ግዕዝ
Home Formaciones Libros Biblioteca Ge'ez Contacto
Sinaxario · Hamle

5 de Hamle

አመ፡፭፡ለሐምሌ

በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። አመ፡፭፡ለሐምሌ፡በዛቲ፡ዕለት፡ኮነ፡ስምዖሙ፡ለ፪፡ሐዋርያት፡ዓቢያን፡ሊቃናት፡ጴጥሮስ፡ወጳውሎስ።።ወጴጥሮስ፡ኮነ፡እምቤተ፡ሳይዳ፡ወውእቱ፡መሠግረ፡ዓሣ፡ወኀረዮ፡እግዚእነ፡ኢየሱስ፡በሣኒታ፡ዕለት፡ዘተጠምቀ፡ባቲ፡ወነበረ፡እንዘ፡ይትለአኮ፡ለመድኃኒነ፡ወኮነ፡ውስቴቱ፡ሃይማኖት፡ወቅንአት፡መንፈሳዊ፡ወፍቅር፡ላዕለ፡እግዚእነ። ወበእንተዝ፡ሤሞ፡እግዚእነ፡ርእሰ፡ላዕለ፡ኵሎሙ፡ሐዋርያት፡እስመ፡ሐዋርያት፡ሶበ፡ናፈቁ፡በእንተ፡ግብሩ፡ለመድኃኒነ፡እንዘ፡ይሔልዩ፡ከመ፡ውእቱ፡ኤልያስ፡ወቦ፡እምኔሆሙ፡ዘይብል፡ከመ፡ውእቱ፡ኤርምያስ፡አው፡፩፡እምነቢያት፡ቀደምት። ውእቱሰ፡ጴጥሮስ፡ተአመነ፡በቅድመ፡ኵሎሙ፡ሐዋርያት፡ወይቤ፡አንተ፡ውእቱ፡ክርስቶስ፡ወልደ፡እግዚአብሔር፡ሕያው። አሜሃ፡ኣስተብፅዖ፡እግዚእነ፡ወሰመዮ፡ኰኵሐ፡ቤተ፡ክርስቲያን። ወመጠዎ፡ሎቱ፡መራኁተ፡መንግሥተ፡ሰማያት። ወእምድኅረ፡ዕርገቱ፡ለእግዚእነ፡ነሢኦ፡ጸጋ፡መንፈስ፡ቅዱስ፡ጰራቅሊጦስ፡ቦአ፡ውስተ፡ተኵላት፡ነባብያን፡ወሰበከ፡ውስቴቶሙ፡በስሙ፡ለእግዚእነ፡ኢየሱስ፡ክርስቶስ፡ዘተሰቅለ፡ወሜጦሙ፡ለብዙኀን፡አሕዛብ፡ዘኢይትኌለቁ፡ወአብኦሙ፡ውስተ፡ሃይማኖት፡ርትዕት። ወገብረ፡እግዚአብሔር፡ዲበ፡እደ፡ዊሁ፡ተአምራተ፡ወመንክራተ፡ዓበይተ፡ዘአልቦ፡ኍልቍ፡ወጸሐፈ፡ክልኤተ፡መልእክታተ፡ወፈነዎሙ፡ኀበ፡መሃይምናን። ወለማርቆስኒ፡ተርጐመ፡ሎቱ፡ወንጌለ፡ወአጽሐፎ። ወእምዝ፡ቦአ፡ሀገረ፡ሮሜ፡ወዐርገ፡መልዕልተ፡ተያጥሮን፡ዘየዓቢ፡ኀበ፡ይትጋብኡ፡መኳንንት፡ወከልሐ፡በዓቢይ፡ቃል፡እንዘ፡ይብል፡ብፁዓን፡መሐርያን፡እስመ፡ሎሙኒ፡ይምሕርዎሙ፡ወመትሎሁ፡ቃለ፡ይቤ፡ከመዝ፡ወእለ፡ሀለዉ፡ህየ፡አርባዕቱ፡አዕማድ፡አእባን፡በ፬ቱ፡መዓዝነ፡ዓውደ፡መንበር፡ሶበ፡ሰምዑ፡ቃሎ፡ለቅዱስ፡ጴጥሮስ፡ይቤሉ፡አሜን። ወሀሎ፡፩፡ብእሲ፡ዘቦቱ፡ሰይጣን፡እምሮ፡ዓመት፡ወአውደቆ፡በይእቲ፡ሰዓት፡ወወፅአ፡እምኔሁ፡በእንተ፡ቃል፡ዘሰምዐ፡እም፡ኣዕማደ፡አእባን። ወጉቡአን፡ሰምዑ፡ዘንተ፡ወርእዩ፡ወለመኳንንተ፡ሀገር፡አኀዞሙ፡ፍርሃት፡ወአተዉ፡ውስተ፡ማኅደሮሙ፡እንዘ፡ያነክሩ። ወ፩፡እመኳንንት፡ዘስሙ፡ቀውስጦስ፡ቦአ፡ውስተ፡ቤቱ፡ወነገራ፡ለብእሲቱ፡ዘስማ፡አክሮስያ፡ዘከመ፡መሀረ፡በእንተ፡ኀዲጎቱ፡ዓለመ፡ወበእንተ፡ምሕረት፡ለነዳያን፡ወይእቲ፡ሶበ፡ሰምዓት፡ቃሎ፡ነቅሐት፡በልባ፡ወትቤ፡ዕፁብ፡ነገር፡ይደሉ፡ከመ፡ይዕቀብዎ።

ወእምዝ፡ተካየዱ፡ኅቡረ፡ከመ፡ይግበሩ፡ኵሎ፡ዘመሀረ፡ቅዱስ፡ጴጥሮስ፡ወዘረዉ፡ኵሎ፡ብዕሎሙ፡ለነዳያን፡ወለፅኑሳን።

ወእምድኅረ፡ኅዳጥ፡መዋዕል፡ለአከ፡ኀቤሁ፡ንጉሥ፡ከመ፡ይብጻሕ፡ወይትማከር፡ምስሌሁ፡በእንተ፡ግብረ፡መንግሥት፡ወሰሚዖ፡ቀውስጦስ፡ኀዘነ፡ፈድፋደ፡በእንተ፡ዘአልቦቱ፡ንዋይ፡ዘይወስድ፡አምኀ፡ለንጉሥ፡ወበእንተ፡ስንቅኒ። ወተማከረ፡ምስለ፡ብእሲቱ፡ከመ፡ያመክኒ፡በብዙኅ፡ነገር፡ወትቤሎ፡ብእሲቱ፡ሐሰ፡ለከ። ወባሕቱ፡ሑር፡አምላከ፡ቅዱስ፡ጴጥሮስ፡ያሤኒ፡ለከ። ወተንሥአ፡ወሖረ፡ኀበ፡ንጉሥ፡ወተቀበሎ፡በብዙኅ፡ትፍሥሕት። ወእምድኅረ፡፫፡ዓመት፡ተመይጠ፡ኀበ፡ሀገሩ፡ወናሁ፡ለ፪፡ደቂቁ፡ረከቦሙ፡በዘሞቱ፡ወፈርሃት፡ብእሲቱ፡ከመ፡ትንግሮ፡እሙነ፡ወአስተማሰለት፡ብዙኀ፡ነገረ፡ድኅረኒ፡ነገረቶ፡ወሰሚዖ፡ደንገፀ፡ወትቤሎ፡ኦ፡እግዚእ፡ንስአሎ፡ለእግዚአብሔር፡አምላከ፡ጴጥሮስ። ወሶበ፡ጸለዩ፡ኀበ፡እግዚአብሔር፡በጥቡዕ፡ልብ፡መጽአ፡ቃል፡ዘይብል፡ኦ፡ቀውስጦስ፡ወአክሮስያ፡እስመ፡ተወከፍክሙ፡ቃለ፡ጴጥሮስ፡ረድእየ፡እጼግወክሙ፡ደቂቀክሙ፡ሕያዋነ። ወተንሥኡ፡ሶቤሃ፡ደቂቆሙ፡ወ፩፡እምእለ፡ተንሥኡ፡ቀሌምንጦስ፡ውእቱ፡ዘኮነ፡ረድኦ፡ለዝንቱ፡ሐዋርያ፡ጴጥሮስ፡ወነገሮ፡ኵሎ፡ምሥጢራተ፡ዘርእየ፡ወዘከመ፡ርእዮ፡ለእግዚእነ፡እንዘ፡የዓርግ፡በሥጋ፡ሰማያተ፡ወአወፈዮ፡መጻሕፍተ፡ኀቡአነ፡ዘኢይደል፡ዎሙ፡ይርአይዎ፡ሰብእ።። ወለዝንቱ፡ቀሌምንጦስ፡ሤሞ፡ጳጳሰ፡ወለእኁሁ፡ዲያቆነ። ወዓዲ፡ርእየ፡ጴጥሮስ፡ራእየ፡አምሳለ፡ዕበያ፡ወክብራ፡ለእግዝእትነ፡ንጽሕት፡ወድንግልት፡ማርያም። ደመና፡ዘያስተርኢ፡በአምሳለ፡ቀስት፡በውስተ፡ደመናት፡ወዲቤሃ፡ደብተራ፡ብርሃን፡ወበውሣጤሃ፡ትነብር፡ቅድስት፡ድንግል፡ማርያም፡ወላዲተ፡አምላክ፡በሥጋ። ወየዓውድዋ፡መላእክት፡ዘውስተ፡እደዊሆሙ፡አስይፍት፡ወኰያንው፡ዘእሳት፡ወይብሉ፡ኦ፡ዓፀደ፡ወይን፡ሥምርት፡ዘሠረፀ፡እምኔኪ፡አስካለ፡በረከት፡ወብፅዕት፡አንቲ፡ኦ፡ጽርሕ፡ዘፆርኪ፡በከርሥኪ፡በግዖ፡ለእግዚአብ፡ዘየአትት፡ኃጢአተ፡ዓለም። ተፈሥሒ፡ኦ፡እመ፡ብርሃን፡ወላዲተ፡ምሕረት። ተፈሥሒ፡ኦ፡መንበረ፡መድኃኒት፡ዘነበረ፡ዲቤሃ፡አምላከ፡አማልክት። ተፈሥሒ፡ኦ፡እግዝእተ፡ኵሉ፡ፍጥረት፡ወምክሐ፡ኵሎሙ፡ደቂቀ፡ዕጓለ፡እመሕያው።። ወሶበ፡ፈጸሙ፡መላእክት፡ተአምኆታ፡አስተርአያ፡እግዚእነ፡ኢየሱስ፡ወተናገራ፡ነገረ፡ዘኢየአምሮ፡መኑሂ፡ዘይቤላ፡ዘእንበሌሃ፡ወበጊዜሃ፡አድለቅለቀት፡ምድር።

