1 de Hamle
አመ፡፩፡ለሐምሌበስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡ወርኀ፡ሐምሌ፡ቡሩክ፡መዓልቱ፡፲ወ፬ቱ፡ሰዓት፡ወሌሊቱኒ፡፲ቱ፡ወአመ፡አሚሩ፡ለዝ፡ወርኀ፡በዛቲ፡ዕለት፡ኮነት፡ሰማዕተ፡ቅድስት፡ድንግል፡ቅፍሮንያ። ወዛቲ፡ቅድስት፡መስተጋድልት፡ወሀበት፡ርእሳ፡ለእግዚእነ፡ኢየሱስ፡ክርስቶስ፡ዘሎቱ፡ስብሐት። ወኮነት፡እኅተ፡እመ፡ምኔት፡ዘውስተ፡፩፡ገዳም፡ዘውስቴቱ፡፶፡ደናግል፡ዘማእከለ፡፪፡አፍላግ፡ዘሶርያ። ወስማ፡ለእመ፡ምኔት፡ኦርያና፡ወሐፀነታ፡በፈሪሃ፡እግዚአብሔር፡ወመሀረታ፡አንብቦ፡መጻሕፍት፡አምላካውያት፡ወኮነ፡አርአያሃ፡ሠናየ፡ወአኃዘት፡ትትጋደል፡ወትጸውም፡ወትጼሊ፡ወትተግህ፡ወትረ፡ወትፀመድ፡በሠናይ፡ገድል። ወሶበ፡አዘዘ፡ዲዮቅልጥያኖስ፡ከሐዲ፡ከመ፡ያምልኩ፡ጣዖታተ፡ወአኀዝዎሙ፡ለብዙኀን፡ክርስቲያን፡ወኮኑ፡ሰማዕተ። ወሰሚዖን፡ደናግል፡ወፅኣ፡እምደ፡ብር፡ወተኀብኣ፡ወኢተርፋ፡ውስተ፡ደብር፡ዘእንበለ፡ኦርያና፡እመ፡ምኔት፡ወዛቲ፡ቅድስት፡ቅፍሮንያ፡እኀታ። ወበሣኒታ፡መጽኡ፡ላእካኒሁ፡ለንጉሥ፡ኀበ፡ውእቱ፡ደብር፡ወአኃዝዋ፡ለእመ፡ምኔት፡ወአሰርዋ፡ወትቤሎሙ፡ዛቲ፡ቅድስት፡ቅፍሮንያ፡ንሥኡኒ፡ኪያየ፡ወኀድግዋ፡ለዛቲ፡አረጋይት፡ወሶቤሃ፡ነሥእዋ፡ወአሰርዋ፡በሰናስል፡ዘሐፂን፡ወወሰድዋ፡ኀበ፡መኰንን። ወመዋዕሊሃ፡በውእቱ፡ጊዜ፡፰፡ዓመት፡ወኮነት፡ትተልዋ፡እመ፡ምኔት፡እንዘ፡ትበኪ። ወሶበ፡አቀምዋ፡ቅድመ፡መኰንን፡ተሰአላ፡ወይቤላ፡ሡዒ፡ለአማልክት፡ወተካየዳ፡ኪዳናተ፡ብዙኃተ፡ወኢተኣዘዘት፡ሎቱ፡ወአኅ፡ሠረት፡ኪዳናቲሁ። ወአዘዘ፡ይዝብጥዋ፡በአብትር፡ወይ፡ሥጥጡ፡አልባሲሃ፡ከመ፡ይትከሠት፡ሥጋሃ። ወጸርሐት፡ላዕሌሁ፡እመ፡ምኔት፡እንዘ፡ትብል፡እግዚአብሔር፡ይሥጥቀ፡ኦ፡ዓላዊ፡ወከሐዲ፡በከመ፡አንተ፡ፈቀድከ፡ታኅሥራ፡ለዛት፡ነአስ፡ወለት። ወተምዐ፡መኰንን፡ፈድፋደ፡ወኣዘዘ፡ከመ፡ይእስርዋ፡ለቅድስት፡ቅፍሮንያ፡ወይኰንንዋ፡ውስተ፡መንኰራኵር፡ወይሥጥቁ፡ሥጋሃ፡በሞሠርት፡ወገብሩ፡ባቲ፡ዘንተ፡ኵሎ፡እስከ፡ተሠጥቀ፡ኵሉ፡አባላቲሃ፡ይእቲሰ፡ትጼሊ፡ኀበ፡እግዚአብሔር፡ወተኀሥሥ፡ረድኤተ፡ወእግዚአብሔር፡ያድኅና፡እምኵሉ፡ምንዳቤሃ፡ወኢበጽሓ፡እሙስና፡ላዕሌሃ፡ምንተኒ። ወእምድኅረዝ፡መተሩ፡ልሳና፡ወሰበሩ፡አስናኒሃ፡ወመተሩ፡መለያልያቲሃ፡ወአውዓዩ፡ሥጋሃ፡በእሳት፡ወአሕየዋ፡እግዚእነ፡ወሶበ፡ደክመ፡እምኰንኖታ፡መኰንን፡ኣዘዘ፡ይምትሩ፡ርእሳ፡በሰይፍ፡ወመተሩ፡ርእሳ፡ወነሥአት፡አክሊለ፡ስምዕ፡በመንግሥተ፡ሰማ፡ያት። ወመጽአ፡፩፡ብእሲ፡መሃይምን፡ባዕል፡ወነሥአ፡ሥጋሃ፡ወገነዛ፡በአልባስ፡ሠናያን፡ወአንበራ፡ውስተ፡ሣፁን፡ዘወርቅ፡ወኮና፡እምኔሃ፡ተአምራት፡ወመንክራት፡ብዙኃት፡እግዚአብሔር፡ይምሐረነ፡በጸሎታ፡ለኵልነ፡ሕዝበ፡ክርስቲያን፡ለዓለመ፡ዓለም፡አሜን።
ወበዛቲ፡ዕለት፡ኣዕረፉ፡ኮልዮስ፡ሊቀ፡ጳጳሳት፡ወበርተሎሜዎስ፡ወገብረ፡መድኅን፡መነኮስ፡ጻድቅ። በረከቶሙ፡ትኩን፡ምስሌነ፡ለዓለመ፡ዓለም፡አሜን።
ወበዛቲ፡ዕለት፡አዕረፉ፡፪ቱ፡ቀሳውስት፡መስተጋድላን፡ቅዱሳን፡አኀው፡ብዩክ፡ወብንያሚን። ወእሉ፡ቅዱሳን፡ኮኑ፡ቀሳውስተ፡ዘቤተ፡ክርስቲያን፡በሀገረ፡ቱና፡እምደወለ፡ቲዳ፡እምደቡበ፡ግብፅ፡ወአቡሆሙ፡መጋቤ፡ቤተ፡ክርስቲያን፡ብእሲ፡ኄር፡ወየዋህ፡ወኮኑ፡እሉ፡ውሉዱ፡ፍጹማነ፡በቅድስና።
ወእግዚአብሔር፡ይገብር፡ዲበ፡እደዊሆሙ፡ተአምራተ፡ወመንክራተ፡ዓበይተ፡ወይትፌወሱ፡ድዉያን፡እስመ፡እሙንቱ፡ኮኑ፡የሐፅብዎሙ፡ለድውያን፡እማየ፡ዓዘቅት፡ዘቤተ፡ክርስቲያን፡ወበጊዜሃ፡ይትፌወሱ፡እምደዌሆሙ።
ወሶበ፡ቀርበ፡ዕረፍቱ፡ለአቡሆሙ፡ወአሜሃ፡ለብሰ፡ብንያሚን፡ወልዱ፡ልብሰ፡ተክህኖ፡ወቦአ፡ቤተ፡መቅደስ፡ከመ፡ይቀድስ፡ቍርባነ፡ወዜነውዎ፡ከመ፡አልፀቀ፡ለመዊት፡ወይቤልዎ፡የኀሥሥ፡ኪያከ፡ይርአይከ፡ወይቤ፡ቅዱስ፡ብንያሚን፡አንሰ፡ኢይክል፡አውፅኦ፡አልባሰ፡ክህነት፡እምላዕሌየ፡እንበለ፡እፈጽም፡ቅዳሴ፡ቍርባን። ወለእመ፡ፈቀደ፡እግዚአብሔር፡ከመ፡እርእዮ፡እምቅድመ፡ዕረፍቱ፡ወእመ፡አኮ፡ፈቃደ፡እግዚአብሔር፡ይኩን።
