡ምስለ፡አማልክቲከ፡ርኩሳን።
44ወሶበ፡ሰምዐ፡ዘንተ፡ቃለ፡እምኔሃ፡ተምዐ፡ፈድፋደ፡ወአዘዘ፡ይዝብጥዋ፡በአብትረ፡ሐፂን፡እስከ፡ይሰበሩ፡አዕፅምቲሃ፡ወገብሩ፡ባቲ፡ከመዝ። ወአዘዘ፡ካዕበ፡ያስክብዋ፡ላዕለ፡ዓራተ፡ሐፂን፡ወያንድዱ፡እሳተ፡መትሕቴሃ፡ወሶበ፡መስየ፡ብሔር፡አዘዘ፡ያብእዋ፡ውስተ፡ቤተ፡ሞቅሕ፡ወበይእቲ፡ሌሊት፡መጽአ፡ኀቤሃ፡መልአከ፡እግዚአብሔር፡ጐሣ፡ወፈወሳ።
45ወበሣኒታ፡አዘዘ፡ንጉሥ፡ያምጽእዋ፡ውስተ፡ዓውድ። ወመጽአት፡እንዘ፡ተሐውር፡በእገሪሃ፡ወይእቲ፡ትመስል፡ከመ፡ዘወፅአት፡እምቤተ፡ምሕጻብ፡ወተቀብዓት፡ወሶበ፡ርእያ፡ዲዮቅልጥያኖስ፡ይቤ፡ርእዩ፡ጽንዐ፡ሥራያ፡ለዛቲ፡ብእሲት፡ክርስቲያናዊት፡ትማልም፡አሕመምናሃ፡በእሳት፡ወዮምኬ፡ጥዕየት። ወትቤሎ፡ቅድስት፡ሶፍያ፡ሥራየሰ፡ኢየአምር፡እስመ፡አምላኪየ፡ፈታሔ፡ሥራያት።
46ወሶቤሃ፡ኄጣ፡ንጉሥ፡ከመ፡ኦሆ፡ትበሎ። ወሶበ፡አበየቶ፡አዘዘ፡ይምትሩ፡ርእሳ፡በሰይፍ፡ወእንዘ፡ይወስድዋ፡ይምትርዋ፡አስተርአያ፡ላቲ፡እግዚእነ፡ኢየሱስ፡ክርስቶስ፡ወተካየዳ፡ኪዳናተ፡ብዙኃተ፡ወይቤላ፡“ኵሉ፡ዘይገብር፡ተዝካረኪ፡ወይሁብ፡ምጽዋተ፡በስምኪ፡ወይጽሕፍ፡መጽሐፈ፡ገድልኪ፡አነ፡እትዌከፎ፡ውስተ፡መንግሥትየ።”
47ወእምድኅረዝ፡መተሩ፡ርእሳ፡በሰይፍ፡ወነሥአት፡አክሊለ፡ስምዕ፡በመንግሥተ፡ሰማያት። በረከታ፡የሀሉ፡ምስሌነ፡ለዓለመ፡ዓለም፡አሜን።
አምኃ፡ለአሞን፡እንዘ፡አቄርብ፡ሰላመ፣ወለሶፍያ፡ምስሌከ፡ዘተሣተፈት፡ሕማመ፤በእንተ፡ኢየሱስ፡ክርስቶስ፡ሥመሩ፡ፍጹመ፣ከዊነክሙ፡ትሕፅኑ፡ኪያየ፡ደክታመ፤ለሊከ፡አበ፡ወይእቲ፡እመ።
48ወበዛቲ፡ዕለት፡ኮኑ፡ስምዐ፡አባ፡አሞን፡ወአዝኀስ። እግዚአብሔር፡ይምሐረነ፡በጸሎቶሙ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።