ግዕዝ
Home Formaciones Libros Biblioteca Ge'ez Contacto
Sinaxario · Sene

2 de Sene

አመ፡፪፡ለሰኔ
1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፪፡ለሰኔ፡በዛቲ፡ዕለት፡አስ፡ተርእዮተ፡ሥጋሆሙ፡ለዮሐንስ፡መጥምቅ፡ወኤልሳዕ፡ነቢይ፡በሀገረ፡እስክንድርያ። በመዋዕለ፡ኡልያኖስ፡ከሐዲ። ሶበ፡ፈቀደ፡ይሕንፅ፡ምኵራቦሙ፡ለአይሁድ፡እምድኅረ፡አንሀልዎ፡አስባስያኖስ፡ንጉሠ፡ሮም፡ወወልዱ፡ጥጦስ።
2እስመ፡ኡልያኖስ፡ፈቀደ፡በእከየ፡ልቡ፡ወበትዕቢቱ፡ከመ፡ይሥዓር፡ቃለ፡እግዚእነ፡ክርስቶስ። ዘይቤ፡በወንጌል፡ቅዱስ፡ኢይትኀደግ፡ዝየ፡እብን፡ዲበ፡እብን፡ዘኢይትነሠት።
3ወሶበ፡አዘዘ፡ሐኒፆቶ፡ሠለስተ፡ጊዜ፡ተነሥተ፡ቦቱ። ወይቤልዎ፡አይሁድ፡እስመ፡ሀለዉ፡ውስቴቱ፡አብድንቲሆሙ፡ለክርስቲያን፡ልኂቃን። ለእመ፡ኢያውፃእኮሙ፡እምዝየ፡ወእመ፡አኮ፡ኢይትከሀል፡ሐኒፀ።
4ወሰሚዖ፡ኡልያኖስ፡ንጉሥ፡አዘዘ፡ያውፅኡ፡አብድንቲሆሙ፡ለቅዱሳን፡እምውእቱ፡መካን፡ወያውዕይዎሙ፡በእሳት።
5ወሶበ፡አውፅእዎሙ፡ረከብዎሙ፡ለቅዱሳን፡ዮሐንስ፡መጥምቅ፡ወኤልሳዕ፡ነቢይ። ወመጽኡ፡መሃይምናን፡ወወሀቡ፡ለሐራ፡ንዋየ፡ብዙኀ። ወነሥኡ፡ሥጋሆሙ፡ለቅዱሳን፡እም፡ድኅረ፡አምሐልዎሙ፡ለሐራ፡ከመ፡ኢያትርፍዎሙ፡ውስተ፡ይእቲ፡ሀገር፡ከመ፡ኢይስማዕ፡ንጉሥ፡ወኢያጥፍኦሙ።
6ወዜናሁሰ፡ለኡልያኖስ፡እስመ፡ሶበ፡ዓገቶሙ፡ለጸላእቱ፡በውስተ፡ፀብእ፡ፈነዎ፡እግዚአብሔር፡ለቅዱስ፡መርቆሬዎስ፡በመንፈስ፡እምድኅረ፡ነሥአ፡አክሊለ፡ስምዕ። ወረግዞ፡በኲናት፡ወሞተ። ወእምቅድመ፡ይሙት፡ነሥአ፡እምደሙ፡ምልአ፡ሕፍን፡ወዘረወ፡ውስተ፡አየር፡እንዘ፡ይብል፡“ኢየሱስ፡ንሥኣ፡ለነፍስየ፡ዘወሀብከኒ።”፡ወሶቤሃ፡ሞተ፡በእኩይ፡ሞት።
7ወለሥጋሆሙሰ፡ለቅዱሳን፡አብጽሕዎ፡እሉ፡ሰብእ፡ኀበ፡ሀገረ፡እስክንድርያ፡ወኀበ፡ቅዱስ፡አትናቴዎስ፡ሊቀ፡ጳጳሳት። ወተፈሥሐ፡ቦሙ፡ዓቢየ፡ፍሥሐ፡ወአንበሮሙ፡በኀቤሁ፡እስከ፡ይትሐነፅ፡ሎሙ፡ቤተ፡ክርስቲያን።
8ወአሐተ፡ዕለተ፡እንዘ፡ይነብር፡ውስተ፡አዕዋድ፡ዘአበዊሁ፡ወምስሌሁ፡ቴዎፍሎስ፡ጸሓፊሁ። ጸለየ፡ወይቤ፡“ለእመ፡ወሀበኒ፡እግዚአብሔር፡መዋዕለ፡ሠናየ፡አሐንፅ፡በስሞሙ፡ቤተ፡ክርስቲያን፡ለቅዱስ፡ዮሐንስ፡መጥምቅ፡ወኤልሳዕ፡ነቢይ። ወአነብር፡ሥጋሆሙ፡ውስቴታ”።
