2 de Hamle
አመ፡፪፡ለሐምሌበስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፪፡ለሐምሌ፡በዛቲ፡ዕለት፡አዕረፈ፡ቅዱስ፡ታዴዎስ፡ሐዋርያ፡ዘእም፲ወ፪፡ሐዋርያት፡ዓቢያን።
ለዝንቱ፡ሐዋርያ፡ቡሩክ፡ኀረዮ፡እግዚእነ፡ወሶበ፡ወረደ፡ላዕሌሁ፡መንፈስ፡ቅዱስ፡ጰራቅሊጦስ፡ሖረ፡ውስተ፡ኵሎን፡አህጉር፡ወሰበከ፡በስብከተ፡ወንጌል፡ቅዱስ፡ወሜጠሙ፡ለብዙኀን፡እምነ፡አይሁድ፡ወአረሚ፡ውስተ፡አእምሮ፡ፈጣሪሆሙ፡ወአጥመቆሙ፡ጥምቀተ፡ክርስትና።
ወአሐተ፡ዕለተ፡እንዘ፡የሐውር፡ውስተ፡ሀገረ፡ሶርያ፡አስተርአዮ፡እግዚእነ፡በአምሳለ፡ወሬዛ፡ዘሠናይ፡ራእዩ፡ወይቤሎ፡ሰላም፡ለከ፡ኦ፡ፍቁርየ፡ታዴዎስ፡ሑር፡ወኢትፍራህ፡አነ፡እሄሉ፡ምስሌከ። ወይቤ፡ሐዋርያ፡ኦ፡እግዚእየ፡ጸጋከ፡ትኩን፡ምስሌየ፡እግዚእነሰ፡ወሀቦ፡ሰላመ፡ወዓርገ፡ውስተ፡ሰማይ።
ወሶበ፡ቀርበ፡ሐዋርያ፡ውስተ፡ሀገር፡ርእየ፡ብእሴ፡አረጋዌ፡እንዘ፡የሐርስ፡ገራህቶ፡ወቀርበ፡ኀቤሁ፡ወይቤሎ፡ሰላም፡ለከ። ወካዕበ፡ይቤሎ፡ሀበኒ፡ኅብስተ፡እብላዕ፡ወይቤሎ፡አረ፡ጋዊ፡ዝየሰ፡አልብየ። ዳዕሙ፡ንበር፡ኀበ፡አሥዋር፡እስከ፡አሐውር፡ወአመጽእ፡ለከ፡ዘትበልዕ። ወይቤሎ፡ይኩን፡በከመ፡ትቤ።
ወሶበ፡ሖረ፡ውእቱ፡አረጋዊ፡ይቤ፡ሐዋርያ፡ኀፍረት፡ሊተ፡ከመ፡እንበር፡በከ፡ምስለ፡አሥዋር፡እስመ፡ብእሲኒ፡ሖረ፡ከመ፡ይግበር፡ሊተ፡ሠናየ፡ወዘንተ፡ብሂሎ፡ተንሥአ፡ወአኀዘ፡ዕርፈ፡ወከልሐ፡ላዕለ፡አሥዋር፡ከመ፡ይሕርስ፡ወዘርአ፡ሎቱ፡ቅዱስ፡ጴጥሮስ፡ሊቀ፡ሐዋርያት፡እስመ፡ውእቱ፡ሀሎ፡ምስሌሁ፡አሜሃ። ወባረከ፡ላዕለ፡ዘርእ፡ወገራህት፡በስሙ፡ለእግዚእነ፡ኢየሱስ፡ክርስቶስ፡ወሐረሰ፡አትላመ፡ወበቈለ፡ዘርእ፡አሜሃ፡ወኮነ፡ሰዊተ፡ምሉአ፡እምነ፡ሥርናይ።
