ግዕዝ
Home Formaciones Libros Biblioteca Ge'ez Contacto
Sinaxario · Hamle

4 de Hamle

አመ፡፬፡ለሐምሌ

በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። አመ፡፬፡ለሐምሌ፡በዛቲ፡ዕለት፡በዓለ፡ፍልሰተ፡ሥጋሆሙ፡ለቅዱሳን፡ክቡራን፡አቡቂር፡ወዮሐንስ። ወውእቶሙኬ፡እስመ፡ቅዱሳን፡ሶበ፡ኮኑ፡ሰማዕተ፡አመ፡፮፡ለወርኀ፡የካቲት፡ወፆሩ፡ሥጋሆሙ፡ሰብእ፡መሃይምናን፡በኅቡእ፡ወአንበርዎሙ፡ውስተ፡ቤተ፡ክርስቲያን፡ዘቅዱስ፡ማርቆስ፡ወንጌላዊ፡ዘሀለወት፡በሰሜነ፡ሀገረ፡እስክንድርያ፡ወሀለዉ፡ንቡራነ፡ህየ፡እስከ፡መዋዕሊሁ፡ለቅዱስ፡ቄርሎስ፡ሊቀ፡ጳጳሳት፡ዘእስክንድርያ። ወአስተርአዮ፡መልአከ፡እግዚአብሔር፡ለቄርሎስ፡ወኣዘዞ፡ከመ፡ይሑር፡ኀበ፡ቤተ፡ክርስቲያን፡ዘቅዱስ፡ማርቆስ፡ወይፁር፡ሥጋሆሙ፡ለቅዱሳን፡አቡቂር፡ወዮሐንስ፡ወሖረ፡ምስለ፡ብዙኀን፡ሕዝብ፡ወጸለዩ፡ወከረዩ፡ምድረ፡ወተከሥተ፡ሎሙ፡ሣፁን፡ዘውስቴቱ፡ሥጋሆሙ፡ለቅዱሳን። ወፆርዎሙ፡በክብር፡ዓቢይ፡ወአብጽሕዎሙ፡ኀበ፡ቤተ፡ክርስቲያን፡ዘቅዱስ፡ማርቆስ፡ካልእት፡ዘሀለወት፡ኀበ፡ጽንፈ፡ባሕር፡ወአንበርዎሙ፡ውስቴታ። ወሐነፁ፡ሎሙ፡ቤተ፡ክርስቲያን፡በህየ፡ወገብሩ፡ሎሙ፡በዓለ፡ዓቢየ፡በከመ፡ዛቲ፡ዕለት፡ወይትጋብኡ፡ህየ፡ብዙኀን፡አረማውያን፡ወሶበ፡ይሬእዩ፡ተአምረ፡ወመንክረ፡ዓቢየ፡ዘያስተርኢ፡እምነ፡ሥጋሆሙ፡ለቅዱሳን፡ኀደጉ፡ጣዖቶሙ፡ወኮኑ፡ክርስቲያነ። ወይእቲሰ፡ቤተ፡ጣዖት፡ተለዓለ፡ላዕሌሃ፡ኆፃ፡እስከ፡ኮነ፡ወግረ፡ዓቢየ። ወእምነ፡ሥጋሆሙሰ፡ለቅዱሳን፡ያስተርኢ፡ተአምር፡ወመንክር፡ዓቢይ፡ወፈውስ፡ለድዉያን። ወእግዚአብሔር፡ይምሐረነ፡በጸሎቶሙ፡ለዓለመ፡ዓለም፡አሜን።

ሰላም፡ሰላም፡ለዮሐንስ፡ወአቡቂር፣እንተ፡ነበሩ፡ኅቡአ፡በእለእስክንድርያ፡ሀገር፣ከመ፡አስተርአዮ፡መልአክ፡ለቄርሎስ፡ማር፣ዮም፡አፍለሶሙ፡በዕበይ፡ወክብር፣ኀበ፡ቤተ፡ማርቆስ፡ዘሀሎ፡በጽንፋ፡ለባሕር።