ወርእየ፡ካዕበ፡ምሥጢራተ፡ዘኢይትነገር። ወእምድኅረዝ፡አዘዞ፡እግዚእነ፡ለጴጥሮስ፡ከመ፡ይስብክ፡ውስተ፡ኵሉ፡አህጉር፡ወሰበከ፡በስብከተ፡ወንጌል፡ቅዱስ። ወእምዝ፡ሖረ፡ኀበ፡ጽንፈ፡ባሕር፡ወቦአ፡ውስተ፡ሀገር፡ዘትሰመይ፡ኢዮጴ፡ወኀበ፡ሀገረ፡ኤማኁስ፡ወኀበ፡ልድያ። ወአሐተ፡ዕለተ፡እንዘ፡ይጼሊ፡በሀገረ፡ኢዮጴ፡ዖደቶ፡ደመና፡ብርሃን፡ወመጽኦ፡ድቃስ፡ወወረደት፡ላዕሌሁ፡ሞጣሕት፡ስፍሕት፡እምሰማይ። ወሀሎ፡ውስቴታ፡አምሳሊሆሙ፡ለኵሉ፡እንስሳት፡ወአዕዋፈ፡ሰማይ፡ወአምሳለ፡ሐራውያ፡ወፀውዖ፡ቃል፡እምሰማይ፡ወይቤሎ፡ተንሥእ፡ኦ፡ጴጥሮስ፡ሕርድ፡ወብላዕ። ወይቤሎ፡ውእቱኒ፡ኢይበልዕ፡እግዚኦ፡ኵሎ፡ዘርኵስ፡ወኢይበውእ፡ውስተ፡አፉየ። ወካዕበ፡ነበቦ፡ቃል፡እንዘ፡ይብል፡ዘእግዚአብሔር፡አንጽሖ፡ኢታስተራኵስ፡አንተ። ወሰምዐ፡ዘንተ፡ቃለ፡፫ተ፡ጊዜያተ፡ለለፀውዖቱ፡ያኤምሮ፡አጽባዕት፡ኀበ፡እሙንቱ፡አምሳላተ፡እንስሳ፡ወአራዊት፡ወእምዝ፡ተሠውጠ፡ኵሉ፡ውስተ፡ሰማይ። ወበእንተ፡ዝንቱ፡ነገር፡ሖረ፡ሀገረ፡ቂሣርያ፡አጥመቆ፡ለቆርነሌዎስ፡ምስለ፡እሊአሁ። ወተመይጦ፡ነገሮሙ፡ለሐዋርያት፡አኅዋሁ፡በእንተ፡ተወክፎተ፡ቃለ፡እግዚአብሔር፡ዘአሕዛብ። ወእምድኅረዝ፡ቦአ፡ጴጥሮስ፡ምስለ፡ዮሐንስ፡ሀገረ፡አንጾኪያ፡በከመ፡እዘዞሙ፡እግዚእነ፡ወፈነዎ፡ለዮሐንስ፡ቅድመ፡ኀበ፡አንቀጸ፡ሀገር፡ከመ፡ያእምር፡ግብረ፡ሀገር፡ወተስእለ፡ዮሐንስ፡ዜናሃ፡ለሀገር፡ወረከበ፡በአፍአ፡ሀገር፡ሰብኣ፡እኩያነ፡ወተናገርዎ፡ነገረ፡ኀሡመ፡ወፈቀዱ፡ይቅትልዎ። ወተመይጠ፡እንዘ፡የኀዝን፡ወይቤሎ፡ለጴጥሮስ፡ለእመ፡ኮኑ፡እሉ፡እኩያን፡ከመዝ፡ሶበ፡ቦእነ፡ምንተ፡ንገብር፡በቅድመ፡ነገሥተ፡ዛቲ፡ሀገር፡ወመኳንንቲሃ፡ወእፎ፡ንሰብክ፡በስሙ፡ለክርስቶስ፡ዘሎቱ፡ስብሐት፤ ወንሜህር፡ሃይማኖተ። ወይቤሎ፡ጴጥሮስ፡ኢትደንግፅ፡ወኢትኀዝን፡ኦ፡ፍቁርየ። እምነገሮሙ፡ለእሉ፡እስመ፡ዘአምጽአነ፡እምኢየሩሳሌም፡ኀበ፡ዝ፡ሀገር፡በአሐቲ፡ሌሊት፡ዘመጠነ፡ፍኖቱ፡፳፡መዓልት፡በዲበ፡አፍራስ፡ውእቱ፡ያሠኒ፡ግብረነ።

