ግዕዝ
Home Formaciones Libros Biblioteca Ge'ez Contacto
Sinaxario · Ginbot

8 de Ginbot

አመ፡፰፡ለግንቦት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፰፡ለግንቦት፡በዛቲ፡ዕለት፡ኮነ፡ዕርገቱ፡ለእግዚእነ፡ኢየሱስ፡ክርስቶስ፡ሎቱ፡ስብሐት፡በሥጋ፡ዘነሥኦ፡እምኔነ፡ውስተ፡ሰማያት። እንዘ፡ውእቱ፡ህልው፡ምስለ፡አቡሁ፡ኄር፡ወመንፈስ፡ቅዱስ፡ማኅየዊ።
2ውእቱኬ፡እምድኅረ፡ፈጸመ፡ኪነ፡ጥበቡ፡በዲበ፡ምድር፡በሕማማቲሁ፡ወሞቱ፡ወትንሣኤሁ።
3ወሶበ፡ኮነ፡ተፍጻሜተ፡፵፡መዓልት፡እምትንሣኤሁ፡ዐርገ፡ውስተ፡ሰማያት፡እንዘ፡ይነብር፡ላዕለ፡ክነፊሆሙ፡ለነፋሳት። ወተፈጸመ፡ትንቢቱ፡ለዳዊት፡ዘይቤ፡“ተፅዕነ፡ላዕለ፡ኪሩቤል፡ወሠረረ። ወሠረረ፡በክነፈ፡ነፋስ።”
4ወበዝንቱ፡ተዓውቀ፡ዕርገቶሙ፡ለእለ፡የአምኑ፡ቦቱ፡ውስተ፡ሰማያት፡ወማኅደር፡ልዕልት፡እስመ፡ኀበ፡ሀሎ፡ርእስ፡ይደሉ፡ህየ፡የሀልዉ፡መለያልይ።
5ወበከመ፡አዳም፡ተለወ፡ወበደረ፡ኀበ፡ርስታት፡ምድር፡ወኀደረ፡ውስተ፡ሲኦል፡ከማሁ፡አዳም፡ዳግማይ፡በደረ፡ወኀደረ፡ውስተ፡ርስተ፡መንግሥተ፡ሰማያት፡ወነበረ፡በየማነ፡ዕበይ።
6ወኢረሰየ፡እግዚእነ፡ዕርገቶ፡እንተ፡ትተልዋ፡ለትንሣኤሁ፡ከመ፡ኢየሐልዩ፡ዓላውያን፡ወኢይበሉ፡እስመ፡ዕርገት፡ምትሐት፡ይእቲ።
7ወእግዚእነሰ፡ነበረ፡በኪነ፡ጥበቡ፡፵፡ዕለተ፡እምድኅረ፡ትንሣኤሁ፡እንዘ፡ያፀንዕ፡ልቦሙ፡ለአርዳኢሁ፡ወያጤይቅ፡ትንሣኤሁ።
8ወተፈጸመ፡ትንቢቱ፡ለዳንኤል፡በዕርገቱ፡ለእግዚእነ፡ዘይቤ፡ርኢኩ፡ከመ፡ወልደ፡ዕጓለ፡እመሕያው፡እንዘ፡ይመጽእ፡በደመና፡ሰማይ፡እስከ፡ቀርበ፡ኀበ፡ብሉየ፡መዋዕል፡ወተውህቦ፡መንግሥት፡ወሥልጣን፡ወክብር፡ከመ፡ያምልክዎ፡ኵሎሙ፡ሕዝብ፡ወአሕዛብ። ወልሳናት፡ወበሐውርት። ወሥልጣኑ፡ዘለዓለም፡ወመንግሥቱ፡ዘኢየኀልቅ። ዘሎቱ፡ስብሐት፡ምስለ፡አቡሁ፡ኄር፡ወመንፈስ፡ቅዱስ፡ማኅየዊ፡ለዓለመ፡ዓለም፡አሜን።
