Sinaxario · Ginbot
7 de Ginbot
አመ፡፯፡ለግንቦት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፯፡ለግንቦት፡በዛቲ፡ዕለት፡አዕረፈ፡አብ፡ቅዱስ፡ወክቡር፡አባ፡አትናቴዎስ፡ሐዋርያዊ፡ሊቀ፡ጳጳሳት፡ዘሀገረ፡እስክንድርያ፡እምኍልቆሙ፡ለአበው፡ሊቃነ፡ጳጳሳት፡ዕሥራ።
2ወዝንቱ፡አብ፡ኮነ፡እምውሉደ፡ሐነፊ፡እምአረማውያን።
3ወእንዘ፡ውእቱ፡ይነብር፡ምስለ፡ሕፃናት፡ውሉደ፡ክርስቲያን፡ርእዮሙ፡እንዘ፡ይገብሩ፡ሥርዓተ፡ቤተ፡ክርስቲያን፡ወይትዋነዩ፡በበይናቲሆሙ፡ወረሰዩ፡እምኔሆሙ፡ዲያቆናተ፡ወለ፩፡ረሰይዎ፡ኤጲስቆጶሰ።
4ወሰአሎሙ፡ውእቱ፡ከመ፡ይሳተፍ፡ምስሌሆሙ፡ውስተ፡ግብረ፡ተውኔቶሙ፡ወከልእዎ፡ወይቤልዎ፡አንተሰ፡አረማዊ፡ወኢንዴመር፡ምስሌከ።
5ወይቤሎሙ፡አነ፡እከውን፡ከማክሙ፡ክርስቲያናዌ።
6ወተፈሥሑ፡ቦቱ፡ወይቤልዎ፡አንተሰ፡ትከውን፡ሊቀ፡ጳጳሳት፡ወረሰዩ፡መትሕቴሁ፡አምሳለ፡መንበር። ወአኀዙ፡ይስግዱ፡ሎቱ፡በውእቱ፡ጊዜ፡ኀለፈ፡አባ፡እለእስክንድሮስ፡ሊቀ፡ጳጳሳት፡ወርእዮሙ፡ለእሉ፡ሕፃናት፡እንዘ፡ይትዋነዩ፡ይቤሎሙ፡ለእለ፡ሀለዉ፡ምስሌሁ፡ሀለዎ፡ለዝንቱ፡ሕፃን፡ይሠየም፡ሢመተ፡ክብ፡ርተ፡ወልዕልተ።
7ወሶበ፡ሞተ፡አቡሁ፡መጽአ፡ኀበ፡አባ፡እለእስክንድሮስ፡ወአጥመቆ፡ጥምቀተ፡ክርስትና፡ወወሀበ፡ኵሎ፡ንዋዮ፡ለነዳያን፡ወለምስኪናን። ወነበረ፡ኀበ፡ዝንቱ፡አብ፡እለእስክንድሮስ፡እንዘ፡ይትሜሀር። ኵሎ፡ትምህርተ፡ወሕገ፡ቤተ፡ክርስቲያን።
8ወረሰዮ፡ሎቱ፡ወልደ፡ፍቁረ፡ወሤሞ፡ዲያቆነ፡ወተመልአ፡ጸጋ፡መንፈስ፡ቅዱስ።
9ወሶበ፡አዕረፈ፡አባ፡እለእስክንድሮስ፡ሤምዎ፡ለዝንቱ፡አብ፡አትናቴዎስ፡ሊቀ፡ጳጳሳት፡ላዕለ፡ሀገረ፡እስክንድርያ።
10ወእምድኅረ፡ሞተ፡ቈስጠንጢኖስ፡ንጉሥ፡ጻድቅ፡ወነግሠ፡ህየንቴሁ፡ወልዱ፡ቈስጠንጢኖስ፡ወኮነ፡አርዮሳዌ፡ወበዝኁ፡አርዮሳውያን፡ወሰደዶ፡ቈስጠንጢኖስ፡ንጉሥ፡ለዝንቱ፡አብ፡አትናቴዎስ፡እምሢመቱ። ወአንበረ፡ህየንቴሁ፡አሐደ፡ብእሴ፡ዘስሙ፡ግርግዮስ፡ወነበረ፡አባ፡አትናቴዎስ፡ውስተ፡ስደት፡፯ተ፡ዓመተ፡ዕሩቀ፡እመንበረ፡ሢመቱ፡ውስተ፡ብሔረ፡ምዕራብ።
11ወሀለወት፡በህየ፡ቤተ፡ጣዖት፡ወይትጋብኡ፡ውስቴታ፡ብዙኃን፡ሰብእ፡ወቦ፡ውስቴታ፡ለይእቲ፡ቤተ፡ጣዖት፡ብዙኀት፡ምግባራት፡ዘሰይጣናት።
12ውእቱሰ፡ይስእሎ፡ለእግዚእነ፡ኢየሱስ፡ክርስቶስ፡ሎቱ፡ስብሐት። እስከ፡አንኀላ፡ለይእቲ፡ቤተ፡ጣዖት።