ወእንዘ፡ዘንተ፡ይትናገሩ፡ቦኡ፡ውስተ፡ሀገር፡ወሰበኩ፡በስሙ፡ለእግዚአነ፡ኢየሱስ፡ክርስቶስ፡ሎቱ፡ስብሐት። ወተጋብኡ፡ላዕሌሆሙ፡ሰብአ፡ሀገር፡ወገነውተ፡አማልክት፡ወዘበጥዎሙ፡ዝብጠተ፡ዓቢየ፡ወአኀሠርዎሙ፡ወተሣለቅዎሙ፡ወላፀዩ፡መንፈቀ፡ሥዕርተ፡ርእሶሙ፡ወሞቅሕዎሙ፡ወገደፍዎሙ፡በህየ። ወእሙንቱኒ፡ጸለዩ፡ኀበ፡እግዚአብሔር፡ከመ፡ይርድኦሙ፡ወአስተርአዮሙ፡እግዚእነ፡እንዘ፡የዓውድዎ፡ኪሩቤል፡ወሱራፌል፡ወይቤሎሙ፡ኦ፡ኀሩያንየ፡ጴጥሮስ፡ወዮሐንስ፡ኢትፍርሁ፡ወኢትኀዝኑ፡እስመ፡አነ፡ህልው፡ምስሌክሙ፡እስከ፡ለዓለም። ወኢታንክሩ፡በእንተ፡ዘላፀዩ፡ርእሰክሙ፡መንፈቆ፡ለተሣልቆ፡እስመ፡ውእቱ፡ይከውነክሙ፡ምክሐ፡ወሥርዓተ፡ክብር፡ትእምርተ፡ክህነት፡ለኵሉ፡ሰብእ፡ዘይትለአክ፡ለቤተ፡ክርስቲያንየ፡ወያቄርብ፡ሥጋ፡ወደምየ። ወካህን፡ዘይመውት፡እንዘ፡ቦ፡ዝንቱ፡ትእምርት፡ዲቤሁ። አነ፡እሁቦ፡ሥርየተ፡ኀጣውኢሁ። ወዘንተ፡ብሂሎ፡ዐርገ፡እምኀቤሆሙ፡ውስተ፡ሰማይ። ወመጽአ፡ጳውሎስ፡በትእዛዘ፡እግዚአብሔር፡ወተራከቦ፡ለዮሐንስ፡ወይቤሎ፡ምንተ፡ኮንከ፡ወምንተ፡ገብሩ፡ላዕሌከ፡ሰብአ፡ይእቲ፡ሀገር፧ ወይቤሎ፡ዮሐንስ፡ኢታንክር፡እምኔየ፡እስመ፡ሊቀ፡ሐዋርያት፡ካዕበ፡በዝንቱ፡አርአያ፡ሀሎ። ወሖረ፡ጳውሎስ፡ኀበ፡ምኵራቦሙ፡ለአረሚ፡ወተናገረ፡ምስሌሆሙ፡ወአመክነየ፡ከመ፡ውእቱ፡ያመልክ፡ጣዖተ። ወወሰድዎ፡ኀበ፡ጴጥሮስ፡ወሶበ፡ርእዮ፡ጳውሎስ፡ለጴጥሮስ፡ጸፍዖ፡ወይቤሎ፡ለእመ፡ጽድቅ፡ቃልከ፡ምንተ፡ትእምርተ፡ታሬኢ፧ ወይቤሎሙ፡ለሕዝብ፡ተመይጦ፡ኀቤሆሙ፡እስኩ፡ንፍትኖ፡ለእመ፡ያነሥእ፡ሙታነ፧ ወአሥመሮሙ፡በዝንቱ።

ወሶቤሃ፡ጸለዩ፡ኵሎሙ፡ኀበ፡እግዚእነ። ወበጊዜሃ፡ተንሥአ፡ምውት፡ዘ፫ቱ፡አውራኅ፡ዘበልየ፡ወማሰነ፡ሥጋሁ፡ወገብሩ፡ካልአተ፡ተአምራተ፡ብዙኃተ፡በአሕይዎ፡ድዉያን።

ወንጉሥኒ፡ወብእሲቱ፡ተናገሩ፡ምስለ፡ጳውሎስ፡ወአምኑ፡ወዘበጠ፡ጴጥሮስ፡ውስተ፡ምድር፡ወውኅዘ፡ማይ፡ጽሩይ፡ወአጥመቅዎሙ፡በስመ፡አብ፡ወወልድ፡ወመንፈስ፡ቅዱስ፡ለንጉሥ፡ምስለ፡ሰብአ፡ቤቱ፡ወለኵሎሙ፡ሰብአ፡አንጾኪያ። ወሐነፁ፡ቤተ፡ክርስቲያን፡ወመሀርዎሙ፡ወአፅንዕዎሙ። ወእምድኅረዝ፡ፈነዉ፡ኀቤሁ፡እለ፡በሎዶቅያ፡መሃይምናን፡ከመ፡ባሕረ፡ቂሣሮስ፡አስጠመ፡ብዙኀነ፡ሰብአ፡ምስለ፡አዕፃዳቲ፡ሆሙ፡ወእንስሳሆሙ፡ውእቱኒ፡ፈነዎ፡ለዮሐንስ፡ፍቁር፡ወእንዘ፡የሐውር፡በፍኖት፡ረከበ፡በግዓ፡ወለአኮ፡ለበግዕ፡ወይቤሎ፡ሑር፡ኅበ፡ፈለገ፡ቂሣሮስ፡ወበሎ፡ረድኡ፡ለክርስቶስ፡ፈነወኒ፡ኀቤከ፡ወይቤለከ፡ከመ፡አንተ፡እሱር፡በቃለ፡እግዚአብሔር፡ወሖረ፡ውእቱ፡በግዕ፡ወገብረ፡በከመ፡አዘዞ፡ወአርመመ፡ባሕር። ወሶበ፡ርእዩ፡ዘንተ፡መንክረ፡አምኑ፡ብዙኀን፡ሕዝብ፡ዘአልቦ፡ኍልቍ፡እምከሐድያን። ወእምዝ፡ኀለፉ፡ሀገረ፡ሰማርያ፡ወሰበኩ፡ውስቴታ፡ወገብሩ፡ተአምራተ፡ወመንክራተ።

ወለሲሞን፡መሠርይ፡ዘያስሕት፡ሰብአ፡አውደቆ፡እመልዕልተ፡አየር፡ውስተ፡ምድር፡ወበዝንቱ፡ትእምርት፡አምኑ፡ብዙኀን፡ሰብእ።ወዕቁባቲሁ፡ለአክርስጶስ፡መልአከ፡ሀገር፡አምና፡በእደዊሁ፡ወዓቀባ፡ንጽሕና፡ወብዙኀት፡አንስት፡ተግኅሣ፡እምአምታቲሆን።

ወበእንተዝ፡ሰብአ፡ሀገር፡ተማከሩ፡ከመ፡ይቅትልዎ፡ወለአከት፡ብእሲቱ፡ለአውሳብዮስ፡ዓርከ፡ንጉሥ፡ኀበ፡ጴጥሮስ፡እንዘ፡ትመክሮ፡ከመ፡ይፃእ፡እምሀገረ፡ሮሜ፡ወአኀው፡ምእመናን፡ከማሁ፡ይቤልዎ። ወወፅአ፡እምሀገር፡ወወለጠ፡አስኬማሁ፡ከመ፡ኢያእምርዎ፡ወአመፀአቱ፡ረከቦ፡ለእግዚእነ፡እንዘ፡ይበውእ፡ውስተ፡ሀገር፡በአምሳለ፡ዘየአምሮ፡ቀዲሙ፡ወሰገደ፡ሎቱ፡ወይቤሎ፡አይቴ፡ተሐውር፡እግዚኦ፡አውሥኦ፡ወይቤሎ፡ኀበ፡ሮምያ፡ከመ፡እሰቀል፡ወይቤሎ፡ትሰቀልኑ፡ዳግመ። አሜሃኒ፡ተዘከረ፡ጴጥሮስ፡ቃሎ፡ለእግዚእነ፡ዘይቤሎ፡ቀዲሙ። አመ፡ልኂቅ፡አንተ፡ባዕድ፡ያቀንተከ፡ወይወስደከ፡ኀበ፡ኢፈቀድከ፡ወተመይጠ፡ኀበ፡ሀገር፡ወነገሮሙ፡ለአኀው፡ኵሎ፡ዘኮነ፡እምኀበ፡እግዚእነ፡ኢየሱስ፡ክርስቶስ፡ወሰሚዖሙ፡ኀዘኑ፡ፈድፋደ። ወሶበ፡ሰምዐ፡ዜናሁ፡ኔሮን፡ንጉሥ፡አዘዘ፡የአኀዝዎ፡ወይስቅልዎ፡ውእቱኒ፡ሰአለ፡ወአስተብቍዐ፡ከመ፡ይስቅልዎ፡ቍልቍሊተ፡ወሶበ፡ሰቀልዎ፡ነገሮሙ፡ለመሃይምናን፡ነገረ፡ውስተ፡ሃይማኖት፡ሕይወት፡ወአፅንዖሙ፡ርትዕት። ወእምድኅረዝ፡መጠወ፡ነፍሶ፡ውስተ፡እዴሁ፡ለእግዚአብሔር። ጸሎቱ፡ወበረከቱ፡የሀሉ፡ምስል፡ኵልነ፡ሕዝበ፡ክርስቲያን፡ውሉዱ፡ለዓለመ፡ዓለም፡አሜን።