ሰላም፡ለዕርገትከ፡መንገለ፡ዘአቡከ፡ታዕካ፤ከመ፡ብእሴ፡ፀብእ፡ዘይገብእ፡ምስለ፡ብዙኅ፡ምህርካ፤ኢየሱስ፡ክርስቶስ፡ቍርባነ፡ሐዲስ፡ፋሲካ፤አፅሕድ፡በቅብዕከ፡ለነፍስየ፡ሳሕካ፤ወጽልመተ፡ገጽየ፡አብርህ፡በገጽከ፡ዋካ።ሰላም፡ለዕርገትከ፡በስብሐተ፡መዝሙር፡ወመሰንቆ፤ኀይለ፡ሰማያት፡በአድለቅልቆ፤በመንበርከ፡እግዚኦ፡ለዘሞዐ፡ታረፍቆ፤እትፌሣሕ፡በዕርገትከ፡ሐሊይየ፡ጽድቆ፤ከመ፡በርዴ፡ዘያረብሕ፡ወርቆ።ህየንተ፡አዳም፡ተከድነ፡ምራዐ፡ኀዘን፡ወምንዳቤ፤ሥነ፡ዚአሁ፡ኀዲጎ፡ዘየኀቱ፡እም፡ክርስቲሎቤ፤እንዘ፡ይገብር፡ዮም፡ሥጋ፡ዚአነ፡ግልባቤ፤በቃለ፡መዝሙር፡በከመ፡ዳዊት፡ይቤ፤እግዚአብሔር፡ዓርገ፡በይባቤ።
9ወበዛቲ፡ዕለት፡ኮነ፡ስምዐ፡ቅዱስ፡ዮሐንስ፡ዘእምሀገረ፡ስንሑት።
10ለዝንቱ፡ቅዱስ፡ኮነ፡ስመ፡አቡሁ፡መቃርስ፡ወስማ፡ለእሙ፡ሐና።
11ወእንዘ፡ውእቱ፡ይርዒ፡አባግዐ፡አቡሁ፡አስተርአየ፡ሎቱ፡መልአከ፡እግዚአብሔር፡ወአርአዮ፡አክሊለ፡ብርሃን፡ወይቤሎ፡ለምንት፡አንተ፡ትነብር፡ዝየ። ወናሁ፡ተጋድሎ፡ስፉሕ፡ወአክሊላት፡ድልዋት፡ለዘይትጋደል፡በእንተ፡ስሙ፡ለክርስቶስ፡ሎቱ፡ስብሐት። ወይቤሎ፡ይእዜኒ፡ተንሥእ፡ሑር፡ኀበ፡ሀገረ፡አትሪብ፡ወተጋደል፡በህየ፡በእንተ፡ስሙ፡ለክርስቶስ፡መድኅን። ወወሀቦ፡ሰላመ፡ወሖረ፡እምኀቤሁ።
12ወሶቤሃ፡ተንሥአ፡ቅዱስ፡አባ፡ዮሐንስ፡ወተአምኆሙ፡ለአቡሁ፡ወለእሙ፡ወሖረ፡ኀበ፡ሀገረ፡አትሪብ፡ወረከቦ፡ለመኰንን፡ውስተ፡ቤተ፡ብለኔ።
13ወሶበ፡ወፅአ፡መኰንን፡እምቤተ፡ብለኔ፡ተአመነ፡በቅድሜሁ፡ገሀደ፡እንዘ፡ይብል፡ክርስቲያናዊ፡አነ፡ወምእመን፡በእግዚእየ፡ኢየሱስ፡ክርስቶስ፡ሎቱ፡ስብሐት።
14ወመጠዎ፡መኰንን፡ለ፩፡እምነ፡ሐራሁ፡ወአዘዘ፡ከመ፡ይየውሆ፡ዮጊ፡ይትመየጥ፡እምክሩ፡ወይትአዘዝ፡ሎቱ፡ወሖረ፡መኰንን፡ኀበ፡ግብሩ።
15ወነሥኦ፡ውእቱ፡ሐራዊ፡ለቅዱስ፡ወወሰዶ፡ኀበ፡ቤቱ፡ወቅዱስኒ፡ገብረ፡ተአምረ፡በቅድሜሁ፡ወአምነ፡ውእቱ፡ሐራዊ፡በእግዚእነ፡ኢየሱስ፡ክርስቶስ፡ሎቱ፡ስብሐት።
16ወሶበ፡ተመይጠ፡ውእቱ፡መኰንን፡እምግብሩ፡ተአመነ፡በቅድሜሁ፡ውእቱ፡ሐራዊ፡በእግዚእነ፡ወነሥአ፡አክሊለ፡ስምዕ፡በመንግሥተ፡ሰማያት።
17ወእምዝ፡አዘዘ፡መኰንን፡ይኰንንዎ፡ለቅዱስ፡ዮሐንስ፡ወኰነንዎ፡ኵነኔ፡ዓቢየ፡በዘዘዚአሁ፡ኵነኔያት። ወእግዚአብሔር፡ያፀንዖ፡ወያስተዔግሦ፡ወይፌኑ፡ሎቱ፡መልአኮ፡ወይ፡ፌውሶ፡ቍስላቲሁ፡ወያነሥኦ፡ጥዑየ፡ዘእንበለ፡ሙስና።
18ወእምድኅረዝ፡ፈነዎ፡ሀገረ፡እንዴናው፡ወኰነንዎ፡በህየኒ፡ኵነኔ፡ዓቢየ፡ወሶበ፡ደክመ፡እምኰንኖቱ፡አዘዘ፡መኰንን፡ይምትሩ፡ርእሶ፡በሰይፍ፡ወነሥአ፡አክሊለ፡ስምዕ፡ወመዊዕ፡በመንግሥተ፡ሰማያት።
