3 de Hamle
አመ፡፫፡ለሐምሌበስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። አመ፡፫፡ለሐምሌ፡በዛቲ፡ዕለት፡አዕረፈ፡አብ፡ቅዱስ፡ቄርሎስ፡ዓምደ፡ሃይማኖት፡ወማኅቶተ፡ቤተ፡ክርስቲያን፡ቅድስት፡ሊቀ፡ጳጳሳት፡ዘሀገረ፡እስክንድርያ፡እምኍልቆሙ፡ለአበው፡ሊቃነ፡ጳጳሳት፡፳ወ፬ቱ።
ወፈነዎ፡ኀበ፡ደብረ፡ቅዱስ፡አባ፡መቃርስ፡ወተምህረ፡ኵሎ፡ትምህርታተ፡መለኮታዊተ፡በ፭፡ዓመት፡አጽንዐ፡ኵሎ፡መጻሕፍተ፡ቅዱሳተ፡ወወሀቦ፡እግዚእነ፡ጸጋ፡ወልቡና፡እስከ፡ኮነ፡ሶበ፡ያነብቦ፡ለመጽሐፍ፡አሐደ፡ጊዜ፡ያጸንዖ።
ወእምዝ፡መጠዎ፡ለአባ፡ሰራብዮን፡አብ፡ክቡር፡ኤጲስቆጶስ፡ወወሰከ፡ጥበበ፡ወኣእምሮ፡ወተምህረ፡ኵሎ፡ምግባራተ፡ሠናይ፡ክቡራተ። ወሶበ፡ፈጸመ፡ትምህርቶ፡ፈነዎ፡አባ፡ሰራብዮን፡ኀበ፡አባ፡ቴዎፍሎስ፡ወተፈሥሐ፡ቦቱ፡ዓቢየ፡ፍሥሐ፡ወአእኰቶ፡ለእግዚአብሔር፡በእንተ፡ዘወሀቦ፡ዘንተ፡ወልደ፡ቡሩከ፡ወበእንተዝ፡ረሰዮ፡ውስተ፡ግብረ፡ጵጵስናሁ፡ከመ፡ያንብብ፡መጻሕፍተ፡ለሕዝብ፡ኵሎ፡ጊዜ፡ኢይፈቱ፡መኑሂ፡ከመ፡ያርምም፡በእንተ፡ጣዕመ፡ቃሉ።
ወሶበ፡አዕረፈ፡አባ፡ቴዎፍሎስ፡ሤምዎ፡ለዝንቱ፡አብ፡ቅዱስ፡አባ፡ቄርሎስ፡ሊቀ፡ጳጳሳት፡ህየንቴሁ፡ወበርሀት፡ቤተ፡ክርስቲያን፡በትምህርታቲሁ።
ወሶበ፡ክሕደ፡ወስሕተ፡ንስጥሮስ፡ሊቀ፡ጳጳሳት፡ዘቍስጥንጥንያ፡ተጋብኡ፡በእንቲአሁ፡ማኀበረ፡ጉባኤ፡፪፻፡ኤጲስቆጶሳት፡በሀገረ፡ኤፌሶን፡በመዋዕሊሁ፡ለቴዎዶስዮስ፡ንጉሥ። ወኮነ፡ዝንቱ፡አብ፡አባ፡ቄርሎስ፡አፈ፡ጉባኤ፡ዝንቱ፡ማኅበር፡ወተዋሥኦ፡ለንስጥሮስ፡ዓላዊ፡ወከሠተ፡ስሕተቶ፡ወሞዖ፡ወሶበ፡ኢተ፡አውገዝዎ፡ወረገምዎ፡ወሰደድዎ፡መይጠ፡እመንበሩ።ወእምዝ፡ደረሰ፡ዝንቱ፡አብ፡ቅዱስ፡ዓሠርተ፡ወክልኤተ፡ቃላተ፡ወከሠተ፡ውስቴቶሙ፡ሃይማኖተ፡ርትዕተ።
ወአጠየቀ፡ዝንቱ፡አብ፡ከመ፡እግዚአብሔር፡ቃል፡፩፡ጠባይዕ፡ወ፩፡ህላዌ፡በህላዌሁ። ወአውገዞሙ፡ለኵሎሙ፡እለ፡ይፈልጥዎ፡ለክርስቶስ፡አው፡ዘይወፅእ፡እምዝንቱ፡ምክር፡ሠናይ፡ወእምዝንቱ፡ሃይማኖት፡ርቱዕ። ወሶበ፡ፈጸመ፡ገድሎ፡ሠናየ፡ወአሥመሮ፡ለእግዚኣብሔር፡ሐሚሞ፡ንስቲተ፡አዕረፈ፡በሰላም፡እምድኅረ፡ነበረ፡ዲበ፡መንበረ፡ማርቆስ፡ወንጌላዊ፡፴ወ፪፡ዓመተ። በረከቱ፡ትኩን፡ምስሌነ፡ለዓለመ፡ዓለም፡አሜን።
