ግዕዝ
Home Formaciones Libros Biblioteca Ge'ez Contacto
Sinaxario · Megabit

20 de Megabit

አመ፡፳ሁ፡ለመጋቢት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ሁ፡ለመጋቢት፡በዛቲ፡ዕለት፡አዕረፈ፡አብ፡ክቡር፡ሊቀ፡ጳጳሳት፡አባ፡ሚካኤል፡ዘውእቱ፡እምኍልቆሙ፡ለአበው፡ሊቃነ፡ጳጳሳት፡ዘእስክንድርያ፡፶ወ፯ቱ።
2ወዝንቱ፡ኣብ፡ኮነ፡ፍጹመ፡በኵሉ፡ምግባረ፡ሠናይ።
3ወበጽሐ፡ላዕሌሁ፡ምንዳቤ፡ወኀዘን፡ዐቢይ፡በመዋዕለ፡ሢመቱ፡እስመ፡ሀሎ፡አሐዱ፡ኤጲስቆጶስ፡እኩይ፡ዘተሠይመ፡ላዕለ፡ሀገረ፡ሳሕ፡ወያፈቅር፡ክብረ፡ዝንቱ፡ዓለም፡ኀላፊ።
4ወኮነ፡በሀገረ፡ደነውሳር፡ዘበሢመቱ፡ሐደሱ፡ሕንፀታ፡ለቤተ፡ክርስቲያን፡ወሶበ፡ፈቀዱ፡ይቀድስዋ፡ልኂቃነ፡ሀገር፡እለ፡ሐደስዋ፡ሰአልዎ፡ለውእቱ፡ኤጲስቆጶስ፡እኩይ፡ከመ፡ይፈኑ፡መልእክተ፡ኀበ፡አብ፡ሊቀ፡ጳጳሳት፡ወኤጲስቆጶሳት፡ዘውእቱ፡በሐውርት፡እለ፡የዓውድዎሙ፡ከመ፡ይትባረኩ፡እምኔሆሙ፡ውእቱሰ፡ኢሠምረ።
5ወእሙንቱ፡ፈነዉ፡መልእክተ፡ኀበ፡ሊቀ፡ጳጳሳት፡አባ፡ሚካኤል፡በፈቃዶሙ፡ውኀበ፡ኤጲስቆጶሳቲሁ።
6ወሶበ፡በጽሐ፡አባ፡ሚካኤል፡ምስለ፡ኤጲስቆጶሳት፡ዘእንበለ፡ፈቃዱ፡ኀደጎሙ፡ውስተ፡ቤተ፡ክርስቲያን፡ወሖረ፡ውስተ፡ቤቱ፡ያስተዳሉ፡ሎሙ፡ምሳሐ።
7ወሶበ፡በጽሐ፡ጊዜ፡ቍርባን፡ኤጲስቆጶሳት፡ወሊቃውንት፡ሰአልዎ፡ለዝንቱ፡አብ፡ሊቀ፡ጳጳሳት፡ከመ፡ይውጥን፡ሥርዓተ፡ቅዳሴ፡እስከ፡ይመጽእ፡ውእቱ፡ኤጲስቆጶስ፡እኩይ፡ወሶበ፡አገበርዎ፡ለዝንቱ፡አብ፡ተንሥአ፡በሞገሰ፡ሊቀ፡ጵጵስና፡እስመ፡ውእቱ፡አብ፡ለኵሎሙ፡ወሥልጣኑ፡ላዕሌሆሙ፡ወወጠነ፡ቅዳሴ።
8ወሶበ፡ሰምዐ፡ውእቱ፡ኤጲስቆጶስ፡እኩይ፡ቦአ፡ውስተ፡ልቡ፡ሰይጣን፡ተንሥአ፡ወመጽአ፡ውስተ፡ቤተ፡ክርስቲያን፡እንዘ፡ይትመዓዕ፡ወነሥአ፡ቍርባነ፡እምላዕለ፡ርእሱ፡ለዲያቆን፡ወገደፎ፡ውስተ፡ምድር።
9ወአዘዘ፡ሊቀ፡ጳጳሳት፡ያምጽኡ፡ካልአ፡ቍርባነ፡ወአምጽኡ፡ሎቱ፡ወቀደሰ፡ወወሀቦሙ፡ምሥጢራተ፡ቅድሳት።
