ግዕዝ
Home Formaciones Libros Biblioteca Ge'ez Contacto
Sinaxario · Ginbot

9 de Ginbot

አመ፡፱፡ለግንቦት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፱፡ለግንቦት፡በዛቲ፡ዕለት፡አዕረፈት፡ቅድስት፡ወንጽሕት፡እሌኒ፡ንግሥት።
2ወዛቲ፡ቅድስት፡እምሀገረ፡ሮሃ፡ወኮኑ፡አበዊሃ፡ክርስቲያነ፡ወሐፀንዋ፡በሠናይ፡ሕፅነት፡መሀርዋ፡ትምህርተ፡ቤተ፡ክርስቲያን፡ወጽሕፈተ።
3ወኮነ፡አርአያሃ፡ሠናየ፡ወወሰከት፡በሥነ፡አርአያ፡ሥጋሃ፡ሥነ፡ነፍስ።
4ወርእያ፡ንጉሥ፡ቍንስጣ፡ዘበራንጥዩ፡ለዛቲ፡ቅድስት፡ዘከመ፡ሠናይ፡አርአያሃ፡ወአውሰባ፡ወወለደ፡እምኔሃ፡ቈስጠንጢኖስሃ፡ንጉሠ፡ወሐፀነቶ፡በሠናይ፡ተሐፅኖ፡ወመሀረቶ፡ጥበበ፡ወአእምሮ።
5ወሶበ፡ነግሠ፡ወልዳ፡ርእየት፡በንዋማ፡ዘከመ፡ይቤላ፡ሑሪ፡ሀገረ፡ኢየሩሳሌም፡ወክሥቲ፡መስቀሎ፡ለክርስቶስ፡ወመካናተ፡ቅዱሳተ።
6ወአይድዓቶ፡ለወልዳ፡ዘንተ፡ራእየ፡ወፈነዋ፡ምስለ፡ሠራዊት፡ብዙኅ፡ኀበ፡ኢየሩሳሌም፡ወሐተተት፡በእንተ፡መስቀል፡ማኅየዊ፡እስከ፡አመ፡ረከበቶ።
7ወረከበት፡ምስሌሁ፡፪ተ፡መስቀላት፡እለ፡ዲቤሁ፡ተሰቅሉ፡ፈያት፡ወፈቀደት፡ከመ፡ታእምር፡አይ፡ውእቱ፡መስቀሉ፡ለክርስቶስ፡እምእሉ፡ወአይድዓ፡ቅዱስ፡መቃርስ፡ኤጲስ፡ቆጶስ፡ዘኢየሩሳሌም፡ከመ፡ውእቱ፡መስቀል፡ዘጽሑፍ፡መልዕልተ፡ርእሱ፡ዘይብል፡ዝንቱ፡ውእቱ፡ኢየሱስ፡ናዝራዊ፡ንጉሠ፡አይሁድ።
8ወእምዝ፡ኀሠሠት፡ትርአይ፡እምኔሁ፡ትእምርተ፡ወይትፌሣሕ፡ልባ፡ወሶቤሃ፡አም፡ጽአት፡፩ደ፡ምውተ፡ወአንበረቶ፡ዲቤሁ፡እሎንተ፡መስቀላተ፡ወኢተንሥአ፡ወእምዝ፡አን፡በረት፡ዲቤሁ፡መስቀሎ፡ለመድኅን። አሜሃ፡ተንሥአ፡በፈቃደ፡እግዚእነ፡ኢየሱስ፡ክርስቶስ፡ሎቱ፡ስብሐት። ወተወሰከ፡ሃይማኖታ፡ወፍሥሐ፡ዚአሃ፡ቦቱ።
9ወእምዝ፡ሐለየት፡በእንተ፡ሕንፀተ፡አብያተ፡ክርስቲያናት፡ቅዱሳት፡እለ፡ጽሑፋት፡አመ፡ዓሥሩ፡ወሰብዑ፡ለወርኀ፡መስከረም።
10ወመጠወቶ፡ለአባ፡መቃርስ፡ንዋየ፡ብዙኀ፡ከመ፡ይሕንፅ፡አብያተ፡ክርስቲያናት፡በኵሉ፡መካን።
11ወእምዝ፡ነሥአት፡መስቀለ፡ክቡረ፡ወቅንዋተ፡ወተመይጠት፡ኀበ፡ወልዳ፡ቈስጠንጢኖስ፡ወመጠወቶ፡ሎቱ፡ወተፈሥሐት፡ይእቲ፡ወንጉሥኒ፡ተፈሥሐ፡ዐቢየ፡ፍሥሐ፡ወተአምኆ፡ለመስቀል፡ክቡር፡ወአክበሮ፡ፈድፋደ፡ወገብረ፡ሎቱ፡ቤተ፡ወርቅ፡ሥርግወ፡በዕንቈ፡ባሕርይ።
12ወበአምሳለ፡ውእቱ፡መስቀል፡ገብረ፡ውስተ፡ጌራ፡መንግሥቱ፡ወውስተ፡ልጓመ፡ፈረሱ፡ከመ፡ይብጻሕ፡ቃል፡ዘጽሑፍ፡እስመ፡ልጓመ፡ፈረስ፡ዘንጉሥ፡ይከውን፡ውስቴቱ፡መድኀኒት።
13ወተጋደለት፡ዛቲ፡ቅድስት፡በኵሉ፡ተጋድሎ፡ሠናየ፡ወአሥመረቶ፡ለእግዚአብሔር፡ወሠርዓት፡ጉልታተ፡ብዙኀተ፡ለአብያተ፡ክርስቲያናት፡ወለአድባራት፡ወበእንተ፡ሲሳዮሙ፡ለነዳያን፡ወለምስኪናን።
14ወኮነ፡ኵሉ፡መዋዕለ፡ሕይወታ፡፹፡ዓመተ፡ወአዕረፈት፡በሰላም። ጸሎታ፡ወበረከታ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለእሌኒ፡ውስተ፡ምድረ፡ሕይወት፡ኤልዳ፤ምክረ፡መንፈስ፡ቅዱስ፡አመ፡ወሰዳ፤ለሐይወ፡በድን፡በለኪፈ፡መስቀል፡ቅድመ፡ዐውዳ፤እምአይቴ፡አንተ፡ትቤሎ፡ወእምአይ፡እንግዳ፤ዘተረከብከ፡ግዱፈ፡በበዳ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።