19ወለሥጋሁኒ፡ነሥኦ፡ዮልዮስ፡ዘእምሀገረ፡አቅፍሐስ፡ወገነዞ፡ወፈነዎ፡ኀበ፡ሀገሩ፡ስንሑት፡ወመጽኡ፡ኵሎሙ፡ሰብአ፡ሀገር፡ወተቀበልዎ፡በዐቢይ፡ፍሥሐ፡ወኃሤት፡በዝማሬ፡ወበዕጣን፡በስባሔ፡ማኅሌት፡ወአንበርዎ፡ውስተ፡ቤተ፡ክርስቲያን።
20ወኮኑ፡እምሥጋሁ፡ተአምራት፡ወመንክራት፡ብዙኀት። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለዮሐንስ፡ጸጋዊተ፡ምጽዋት፡እዱ፤ባዝግና፡ብርሃን፡ጽሩየ፡እስከ፡አጥረየ፡በዐውዱ፤አመ፡አነዳሁ፡ዘሐቁ፡ወሌለዩ፡እምነ፡ድዱ፤አፍሐመ፡እሳት፡ላዕሌሁ፡አንደዱ፤ወበእብን፡ቀይሕ፡ሥጋሁ፡በርደዱ።
21ወበዛቲ፡ዕለት፡ተከለሉ፡ሰማዕታት፡ማኅበራነ፡ዮሐንስ፡፪፻፳ወ፬ቱ፡ሉሊስ፡ወማትያስ፡ንቡረ፡እድ፡ዘሲሐት። በረከቶሙ፡ተሀሉ፡ምስሌነ፡ለዓለመ፡ዓለመ፡አሜን።
ሰላም፡እብል፡ለማኅበረ፡ዮሐንስ፡ዝንቱ፤፪፻፳ወ፬ቱ፤ለዲዮናስዮስ፡ሰላም፡ምስለ፡ደቂቁ፡ወብእሲቱ፤እንዘ፡ይሴፈዉ፡ሕይወተ፡እምሕያውቱ፤እለ፡ኀረዩ፡ኅቡረ፡መዊተ፡በሞቱ።
22ወበዛቲ፡ዕለት፡አዕረፈ፡አባ፡ዳንኤል፡አበ፡ምኔት፡ዘገዳመ፡አስቄጥስ፡ጻድቅ፡ንጹሕ፡ፍጹም።
23ወሶበ፡ተሰምዐ፡ዜናሁ፡በጽሐት፡ኀቤሁ፡አንስጣስያ፡ሥይምት፡እንዘ፡ትለብስ፡አልባሰ፡መኳንንት፡ወመንኰሰት፡ኀቤሁ፡ወነበረት፡ውስተ፡በዓት፡ዘቅሩብ፡እምኔሁ፡፳ወ፰፡ዓመተ፡ወኢያእመረ፡ባቲ፡መኑሂ፡ከመ፡ይእቲ፡ብእሲት።
24ወርእዮ፡ዝንቱ፡ቅዱስ፡ለ፩፡ብእሲ፡ዘስሙ፡አውሎጊስ፡ዘይወቅር፡እብነ፡በአምሳለ፡ቍራጠ፡ወርቅ፡ኵሎ፡ዕለተ፡ወይሴሰይ፡በበንስቲት፡እምኔሁ፡ወይሴስዮሙ፡ለነዳያን፡ወለምስኪናን፡ወዘተርፈ፡ይዌግር፡ለከለባት፡ወኢይዘግብ፡ምንተኒ፡ለሳኒታሁ።
25ወሶበ፡ርእየ፡ሠናየ፡ገድሎ፡ዝንቱ፡ቅዱስ፡አባ፡ዳንኤል፡አደሞ፡ግብሩ፡ወሰአለ፡ኀበ፡እግዚአብሔር፡በእንቲአሁ፡ከመ፡የሀቦ፡ለአውሎጊስ፡ንዋየ፡ዝንቱ፡ዓለም፡ከመ፡ይወስክ፡ቦቱ፡ገቢረ፡ሠናይ፡ወምሕረት፡ወተሐበዮ፡ለአውሎጊስ።
26ወእንዘ፡ውእቱ፡ይወቅር፡እብነ፡ረከበ፡መዝገበ፡ወርቅ፡ነሥአ፡ወሖረ፡ሀገረ፡ቍስጥንጥንያ፡ወኮነ፡ሊቀ፡ሐራ፡ዘንጉሥ፡ወኀደገ፡ገቢረ፡ሠናይ፡ዘይገብር፡ቀዳሚ።
27ወሶበ፡ሰምዐ፡አባ፡ዳንኤል፡በእንተ፡ኣውሎጊስ፡ሖረ፡ቍስጥንጥንያ፡ወርእዮ፡ዘከመ፡ኮነ፡ሊቀ፡ሐራ፡ዐቢየ፡ወእንዘ፡ይሄዓን፡ዲበ፡ፈረስ፡ወየዐውድዎ፡ብዙኃን፡ሠራዊት፡በዓቢይ፡ትዕቢት፡ወኀደገ፡ምግባረ፡ሠናይ፡ዘቀዳሚ።
28ወእምዝ፡ርእየ፡ራእየ፡አባ፡ዳንኤል፡ዘከመ፡እግዚእነ፡ኢየሱስ፡ክርስቶስ፡ሎቱ፡ስብሐት። ይነብር፡ውስተ፡ዓውደ፡ምኵናን፡ወአዘዘ፡ከመ፡ይስቅልዎ፡ለአባ፡ዳንኤል፡ወይኀሥሡ፡እምኔሁ፡ነፍሶ፡ለአውሎጊስ፡ወዘከመ፡ሰአለቶ፡እግዝእትነ፡ማርያም፡ለእግዚእነ፡ኢየሱስ፡ክርስቶስ፡ሎቱ፡ስብሐት፡በእንቲአሁ።
29ወሶቤሃ፡ነቅሐ፡እምንዋሙ፡ወገብአ፡ኀበ፡ደብሩ፡ወሰአሎ፡ለእግዚአብሔር፡በእንቲአሁ፡ከመ፡ይሚጦ፡ኀበ፡ዘቀዳሚ፡ንዴቱ።
30ወአስተርአዮ፡መልአከ፡እግዚአብሔር፡ወገሠፆ፡ከመ፡ኢይትሀበል፡ላዕለ፡እግዚአብሔር፡በእንተ፡ኵነኔሁ፡ላዕለ፡ፍጥረቱ።
31ወእምድኅረዝ፡ሞተ፡ንጉሥ፡ቈስጠንጢኖስ፡ወነግሠ፡ህየንቴሁ፡ካልእ፡ንጉሥ፡ወተንሥአ፡ላዕለ፡አውሎጊስ፡ወነሥአ፡ኵሎ፡ንዋዮ፡ወፈቀደ፡ይቅትሎ፡ወጐየ፡እምኔሁ፡ከመ፡ያድኅን፡ነፍሶ፡ወገብአ፡ውስተ፡ሀገሩ፡ወአኀዘ፡ይውቅር፡እብነ፡ከመ፡ቀዳሚ።
32ወመጽአ፡ኀቤሁ፡አባ፡ዳንኤል፡ወነገሮ፡ዘከመ፡ሰቀልዎ፡በእንቲአሁ፡በራእይ፡ወዘከመ፡ኀሠሡ፡ነፍሶ፡እምኔሁ።
33ወኮነ፡ላዕሌሁ፡ለዝንቱ፡ቅዱስ፡መንፈሰ፡ትንቢት፡ወከሠተ፡እግዚአብሔር፡በእደዊሁ፡ተአምራተ፡ወመንክራተ፡ብዙኀተ።
34ወሶበ፡ፈቀዱ፡ዕልዋን፡ያውፅእዎ፡እምሃይማኖት፡ርትዕት፡ኣበየ፡ወአኀዘ፡ይእተ፡መጽሐፈ፡ዕልወት፡ወበተካ፡ወኰነኖ፡ሐራዊ፡ዘንጉሥ፡ኵነኔ፡ብዙኀ።
35ወእምድኅረዝ፡ሶበ፡ፈቀደ፡እግዚአብሔር፡ከመ፡ያዕርፎ፡ፈነወ፡ሎቱ፡መልአኮ፡ወአጠየቆ፡ጊዜ፡ፀዓቱ፡እምዝንቱ፡ዓለም።
36ወሶቤሃ፡አስተጋብኦሙ፡ለመነኮሳት፡ወናዘዞሙ፡ወአፅንዖሙ፡ወአዕረፈ፡በሰላም። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለዳንኤል፡እንዘ፡የዓውድ፡ጥቡዐ፤ዜና፡ኅሩያን፡ሰብእ፡ዘአስተጋብአ፤ዘየዓቢ፡ክብረ፡እምነ፡ቀደምቱ፡አድምዐ፤እስከ፡ፈያታይ፡በስሙ፡ኀበ፡ደብረ፡ሲሐት፡ቦአ፤በምሕፃበ፡እግሩ፡ብርሃነ፡ለዕውር፡ዘቀብአ።ወበዛቲ፡ዕለት፡ስምዐ፡ኮነ፡ቅዱስ፡መክሲሞስ፡መስተጋድል። በረከቱ፡ትኩን፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።