ወከመዝ፡እንዘ፡ይፌኑ፡አቡሁ፡፫ተ፡ጊዜያተ፡ውእቱኒ፡እንዘ፡ይብል፡ከመዝ፡ወሶበ፡ፈጸመ፡ቅዳሴ፡ቍርባን፡ሖረ፡ወረከቦ፡በዘአዕረፈ፡ኀዘነ፡ፈድፋደ፡በእንተ፡ንዋየ፡ቅድሳት፡ዘቤተ፡ክርስቲያን። እስመ፡እሎንቱ፡ንዋያት፡ነበሩ፡ኀበ፡አቡሁ፡ውእቱሰ፡ኢየአምር፡ኀበ፡አንበሮሙ፡አቡሁ፡ወአምከሮ፡አባ፡ብዩስ፡ከመ፡ይሑር፡ኀበ፡ገዳመ፡አስቄጥስ፡ወይሰአሎሙ፡ለአረጋውያን፡ቅዱሳን፡በእንተ፡ንዋየ፡ቅድሳት፡ዘቤተ፡ክርስቲያን።
ወሶበ፡በጽሐ፡ኀበ፡ገዳመ፡አስቄጥስ፡ተራከበ፡ምስለ፡አባ፡ዳንኤል፡አበ፡ምኔት፡ዘገዳመ፡አስቄጥስ፡ወነገሮ፡አባ፡ዳንኤል፡ለቅዱስ፡ብንያሚን፡ኵሎ፡ዘይገብር፡ወበእንተ፡ዘመጽአ፡ኀቤሁ፡ወአመሮ፡ከመ፡ይሑር፡ኀበ፡፩፡ብእሲ፡ጻድቅ፡ወውእቱ፡ያጤይቆ፡ኵሎ፡ግብረ፡ዘመጽአ፡በእንቲአሁ።
ወእምድኅረዝ፡ተፀምደ፡ዝንቱ፡ቅዱስ፡ምስለ፡እኁሁ፡በኵሉ፡ገድል፡ሠናይ፡ወፍጹም። ወኮኑ፡መሃይምናን፡በውእቱ፡መዋዕል፡ያነብሩ፡ዘተርፈ፡እምሥጋ፡ቅዱስ፡በእንተ፡ድዉያን፡ሶበ፡አልጸቁ፡ለመዊት፡ይሜጥውዎሙ፡እምውእቱ፡ወአስተናሥኦ፡ሰይጣን፡ለከይሲ፡ወሰቆሮ፡ለሣፁን፡ወበልዐ፡ቅዱሰ፡ቍርባነ።
ወሶበ፡ኣእመሩ፡ዘንተ፡እሉ፡ቅዱሳን፡ኀዘኑ፡ፈድፋደ፡ወቀተልዎ፡ለውእቱ፡ከይሲ፡ወተማከሩ፡ከመ፡ይብልዕዎ፡ለውእቱ፡ከይሲ፡በእንተ፡ሥጋ፡ቅዱስ፡ዘበልዖ፡ወሰአልዎ፡ለእግዚእነ፡ከመ፡ያጤይቆሙ፡ለእመ፡ኮነ፡እምሥምረቱ፡ዝንቱ፡ወአስተርአዮሙ፡መልአከ፡እግዚአብሔር፡ወአዘዞሙ፡ከመ፡ይብልዕዎ፡ለውእቱ፡ከይሲ፡ወበሊዖሙ፡አዕረፉ።