ሰላም፡ለከ፡ጴጥሮስ፡ተልሚድ፣ዘኢያቅበጸከ፡ተስፋ፡ነገረ፡ኑፋቄ፡ወካሕድ፣እንዘ፡ትረውፅ፡ጥቡዐ፡ለመልእክተ፡ክርስቶስ፡ወልድ፣አመ፡ለሊከ፡ወሬዛ፡ቀነትከ፡በእድ፣ወአመ፡ልኅቀ፡አቅነተከ፡ባዕድ።ሰላም፡ለጴጥሮስ፡ወለጳውሎስ፡ሱታፉ፣እምሥራሐ፡ክቡድ፡ሕማም፡ድኅረ፡አዕረፉ፣አልባሰ፡መንግሥት፡ሠናየ፡እንዘ፡ይትዓፀፉ፣ኀበ፡ተርኅወ፡ገነት፡ወኀበ፡ዕረፍታት፡ተነጽፉ፣በቅድመ፡አሐቲ፡ወለት፡ኅቡረ፡ኀለፉ።ሰላም፡ለቀውስጦስ፡ወለአክሮስያ፡ዘተበፅዑ፣በትምህርተ፡ጴጥሮስ፡ረድእ፡እስመ፡ኀየሉ፡ወጸንዑ፣ሶበ፡በጸሎት፡ኅቡረ፡አስማቲሆሙ፡ጸውዑ፣እምውስተ፡ደመና፡ከመ፡ቃለ፡ሰምዑ፣ደቂቀ፡ከርሦሙ፡ሙታነ፡አንሥኡ።

ወካዕበ፡ንዜኑ፡ዜናሁ፡ለቅዱስ፡ጳውሎስ፡ሐዋርያ፡ልሳነ፡ክርስቶስ፡ወልሳነ፡ዕፍረት፡ምዑዝ፡ወማኅቶተ፡ቤተ፡ክርስቲያን፡ወዓዘቅተ፡ጥበብ፡ወምክር፡ዘትርጓሜ፡ስሙ፡መራሒ፡ወአእኳቲ፡መርስ፡ወዛኀን። ወዝንቱ፡ጳውሎስ፡አይሁዳዊ፡እም፡ነገደ፡ብንያም፡ፈሪሳዊ፡ወልደ፡ፈሪሳዊ። ወቀዲሙ፡ስሙ፡ሳውል፡ዘበትርጓሜሁ፡ውሁብ፡ብሂል፡ወሬዛ፡ሠናየ፡ሥን፡ወልሁይ፡ወርቱዕ፡ቆሙ፡ወቂሐቱ፡ከመ፡ቅርፍተ፡ሮማን፡ወገጹ፡ብሩህ፡ወአንፉ፡ቅውም፡ወአዕይንቲሁ፡ኵሑል፡መላትሒሁ፡ከመ፡ጽጌረዳ፡ዕውደ፡ጽሕም። ወኮነ፡ማእምረ፡በሕገ፡ኦሪት፡ወቀናኢ፡በእንቲአሃ፡ወአርድእት፡መሃይምናን፡እለ፡አምኑ፡በእደዊሆሙ፡ለሐዋርያት፡ይፈርህዎ፡ፈድፋደ፡እስመ፡ውእቱ፡ነሥአ፡መባሕተ፡እምኀበ፡ሊቃነ፡ካህናት፡ወይእኅዞሙ፡ለኵሎሙ፡እለ፡ይሰብኩ፡በስሙ፡ለእግዚእነ። ወአሐተ፡ዕለተ፡እንዘ፡የሐውር፡ሀገረ፡ደማስቆ፡ከመ፡የአኀዞሙ፡ለምእመናን፡ወምስሌሁ፡ሰብእ፡ኃያላን፡ወግብተ፡በረቀ፡መብረቅ፡እምሰማይ፡ዲቤሁ፡ወወድቀ፡ዲበ፡ምድር፡ወሰምዐ፡ቃለ፡ዘይቤሎ፡“ሳውል። ሳውል። ለምንት፡ትሰድደኒ”፡ወይቤሎ፡መኑ፡አንተ፡እግዚኦ፧ ወተሠጥዎ፡እንዘ፡ይብል፡ኣነ፡ውእቱ፡ኢየሱስ፡ናዝራዊ፡ዘአንተ፡ትሰድደኒ፡ይብእሰከ፡ረጊፅ፡ውስተ፡ቀኖት፡በሊሕ፡ወባሕቱ፡ተንሥእ፡ወባእ፡ሀገረ፡ደማስቆ፡ወበህየ፡ይነግሩከ፡ዘሀለወከ፡ትግበር። ወሰብእሰ፡እለ፡ምስሌሁ፡ያፀምኡ፡ቃሎ፡ወአልቦ፡ዘይሬእዩ፡ወተንሥአ፡ሳውል፡እምድር፡ወእንዘ፡ክሡታት፡አዕይንቲሁ፡አልቦ፡ዘይሬኢ፡ወእንዘ፡ይመርሕዎ፡አብእዎ፡ደማስቆ፡ወነበረ፡ህየ፡ሠሉሰ፡ዕለታተ፡እንዘ፡ኢይበልዕ፡ወኢይሰቲ፡ወኢይሬኢ። ወሀሎ፡፩፡ብእሲ፡ዘስሙ፡ሐናንያ፡እምውስተ፡ሐዋርያት፡አስተርአዮ፡እግዚእነ፡ወይቤሎ፡ሐናንያ፡ሐናንያ፡ወይቤ፡ነየ፡እግዚእየ፡ወይቤሎ፡ተንሥእ፡ወሑር፡ሰኰተ፡እንተ፡ይብልዋ፡ርትዕት፡ወኅሥሥ፡በቤተ፡ይሁዳ፡ዘስሙ፡ሳውል፡ዘገሀረ፡ጠርሴስ፡እስመ፡ውእቱ፡ናሁ፡ይጼሊ። ወይቤሎ፡ሐናንያ፡እግዚኦ፡ሰማዕኩ፡በእንተ፡ውእቱ፡ብእሲ፡ኵሎ፡ዘገብረ፡እኩየ፡ዲበ፡ቅዱሳኒከ፡በኢየሩሳሌም፡ወበዝየኒ፡አስተበዊሖ፡በኀበ፡ሊቃነ፡ካህናት፡መጽአ፡ከመ፡ይሞቅሖሙ፡ለኵሎሙ፡እለ፡ይጼውዑ፡ስመከ። ወይቤሎ፡እግዚእነ፡እስመ፡ንዋየ፡ኅሩየ፡ረሰይክዎ፡ሊተ፡ከመ፡ይፁር፡ስምየ፡በውስተ፡አሕዛብ፡ወነገሥት፡ወደቂቀ፡እስራኤል፡ወአነ፡አርእዮ፡መጠነ፡ሀለዎ፡ይሕምም፡በእንተ፡ስምየ። ወሖረ፡ሐናንያ፡ወቦአ፡ኀበ፡ሀሎ፡ሳውል፡ወረከቦ፡እንዘ፡ይጼሊ፡ወወደየ፡እዴሁ፡ወጸለየ፡ላዕሌሁ፡ከመ፡ይርአይ፡ወይቤሎ፡ሳውል፡እኁየ!፡እግዚእነ፡ኢየሱስ፡ክርስቶስ፡ፈነወኒ፡ኀቤከ፡ዘአስተርአየከ፡በፍኖት፡እንዘ፡ትመጽእ፡ከመ፡ትርአይ፡ወይምላእ፡ላዕሌከ፡መንፈስ፡ቅዱስ። ወሶቤሃ፡ተሥዕዓ፡እምአዕይንቲሁ፡በአምሳለ፡ሣሬት፡ወተንሥአ፡ሶቤሃ፡ወተጠምቀ፡ወበልዐ፡እክለ፡ወጸንዐ፡ወነበረ፡ምስለ፡ሐዋርያት፡በደማስቆ። ወሰበከ፡በምኵራባቲሆሙ፡ወመሀረ፡በእንተ፡ኢየሱስ፡ክርስቶስ፡እንዘ፡ይብል፡ውእቱ፡ወልደ፡እግዚአብሔር። ወአንከሩ፡ኵሎሙ፡እለ፡ሰምዑ፡ወይቤሉ፡አኮኑ፡ዝንቱ፡ዘይፀብፆሙ፡ለእለ፡ይጼውዑ፡ዘንተ፡ስመ፡በኢየሩሳሌም። ወተመልአ፡ዝንቱ፡ቅዱስ፡ጳውሎስ፡እምጸጋ፡መንፈስ፡ቅዱስ፡ጰራቅሊጦስ፡ወአግሀደ፡ሃይማኖተ፡ጽድቅ፡ወበከመ፡ኮነ፡ሎቱ፡ቅንአት፡በሕገ፡ኦሪት፡ከማሁ፡ተመክዓበ፡ቅንአት፡ለሕገ፡እግዚእነ፡ኢየሱስ፡ክርስቶስ። ወሖረ፡ውስተ፡ኵሉ፡ኣጽናፈ፡ዓለም፡ወሰበከ፡በእንተ፡እግዚእነ፡ዘተሰቅለ፡ወኣምኑ፡በእዴሁ፡ብዙኀን፡አሕዛብ፡ዘአልቦሙ፡ኍልቍ። ወበጽሖ፡ምንዳቤ፡ብዙኅ፡ወዝብጠት፡ወመዋቅሕት፡ወስደት፡ወኵነኔ፡ዓቢይ፡ወናሁ፡ጽሑፍ፡ውስተ፡መልእክታቲሁ፡ወውስተ፡መጽሐፈ፡ግብረ፡ሐዋርያት። ወእንዘ፡ይገብሩ፡ግብረ፡እግዚአብሔር፡ምስለ፡ሐዋርያት፡በአንጾኪያ፡ሳውል፡ወበርናባስ፡ይቤሎሙ፡መንፈስ፡ቅዱስ፡ፍልጥዎሙ፡ሊተ፡ለሳውል፡ወለበርናባስ፡ለግብር፡ዘፈቀድክዎሙ። ወእምዝ፡ጸሙ፡ወጸለዩ፡ወወደዩ፡እዴሆሙ፡ዲቤሆሙ፡ወፈነውዎሙ፡ወተፈኒ፡መንፈስ፡ቅዱስ፡ወወረዱዎሙ፡እምኀበ፡ሴሌውቅያ፡ወእምህየ፡ነገዱ፡ቆጵሮስ፡ወወረዱ፡ሀገረ፡ስልማና፡ነገሩ፡ቃለ፡እግዚአብሔር፡በምኵራባቲሆሙ፡ለአይሁድ። ወሶበ፡አንሶሰዉ፡ውስተ፡ኵሉ፡ደሰያት፡በጽሑ፡ሀገረ፡እንተ፡ስማ፡ጳፉ፡ወረከቡ፡በህየ፡ብእሴ፡ዘሥራይ፡አይሁዳዌ፡ሐሳዌ፡ነቢየ፡ወስሙ፡በርያሱስ፡ዘሀሎ፡ኀበ፡መልአክ፡ዘስሙ፡ሰርግዮስ፡ጳውሎስ፡ብእሲ፡ጠቢብ፡ወጸውዖሙ፡ለሳውል፡ወለበርናባስ፡ፈቂዶ፡ይስማዕ፡ቃለ፡እግዚአብሔር። ወይትዋቀሦሙ፡ውእቱ፡ዘሥራይ፡ዘይብልዎ፡ኤልማስ፡እስመ፡ከመዝ፡ትርጓሜ፡ስሙ፡ወፈቂዶ፡ይክልኦ፡አሚነ፡ለመልአክ። ወመልአ፡መንፈስ፡ቅዱስ፡ላዕለ፡ሳውል፡ዘውእቱ፡ጳውሎስ፡ወነፀሮ፡ወይቤሎ፡ኦ፡ጽጉበ፡ኃጢአት፡ወኵላ፡እከይ፡ወልዱ፡ለሰይጣን፡ፀራ፡ለኵላ፡ጽድቅ። አበይከ፡ትኅድግ፡እንዘ፡ተዓሉ፡ፍኖተ፡እግዚአብሔር፡ርቱዐ። ወይእዜኒ፡ናሁ፡እደ፡እግዚአብሔር፡ላዕሌከ፡ወተዐውር፡ወኢትሬኢ፡ፀሐየ፡እስከ፡አመ፡ይበጽሕ፡ዕድሜከ። ወተጸለለ፡ሶቤሃ፡ወጸልመ፡ወኀሠሠ፡ዘይመርሖ። ወርእዮ፡መልአክ፡ደንገፀ፡ወአምነ፡በእግዚእነ። ወሀሎ፡አሐዱ፡ብእሲ፡በሀገረ፡ልስጥራን፡ዘዕዉስ፡እገሪሁ፡እምከርሠ፡እሙ፡ወዳዕሙ፡ይነብር፡እምአመ፡ኮነ፡ኢሖረ፡ግሙራ፡ወሰምዖ፡ለጳውሎስ፡እንዘ፡ይነግር፡ወነፀሮ፡ወርእዮ፡ከመቦ፡ሃይማኖት፡ወየሐዩ፡ወይቤሎ፡በዓቢይ፡ቃል፡ተንሥእ፡ወቁም፡በእገሪከ፡ርቱዐ። ወሶቤሃ፡ተንሥአ፡ወሖረ።