ወሶበ፡ገብአ፡ውእቱ፡ብእሲ፡ነፀረ፡ገራህቶ፡ዘገብረ፡ሐዋርያ፡ወወድቀ፡ታሕተ፡እገሪሁ፡ወይቤሎ፡አምላክኑ፡አንተ፡ዘወረደ፡እምሰማይ፧ ወይቤሎ፡ታዴዎስ፡አንሰ፡ኢኮንኩ፡አምላከ፡አላ፡ገብረ፡አምላክ፡አነ። ወይቤሎ፡ውእቱ፡ብእሲ፡ህየንተ፡ሠናይት፡ዘገበርከ፡ሊተ፡እትሉከኑ፡ኀበ፡ተሐውር፧ ወይቤሎ፡ሐዋርያ፡አኮ፡መፍትው፡ትግበር፡ከመዝ፡ዳእሙ፡ንሣእ፡አሥዋረ፡ወአግብኦሙ፡ኃበ፡ሊቆሙ።
ወአስተዳልዉ፡አንተ፡ወብእሲትከ፡ዘንበልዕ፡ውስተ፡ቤትክሙ፡እስመ፡አነ፡እፈቅድ፡በዊኦታ፡ለዛቲ፡ሀገር፡ወእንበር፡ውስቴታ፡እስመ፡እግዚእነ፡ኢየሱስ፡ክርስቶስ፡ጸውዓኒ፡ውእቱሰ፡ብእሲ፡ነሥአ፡ሰዊተ፡እም፡ውእቱ፡ገራህት፡ዘዘርእዎ፡ሐዋርያት፡ወቦአ፡ውስተ፡ሀገር፡ምስለ፡አሥዋር።
ወሶበ፡ርእይዎ፡ሰብእ፡እንዘ፡ይፀውር፡ሰዊተ፡ወይቤልዎ፡እምአይቴ፡ረከብከ፡ሰዊተ፡ዮም፡አኮኑ፡ጊዜ፡ሐሪስ፡ውእቱ፡ወኢያግብአ፡ሎሙ፡ቃለ፡ወለአዋርሰ፡አግብኦሙ፡ኀበ፡እግዚኦሙ፡ወቦአ፡ውስተ፡ቤቱ፡ወአስተ፡ዳለወ፡ለሐዋርያት፡ዘይሤኒ፡ማኅደረ።
አውሥአ፡ወይቤሎሙ፡ነገሮሙ፡ዘከመ፡ገብረ፡ሐዋርያ፡ኵሎ፡መንክረ፡ወይቤልዎ፡መኳንንት፡ሑር፡ኣምጽኦ፡ኀቤነ። ወይቤሎሙ፡ጽንሑ፡ንስቲተ፡እስመ፡ይመጽእ፡ውስተ፡ቤትየ፡ወሶበ፡ይመጽእ፡አንትሙ፡ትኔፅርዎ።
ወሰይጣንሰ፡አኅሠመ፡ልበ፡መኳንንት፡ወይቤሉ፡አሌ፡ለነ፡ለእመ፡ኮነ፡ዝንቱ፡ብእሲ፡እም፲ወ፪ቱ፡ዕደው፡መሠርያን፡ወባሕቱ፡ተንሥኡ፡ንሑር፡ኀቤሁ፡ንቅትሎ፡ወአውሥኡ፡ካልአን፡ወይቤሉ፡ኢንክል፡ቀቲሎቶሙ፡እስመ፡ሰማዕነ፡ከመ፡ኢየሱስ፡አምላኮሙ፡ይገብር፡ሎሙ፡ዘፈቀዱ፡ዳዕሙ፡ንንሣእ፡ብእሲተ፡ዘማዊተ፡ወናንብራ፡ዕራቃ፡ኣፍኣ፡ሀገር፡ወሶበ፡ፈቀደ፡ይባእ፡ውስተ፡ሀገር፡ርእዮ፡ኪያሃ፡ይትመየጥ።
