Sinaxario · Megabit
19 de Megabit
አመ፡፲ወ፱፡ለመጋቢት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፱፡ለመጋቢት፡በዛቲ፡ዕለት፡አዕረፈ፡አርስጥቦሎስ፡ሐዋርያ፡ረድኡ፡ለጳውሎስ፡ሐዋርያ፡እምኍልቆሙ፡ለ፸ወ፪፡አርድእት፡ዘኀረዮሙ፡እግዚእነ፡ወፈነዎሙ፡ይስብኩ፡እምቅድመ፡ሕማማቲሁ።
2ወበጊዜ፡ወረደ፡ላዕለ፡ሐዋርያት፡መንፈስ፡ቅዱስ፡ነሥአ፡ምስሌሆሙ፡ውእተ፡ጸጋ፡ወኃይለ፡ዘመንፈስ፡ቅዱስ፡ወሖረ፡ምስለ፡ሐዋርያት፡ወተልእኮሙ፡በስብከተ፡ወንጌል፡ማኅየዊ፡ወሜጠሙ፡ለብዙኃን፡ውስተ፡ፍኖተ፡መድኃኒት፡ወአብኦሙ፡ኀበ፡ሃይማኖት፡ዘእግዚእነ፡ኢየሱስ፡ክርስቶስ፡ሎቱ፡ስብሐት። ወአጥመቆሙ፡ጥምቀተ፡ክርስትና፡ወአድኀነ፡ነፍሳቲሆሙ፡በዘወሀቦሙ፡እምትእዛዛት፡መለኮታዊት።
3ወሤምዎ፡ሐዋርያት፡ለዝንቱ፡ቅዱስ፡ኤጲስቆጶሰ፡ላዕለ፡ሀገረ፡አብራጣብያስ፡ወሖረ፡ኀቤሃ፡ወሰበከ፡ውስቴታ፡ወሜጦሙ፡ለብዙኃን፡እምሰብአ፡ዚአሃ፡ወአብኦሙ፡ውስተ፡አእምሮ፡እግዚአብሔር፡ወገብረ፡በቅድሜሆሙ፡ተአምራተ፡ብዙኃተ። ወባሕቱ፡በጽሖ፡ምንዳቤ፡ዐቢይ፡እምአይሁድ፡ወዮናናውያን፡ወሰደድዎ፡ብዙኃ፡ጊዜ፡ወወገርዎ፡በአእባን፡ወእግዚእነ፡ያድኅኖ።
4ወሶበ፡ፈጸመ፡ሑረቶ፡ሠናየ፡አዕረፈ፡በሰላም።
5ወናሁ፡ዘከሮ፡ጳውሎስ፡በውስተ፡መልእክቱ፡ለሰብአ፡ሮሜ። በረከቱ፡ትኩን። ምስሌነ፡ለዓለመ፡ዓለም፡አሜን።
ሰላም፡ለአርስጦቦሎስ፡ዘተፈነወ፡ለምህሮ፤ምስለ፡ሐዋርያት፡በጽዮን፡ውኂዘ፡መንፈስ፡ሰኪሮ፤ጽሒፎ፡በእዱ፡ሶበ፡አምኀ፡ማኅበሮ፤እንዘ፡ያስተበፅዕ፡ወእንዘ፡ይዌድስ፡ግብሮ፤በውስተ፡መልእክቱ፡ዘሮሜ፡ጳውሎስ፡ዘከሮ።
6ወበዛቲ፡ዕለት፡ተዝካሮሙ፡ለ፯ቱ፡ሰማዕታት፡እሉ፡እሙንቱ፡እለእስክንድሮስ፡ግብፃዊ፡ወአጋብዮስ፡ዘሀገረ፡ጋዛ፡ወኒሞላዎስ፡ዘሀገረ፡ቡንጥስ፡ወዲዮናስዮስ፡እምሀገረ፡ጠራ፡ልብስ፡ወሮሜሎስ፡ወተላስዮስ፡እምአዕፃዳተ፡ግብፅ።
7ወእሙንቱ፡ተሰነዓዉ፡በፍቅር፡መንፈሳዊ፡ወበጽሑ፡ኀበ፡ሀገረ፡ቂሣርያ፡ዘፍልስጥኤም፡ወተአመኑ፡በቅድመ፡መኰንን፡በእግዚእነ፡ኢየሱስ፡ክርስቶስ፡ሎቱ፡ስብሐት። በመዋዕሊሁ፡ለዲዮቅልጥያኖስ፡ከሐዲ፡ወኰነኖሙ፡ኵነኔ፡ዓቢየ፡ወነሥኡ፡አክሊለ፡ስምዕ፡በመንግሥተ፡ሰማያት። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለክሙ፡እስክንድሮስ፡ወአጋብዮስ፤ሜልንዮስ፡ወዲዮናስዮስ፤ሮሜሎስ፡ዓዲ፡ወተላስዮስ፤እለ፡ጸናዕክሙ፡በዓዚዝ፡መንፈስ፤እስከ፡ኣድማዕክሙ፡አክሊለ፡ዘርእስ።
8ወበዛቲ፡ዕለት፡አዕረፈ፡ቅዱስ፡አስከናፍር፡ወብእሲቱ፡ማርታ።