ወርእዮሙ፡አሕዛብ፡ዘገብረ፡ጳውሎስ፡ከልሑ፡በነገረ፡ሊቃዖንስጢ፡ወይቤሉ፡አማልክት፡ተመሰሉ፡ሰብአ፡ወወረዱ፡ኀቤነ፡ወሰመይዎ፡ለበርናባስድያ፤ ወለጳውሎስ፡ሄርሜን። እስመ፡ውእቱ፡ሊቅ፡በትምህርቱ። ወአምጽኡ፡ማሬ፡ዘድያስ፡ዘሀሎ፡ቅድመ፡ሀገር፡ምስለ፡አልሕምት፡ወመሣውዕ፡ኀበ፡አንቀጸ፡ዓፀደ፡ማኅበሮሙ፡ምስለ፡ሕዘቢሆሙ፡ወፈቀዱ፡ከመ፡ይሡዑ፡ሎሙ።።ወሰሚፆሙ፡ሐዋርያት፡በርናባስ፡ወጳውሎስ፡ሠጠጡ፡አልባሲሆሙ፡ወሖሩ፡ኀበ፡አሕዛብ፡ወከልሑ፡ሎሙ፡ወይቤልዎሙ፡አንትሙ፡ሰብእ፡ምንትኑ፡ዝ፡ነገር፧ ኣኮኑ፡ከማክሙ፡ሰብእ፡ንሕነ፡ዘንመውት፡ወንሜህረክሙ፡ከመ፡ትኅድጉ፡ዘንተ፡ከንቶ፡ወትትመየጡ፡ኀበ፡እግዚአብሔር፡ሕያው፡ዘገብረ፡ሰማየ፡ወምድረ፡ወባሕረ፡ወኵሎ፡ዘውስቴቶሙ። ወኀደጎሙ፡ለአሕዛብ፡ይሑሩ፡በግዕዞሙ፡በዘቀዲሙ፡መዋዕል፡እንዘ፡ኢየኀድግ፡ርእሶ፡ዘእንበለ፡ሰማዕት። ወይገብር፡ሠናይቶ፡ወይሁብ፡ዝናመ፡እምሰማይ፡ወያከርም፡በበ፡ዓመት፡ያፈሪ፡ወያሠምር፡ከመ፡ያጽግበነ፡ወያ፡ስተፍሥሕ፡ልበነ፡ወዘንተ፡ብሂሎሙ፡እምዕ፡ፁብ፡አኅደግዎሙ፡ኢይሡዑ፡ሎው። ወመጽኡ፡አይሁድ፡እምአንጾኪያ፡ወኢቆንያ፡ወየውህዎሙ፡ለአሕዛብ፡ከመ፡ያሕስሙ፡ልቦሙ፡ላዕሌሆሙ፡ወወገርዎ፡ለጳውሎስ፡ወሰሐብዎ፡ወአውፅእዎ፡አፍአ፡እም፡ሀገር፡ወመሰሎ፡ዘሞተ፡ወፆድዎ፡አርዳኢሁ፡ወተንሥአ፡ወቦአ፡ሀገረ።

ወበሣኒታ፡ወፅአ፡ምስለ፡በርናባስ፡ሀገረ፡ደርቤን፡ወመሀሩ፡በይእቲ፡ሀገር፡ወአብኡ፡ብዙኀነ፡ወገብኡ፡ሀገረ፡ልስጥራን፡ወኢቆንዮን፡ወአንጾኪያ፡ወአጽንዕዎሙ፡ነፍሳቲሆሙ፡ለሕዝብ። ወመሀርዎሙ፡ያጥብዑ፡በሃይማኖት፡እንዘ፡ይብሉ፡“በብዙኅ፡ሕማም፡ሀለወነ፡ንባኣ፡ለመንግሥተ፡እግዚአብሔር።”