ወበዛቲ፡ዕለት፡አዕረፈ፡አብ፡ቅዱስ፡ወክቡር፡ክልስትያኖስ፡ሊቀ፡ጳጳሳት፡ዘሀገረ፡ሮሜ፡ዘኮነ፡ረድኦ፡ለዮናክንዲኖስ፡ሊቀ፡ጳጳሳት፡ዘእምቅድሜሁ።
ወለዝንቱኒ፡ረድኡ፡ክልስትያኖስ፡አዘዞ፡እንዘ፡ይብል፡ተዓቀብ፡ኦ፡ወልድየ፡እስመ፡ሀለዉ፡ውስተ፡ሀገረ፡ሮሜ፡ዘይከውኑ፡ተኵላት፡መሠጥ።
ወሶበ፡አዕረፈ፡ዮናክንዲኖስ፡ተሠይመ፡ዝንቱ፡አብ፡ቅዱስ፡ክልስትያኖስ፡ሊቀ፡ጳጳሳት፡ህየንተ፡ዮናክንዲኖስ፡ወሀሎ፡በውእቱ፡መዋዕል፡ንጉሥ፡ጻድቅ፡አኖሬዎስ፡በሀገረ፡ርሜ።
ወሶበ፡አዕረፈ፡አኖሬዎስ፡ነግሠ፡ህየንቴሁ፡ሉልያኖስ፡ከሐዲ፡ወፈቀደ፡ውእቱ፡ከመ፡ይሢሞ፡ለንስጥሮስ፡ሊቀ፡ጳጳሳት፡ላዕለ፡ሀገረ፡ሮሜ፡ወይስድዶ፡ለዝንቱ፡አብ፡ክልስትያኖስ።
ወሰብአ፡ሀገርሰ፡ሰደድዎ፡ለንስጥሮስ፡ወበእንተዝ፡ኮነ፡ውስተ፡ልበ፡ውእቱ፡ከሐዲ፡ንጉሥ፡ቂም፡ዓቢይ፡በላዕለ፡ቅዱስ፡ክልስትያኖስ፡ወወፅአ፡ቅዱስ፡ወሖረ፡ኀበ፡፩፡እምነ፡አድባራት፡ዘቅሩብ፡እም፭ቱ፡አህጉራት፡ወነበረ፡ውስቴቱ። ወገብረ፡እግዚእነ፡ዲበ፡እደዊሁ፡ተአምራተ፡ወመንክራተ።
ወእምዝ፡ሖረ፡ንጉሥ፡ውስተ፡ፀብዕ፡ወለቅዱስሶ፡ክልስትያኖስ፡አስተርአዮ፡መልአከ፡እግዚአብሔር፡ሩፋኤል፡በራእየ፡ሌሊት፡ወወሀቦ፡ሰላመ፡ወይቤሎ፡ተንሥእ፡ወሑር፡ኀበ፡ሀገረ፡አንጾኪያ፡ኀበ፡ቅዱስ፡ድምትርያኖስ፡ሊቀ፡ጳጳሳት፡ዘአንጾኪያ፡ወንበር፡በኀቤሁ፡እስመ፡ንጉሥ፡ከሐዲ፡ሐለየ፡በልቡ፡ለእመ፡ተመይጠ፡እምፀብዕ፡ይቅትልከ።
ወሶበ፡ነቅሐ፡እምንዋሙ፡ወፅአ፡እምውእቱ፡ደብር፡ወምስሌሁ፡፪ቱ፡አኀው፡ወበጽሐ፡ኀበ፡ሀገረ፡አንጾኪያ፡ወረከቦ፡ለቅዱስ፡ድምትርያኖስ፡እንዘ፡ይደዊ፡ወነገሮ፡ኵሎ፡ዘከመ፡በጽሖ፡እምኀበ፡ንጉሥ፡ወነበረ፡ምስሌሁ፡ውስተ፡፩፡ደብር፡እምአድባራተ፡ሀገረ፡ኣንጾኪያ።
