ግዕዝ
Home Formaciones Libros Biblioteca Ge'ez Contacto
Sinaxario · Ginbot

6 de Ginbot

አመ፡፮፡ለግንቦት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፮፡ለግንቦት፡በዛቲ፡ዕለት፡ኮነ፡ሰማዕተ፡ቅዱስ፡አባ፡ይስሐቅ፡እምሀገረ፡ዳፍራ፡እምደቡበ፡ግብፅ።
2ወለዝንቱ፡ቅዱስ፡አስተርአዮ፡መልአከ፡እግዚአብሔር፡በራእየ፡ሌሊት፡ወይቤሎ፡ሑር፡ኀበ፡ሀገረ፡ጠዋ፡ከመ፡ትንሣእ፡አክሊለ፡ስምዕ፡በህየ። ወተንሥአ፡ከመ፡ይትአምኆሙ፡ለአቡሁ፡ወእሙ፡እምቅድመ፡ይሑር፡ወበከዩ፡ላዕሌሁ፡ወኢኀደግዎ፡ይሑር፡እስከ፡መጽአ፡መልአከ፡እግዚአብሔር፡ዳግመ፡ወአውፅኦ፡እምሀገሩ፡ወአብጽሖ፡ኀበ፡ጠዋ።
3ወሶበ፡በጽሐ፡ረከቦ፡ለመኰንን፡ውስተ፡ቤተ፡ብለኔ፡ወሶበ፡ወፅአ፡መኰንን፡ፀርሐ፡ቅድሜሁ፡እንዘ፡ይብል፡አነ፡ክርስቲያናዊ፡ገሀደ፡ዘአአምን፡በእግዚእየ፡ኢየሱስ፡ክርስቶስ፡ሎቱ፡ስብሐት።
4ወአዘዞ፡መኰንን፡ለ፩፡ሐራ፡ከመ፡ይንሥኦ፡ኀቤሁ፡ወይዕቀቦ፡እስከ፡አመ፡ይትመየጥ፡እምሀገረ፡ኒቅዩስ።
5ወእንዘ፡የኀልፍ፡ቅዱስ፡ምስለ፡ውእቱ፡ሐራዊ፡ሰአሎ፡፩፡ዕውር፡ዘይነብር፡ውስተ፡ፍኖት፡እንዘ፡ይብል፡ተሣሃለኒ፡ኦ፡ቅዱሱ፡ለእግዚአብሔር፡ወፈውሰኒ፡አዕይንትየ።
6ወሶቤሃ፡ሰአለ፡ቅዱስ፡አባ፡ይስሐቅ፡ኀበ፡እግዚእነ፡ኢየሱስ፡ክርስቶስ፡ሎቱ፡ስብሐት። በእንተ፡ውእቱ፡ዕውር፡ወተከሥታ፡አዕይንቲሁ።
7ወርእዮ፡ሐራዊ፡ዘንተ፡መንክረ፡አምነ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወነሥአ፡አክሊለ፡ስምዕ።
8ወእምድኅረዝ፡ኰነኖ፡መኰንን፡ኵነኔ፡ዐቢየ፡ለቅዱስ፡ወፈነዎ፡ኀበ፡ሀገረ፡ብህንሳ፡ከመ፡ይኰንንዎ፡በህየ።
9ወእንዘ፡ሀሎ፡ውስተ፡ሐመር፡ሰአለ፡ከመ፡የሀብዎ፡ጽዋዓ፡ማይ፡ወወሀቦ፡፩፡እም፡ኖትያት፡ማየ፡በጽዋዕ፡ወዕውርት፡ይእቲ፡አሐቲ፡ዓይኑ፡ወነዝኀ፡ላዕሌሁ፡ቅዱስ፡አባ፡ይስሐቅ፡ውእተ፡ማየ፡ወተከሥተት፡ዓይኑ፡ወኮነት፡ከመ፡ካልእታ።
10ወሶበ፡ርእዩ፡ሰብአ፡ሀገረ፡ብህንሳ፡ብዙኀ፡ኵነኔ፡ዘኰነንዎ፡ወዐቢያተ፡ዘይገብር፡ነሥእዎ፡ወወሰድዎ፡ኀበ፡መኰንን፡ወይቤ፡ልዎ፡ነዋ፡ብእሲሁ፡እመሂ፡ትቀትሎ፡ወእመሂ፡ትሰድዶ።