ወበጺሖ፡ሐዋርያ፡ርእያ፡ለብእሲት፡ዕራቃ፡ወጸለየ፡ኀበ፡እግዚእ፡እንዘ፡ይብል፡ኦ፡እግዚእየ፡ኢየሱስ፡ክርስቶስ፡ፈኑ፡ሊተ፡ሚካኤልሃ፡ሊቀ፡መላእክት፡ይስቅላ፡ለዛቲ፡ብእሲት፡በፀጕረ፡ርእሳ፡ውስተ፡ነፋስ፡እስከ፡እበውእ፡ውስተ፡ሀገር፡ወበይእቲ፡ሰዓት፡ተሰቅለት፡በፀጕረ፡ርእሳ፡እንዘ፡ይኔዕሩ፡ኵሎሙ፡መኳንንት፡ምስለ፡ሕዝብ፡ወኢርእዩ፡ዘይእኀዛ፡ይእቲሰ፡ትኬልሕ፡ወትብል፡ፍታሕ፡ሊተ፡እግዚኦ፡እመኳንንተ፡ዝንቱ፡ሀገር፧ ወኢአምነ፡አሐዱኒ፡እምሰብአ፡ዝንቱ፡ሀገር፡እስመ፡ሰይጣን፡አጽንዐ፡አልባቢሆሙ።
ወካዕበ፡ጸለየ፡ሐዋርያ፡ኀበ፡እግዚአብሔር፡ወይቤ፡አፅንዓኒ፡ላዕለ፡ተጋድሎቱ፡ለሰይጣን፡ዘተንሥአ፡ላዕሌየ፡ወሶቤሃ፡ወረደ፡ሊቀ፡ኀይላት፡ሰማይ፡ሚካኤል፡ወሰደዶሙ፡ለመናፍስት፡እኩያን፡እለ፡ይኴንኑ፡ሰብአ፡ሀገር።
ወሶቤሃ፡አውረዳ፡ለይእቲ፡ብእሲት፡ዘስቅልት፡ውስተ፡ነፋስ፡ወእምድኅረዝ፡ሤመ፡ሎሙ፡ኤጲስቆጶሳተ፡ወካህናተ፡ወአጥመቆሙ፡በስመ፡አብ፡ወወልድ፡ወመንፈስ፡ቅዱስ። ወለይእቲ፡ብእሲት፡ዘተሰቅለት፡ውስተ፡ነፋስ፡ረሰያ፡ትትለአክ፡ለቤተ፡ክርስቲያን።
ወገብረ፡ተአምረ፡ወፈወሰ፡ድዉያነ፡ወከሠተ፡አዕይንተ፡ዕዉራን፡ወበሀማን፡ተናገሩ፡ወሐንካሳን፡ሖሩ፡ርቱዐ፡ወአጋንንት፡ወፅኡ፡እምሰብእ፡ወሙታን፡ተንሥኡ፡እስከ፡አምኑ፡ኵሉ፡ሰብአ፡ሀገር።
ወተምዐ፡ሰይጣን፡ወቦአ፡ውስተ፡ልበ፡አሐዱ፡ወሬዛ፡ባዕል፡ዘያፈቅር፡ንዋየ፡ወአሥረሮ፡ላዕለ፡ሐዋርያ፡ወበጺሖ፡ኀቤሁ፡ሰገደ፡ሎቱ፡በጕሕሉት። ወይቤሎ፡ኦ፡ገብረ፡እግዚአብሔር፡አንሰ፡ብየ፡ብዙኅ፡ንዋይ፡ምንተ፡እግበር፡ከመ፡እሕየው፧ ወይቤሎ፡ሐዋርያ፡ለወሬዛ፡አፍቅሮ፡ለእግዚአብሔር፡አምላክከ፡በኵሉ፡ልብከ፡ወበኵሉ፡ኃይልከ፡ወበኵሉ፡ነፍስከ፡ኢትቅትል፡ወኢትስርቅ፡ወኢትዘሙ፡ወዘኢትፈቅድ፡ይግበሩ፡ብከ፡ሰብእ፡አንተኒ፡ኢትግበር፡ለባዕድ፡ወዓዲ፡ሢጥ፡ንዋየከ፡ወሀብ፡ምጽዋተ፡ለነዳያን፡ዘዛቲ፡ሀገር።