ወቅዱሳንሰ፡አግናጥዮስ፡ወዮናክንዲኖስ፡ሊቀ፡ጳጳሳት፡ዘሮሜ፡አስተርአይዎ፡ለንጉሥ፡ሉልያኖስ፡ከሐዲ፡ወምስሌሆሙ፡፩፡ብእሲ፡ዘመፍርህ፡ጥቀ፡ወግሩም፡ፈድፋደ፡ውእቱሰ፡ይቤሎ፡ለምንት፡አኅደገ፡ሀገሮሙ፡ለእሉ፡ዘእንበለ፡ሊቀ፡ጳጳሳት፡ናሁ፡እግዚአብሔር፡ያአትት፡ነፍሰከ፡እምኔከ፡ወትመውት፡ውስተ፡እደዊሆሙ፡ለጸላእትከ። ወይቤሎ፡ንጉሥ፡ምንተ፡እግበር፡ኦእግዚእየ፡አውሥእዎ፡እሙንቱ፡ወይቤልዎ፡ተአምንሁ፡በሕማማተ፡ወልደ፡እግዚአብሔር፧ አውሥአ፡ወይቤሎሙ፡እወ፡አአምን፡አንሰ፡ወይቤልዎ፡ፈኑ፡መልእክተ፡ወአብጽሖ፡ለወልድነ፡ክልስቲያኖስ፡ወሚጦ፡ውስተ፡መንበሩ።
ወሶበ፡ነቅሐ፡እምንዋሙ፡ንጉሥ፡ፈርሀ፡ወርዕደ፡ወጸሐፈ፡መልእክተ፡ኀበ፡ድምትርያኖስ፡እንዘ፡ይብል፡ኢትኀዝን፡ላዕሌየ፡በእንተ፡ክልስትያኖስ፡ወእስእለከ፡ከመ፡ትምርሖሙ፡ለላእካነ፡ዚአየ፡ወታብጽሖሙ፡ኀበ፡ሀሎ፡ክልስትያኖስ፡ከመ፡ይትመየጥ፡ኀበ፡ሢመቱ።
ወሶበ፡በጽሑ፡ላእካኒሁ፡ለንጉሥ፡ረከብዎ፡ለቅዱስ፡ክልስትያኖስ፡ወሜጥዎ፡ኀበ፡ሀገረ፡ሮሜ፡በክብር፡ዓቢይ፡ወተቀበልዎ፡በፍሥሐ፡ዓቢይ። ወበውእቱ፡መዋዕል፡ተመይጠ፡ንጉሥ፡እምፀብዕ፡ምስለ፡መዊዕ፡ወነበረት፡ቤተ፡ክርስቲያን፡በዳኅና፡ወበሰላም።
ወሶበ፡ክሕደ፡ንስጥሮስ፡ተጋብኡ፡በእንቲአሁ፡ማኅበረ፡ጉባኤ፡ወኢተክህሎ፡ለቅዱስ፡ክልስቲያኖስ፡ከመ፡ይብጻሕ፡ውስተ፡ጉባኤሆሙ፡በእንተ፡ደዌሁ፡ወርሥዕናሁ፡ወፈነወ፡፪ተ፡ቀሳውስተ፡ወምስሌሆሙ፡መልእክት፡እንተ፡ትረግሞ፡ወታወግዞ፡ለንስጥሮስ።
ወንጉሥኒ፡የአምን፡በቃሉ፡ለንስጥሮስ፡ወይሠምር፡ቦቱ፡አላ፡ይፈርሆ፡ለሊቀ፡ጳጳሳት። ወሶበ፡ፈቀደ፡እግዚአብሔር፡ከመ፡ያዕርፎ፡ለክልስቲያኖስ፡እምፃማ፡ዝንቱ፡ዓለም፡ኃላፊ፡አስተርአዩ፡ሎቱ፡ዮናክንዲኖስ፡ወአትናስዮስ፡ወይቤልዎ፡አዝዞሙ፡ለሕዝብከ፡ከመ፡ይትዓቀቡ፡እስመ፡አንተ፡ትመጽእ፡ኀቤነ፡እስመ፡እግዚእነ፡ኢየሱስ፡ዘሎቱ፡ስብሐት፡ይጼውዓከ።
ወሶበ፡ይቤ፡ዘንተ፡መሠጥ፡ውስተ፡ዛቲ፡ወይቤ፡ካዕበ፡እትነሣእ፡እሑር፡እስመ፡ናሁ፡ቅዱሳን፡የኀሥሡኒ፡ሊተ፡ወለ፪ቱ፡ካልአን፡ሀለወነ፡ንፃእ፡እምዝንቱ፡ዓለም፡እሉ፡እሙንቱ፡ቄርሎስ፡ሊቀ፡ጳጳሳት፡ዘሀገረ፡እስክንድርያ፡ወሉክያስ፡ኤጲስቆጶስ፡ዘሀገረ፡ፃን። ወዘንተ፡ብሂሎ፡አዕረፈ፡በሰላም። በረ፡ከቱ፡ተሀሉ፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።