ወከሠተ፡እግዚአብሔር፡ግብሮሙ፡ወገድሎሙ፡ለአሐቲ፡ቅድስት፡ድንግል፡ወነገ፡ረቶሙ፡ለሕዝብ፡በከመ፡ኮነ፡እምነ፡ቅዱሳን፡ወሐነፁ፡ሎሙ፡ቤተ፡ክርስቲያን፡ሠናይተ፡ወአስተርአየ፡እምነ፡ሥጋሆሙ፡ተአምር፡ወመንክር፡ብዙኅ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ወሀሎ፡፩፡ብእሲ፡ወሬዛ፡ዘይገብር፡ግብረ፡ዘኢይደሉ፡ወነሥአ፡በረከተ፡አኰቴት፡በእደዊሁ፡ከመ፡ይደይ፡ውስተ፡አፉሁ፡ወየ፡ብሰ፡እደዊሁ፡ወሰብእ፡እለ፡ርእይዎ፡ነገዎ፡ለሐዋርያ፡ከመ፡ኮነ።
ወጸውዖ፡ሐዋርያ፡ወይቤሎ፡ንግረኒ፡ወልድየ፡ኢትኅፈር፡ምንተ፡ገበርከ፡እስመ፡ዘለፈከ፡ጸጋሁ፡ለእግዚአብሔር፡ወሰገደ፡ውእቱ፡ብእሲ፡ታሕተ፡እገሪሁ፡ለሐዋርያ፡ወተአመነ፡ኃጢአቶ፡ወይቤሎ፡ኀሡመ፡ግብረ፡ገበርኩ፡እንዘ፡ሠናየ፡ዘገበርኩ፡ይመስለኒ። ወአፍቀርኩ፡አሐተ፡ብእሲተ፡መያሲተ፡ወእቤላ፡ከመ፡ትግበር፡ሊተ፡ዘእፈቅድ፡እምኀቤሃ፡ወሶበ፡አበየተኒ፡ነሣእኩ፡ሰይፈ፡ወቀተልክዋ።
ወሶቤሃ፡አዘዘ፡ሐዋርያ፡ያምጽኡ፡ማየ፡ወጸለየ፡ላዕለ፡ማይ፡ወይቤሎ፡ተኣመን፡ወተሐፀብ፡በእግዚእነ፡ኢየሱስ፡ክርስቶስ፡እደዊከ። ወሶበ፡ተሐፅበ፡ሐይወ፡ከመ፡ቀዳሚ።
ወይቤሎ፡ሐዋርያ፡ወናሁ፡ምርሐኒ፡ኀበ፡ሀሎ፡በድና፡ለይእቲ፡ብእሲት፡ወመርሖ፡ውእቱ፡ወአብጽሖ፡ውስተ፡መካን፡ኀበ፡ቀተላ፡ለብእሲት፡ወሶበ፡ርእያ፡ሐዋርያ፡ኀዘነ፡ፈድፋደ፡ወአዘዘ፡ያንብርዋ፡ላዕለ፡ዓራት፡ወገብሩ፡በከመ፡አዘዞሙ፡ወአንበረ፡እዴሁ፡ላዕሌሃ፡መጸለየ።
ወፈጺሞ፡ጸልዮ፡ይቤሎ፡ለዝኩ፡ወሬዛ፡ሑር፡በላ፡እኂዘከ፡እዴሃ፡አንሰ፡በእዴየ፡ቀተልኩኪ፡ወበእደ፡ዚአየ፡ኢየሱስ፡ክርስቶስ፡ያንሥእኪ። ወቀርበ፡በሃይማኖት፡ኀቤሃ፡ዝኩ፡ወሬዛ፡ወይቤ፡አመንኩ፡ብከ፡ኦ፡ክርስቶስ፡ወይእተ፡ጊዜ፡ሰሐባ፡አዴሃ፡ለይእቲ፡ብእሲት፡ወተንሥአት፡ሶቤሃ፡ወቀነፀት፡ወነበረት፡ላዕለ፡ዓራታ፡እንዘ፡ይኔፅሩ፡ሕዝብ፡ብዙኀን።