11ወሶቤሃ፡አዘዘ፡መኰንን፡ይምትሩ፡ርእሶ፡ወመተሩ፡ርእሶ፡ቅድስተ፡በሰይፍ፡ወነሥአ፡አክሊለ፡ስምዕ፡በመንግሥተ፡ሰማያት። ወሀለዉ፡ሰብእ፡መሃይምናን፡በህየ፡ወነሥኡ፡ሥጋሁ፡ወፆርዎ፡ዲበ፡መንኰራኵር፡ወሰሐ፡ብዎ፡በአልሕምት፡ወአብጽሕዎ፡ኀበ፡ሀገረ፡ዳፍራ።
12ወሶበ፡ኢረከቡ፡ሐመረ፡ከመ፡ያዕድውዎ፡ማዕዶተ፡ባሕር፡ፀዊሮሙ፡አዕደውዎ፡ሥጋሁ፡ለቅዱስ፡ይስሐቅ፡ወአብጽሕዎ፡መሃይምናን፡ውስተ፡ቤቱ፡ወአንሐልዋ፡ለቤቱ፡ወሐነፁ፡ባቲ፡ቤተ፡ክርስቲያን፡በስሙ፡ወአንበሩ፡ሥጋሁ፡ውስቴታ።
13ወኮኑ፡እምኔሁ፡ተአምራት፡ወመንክ፡ራት፡ብዙኀት። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለይስሐቅ፡በትዕግሥተ፡ሕማም፡ዘተኀየለ፤ቀኖተ፡ሐፂን፡ርሱን፡አመ፡ውስተ፡ዕዝኑ፡ተተክለ፤ኢተግኀሠ፡ዓዲ፡ወኢተአንተለ፤ድኅረ፡በመጥባሕት፡አጽፋረ፡እዴሁ፡ተነቅለ፤እንዘ፡ይወድዩ፡በቍስሉ፡ግንፋለ።
14ወበዛቲ፡ዕለት፡አዕረፈ፡ኣብ፡ክቡር፡ወቅዱስ፡አባ፡መቃርስ፡ቀሲስ፡ዘእስክንድርያ።
15ወዝንቱ፡ቅዱስ፡በመዋዕለ፡አቡሁ፡መንፈሳዊ፡አባ፡መቃርስ፡ዘየዓቢ፡ኮነ፡አበ፡ለገዳመ፡አስቄጥስ፡ወገብረ፡ትሩፋተ፡ብዙኀተ።
16ወተብህለ፡በእንቲአሁ፡ከመ፡አሐቲ፡ጻጹት፡ነሰከቶ፡ወቀተላ፡በእንተዝ፡ነስሐ፡ወኀዘነ፡በእንተ፡ቀቲሎታ፡ወወረደ፡ውስተ፡ፈለግ፡ኀበ፡ሀሎ፡ብዙኅ፡ጻጹት፡ዘውስተ፡ገዳም፡ወከሠተ፡ሥጋሁ፡ለጻጹት፡ወነበረ፡አውራኀ፡እስከ፡ኮነ፡ሥጋሁ፡ከመ፡ዝልጉሥ፡፮ተ፡ወተመይጠ፡ኀበ፡በዓቱ፡ወኢያእመሮ፡መኑሂ፡ከመ፡ውእቱ፡መቃርስ።
17ወበአሐቲ፡ጊዜ፡ቆመ፡ከመ፡ይጼሊ፡፭፡መዓልተ፡ወ፭ተ፡ለያልየ፡ወልቡ፡ውስተ፡ሰማይ፡እስከ፡ውዕዩ፡ሰይጣናት፡ወይቤሉ፡እስመ፡ዛቲ፡ፃማ፡ተዓቢ፡እምኵሉ፡ትሩፋት፡ዘገብረ።
18ወአሐተ፡ጊዜ፡ፈቀደ፡ይርአይ፡አዕዋደ፡እምአዕዋዳቲሆሙ፡ለረዓይት። ወቦአ፡ውስተ፡ገዳም፡ወነበረ፡እንዘ፡ያንሶሱ፡ዓሠርተ፡መዓልተ፡ወሀለዉ፡ምስሌሁ፡ህለታት፡ዘያነብሮሙ፡ውስተ፡ፍኖት፡ትእምርተ፡ይኩንዎ፡ሶበ፡ይትመየጥ፡ከመ፡ኢይስሐት፡ፍኖቶ።
19ወሶበ፡ደክመ፡ሰከበ፡ዲበ፡ምድር፡ያዕርፍ፡ንስቲተ።