13ወሜጠሙ፡ለኵሎሙ፡ሰብአ፡ሀገር፡ወአብኦሙ፡ውስተ፡አእምሮ፡እግዚአብሔር።
14ወእምድኅረዝ፡ሜጦ፡እግዚእነ፡ኀበ፡ሀገረ፡እስክንድርያ፡ወሰደዶ፡ለግርግዮስ፡ከሐዲ፡አርዮሳዊ።
15ወነበረ፡ካዕበ፡ዝንቱ፡አብ፡ዲበ፡መንበረ፡ሢመቱ፡፮ተ፡ዓመተ፡ወሖሩ፡አርዮሳውያን፡ኀበ፡ንጉሥ፡ወአስተዋደይዎ፡በሐሰት፡ወፈነወ፡፩ደ፡መሥፍን፡አኀዞ፡ወሞቅሖ፡ምስለ፡ሊቃነ፡ጳጳሳት፡ዘሮሜ፡ወአንጾኪያ፡ወፈነወ፡እግዚአብሔር፡መልአኮ፡ወአድኀኖ፡እምነ፡ሞቅሕ።
16ወሞተ፡ንጉሥ፡ዕልው፡ወሤሞ፡እግዚአብሔር፡ለወልዱ፡ርቱዐ፡ሃይማኖት፡ህየንቴሁ፡ወሜጦ፡ለዝንቱ፡አብ፡ኀበ፡መንበረ፡ሢመቱ፡ወነበረ፡፳ወ፪ተ፡ዓመተ፡በንድአት፡ወበሰላም።
17ወሶበ፡አዕረፈ፡ቅዱስ፡ቀውስጦስ፡ነግሠ፡እምድኅሬሁ፡ሉልያኖስ፡ከሐዲ፡ወኀሠሦ፡ለዝንቱ፡አብ፡አትናቴዎስ፡ወጐየ፡እምኔሁ፡ኀበ፡ላዕላይ፡ግብፅ፡ወነበረ፡ሀገረ፡አክሚም።
18ወእምድኅረ፡አጥፍኦ፡እግዚአብሔር፡ለሉልያኖስ፡ከሐዲ፡ኀሠሥዎ፡ሕዝብ፡ለዝንቱ፡አብ፡አትናቴዎስ፡ወሶበ፡ኢረከብዎ፡ሖሩ፡ኀበ፡አብ፡ዐቢይ፡አባ፡እንጦንዮስ፡ወነገሮሙ፡ከመ፡ውእቱ፡ሀሎ፡በሀገረ፡አክሚም።
19ወሖሩ፡ወአምጽእዎ፡እምሀገረ፡አክሚም፡በፍሥሐ፡ዓቢይ። ወነበረ፡ዲበ፡መንበረ፡ሢመቱ፡በዳኀን፡ወበሰላም፡እስከ፡አመ፡አዕረፈ።
20ወኮነ፡መዋዕለ፡ሢመቱ፡፵ወ፯ተ፡ዓመተ፡ወበእንተ፡ዘበጽሖ፡ምንዳቤ፡ወፃማ፡ብዙኅ፡ወስደት፡ተሠይመ፡ሐዋርያዊ።
21ወበጊዜ፡ዕረፍቱ፡ይቤ፡ለእመ፡ረከብኩ፡ሞገሰ፡በኀበ፡እግዚአብሔር፡አነ፡እሰግድ፡ቅድሜሁ፡ወእስእሎ፡ከመ፡ያንኅል፡ምኵራበ፡ሰንቢል፡ወእምድኅረ፡ዕረፍቱ፡ለዝንቱ፡አብ፡ፈነወ፡ንጉሥ፡ወአንኃሎ፡ለዝንቱ፡ምኵራበ፡ሰንቢል። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለአትናቴዎስ፡ከመ፡ላዕሌሁ፡ተነበዩ፤ደቂቀ፡ክርስቲያን፡ኵሉ፡እንዘ፡ይትዋነዩ፤ሊቀ፡ጳጳሳት፡ዘኮነ፡ወምእመነ፡ክርስቶስ፡ዲበ፡ንዋዩ፤ወተሰምየ፡ሐዋርያዊ፡በኵሉ፡ዓያዩ፤ከመ፡ሐሳሩ፡ብዙኅ፡ወፍድፉድ፡ሥቃዩ።ሰላም፡ለዮሐንስ፡ከመ፡አብርሃም፡በጽድቁ፤እምኍልቈ፡ከዋክብት፡ዘበዝኁ፡ወእምኆፃ፡ባሕር፡ደቂቁ፤እንዘ፡ይጼጉ፡ምጽዋተ፡ለእለ፡ይጽሕቁ፤አኅለቀ፡ልብሶ፡ወኢያትረፈ፡ለስንቁ፤እስከነ፡ተረክበ፡ውስተ፡ግብ፡ዕራቁ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።