Sinaxario · Megabit
18 de Megabit
አመ፡፲ወ፰፡ለመጋቢት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፰፡ለመጋቢት፡በዛቲ፡ዕለት፡ኮነ፡ሰማዕተ፡ቅዱስ፡ኤስድሮስ፡ቢጹ፡ለቅዱስ፡ጻና፡ሰማዕት።
2እስመ፡ጻናሰ፡ኮነ፡እምነ፡ሐራ፡ትዕይንቱ፡ለመኰንን፡ዘሀገረ፡ፈርማ፡ወውእቱ፡ኤስድሮስ፡እምሀገረ፡ደቅስያ፡ወለዝንቱ፡ቅዱስ፡ኤስድሮስ፡ዓርኩ፡ውእቱ፡ወየአንሙ፡አልባሳተ፡ፀምር፡ወኮኑ፡ክልኤሆሙ፡ይመጸውቱ፡ለነዳያን፡ወለምስኪናን፡እምዘረብኁ።
3ወበአሐቲ፡እምለያልይ፡ርእዩ፡ክልኤሆሙ፡ከመ፡ብእሲት፡ድንግል፡ወምስሌሃ፡አክሊላት፡እንዘ፡ታነብር፡ዲበ፡አርእስቲሆሙ፡ወሶበ፡ነቅሑ፡እምንዋሞሙ፡ተናገሩ፡ዘከመ፡ርእዩ፡ተፈሥሑ፡ፈድፋደ፡ወአእመሩ፡ከመ፡እግዚአብሔር፡ውእቱ፡ዘጸውዖሙ፡ከመ፡ይኩኑ፡ሰማዕቶ።
4አሜሃ፡ተንሥኡ፡ወሖሩ፡ኀበ፡መኰንን፡ወፈትሐ፡ቅናቶ፡ቅዱስ፡ጻና፡ወገደፎ፡ቅድሜሁ፡ወተአመኑ፡ክልኤሆሙ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወርእዮ፡መኰንን፡አዘዘ፡ይዝብጥዎሙ፡እንዘ፡ይሞቅሕዎሙ፡ወፈነወ፡እግዚእነ፡መልአኮ፡አድኀኖሙ።
5ወእምዝ፡ፈነዎ፡መኰንን፡ለቅዱስ፡ጻና፡ኀበ፡እስክንድርያ፡ወኀደጎ፡ለኤስድሮስ፡ወእምድኅረ፡ኅዳጥ፡መዋዕል፡ሜጦ፡መኰንነ፡እስክንድርያ፡ኀበ፡ሀገረ፡ፈርማ፡ለቅዱስ፡ጻና፡ወተፈሥሑ፡ክልኤሆሙ፡ኅቡረ፡በተራክቦቶሙ፡ወተናገሩ፡በበይናቲሆሙ፡ለለ፩፡ዘከመ፡በጽሐ፡ላዕሌሆሙ፡ወኵነኔሆሙ፡ዐቢይ።
6ወእምዝ፡ኣዘዘ፡መኰንን፡ይክርዩ፡ሎቱ፡ለቅዱስ፡ኤስድሮስ፡ዓዘቅተ፡ወያንድዱ፡እሳተ፡ውስቴታ፡ወይውግርዎ፡ለቅዱስ፡ውስተ፡እሳት፡ወእንዘ፡ይወስድዎ፡ሰአሎሙ፡ለሐራ፡ንስቲተ፡ይትዓገሥዎ፡እስከ፡ይጼሊ፡ወጸለየ፡ኀበ፡እግዚእነ፡ከመ፡ይትወከፍ፡ነፍሶ፡ወየሐሊ፡ለሥጋሁ።
7ወእምዝ፡ቀርበ፡ኀበ፡ዓዘቅተ፡እሳት፡ወወደይዎ፡ወመጠወ፡ነፍሶ፡ውስተ፡እዴሁ፡ለእግዚአብሔር፡ወኢበጽሐ፡ላዕለ፡ሥጋሁ፡እሙስና፡ወኢምንትኒ፡ወኢተወለጠ፡አርአያሁ።
8ወኮነት፡እሙ፡ለቅዱስ፡ጻና፡ትበኪ፡በእንተ፡ተፈልጦቱ፡እምዓርኩ፡ወእምዝ፡ፆሩ፡ሥጋሁ፡ወአንበርዎ፡ውስተ፡መካን፡ሠናይ፡እስከ፡ተፍጻሜተ፡ስደት።
9ወበጊዜ፡ኮነ፡ሰማዕተ፡ቅዱስ፡ኤስድሮስ፡ርእየት፡እሙ፡ለቅዱስ፡ጻና፡ብዙኃን፡መላእክት፡እንዘ፡ይነሥኡ፡ነፍሶ፡ለቅዱስ፡ኤስድሮስ፡በዓቢይ፡ክብር፡ወያዓርግዋ፡ውስተ፡ሰማያት። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለኤስድሮስ፡እምነ፡ሤጠ፡ፀምር፡ግብረ፡እዱ፤ዘይሁብ፡ምጽዋተ፡ለእለ፡ፈቀዱ፤ምንዳቤያተ፡ፈጺሞ፡ወኵነኔያተ፡ለለ፩ዱ፤በዕለተ፡ውዕየ፡ለዓዘቅተ፡እሳት፡በነዱ፤መላእክት፡ነፍሶ፡በስብሐት፡ወሰዱ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።