ወሤሙ፡ሎሙ፡ቀሲሳነ፡ላዕለ፡ቤተ፡ክርስቲያን፡ወጸለዩ፡ወጾሙ፡ወአማኅፀንዎሙ፡ኀበ፡እግዚአብሔር፡ዘኪያሁ፡ተአመኑ።

ወእምዝ፡ሖሩ፡ኀበ፡አፍራቅያ፣ ወላገትያ፡ወኀበ፡ጢሮአዳ፡ወእምህየ፡ኀለፉ፡እንተ፡መቄዶንያ። ወረከቡ፡አሐተ፡ወለተ፡እንተ፡ይትዋረዳ፡ጋኔን፡ወታገብእ፡ለአጋእዝቲሃ፡ብዙኀ፡ብነተ፡ወተለወት፡ድኅሬሆሙ፡እንዘ፡ትኬልሕ፡ወትብል፡እሉ፡አግብርተ፡እግዚአብሔር፡ይሜህሩነ፡ፍኖተ፡ሕይወት፡ወኣጽሐበቶ፡ለጳውሎስ፡ወተመይጠ፡ጳውሎስ፡ወገሠፆ፡ለመንፈስ፡ርኩስ፡ዘላዕሌሃ፡በስሙ፡ለእግዚእነ፡ኢየሱስ፡ክርስቶስ፡ወሐይወት፡ይእቲ፡ወለት። ወእምድኅረዝ፡ወፅአ፡ሀገረ፡ሀለብ፡ወአሕየዋ፡ለእመ፡ጢሞቴዎስ፡ዘስማ፡በድሮና፡እምነ፡ሙታን። ወበህየ፡ፈቀዱ፡ከመ፡ይሡዑዎ፡ለአምላከ፡ዛቲ፡ሀገር፡ወወደይዎ፡ለጳውሎስ፡ውስተ፡እቶነ፡እሳት፡ወሰፍሐ፡እደዊሁ፡ማእከለ፡እቶነ፡እሳት፡በአርአያ፡ትእምርተ፡መስቀል። ወርእዮሙ፡ሰብአ፡ሀገር፡አስተብቍዕዎ፡ከመ፡ይፃእ፡ወወፅአ፡እንዘ፡ኢይለክፎ፡ምንተኒ፡እምሕማም፡ወሰገዱ፡ሎቱ፡ኵሎሙ፡ወአ፡ምኑ፡በላዕለ፡እደዊሁ፡ወአርስጦስኒ፡መኰንነ፡ሀገር፡አምነ።

ወገነውተ፡ጣዖትሰ፡ሰብዓቱ፡ጐዩ፡ወተኀብኡ፡ወጸውዖ፡ጳውሎስ፡ለምስል፡ዘወርቅ፡ዘኮነ፡አምሳለ፡ጉዛ፡መጽአ፡ወቆመ፡በአምሳለ፡አንበሳ፡ማእከለ፡ምኵራብ። ወይቤሎ፡ጳውሎስ፡አይቴ፡ሀለዉ፡ካህናቲከ፡እለ፡ያመልኩከ፧ ወይቤ፡አንበሳ፡እግዚእየ፡ተዓገሠኒ፡እስከ፡አየድዓከ፡ኀበ፡ሀለዉ፡ወሖረ፡ኀበ፡ተኀብኡ፡ወአውፅአ፡አሐደ፡እምካህናት፡እኂዞ፡በአፉሁ፡ክሣዶ፡እንዘ፡ይስሕቦ፡ከመ፡ምውት፡ወገደፎ፡ማእከለ፡ሕዝብ፡ወከመዝ፡አምጽኦሙ፡ለ፯ቲሆሙ። ወሶበ፡ርእዩ፡ሕዝብ፡ፈቀዱ፡ይቅትልዎሙ፡ለካህናተ፡ጣዖት፡ወይቤ፡ጳውሎስ፡ኢይደሉ፡ዮም፡መዊት፡በዛቲ፡ሀገር፡ዘእንበለ፡ሕይወት፡ወአጥመቆሙ፡ለኵሎሙ፡ሕዝብ።