9ወሶበ፡ተሠይመ፡አባ፡ቴዎፍሎስ፡ሊቀ፡ጳጳሳት፣ ተዘከረ፡ውእተ፡ቃለ፡ዘተናገረ፡ኣባ፡ኣትናቴዎስ። ወሐነፀ፡ቤተ፡ክርስቲያን፡በስሞሙ፡ወነሥአ፡ምስሌሁ፡ካህናተ፡ብዙኀነ፡ወኵሎሙ፡ሕዝበ፡ክርስቲያን፡ተለውዎ፡ወሖሩ፡ኀበ፡ሥጋሆሙ፡ለቅዱሳን፡ወፆርዎሙ፡በክብር፡ዓቢይ፡ከመ፡ይሰድዎሙ፡ኀበ፡ቤተ፡ክርስቲያን።
10ወእንዘ፡የኀልፉ፡በጽሑ፡ኀበ፡ቅሩበ፡ቤት፡ዘሀለወት፡ውስቴቱ፡አሐቲ፡ብእሲት፡አረማዊት፡ዘትፄዓር፡በሕማመ፡ወሊድ፡መጠነ፡፬፡መዓልት፡እስከ፡አልጸቀት፡ለመዊት።
11ወሰምዓት፡ማኅሌቶሙ፡ለካህናት፡እንዘ፡የኀልፉ፡ምስለ፡ሥጋሆሙ፡ለቅዱሳን፡ወተሰአለት፡ወነፀረት፡እመስኮተ፡ቤታ። ወትቤ፡“ምንት፡ውእቱ፡ዝንቱ፧ ወይቤልዋ፡“ሥጋሆሙ፡ለቅዱሳን፡ዮሐንስ፡መጥምቅ፡ወኤልሳዕ፡ነቢይ”።
12ወሶቤሃ፡በፅዓት፡በሃይማኖት፡እንዘ፡ትብል፡“ኦ፡ቅዱሱ፡ለእግዚአብሔር፡ዮሐንስ። ለእመ፡ድኅንኩ፡እምዝንቱ፡ምንዳቤ፡በጸሎትከ፡አነ፡እከውን፡ክርስቲያናዊተ፡ወእምቅድመ፡ይትፈጸም፡ዝንቱ፡ቃል፡እምአፉሃ፡ሶቤሃ፡ወለደት፡ሕፃነ፡ሕያወ። ወሰመየቶ፡ስሞ፡ዮሐንስሃ።
13ወእምድኅረዝ፡ተጠምቀት፡ጥምቀተ፡ክርስትና፡ምስለ፡ኵሉ፡ሰብአ፡ቤታ።
14ወለሥጋ፡ቅዱሳንሂ፡ኣንበርዎ፡ውስተ፡ቤተ፡ክርስቲያን፡ወአስተርአዩ፡እምኔሆሙ፡ተአምራት፡ወመንክራት፡ዓበይት።
15ወእንዘ፡ይቄድስዋ፡ለቤተ፡ክርስቲያን፡ርእይዎሙ፡ለቅዱሳን፡ዮሐንስ፡መጥምቅ፡ወኤልሳዕ፡ነቢይ፡ብዙኀን፡ሰብእ፡ምስለ፡ሊቀ፡ጳጳሳት፡እንዘ፡የዓውዱ፡ምስሌሆሙ።
16ወአርአያሁ፡ለዮሐንስ፡ፀጓረ፡ኵለንታ፡ወፅሕሙ፡ይወርድ፡ዲበ፡እንግድዓሁ። ወኤልሳዕኒ፡ነዊኅ፡ቆም፡ወበራኅ፡ርእሱ።
17ወእምድኅረዝ፡ሶበ፡ኮነ፡ሰማዕተ፡ቅዱስ፡መቃርስ፡ኤጲስቆጶስ፡ረሰዩ፡ሥጋሁ፡ምስለ፡ሥጋሆሙ። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ለአስተርእዮቶሙ፡ነዮ፣ለሥጋ፡ዮሐንስ፡መጥምቅ፡ወለሥጋ፡ኤልሳዕ፡በኢተሌልዮ፣አቅረበ፡ሎሙ፡አኰቴተ፡ወተጋንዮ፣እስመ፡ክህሉ፡አረማዊተ፡እምሕማመ፡ወሊድ፡አጥዕዮ፣ተአምሪሆሙ፡ቴዎፍሎስ፡ርእዮ።
18ወበዛቲ፡ዕለት፡ኮነ፡በዓለ፡ሰዊት፡አው፡አዊት። ወተዝካሮሙ፡ለቄርሎስ፡ወአኬልጥስ፡ወቀውስጦስ፡መነኮስ። እግዚአብሔር፡ይምሐረነ፡በጸሎቶሙ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።