10ወበሣኒታ፡አስተጋብኦሙ፡ለሕዝብ፡ዝንቱ፡አብ፡ለኤጲስቆጶሳት፡ወለካህናት፡ወለኵሎሙ፡ማኅበረ፡ቤተ፡ክርስቲያን፡ወመተርዎ፡እምሢመቱ፡ለኤጲስቆጶስ፡እኩይ፡ወሤሙ፡ካልአ፡ኤጲስቆጶሰ፡ህየንቴሁ።
11ወተንሥአ፡ውእቱ፡ኤጲስቆጶስ፡እኩይ፡ወሖረ፡ኀበ፡መኰንነ፡ምስር፡አሕመድ፡ወልደ፡በጥሎን፡ወአስተዋደዮ፡ለዝንቱ፡አብ፡አባ፡ሚካኤል፡ወይቤሎ፡አእምር፡ከመ፡ሀሎ፡በኀበ፡ሊቀ፡ጳጳሳት፡ብዙኅ፡ንዋይ፡ዘወርቅ፡ወብሩር፡ወከማሁ፡አብያተ፡ክርስቲያናትኒ፡ምሉአን፡ንዋየ፡ቅድሳት፡ዘወርቅ፡ወዘብሩር።
12ወአብጽሖ፡መኰንን፡ለሊቀ፡ጳጳሳት፡ኀቤሁ፡ወኀሠሠ፡እምኔሁ፡ኵሎ፡ንዋየ፡ቅድሳት፡ወአበዮ፡ወይቤሎ፡ሥጋየሰ፡ግበር፡ዘፈቀድከ፡ወነፍስየሰ፡ውስተ፡እዴሁ፡ለእግዚአብሔር።
13ወአዘዘ፡ይእስርዎ፡እደዊሁ፡ወእገሪሁ፡ወይገርዎ፡ውስተ፡ቤተ፡ሞቅሕ፡ወነበረ፡ውስቴታ፡አሐደ፡ዓመተ።
14ወእምድኅረዝ፡መጽአ፡አሐዱ፡ጸሐፊ፡ዘስሙ፡ዮሐንስ፡ክርስቲያናዊ፡ወተሀበዮ፡ለአባ፡ሚካኤል፡ወወፅአ፡እምቤተ፡ሞቅሕ፡ከመ፡የሀቦ፡ለመኰንን፡፪ተ፡እልፈ፡ዲናረ፡ወርቅ፡ወሖረ፡ኀበ፡ቤቱ፡ወአስተጋብኡ፡ልኂቃን፡መሃይምናን፡በበይናቲሆሙ፡ወመነኮሳተ፡ገዳመ፡አስቄጥስ፡እልፈ፡ዲናረ፡ወርቅ፡ወሰብአ፡ሀገረ፡እስክንድርያ፡ሤጡ፡አሐደ፡እምድሮሙ፡፲፻ተ፡ዲናረ፡እስከ፡መልአ፡እልፈ፡ዲናረ፡ወወሀቦ፡ለመኰንን፡ሊቀ፡ጳጳሳት፡ወጸሐፈ፡በእዴሁ፡ለሰብአ፡ሀገረ፡እስክንድርያ፡ከመ፡የሀብዎ፡፲፻ተ፡ዲናረ፡ወርቅ፡ለለዓመት።
15ወእምዝ፡ሖረ፡ሀገረ፡በልበይስ፡ፈቂዶ፡ከመ፡ይስአል፡እምኀበ፡መሃይምናን፡ወነበረ፡አሐተ፡ዕለተ፡ወቦአ፡ኀቤሁ፡አሐዱ፡ነዳይ፡መነኮስ፡እንዘ፡ይለብስ፡አፅርቅተ፡ወተባረከ፡እምአብ፡አባ፡ሚካኤል፡ወነበረ፡በገቦ፡ረድኡ፡ኀበ፡አንቀጽ፡ወይቤሎ፡ለረድኡ፡በሎ፡ለአብ፡ሊቀ፡ጳጳሳት፡ኢትተክዝ፡በልብከ፡ወኢትኅዝን፡እምዛቲ፡ዕለት፡እስከ፡አርብዓ፡መዋዕል፡ትድኅን፡ወትነሥእ፡መጽሐፈ፡ዕዳ፡ዘላዕሌከ፡ወኢተሀቦ፡ለመኰንን፡ምንተኒ፡ወአይድዖ፡ረድኡ፡ለአብ፡አባ፡ሚካኤል፡ዘከመ፡ይቤሎ፡ውእቱ፡መነኮስ፡ነዳይ፡ወኀሠሥዎ፡ወኢረከብዎ።
16ወእምቅድመ፡ይትፈጸም፡፵፡መዋዕል፡ሞተ፡መኰንን፡ዕቡይ፡ወተሠይመ፡ወልዱ፡ህየንቴሁ፡ወሜጠ፡ውእተ፡መጽሐፈ፡ዕዳ፡ለአባ፡ሚካኤል፡ወሠጠጦ፡በከመ፡ተነበየ፡ውእቱ፡መነኮስ፡ነዳይ።