ወሶበ፡ነፀረቶ፡ለሐዋርያ፡ኀደገት፡ዓራታ፡ወሰገደት፡ታሕተ፡እገሪሁ፡ወአኀዘት፡ጽንፈ፡ልብሱ፡ወትቤ፡አይቴ፡ካልእ፡ዘምስሌከ፡ዘአማኀፀነኒ፡ኪያከ። ወይቤላ፡ሐዋርያ፡ቶማስ፡ንግርኒ፡አይቴ፡በጻሕኪ፡ወአውሥአቶ፡ወትቤሎ፡አሐዱ፡ብእሲ፡ጸሊም፡ኵለንታሁ፡ወልብሱ፡ርሱሕ፡በሕቁ፡ተመጠወኒ፡ወወሰደኒ፡መካነ፡ጽልመት፡ወቦቱ፡ብዙኅ፡በዓታት፡ወኅሡም፡መዓዛ፡ይሄኑ፡ወርኢኩ፡ግበ፡እሳት፡ወመንኰራኵረ፡እሳት፡ዘይነድድ፡ወነፋሳት፡ኅሡራን፡ውስተ፡ውእቱ፡መንኰራኵር።
ወዓዲ፡ርኢኩ፡ካልአ፡ግበ፡ዘምሉእ፡እደፈ፡ወዕፄ፡ይፈልሕ፡እምኔሁ፡ወነፋሳት፡ያንገረግሩ፡ህየ፡ወቦ፡እለ፡ስቍላን፡በልሳኖሙ፡ወቦ፡እለ፡በሥዕርቶሙ፡ወቦ፡እለ፡በእደዊሆሙ፡ወቦ፡እለ፡በእገሪሆሙ፡ወርእሶሙ፡ኀበ፡ታሕተ፡ጢስ፡ወተይ፡ይጠይስ፡ዲቤሆሙ፡ወርኢኩ፡መካነ፡ጽልመት፡ዘጽዩእ፡መዓዛሁ፡ወይቤለኒ፡ዝኩ፡ዘይመርሐኒ፡እሉ፡ነፍሳት፡ዘዘማውያን፡ወመስተዋድያን፡ወሐሳውያን፡ወሐያድያን፡ወሰረቀት፡ወቀታልያን፡ወዘኢሐወፁ፡ድዉያነ፡ወኢተዘከሩ፡ሕገ፡እግዚአብሔር፡በእንተዝ፡ናሁ፡ይትፈደዩ፡በከመ፡ምግባሮሙ።
ወይቤሎሙ፡ሐዋርያ፡ለእለ፡ሀለዉ፡ሰማዕክሙኑ፡ዘትብል፡ዛቲ፡ብእሲት፡አኮ፡ዝንቱ፡ባሕቲቱ፡ዘሀሎ፡ኵነኔ፡ዓዲ፡ሀሎ፡ዘየአኪ፡እምዝንቱ፡ወአንትሙኒ፡ተመየጡ፡ኀበ፡እግዚአብሔር፡ወኅድጉ፡ምግባረ፡ኃጢአት፡ወሕሊና፡እኩየ፡ወንበሩ፡በሃይማኖት፡ወበመንፈስ፡የዋህ፡ዘቅድሳት፡ወትነሥኡ፡ጸጋ፡እግዚአብሔር።
ወአምኑ፡ኵሉ፡ሕዝብ፡በእግዚእነ፡ወአስተጋብኡ፡ብዙኀ፡ወርቀ፡ወብሩረ፡ከመ፡የሀቡ፡ምጽዋተ፡ለነዳያን፡እስመ፡ልማዱ፡ለሐዋርያ፡ውሂበ፡ምጽዋት።
ወበጽሐ፡ዜናሁ፡ውስተ፡ኵሉ፡በሐውርት፡ወአህጉር፡ወኵሎሙ፡እለ፡ቦሙ፡ድዉያን፡ወሕሙማን፡ወእለሂ፡አጋንንት፡እኩያን፡ወወርኃውያን፡ወፅዑራን፡ይፀውርዎሙ፡በዓራታት፡ወያመጽእዎሙ፡ወያነብርዎሙ፡ውስተ፡ፍኖት፡ኀበ፡ባቲ፡የኃልፍ፡ሐዋርያ፡ወውእቱ፡ይፈውስ፡በኃይለ፡እግዚእነ፡ኢየሱስ፡ክርስቶስ፡ሎቱ፡ስብሐት። በረከቱ፡ትኩን፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።