ወበዛቲ፡ዕለት፡አዕረፈ፡ሰፎንያስ፡ወልደ፡ኵሲ፡ወልደ፡ጐዶልያስ፡ወልደ፡አማርያ። ወተነበየ፡በመዋዕለ፡ኢዮስያስ፡ወልደ፡አሞፅ፡ንጉሡ፡ይሁዳ፡ወተነበየ፡በእንተ፡ፄዋዌ፡እስራኤል። ወይቤ፡ኀሊቀ፡ዮኀልቁ፡እምጸ፡ምድር፡ይቤ፡እግዚአብሔር፡የኀልቅ፡ሰብእ፡ወእንስሳ፡ወየኀልቁ፡አዕዋፈ፡ሰማየ፡ወዓሣተ፡ባሕር። ወተነበየ፡ካዕበ፡በእንተ፡ሞአብ፡ወይቤ፡እስመ፡ሞአብኒ፡ከመ፡ሰዶም፡ትከውን፡ወደቂቀ፡አሞንሂ፡ከመ፡ገሞራ፡ወደማስቆኒ፡ተኀልቅ፡ከመ፡ክምረ፡እክል፡እስመ፡እማንቱ፡አህጉር፡ማሰና፡በፄዋዌ፡ናቡከደነፆር። ወተነበየ፡ካዕበ፡በእንተ፡ፋርስ፡ወነነዌ፡ወይቤ፡አጠፍኦሙ፡ለፋርስ፡ወእሬስያ፡መዝበረ፡ለነነዌ፡ከመ፡በድው፡ዘአልቦ፡ማይ፡ወይትረአዩ፡በማእከላ፡አራዊተ፡ገዳም፡ከመ፡መራዕይ። ወይእቲ፡ሀገር፡ጠፍአት፡በእደ፡እስ፡ክንድር፡መቄዶናዊ። ወካዕበ፡ተነበየ፡በእንተ፡ክርስቶስ፡ወይቤ፡ይእተ፡አሚረ፡እመይጥ፡ልሳኖሙ፡ለኵሎሙ፡አሕዛብ፡ከመ፡ኵሉ፡ይፀውዕ፡ስመ፡እግዚአብሔር፡ወከመ፡ይትቀነዩ፡ሎቱ፡በ፩፡አርዑት። ወይቤ፡ካዕበ፡እምአፍላገ፡ኢትዮጵያ፡ያመጽኡ፡ሎቱ፡መሥዋዕተ። እግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።

ሰላም፡ለከ፡ሰፎንያስ፡ክቡር፣ዘተነበይከ፡በይሁዳ፡ኅልቀተ፡አይሁድ፡እምድር፣እንዘ፡ትብል፡ከመዝ፡እንበለ፡ሠናይ፡ምግባር፣ኢያድኅን፡ወርቅ፡ወኢይትቤዘው፡ብሩር፤አመ፡ዕለተ፡እግዚእ፡ዕለተ፡ፍዳ፡ዘድምፃ፡መንክር።

ወበዛቲ፡ዕለት፡ይትገበር፡ተዝካሮሙ፡ለ፲ወ፪ቱ፡ደቂቀ፡ነቢያት፡ንኡሳን፡እለ፡አውኀዙ፡ተነብዮ፡በእንተ፡ክርስቶስ። ወተዝካሮሙ፡ለኪራኮስ፡ወቢማን። በረከቶሙ፡ተሀሉ፡ምስሌነ፡ለዓለመ፡ዓለም፡ኣሜን።

ሰላም፡ለክሙ፡ነቢያተ፡እስራኤል፡ኵሉ፣ዝርኢክሙ፡ገሀደ፡ምሥጢረ፡ዘሀሎ፡ወይሄሉ፤ በእንተ፡ክርስቶስ፡እግዚእ፡ወበእንተ፡ቅዱስ፡ወንጌሉ፣ይወፅእ፡ሕግ፡እምጽዮን፡ትብሉ፣ወእምኢየሩሳሌም፡ካዕበ፡ለአምላክ፡ቃሉ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።