20ወሰይጣንሰ፡መልሖሙ፡ለእሉ፡ህለታት፡ወአሠሮሙ፡ወአንበሮሙ፡ኀበ፡ርእሱ፡ለቅዱስ፡እንዘ፡ይነውም፡ሶበ፡ነቅሐ፡አባ፡መቃርስ፡ርእዮሙ፡ለእሉ፡ህለታት፡ወኀጥኦሙ፡ሶቤሃ፡አንከረ።
21ወሰምዐ፡ቃለ፡ዘይብል፡ኦ፡መቃርስ፡ለእመ፡ብከ፡ሃይማኖት፡ኢትትወላወል፡ወኢትትወከል፡በህለታት፡አላ፡እመን፡ከመ፡ዓምደ፡ብርሃን፡ዘኮነ፡ይመርሖሙ፡ለደቂቀ፡እስራኤል፡በውስተ፡ገዳም፡ውእቱ፡ይመርሐከ።
22ወሶበ፡ርእየ፡ውእተ፡ዓምደ፡ተመይጠ፡ወእንዘ፡ሀሎ፡በፍኖት፡ጸምአ፡ወፈነወ፡ሎቱ፡እግዚአብሔር፡አሐተ፡ላሕመ፡እምአልሕምተ፡ገዳም፡ሰትየ፡እምሐሊባ፡ጸግበ፡ወረወየ፡ወበጽሐ፡ኀበ፡በዓቱ።
23ወአሐተ፡ዕለተ፡መጽአት፡ኀቤሁ፡ዝእብ፡ወአኀዘት፡ትስሐብ፡አልባሲሁ፡ወተለዋ፡ኀበ፡በዓታ፡ወአውፅአት፡ሎቱ፡ሠለስተ፡ዕጓላቲሃ፡ወርእዮሙ፡ረከቦሙ፡ዕውራነ፡አዕይንት፡ወአንከረ፡እምልቡናሃ፡ለይእቲ፡ዝእብ፡አኀዞሙ፡በእደዊሁ፡ወተፍፀ፡ምራቆ፡ውስተ፡አዕይንቲሆሙ፡ወዓተቦሙ፡በአጽባዕቱ፡በትእምርተ፡መስቀል፡ማኅየዊ፡ወሐይዉ፡ሶቤሃ፡ወሮፁ፡ኀበ፡እሞሙ፡ወጠበዉ፡ጥባ፡ወተለውዋ፡እስከ፡በዓታ።
24ወእምድኅረዝ፡ተመይጠት፡ኀበ፡ቅዱስ፡መቃርስ፡ወወሀበቶ፡ማዕሰ፡ዘበግዕ፡ወአንበሮ፡ኀቤሁ፡እንዘ፡ይሰክብ፡ዲቤሁ፡እስከ፡ጊዜ፡ዕረፍቱ።
25ወአሐተ፡ጊዜ፡ወለጠ፡አልባሲሁ፡በአምሳለ፡ሕዝባውያን፡ወሖረ፡ኀበ፡ደብረ፡ቅዱስ፡አባ፡ጳኵሚስ፡ወቆመ፡፵፡መዓልተ፡በጾም፡ዓቢይ፡ኢበልዐ፡ወኢሰትየ፡ወኢነበረ፡አላ፡ይፀፍር፡ሆሣዕና፡እንዘ፡ይቀውም።
26ወይቤልዎ፡መነኮሳት፡ለአባ፡ጳኵሚስ፡አውፅኦ፡ለዝንቱ፡አብ፡ብእሲ፡እምኔነ፡እስመ፡አልቦቱ፡ሥጋ፡ወይቤሎሙ፡አባ፡ጳኵሚስ፡ተዓገሡኒ፡እስከ፡እስእሎ፡ለእግዚእነ፡ይክሥት፡ሊተ፡ግብሮ።
27ወሶበ፡ሰአለ፡ኀበ፡እግዚአብሔር፡በእንቲአሁ፡አጠየቆ፡ከመ፡ውእቱ፡መቃርስ፡እስክንድራዊ።
28ወሶቤሃ፡ሖረ፡ኀቤሁ፡አባ፡ጳኵሚስ፡ምስለ፡ኵሎሙ፡መነኮሳት፡ወተአምኅዎ፡ወተባረኩ፡እምኔሁ፡ወተፈሥሑ፡ቦቱ፡ዓቢየ፡ፍሥሐ፡ወአብእዎ፡ውስተ፡ቤተ፡መቅደስ፡ምስሌሆሙ፡ወእለ፡ኮኑ፡ይትዔበዩ፡ላዕለ፡ቢጾሙ፡በምግባሪሆሙ፡በውእቱ፡ገዳም፡ኮኑ፡ትሑታነ፡ሶበ፡ርእዩ፡ጸጋሁ፡ለዝንቱ፡አብ፡ቅዱስ፡አባ፡መቃርስ።