17ዳቤ፡ወእምድኅረ፡ነበረ፡ዝንቱ፡አብ፡በምን፡ወበኀዘን፡ዐቢይ፡በመዋዕለ፡ሢመቱ፡፳ወ፱ተ፡ዓመተ፡አዕረፈ፡በክብር፣ በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ሰላም፡ለሊቀ፡ጳጳሳት፡ስሙይ፤በስመ፡ሚካኤል፡ሊቆሙ፡ለኀይላተ፡ሰማይ፤እምዕለተ፡ተበሥረ፡ዝንቱ፡እምአፈ፡፩፡ነዳይ፤ኮነ፡በ፵፡ሞተ፡መኰንን፡ዕቡይ፡እንተ፡በብዙኅ፡ሥቃይ።
18ወበዛቲ፡ዕለት፡አንሥኦ፡እግዚእነ፡ለአልዓዛር፡ጻድቅ፡እመቃብር፡እምድኅረ፡አርባዕቱ፡መዋዕል፡ወአምኑ፡ቦቱ፡ብዙኃን፡በእንተ፡ዕበያ፡ለዛቲ፡ትእምርት። ወስብሐት፡ለእግዚእነ፡ኢየሱስ፡ክርስቶስ፡እስከ፡ለዓለመ፡ዓለም፡አሜን።
ሰላም፡ለሑረትከ፡እግዚአብሔር፡ኬንያ፤ እምኢየሩሳሌም፡ለቢታንያ፤ ከመ፡ታንሥእ፡በድኖ፡ለአልዓዛር፡እኅወ፡ማርያ፤ ትሴፈወከ፡ነፍስየ፡ወትጸንሐከ፡ነያ፤ እሞተ፡ኀጢአት፡ታሕይዋ፡በዝንቱ፡አርአያ።
19ወበዛቲ፡ዕለት፡ኮነት፡ስምዐ፡አስጠራ፡ጦኒቃ፡ቅድስት፡ወቡርክት።
20ለዛቲ፡ቅድስት፡ኮነ፡አቡሃ፡መምለኬ፡ጣዖት፡ወይእቲሰ፡ማእምንት፡በክርስቶስ፡ሎቱ፡ስብሐት፡ትጸውም፡ወትጼሊ፡በኅቡዕ፡እስከ፡ደግደገ፡ሥጋሃ፡ወተወለጠ፡ራእያ።
21ወሶበ፡ኮና፡፲ወ፭ቱ፡ዓመት፡ይቤልዋ፡አቡሃ፡ወእማ፡ምንት፡ያደገድኪ። ወትቤሎሙ፡እጼሊ፡ወእጸውም፡ኀበ፡እግዚእየ፡ኢየሱስ፡ክርስቶስ፡ሎቱ፡ስብሐት፡ከመ፡ይሥረይ፡ኀጢአትየ።
22ወሰሚዖ፡አቡሃ፡ሖረ፡ኀበ፡ጢባርዮስ፡ዓላዊ፡ወነገሮ፡ግብረ፡ወለቱ፡ወአብጽሓ፡ኀቤሁ፡መኰንን፡ወኄጣ፡ከመ፡ትስግድ፡ለጣዖት፡ወሶበ፡አበየት፡ወደይዋ፡ውስተ፡ቤተ፡ሞቅሕ፡ወእማሰ፡ክርስቲያናዊት፡ይእቲ፡ትመጽእ፡ኀቤሃ፡ወታጸንዓ።
23ወእምዝ፡ኣዘዘ፡ከመ፡ይግበሩ፡ሰፋዲለ፡ዘሐፂን፡እለ፡ርሱናን፡በእሳት፡ወያፁርዋ፡ውስተ፡ኵርንዓቲሃ፡እስከ፡ይትላጸቅ፡ምስለ፡ገበዋቲሃ፡ውእቱ፡ሰፋዲል፡ወሰበረቶ፡ለሰፋ፡ዲል፡ወወፅአት፡ወርእዮሙ፡ሕዝብ፡አምኑ፡በእግዚእነ፡ሎቱ፡ስብሐት። መጠነ፡፵ወ፯፻፡ሰብእ፡ወኮኑ፡ሰማዕተ።