ወሶበ፡ሰምዐ፡ወሬዛ፡ዘንተ፡ነገረ፡ተወሰከ፡መዓተ፡ወሐነቆ፡ከመ፡ይቅትሎ፡ሶበሰ፡ኃይለ፡እግዚአብሔር፡እምኢያፅንፆ፡እምወፅአ፡አዕይንቲሁ፡በኃይለ፡ሕንቀት።
ወይቤሎ፡ሐዋርያ፡ይቤ፡እግዚእነ፡ለዘከማከ፡ባዕል፡ይቀልል፡ይኀልፍ፡ገመል፡እንተ፡ስቍረተ፡መርፍእ፡እምባዕል፡ይባእ፡ውስተ፡መንግሥተ፡እግዚአብሔር። ወይቤሎ፡ዝንቱኒ፡ነገርከ፡ኢኮነ፡ርቱዐ፡እፎ፡ይትከሀል፡ገመል፡ይባእ፡ውስተ፡ስቍረተ፡መርፍእ።
ወበይእቲ፡ሰዓት፡ኀለፈ፡ገመል፡በቅድሜሆሙ፡እንዘ፡ይስሕቦ፡፩፡ብእሲ፡ወአቀሞ፡ወኀሠሠ፡መርፍአ፡እምኀበ፡ብእሲ፡ሠያጤ፡መርፍእ፡ወሠያጤ፡መርፍእሰ፡ፈቀደ፡ይርድኦ፡ለሐዋርያ፡ወአምጽአ፡መርፍአ፡ዘርኂብ፡ስቍረቱ፡ወባረኮ፡ሐዋርያ፡ወይቤሎ፡አምጽእ፡መርፍአ፡ዘፀቢብ፡ስቍረቱ፡ከመ፡ይትከሠት፡ስብሐተ፡እግዚአብሔር፡ውስተ፡ዛቲ፡ሀገር፡ወገብረ፡በከመ፡አዘዞ፡ወአምጽኡ፡ሎቱ፡ዘፀቢብ፡ስቍረቱ።
ወሰፍሐ፡እደዊሁ፡ጸለየ፡ወይቤ፡ኦ፡እግዚእየ፡ኢየሱስ፡ክርስቶስ፡ክሥት፡ኃይለከ፡ወእምዝ፡ይቤሎ፡ለብእሲ፡ዘይእኅዝ፡ገመለ፡በስመ፡እግዚእነ፡ኢየሱስ፡ክርስቶስ፡ባእ፡አንተ፡ወገመልከ፡ውስተ፡ስቍረተ፡ዛቲ፡መርፍእ። ወቦአ፡ውእቱ፡ብእሲ፡ምስለ፡ገመሉ፡ውስተ፡ስቍረተ፡መርፍእ፡ወይቤሎ፡ሐዋርያ፡ግባእ፡ዳግመ፡ከመ፡ይጠይቁ፡ሕዝብ፡ወሶበ፡ነፀሩ፡ዘንተ፡መንክረ፡አልዓሉ፡ቃላቲሆሙ፡ወይቤሉ፡አልቦ፡ባዕድ፡አምላክ፡ዘእንበለ፡እግዚአብሔር፡አምላከ፡ታዴዎስ፡ሐዋርያ።
ወርእዮ፡ወሬዛ፡ሰገደ፡ለሐዋርያ፡ውስተ፡ምድር፡ወሰአሎ፡ከመ፡ይሥረይ፡ሎቱ፡ኃጢአቶ። ወይንሣእ፡ኵሎ፡ንዋዮ፡ወይዝርዎ፡ለነዳያን፡ወገብረ፡ሎቱ፡በከመ፡ስእለቱ፡ወመሀሮ፡ሕገ፡ሃይማኖት፡ወአጥመቆ፡ጥምቀተ፡ክርስትና፡ወለኵሎሙ፡ሰብአ፡ሀገር፡ወሀቦሙ፡ምሥጢራተ፡ቅድሳት፡ወወፅአ፡እምኀቤሆሙ፡እንዘ፡ያስተፋንውዎ፡በሰላም።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።