29ወእምድኅረዝ፡ተመይጠ፡ውስተ፡በዓቱ፡ውስተ፡ገዳመ፡አስቄጥስ።
30ወሶበ፡ተከልአ፡ዝናም፡ላዕለ፡ሀገረ፡እስክንድርያ፡ፈነወ፡ኀቤሁ፡ሊቀ፡ጳጳሳት፡አባ፡ጢሞቴዎስ፡እንዘ፡ይስእሎ፡ይምጻእ፡ኀቤሁ፡ሀገረ፡እስክንድርያ፡ከመ፡ይጸሊ፡ምስሌሁ፡እግዚአብሔር፡ያውርድ፡ዝናመ፡ወያጥፍእ፡ኣንበጣ።
31ወተንሥአ፡ወሖረ፡ኀበ፡ምስለ፡ላእካን፡ወተቀበልዎ፡ሕዝብ፡በፍሥሐ፡ዓቢይ፡ወጸለየ፡በልቡ፡ወዘንመ፡ዝናም፡ብዙኅ፡ወነበረ፡ከመዝ፡፪ተ፡መዓልተ፡ወ፪ተ፡ለያልየ፡እንዘ፡ይዘንም፡እስከ፡መሰሎሙ፡ከመ፡ትማስን፡ምድር፡እምብዝኀ፡ዝናም።
32ወሰአልዎ፡ዳግመ፡እንዘ፡ይብሉ፡ኦ፡አቡነ፡ጸሊ፡በእንቲአነ፡ኀበ፡እግዚአብሔር፡ከመ፡ያእትት፡ዝናመ፡እምላዕሌነ፡ከመ፡ኢንጥፋእ፡ኵልነ። ወሶቤሃ፡ጸለየ፡ወተአተተ፡ዝናም፡ወኮነ፡ፀሐየ፡በኀይለ፡እግዚአብሔር።
33ወገብረ፡ዝንቱ፡አብ፡ትሩፋተ፡ዓበይተ፡ወበእደዊሁ፡ከሠተ፡እግዚአብሔር፡ተአምራተ፡ወመንክራተ፡ወፈወሶሙ፡ለብዙኃን፡ድውያን፡ወእለ፡ቦሙ፡መናፍስት፡ርኩሳን።
34ወውእቱ፡ገብረ፡ምግባራተ፡ሠናይ፡ዘኢይኌልቆ፡ሰብእ፡ወሶበ፡ይሰምዕ፡ከመ፡ይገብር፡ሰብእ፡ምግባረ፡ሠናይ፡ኢይነውም፡እስከ፡ይገብሮ፡ለዝንቱ፡በከመ፡ውእቱ፡ገብረ።
35ወሶበ፡ፈጸመ፡ገድሎ፡ኣዕረፈ፡በርስዕ፡ሠናይ፡ወበሰላም፡ወነበረ፡፰፡ዓመተ፡እንዘ፡ኢይተፍእ፡ምራቆ፡ዲበ፡ምድር፡ግሙራ፡በእንተ፡ክብረ፡ሥጋሁ፡ወደሙ፡ለእግዚእነ፡ኢየሱስ፡ክርስቶስ፡ሎቱ፡ስብሐት።
36ወኮነ፡ኵሉ፡መዋዕሊሁ፡፫፡ዓመተ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለመቃርስ፡ሕሊና፡መንፈስ፡ዘተውህቦ፤መንገለ፡አርያም፡ያንብር፡ኀይለ፡መለኮት፡ኀበ፡ቦ፤ወዕጓላቲሃ፡ለዝእብ፡እም፡ሕማመ፡ዑረት፡ወተመንድቦ፤ህየንተ፡አሕወየ፡ላቲ፡በአጽባዕቱ፡ዓቲቦ፤አነዳ፡በግዕ፡ወሀበቶ፡ዓሥቦ።
37ወበዛቲ፡ዕለት፡ስምዐ፡ኮነ፡በንደላዖስ፡አቡሁ፡ለቅዱስ፡ኤስድሮስ። በረከቱ፡ትኩን፡ምስሌነ፡አሜን።
38ወበዛቲ፡ዕለት፡አዕረፈ፡ኣሞን፡ጻድቅ፡ዘአብየ፡ሢመተ፡ጵጵስና፡እንዘ፡ይብል፡የአክለኒ፡ለእመ፡አጥረይኩ፡ግብረ፡ምንኵስና። በረከቱ፡ትኩን፡ምስሌነ፡አሜን።