ወይቤሎ፡ለምስለ፡ጉዛ፡ዘኮነ፡አንበሳ፡ኢትፍራህ፡አንበሳ፡በእንተ፡ዘተልእከኒ፡ይኩን፡ህላዌከ፡ውስተ፡ገዳም፡እስከ፡አመ፡እፈቅደከ፡ወሖረ፡ውእቱ፡አንበሳ፡ውስተ፡ገዳም። ወእምዝ፡ሖረ፡ጳውሎስ፡እስከ፡አካ፡ወበጽሐ፡ውስተ፡ሀገር፡ወሰምዑ፡ዜናሁ፡ኵሎሙ፡ወተጋብኡ፡ላዕሌሁ፡ወአኀዝዎ፡ወኰነንዎ፡ወአምጽኡ፡ዓዲ፡፪ተ፡አሥዋረ፡ወሰቀሱ፡እገሪሁ፡ለጳውሎስ፡ወአሰርዎ፡ምስለ፡እስክንጥስ፡ረድእ፡ወሰሐብዎሙ፡ውስተ፡ጽጐ፡ሀገር፡ወዲበ፡አእባን፡በሊሐት፡እስከ፡ውኅዘ፡ደሞሙ፡ከመ፡ማይ፡ወተነትፈ፡ሥጋሆሙ፡ወተርእየ፡አዕፅምቲሆሙ፡ወሶበ፡ጸለዩ፡አርድእት፡ኀበ፡እግዚአብሔር፡ወኮኑ፡አእባነ፡እልክቱ፡አሥዋር፡ምስለ፡ዘይነድኦሙ። ወሶበ፡ርእዩ፡ሕዝብ፡ነገርዎ፡ለመኰንን፡ውእቱኒ፡ተምዐ፡ወአዘዘ፡ያምጽእዎሙ፡ኀቤሁ፡እንዘ፡ይዌግርዎሙ፡በአእባን፡ወርእዮ፡መኰንን፡ለጳውሎስ፡ወይቤሎ፡ኦ፡ብእሴ፡ሥራይ፡አንሰ፡እኴንነከ፡ወአዘዘ፡ያምጽኡ፡፪ተ፡አሥዋረ፡ዘብርት፡ወአምጽኡ፡ቅጥራነ፡ወፒሳ፡ወተየ፡ወሥብሐ፡ወደመርዎሙ፡ወቀ፡ብዕዎሙ፡በአፍአ፡ወውስጥ፡ለ፪ቱ፡አሥዋረ፡ብርት፡ወወደይዎሙ፡ለአርድእት፡ውስቴ፡ቶሙ፡ወአብእዎሙ፡ውስተ፡እቶነ፡እሳት፡ወአ፡ንደዱ፡ላዕሌሆሙ፡እሳተ፡ሠሉሰ፡መዋዕለ፡መሠ፡ሉሰ፡ለያልየ። ወመጽአ፡እግዚእነ፡ኢየሱስ፡ክርስቶስ፡ምስለ፡መላእክቲሁ፡ወረሰዮ፡ለእቶነ፡እሳት፡ይፍልስ፡እመካኑ፡ውስተ፡ዓፀደ፡ምኵናን፡ወተመይጠ፡እሳት፡ወአውዓዮሙ፡ለሰብአ፡ሀገር። ወለእለ፡ተርፉ፡ጸውዖሙ፡ቃል፡እም፡ሰማይ፡ከመ፡ይትጋብኡ፡አሐተኔ። ወመጽእ፡ውእቱ፡አንበሳ፡ዘፈነዎ፡ቀዲሙ፡ውስተ፡ገዳም፡ወጸርሐ፡በልዑል፡ቃል፡እንዘ፡ይብል፡እመኑ፡በእግዚእነ፡ኢየሱስ፡ክርስቶስ፡ዘጳውሎስ፡ይሰብክ፡በስሙ። ወተመይጠ፡አንበሳ፡ወይቤሎሙ፡ለጳውሎስ፡ወለእስክንጥስ፡ፃኡ፡እም፡እሳት፡ከመ፡ያእምሩ፡ኃይሎ፡ሰብአ፡ሀገር። ወወፅኡ፡አሜሃ፡እምእቶነ፡እሳት፡ሕያዋኒሆሙ፡እንዘ፡ኢይውዒ፡ሥዕርተ፡ርእሶሙ፡ወአልቦ፡ላዕሌሆሙ፡ፄና፡ዘእሳት፡ወጸርሑ፡ሶቤሃ፡ሰብአ፡ሀገር፡እንዘ፡ይብሉ፡ነአምን፡በ፩፡አምላክ፡እግዚእነ፡ኢየሱስ፡ክርስቶስ፡ዘሎቱ፡ስብሐት። ወእምድኅረዝ፡አጥመቆሙ፡በስመ፡አብ፡ወወልድ፡ወመንፈስ፡ቅዱስ። ወሤሞ፡ለእስክንጥስ፡ቀሲሰ፡ወሐነፀ፡ሎሙ፡ቤተ፡ክርስቲያን። ወእምዝ፡ሖረ፡ሀገረ፡አቴና፡ወእምህየ፡ሖረ፡ኀበ፡፪፡አህጉር፡ምስለ፡ፊልጶስ፡ወሰበከ፡አኀዝዎ፡ሊቃውንተ፡ሀገር፡ወሞቅሕዎሙ፡ወወደዩ፡ሰናስለ፡ውስተ፡ክሣውዲሆሙ፡ወገብሩ፡ጌራ፡ሐፂን፡ዘይከድን፡ርእሶሙ፡ገብሩ፡አምሳለ፡እራኀ፡ዘእድ፡ወአፃብዐ፡ዘሐፂን፡ወወደዩ፡ውስተ፡እደዊሆሙ፡ወገብሩ፡ዓዲ፡አምሳለ፡መትከፍት፡ዘይበጽሕ፡እስከ፡ክሣውዲሆሙ፡ወቀነውዎሙ፡እምቅድም፡ወድኅር፡ወገብሩ፡ሠሌዳተ፡ዘሐፂን፡ዘይገለብብ፡ኵሎ፡አባላቲሆሙ፡ከመ፡ኢያስተርኢ፡ምንተኒ፡እምአባሎሙ፡ወቀነዉ፡ገበዋቲሆሙ፡ምስለ፡ሠሌዳ፡ሐፂን፡ወገብሩ፡ኣሣዕነ፡ዘሐፂን፡ወቀነውዎሙ፡እገሪሆሙ፡እስከ፡በጽሑ፡ቅንዋት፡እምሰኰና፡እግሮሙ፡እስከ፡አቍያሚ፡ሆሙ። ወገብሩ፡እምሐፂን፡አምሳለ፡ግላ፡ወመጽኡ፡ገባርያነ፡አቃቂር፡ወአምጽኡ፡መጠነ፡፩፡መክሊት፡ዓረረ፡ወጽሕርተ፡ዓቢየ፡ዘብርት፡ወ፯ተ፡ልጥረ፡ቅብዕ፡ዘሠሊጥ፡ወደ፡መሩ፡ውስቴቱ፡ሥብሐ፡ወመዓረ፡ግራ፡ወቅ፡ብዐ፡ላሕም፡ወአቃቂረ፡ብዙኀ፡ዘያነድዶ፡ለላ፡ህበ፡እሳት፡ወፒሳ፡ወተየ፡ወቅጥራነ፡ወ፯ተ፡ልጥረ፡እምነ፡ቀልፎልያ፡ወቀለምጼዳ፡ወሰጠ፡ጵዮን፡ወዕፀወ፡ብዙኅ፡ወአምጽኡ፡አቃቂረ፡በእሳት፡በውስተ፡ጽሕርት፡ዘአምሐውዎ፡ወሶጥዎ፡ውስተ፡ሠሌዳት፡ዘሐፃውንት፡ዘላዕለ፡ሥጋሆሙ፡ለቅዱሳን፡እስከ፡ተላፀቀ፡ጥቀ፡ምስለ፡ሠሌዳተ፡ሥጋሆሙ፡ወዓዲ፡ከዓዉ፡ውእተ፡ዓረረ፡ዘአምሐውዎ፡በእሳት፡እስከ፡ተለዓለ፡እምእግሮሙ፡እስከ፡ርእሶሙ። ወዓቀምዎሙ፡በዓምደ፡ሰኖባር፡ገዚፍ፡ዘኁኁ፡፭፡በእመት፡ወአንደዱ፡እሳተ፡ላዕለ፡ሐዋርያት፡ወተለዓለ፡መልዕልተ፡ሥጋሆሙ፡ነበልባለ፡እሳት። ወሐዋርያትሰ፡ጸለዩ፡ኀበ፡እግዚአብሔር፡ወወደየ፡ምሕረተ፡ላዕለ፡፩፡እመኳንንት። ወይቤሎሙ፡ለሰብእ፡ፍትሕዎሙ፡ወሶቤሃ፡ፈትሕዎሙ፡ወአእተቱ፡ሠሌዳተ፡ሐፂን፡እምላዕሌሆሙ፡ወተዝሕቀ፡ሥጋሆሙ፡አንጸፍጸፈ፡ደም፡ብዙኅ፡ዲበ፡ምድር። ወሰይጣንሰ፡ቦአ፡ውስተ፡ልበ፡ሰብአ፡ሀገር፡ወሜጥዎሙ፡ዳግመ፡ውስተ፡እሳት፡ለሐዋርያት፡አሜሃ፡ወረደ፡እግዚእነ፡እምሰማይ፡ወአጥፍኦ፡ለነበልባለ፡እሳት፡ወመጽአት፡ደመና፡ብርህት፡እንተ፡ምልእት፡ዝናም፡ወፆደት፡ሥጋሆሙ፡ለሐዋርያት፡ወሶበ፡ርእዩ፡ዘንተ፡አምኑ፡ኵሎሙ፡ሰብአ፡ሀገር። ወበይእቲ፡ሀገር፡ተኰነኑ፡ብዙኀ፡ምዕረ፡በውግረተ፡እብን፡ወምዕረ፡በንድፈተ፡አሕፃ፡ወባሕቱ፡አንሥኡ፡ብዙኀነ፡ምውታነ፡ወአጽንዕዎሙ፡ውስተ፡ሃይማኖት፡ርትዕት።

ወእምዝ፡ሖረ፡ጳውሎስ፡ውስተ፡ካልእ፡ሀገር፡ወሰበከ፡በስብከተ፡ወንጌል፡ቅዱስ፡ወአስተርአዮ፡እግዚእነ፡ኢየሱስ፡ክርስቶስ፡ሎቱ፡ስብሐት። ወይቤሎ፡ሰላም፡ለከ፡ፍቁርየ፡ወኅሩይየ፡“ኵሉ፡ዘገብረ፡ተዝካረከ፡ወጸውዐ፡ስመከ፡ወዘሐነፀ፡ቤተ፡ክርስቲያን፡ወዘጸለየ፡ውስቴታ፡ወለዘይሁብ፡ብፅዓተ፡ላቲ፡ወለ፡ዘገብረ፡ምሕረተ፡በዕለተ፡ተዝካርከ፡ለእሉ፡ኵሎሙ፡አነብሮሙ፡በመንግሥተ፡አቡየ፡ምስሌከ፡በሰማያት፡ወዘተሐንፃ፡አብያተ፡ክርስቲያናት፡በስምከ፡እሬስዮሙ፡ለመላእክትየ፡ይዕቀብዎን፡ወብዙኅ፡ኪዳነ”፡ወሀቦ፡ወአምኆ፡በአፉሁ፡ቅዱስ፡ወዓርገ፡እምኀቤሁ፡ውስተ፡ሰማይ። ወእምዝ፡አንሶሰወ፡አህጉራተ፡ብዙኀተ፡ወበጽሐ፡እስከ፡ሀገረ፡ዕልዋሪቆን፡ወርእያ፡ለእግዝእትነ፡ማርያም፡እመ፡ብርሃን፡ወአዘዘቶ፡ከም፡ይምህር፡በይእቲ፡ሀገር፡ወነገረቶ፡ብዙኀ፡ነገረ፡ወወሀበቶ፡ሰላመ፡ወዓርገት፡ውስተ፡ሰማያት። ወእምዝ፡ቦአ፡ሀገረ፡ርሜ፡ወሰበከ፡ውስቴታ፡ወአምኑ፡በእደዊሁ፡ብዙኀን፡ሰብእ፡ወአጥመቆሙ፡ጥምቀተ፡ክርስትና።

ወጸሐፈ፡መልእክታተ፡፲ወ፬ተ፡መጻሕፍተ፡ዘምሉእ፡ውስቴቶን፡ጥበብ፡ወአእምሮ፡ፍጹም። ወአሐቲ፡ጥንተ፡መልእክታቲሁ፡ዘጸሐፋ፡እንዘ፡ሀሎ፡በቆሮንቶስ፡ይእቲ፡ለሀገረ፡ሮሜ።