24ወካዕበ፡አብእዋ፡ውስተ፡ቤተ፡ሞቅሕ፡ወእምዝ፡ገብሩ፡ሶረ፡ዘሐፂን፡ዘቦቱ፡አጽፋር፡ከመ፡ይንድፍዋ፡ውስተ፡ከርሣ፡ወይስጥቅዋ፡ወሶበ፡ገብሩ፡ዘንተ፡ተከፍለ፡ሶር፡ከሐ፡ወዝየ፡በኀይለ፡እግዚአብሔር፡ወሶበ፡ርእዩ፡ሕዝብ፡ዘንተ፡መንክረ፡አምኑ፡በክርስቶስ፡ሎቱ፡ስብሐት፡መጠነ፡፱፻፹ወ፭፡ነፍስ፡ወኮኑ፡ሰማዕተ።
25ወእምዝ፡ወደይዋ፡ውስተ፡አክይስት፡እለ፡ምሉአን፡ኀምዘ፡ወሶበ፡ጸለየት፡ኮኑ፡ከመ፡ጸበል።
26ወካዕበ፡አምጽኡ፡እብነ፡ክቡደ፡ዘይፀውርዎ፡፬ቱ፡ዕደው፡ወሰቀሉ፡ውስተ፡ክሣዳ፡ወሶበ፡ጸለየት፡ኮነ፡፫ተ፡ክፍለ፡ወርእዮሙ፡አምኑ፡ብዙኃን፡አረማውያን፡ወኮኑ፡ሰማዕተ፡በእንተ፡ስሙ፡ለእግዚእነ።
27ወለቅድስትሰ፡ገብሩ፡ላቲ፡መቅፁተ፡ዘሐፂን፡ወአፍልሑ፡ውስቴቱ፡ዓረረ፡ምስለ፡ዘይት፡ከመ፡ይክዓዉ፡ላዕሌሃ፡ወሶበ፡ለከፍዎ፡ለመቅፁት፡ተሰብረ፡ላዕሌሆሙ፡ወቀተሎሙ፡ለእለ፡ይኴንንዋ።
28ወተምዐ፡ንጉሥ፡ወአዘዘ፡ይምትሩ፡ርእሳ፡በሰይፍ።
29ወበጺሓ፡ውስተ፡መካነ፡ስምዕ፡ጸለየት፡ኀበ፡እግዚአብሔር፡ወመጽአ፡ቃል፡እምሰማይ፡ዘይብል፡ብፅዕት፡አንቲ፡አስጠራጦኒቃ፡እስመ፡ተጽሕፈ፡ስምኪ፡ውስተ፡መጽሐፈ፡ሕይወት፡ወእምዝ፡ተከለለት፡በሰይፍ። ትንብልናሃ፡ወበረከታ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለሥንኪ፡ዘአዋከየ፡መብረቃ፤በብሔረ፡ጽልመት፡ወጣቃ፤ሕሊናየ፡ትቤ፡ሶበ፡ፍቅርኪ፡አለቃ፤አስጠራጦኒቃ፡ለንዴትየ፡ወርቃ፤አስጠራጦኒቃ፡ለነፍስየ፡ጽድቃ።ሰላም፡ለክሙ፡ተስዓ፡አምአት፤ወአሐዱ፡ምእት፤ ፹ወ፭፡ሰማዕታት፤ዘመርሐተክሙ፡አስጠራጦኒቃ፡ብፅዕት፤ፍኖተ፡መንግሥት፡ዘስማ፡ርትዕት።
30ወበዛቲ፡ዕለት፡ተዝካራ፡ለቅድስት፡ጽጌ፡ሥላሴ፡መስተጋድልት፡ወቅዳሴ፡ቤተ፡ክርስቲያኑ፡ለቅዱስ፡አስቃራን። በረከቶሙ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለከ፡በቃለ፡ማኅሌት፡ዘድርሳን፤ቅዱስ፡አስቃራን፤በጉባኤ፡ካህናት፡ወሕዝብ፡ወመሃይምናን፤ከመ፡ተቀደሰት፡ዮም፡በስመ፡ዚኣከ፡መካን፤ይቀድሰኒ፡እምርኵስየ፡ቅብዕከ፡ሜሮን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።