9ወለዝንቱ፡ቅዱስ፡ቦ፡ውሉድ፡አርቃድዮስ፡ወዮሐንስ፡ውእቱሰ፡ብዙኀ፡ንዋይ፡ወብዕል፡ወተዓቃቢ፡ለሕገ፡እግዚአብሔር፡ወሐፀኖሙ፡ለውሉዱ፡በተግሣፅ፡ወበፈሪሃ፡እግዚአብሔር።
10ወሶበ፡ልኀቁ፡ደቂቁ፡ፈነዎሙ፡ኀበ፡ሀገረ፡ተይሩት፡ከመ፡ይትመሀሩ፡ጥበበ፡ወሶበ፡ፈጸሙ፡ትምህርተ፡ለአከ፡ያምጽእዎሙ፡ከመ፡ይትፈሣሕ፡በመርዓሆሙ፡ወእንዘ፡ሀለዉ፡ውስተ፡ሐመር፡ዲበ፡ባሕር፡ተሰብረ፡ሐመር፡ወተሠጥሙ፡ውሉዱ።
11ወባሕቱ፡አድኃኖሙ፡እግዚእነ፡እምተሠጥሞ፡ወገደፎ፡ማዕበል፡ለዮሐንስ፡ውስተ፡፩፡መካን፡ወሶበ፡ኀጥአ፡ተስፋ፡ሖረ፡ዮሐንስ፡ውስተ፡ምኔተ፡ቅዱሳን፡ወመንኰሰ፡ወኣንሐለ፡ሥጋሁ፡በጾም፡ወበጸሎት፡በእንተ፡እኍሁ፡አርቃዴዎስ፡እንዘ፡ይትሔዘብ፡ከመ፡ውእቱ፡ሞተ።
12ወአርቃዴዎስኒ፡ሖረ፡ኀበ፡መካናት፡ቅዱሳት፡ወቦአ፡ገዳመ፡ዮርዳኖስ፡ወመንኰሰ፡ኀበ፡፩፡አረጋዊ፡ቅዱስ፡ወነበረ፡እንዘ፡ይትጋደል፡፫፡ዓመተ።
13ወአስከናፍርሰ፡ሶበ፡ሰምዐ፡ስጥመተ፡ውሉዱ፡ለብሰ፡ሠቀ፡ምስለ፡ብእሲቱ፡ወነጸፉ፡ሐመደ፡ወነበሩ፡እንዘ፡የኀዝኑ።
14ወበአሐቲ፡ሌሊት፡ርእዮ፡በሕልም፡ለዮሐንስ፡እንዘ፡ዲበ፡ርእሱ፡አክሊል፡ዘእምዕንቍ፡ወውስተ፡እዴሁ፡መስቀል፡ወለአርቃዴዎስኒ፡አክሊል፡ዲበ፡ርእሱ፡በአምሳለ፡ኮከብ።
15ወነቂሖ፡እምንዋሙ፡ነገራ፡ለብእሲቱ፡ወይቤላ፡ንዒ፡ንሑር፡ውስተ፡ቤተ፡መቅደስ፡ከመ፡ንጸሊ፡ከመ፡ይክሥት፡ለነ፡እግዚእነ፡ዜና፡ውሉድነ፡ወበጺሖሙ፡ጸለዩ፡ወእምህየ፡ሓሩ፡ኀበ፡ዮርዳኖስ፡ኀበ፡ምኔተ፡ዮሐንስ፡መጥምቅ፡ወረከብዎ፡ለአረጋዊ፡ዘአመንኰሶ፡ለአርቃዴዎስ፡ወልዶሙ፡ወድቁ፡ታሕተ፡እገሪሁ፡ወነገርዎ፡ትካዞሙ፡ወይቤሎሙ፡ኢትኀዝኑ፡ሶበ፡ተመየጥክሙ፡ውስተ፡ቤተ፡መቅደስ፡ትረክቡ፡ደቂቅክሙ፡ሕያዋነ፡ወተመይጡ፡እንዘ፡ይትፌሥሑ።
16ወዮሐንስሰ፡መጽአ፡ይስግድ፡በበዓለ፡መስቀል፡ወጸውዖ፡አረጋዊ፡ለዮሐንስ፡ወአስ፡ተራከቦ፡ምስለ፡አርቃዴዎስ፡እኍሁ፡ወተአኀዙ፡ክሣውዲሆሙ፡ወበከዩ፡ወእምዝ፡አስተራከቦሙ፡ምስለ፡አቡሆሙ፡ወእሞሙ፡ወእምብዝኀ፡ፍሥሐሆሙ፡በከዩ፡በበይናቲሆሙ።
17ወለብሱ፡አስከናፍር፡ወማርታ፡ልብሰ፡ምንኵስና፡በኀበ፡ውእቱ፡አረጋዊ፡ወለብእሲቱ፡ማርታ፡ኣብኣ፡አስከናፍር፡ውስተ፡ምኔተ፡ቅዱሳት፡አንስት፡ወአግዓዘ፡አግብርቲሁ፡ወዘረወ፡ኵሎ፡ንዋዮ፡ላዕለ፡ነዳያን፡ወምስኪናን፡ወለብሰ፡ሠቀ፡ፀጕር፡ወቦአ፡ገዳመ፡ወነበረ፡እንዘ፡ይትጋደል፡በጾም፡ወበጸሎት፡ወከማሁ፡ውሉዱኒ፡ቡሩካን፡ወብእሲቱኒ፡ነበሩ፡በገድል፡እንዘ፡ይፀመድዎ፡ለእግዚአብሔር፡ወአዕረፉ፡በሰላም። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።