ወእምድኅረ፡ፈጸመ፡ሩጸቶ፡ሠናየ፡አኀዞ፡ኔሮን፡ንጉሥ፡ወኰነኖ፡ኵነኔ፡ዓቢየ፡ወአዘዘ፡ከመ፡ይምትሩ፡ርእሶ፡በሰይፍ። ወእንዘ፡የኀልፍ፡ምስለ፡ሰያፊ፡ረከበቶ፡ወለት፡እምዘመዱ፡ለኔሮን፡ንጉሥ፡ዘአምነት፡በእደዊሁ፡ወሶበ፡ርእየቶ፡ምስለ፡ውእቱ፡ሰያፊ፡በከየት፡ወናዘዛ፡ወይቤላ፡ሀብኒ፡ዓፅፈኪ፡ወአነ፡እመይጥ፡ለኪ፡ይእዜ፡ወወሀበቶ፡ዓፅፋ፡ወሖረ፡ምስለ፡ሰያፊ፡ኀበ፡መካን፡ዘይመትሩ፡ውስቴታ፡አርእስታተ። ወሶበ፡አድነነ፡ርእሶ፡ለሰያፊ፡ከደነ፡ገጾ፡በዓፅፋ፡ለይእቲ፡ወለት፡ወመተረ፡ርእሶ፡ለቅዱስ፡ጳውሎስ፡ሰያፊ፡ወኀደጎ፡ግዱፈ፡ወክዱነ፡በዓጽፋ፡ለይእቲ፡ወለት። ወሶበ፡ተመይጠ፡ውእቱ፡ሰያፊ፡ከመ፡ይንግሮ፡ለንጉሥ፡ዘከመ፡ቀተሎ፡ለጳውሎስ፡ረከበቶ፡ይእቲ፡ወለት፡ወትቤሎ፡አይቴ፡ሀሎ፡ውእቱ፡ጳውሎስ፧ ወይቤላ፡ናሁ፡ሀሎ፡ግዱፈ፡ውስተ፡መካን፡ዘይመትሩ፡ቦቱ፡አርእስተ፡ወርእሱ፡ክዱን፡በዓፅፍኪ። ወአውሥአቶ፡ወትቤሎ፡ሐሰውከ፡ናሁ፡ይእዜ፡ኀለፉ፡እምኀቤየ፡ጴጥሮስ፡ወጳውሎስ፡እንዘ፡እሙንቱ፡ይለብሱ፡አልባሰ፡ነገሥት፡ወዲበ፡ርእሶሙ፡አክሊላት፡ሥርግዋተ፡ወወሀቡኒ፡ዓፅፈ፡ዚአየ፡ወነዋ፡ርኢ፡ይእቲ፡ዓፅፍየ። ወአርአየቶ፡ኪያሃ፡ዓፅፋ፡ለውእቱ፡ሰያፊ፡ወለእለ፡ምስሌሁ፡ወአንከሩ፡ኵሎሙ፡ወአምኑ፡በእግዚእነ፡ኢየሱስ፡ክርስቶስ። ወእምቅድመ፡ዕረፍቱኒ፡ይገብር፡እግዚአብሔር፡በእደዊሁ፡ተአምራተ፡ወመንክራተ፡ዘአልቦ፡ኍልቍ፡እስከ፡ኮኑ፡ያነብርዎሙ፡ለድውያን፡ምስለ፡ዓራታቲሆሙ፡ውስተ፡ፍኖት፡ዘየኀልፍ፡ባቲ፡ጳውሎስ፡ወሶበ፡ይበጽሖሙ፡ጽላሎቱ፡የሐይዉ፡ሶቤሃ። ወእግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።

ሰላም፡ለጳውሎስ፡ሃይማኖተ፡ክርስቶስ፡ዘኣግሀደ፣እስከ፡አቍሰልዎ፡በሰይፍ፡ወመተርዎ፡ክሣደ፣ከመ፡ያግብእ፡ሕዝበ፡ህየንተ፡ቀዳሚ፡ሰደደ፤በላዕለ፡ዓብዳን፡ተመሰለ፡ዓብደ፣ወለአይሁድኒ፡ኮኖሙ፡አይሁደ።ሰላም፡ኣብል፡ዘአክርጶስ፡አንስትያ፤ዴውርስ፡ወቃርያ፡አቅባማ፡ወአቅራባንያ፤ለአክስትያና፡ሰላም፡ብእሲተ፡አልታብዮስ፡ዘሮምያ፤በቃለ፡ትምህርቱ፡ለጳውሎስ፡ሐዋርያ፤ዘምስካበ፡ስዕበት፡ወርኵስ፡ሰኪበ፡አበያ።

ወበዛቲ፡ዕለት፡ካዕበ፡ተዝካሮሙ፡ለ፸ወ፪ቱ፡አርድእት። ወይስሐቅ፡ዘኮነ፡ሰማዕተ፡በሀገረ፡ጋዛ። ወጻድቃን፡እለ፡ደብረ፡ዓሣ። በረከቶሙ፡ትኩን፡ምስሌነ፡ለዓለመ፡ዓለም፡ኣሜን።

ሰላም፡እብል፡በቃል፡ወውዋዔ፤አርድእተ፡ኢየሱስ፡፸፡ለለአስማቲክሙ፡ዘበጽዋዔ፤ኣህጉራተ፡ኵሎ፡አመ፡ፈነወክሙ፡ዘበበ፡ክልኤ፤ዘረወ፡ኢምእመናነ፡እምነ፡ምእመናን፡ጉባኤ፤በአእዳዊክሙ፡ዘተፀውረ፡መሥኤ።ሰላም፡ለከ፡ቆመ፡በቀልት፡ወዓርዝ፤ዘፈረየተከ፡ግዕዝ፤ይስሐቅ፡ጥቡዕ፡ሰማዕተ፡አምላክ፡ዓዚዝ፤ኀድፈኒ፡በጸሎትከ፡ለብእሲ፡ትኩዝ፤እማእከለ፡ማይ፡ዘላኳ፡ወጋዕዝ።ሰላም፡እብል፡እለ፡ደብረ፡ዓሣ፡አበወ፤ትርሲተ፡ዓለም፡ኵሎ፡ዘረሰይክሙ፡ዕዳወ፤በማዕቅፈ፡ጌጋይ፡እምግምዔ፡እስመ፡ቅብዕየ፡ተክዕወ፤ጸግዉኒ፡አጋዕዝትየ፡ብርሃነክሙ፡ኀትወ፤ጊዜ፡መንፈቀ፡ሌሊት፡እትቀበል፡መርዓዌ፡ሥርግዉ።ወበዛቲ፡ዕለት፡ተዝካረ፡በዓሉ፡ለሊቀ፡መላእክት፡ሳቁኤል። ትንብልናሁ፡የሀሉ፡ምስሌነ፡ለዓለም፡ወለዓለመ፡ዓለም፡ኣሜን።ሰላም፡ለከ፡ሳቁኤል፡ብሑት፤ ዲበ፡መና፡ፍስት፤ፀዊረከ፡መርኆ፡ምስለ፡መላእክት፤አርኁ፡መዝገቦ፡ለዝናመ፡ዝንቱ፡ክረምት፤በዘያሕመለምል፡ሠርፅ፡ወይሠምር፡ገራህት።ድኅረ፡ተወክፈት፡ምንዳቤ፡ወተዓገሠት፡መከራ፤በብሔረ፡ባዕድ፡ወበሀገራ፤ለቀበላሃ፡ዘመጽኡ፡በዓይነ፡መንፈስ፡ነፂራ፤ማርያም፡ነያ፡ወክርስቶስ፡በኵራ፤ብሂላ፡አዕረፈት፡መስቀል፡ክብራ።ሰላም፡ለመርቄሎስ፡ረድአ፡ጴጥሮስ፡ወልደ፡ዮና፤በቅብዐ፡ጽጌያት፡ለሥጋሁ፡ሶበ፡ቀብዐ፡በድና፤ይቤሎ፡ለሊሁ፡በቃለ፡ትሕትና፤እፎ፡በበድን፡ዘመጠነዝ፡አሕጐልከ፡ፄና፤እንዘ፡ሕያው፡አንተ፡ወአንተ፡ዳኅና።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።