39ወበዛቲ፡ዕለት፡ስምዐ፡ኮነት፡ቅድስት፡ዲላጊ፡ወደቂቃ፡ሱርስ። ውኅርማን። ወያአፋ፡ስንጥንያ።
40ወዛቲ፡ቅድስት፡ፅንዕት፡በሃይማኖተ፡ክርስቶስ፡ሎቱ፡ስብሐት።
41ወሶበ፡በጽሐ፡አርያኖስ፡መኰንን፡ሀገረ፡እስና፡ተቀበለቶ፡ዛቲ፡ቅድስት፡እንዘ፡ትነድ፡ደቂቃ፡ወቆመት፡ቅድሜሁ፡ወትቤሎ፡ኦ፡አርያኖስ፡አንሰ፡ክርስቲያናዊት፡መሢሐዊት፡ወመሃይምንት፡በኢየሱስ፡ክርስቶስ፡ሎቱ፡ስብሐት። ዘፈጠረ፡ሰማየ፡ወምድረ፡ወኵሉ፡ዘውስቴቶሙ።
42ወደቂቅኒ፡ይኬልሑ፡ከማሃ፡ወይቤሉ፡ክርስቲያን፡ንሕነ፡ገሀደ።
43ወሰሚዖ፡መኰንን፡ተመልአ፡መዓተ፡ወመተረ፡አርእስቲሆሙ፡በሰይፍ፡ወፈጸሙ፡ስምዖሙ፡ወተመጠዉ፡ነፍሳቲሆሙ፡መላእክት፡ኀበ፡እግዚእነ፡ኢየሱስ፡ክርስቶስ፡ሎቱ፡ስብሐት። በረከቶሙ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለኪ፡ሰማዕት፡ዲላጊ፤ሠናይተ፡ስምዕ፡በሀገረ፡እስና፡ዘኀደጊ፤ምስለ፡ደቂቅኪ፡አርባዕ፡እንበለ፡ትንትጊ፤እምትሡዒ፡ለአማ፡ልክት፡ወእምዕጣነ፡ታዕርጊ፤ተመትሮ፡ክሣድ፡አብደርኪ፡ወኀረይኪ፡ዮጊ።
44ወበዛቲ፡ዕለት፡አዕረፈት፡ባዕልተ፡ንጽሕ፡ወቅድስና፡ተኀራሚት፡ወድንግልት፡ሰሎሜ።
45ወዛቲ፡ቅድስት፡እምሀገረ፡ወረብ፡ወኮኑ፡አበዊሃ፡ፈራህያነ፡እግዚአብሔር፡ወሐፀንዋ፡በሠናይ።
46ወሶበ፡ልኅቀት፡ሐፀያ፡፩፡መኰንን፡ወአእተዋ፡በሥርዓተ፡ከብካብ፡እንዘ፡ኢትፈቅድ፡ለሊሃ፡ወከልኦ፡ኀይል፡አምላካዊ፡ቀሪበ፡ኀቤሃ፡ወቀሠፎ፡ውስተ፡ሥጋሁ፡ወኢክህለ፡ቀሪበ።
47ወእንዘ፡ከመዝ፡ሀለወት፡ኀብአት፡ርእሳ፡ወሖረት፡በሌሊት፡ወአምሠጠት፡በኀይለ፡እግዚአብሔር፡ወነበረት፡እንዘ፡ትትሜከር፡ወተዓውድ፡ኀበ፡ኵሎሙ፡ቅዱሳን፡ወትስእል፡መዐልተ፡ወሌሊተ፡በጾም፡ወበጸሎት፡ከመ፡ይምርሓ፡እግዚእነ፡ፍኖተ፡ጽድቅ።
48ወሰምዐ፡ስእለታ፡ወበሥምረቱ፡ጽሓ፡ደብረ፡ሊባኖስ፡ወለብሰት፡አልባሰ፡ምንኵስና፡ዘውእቱ፡አልባሰ፡መላእክት፡በእደ፡ዮሐንስ፡ከማ፡ወተጋደለት፡ብዙኀ፡ዘያደነግፅ፡ኣብ፡አልባበ።
49ወሖረት፡ፍኖተ፡አበው፡ትሩፋን፡በጾም፡ወበጸሎት፡ወበኵሉ፡ገድል፡ውዱስ፡እስከ፡ገብረት፡ተአምራተ፡ወመንክራተ፡ብዙኀተ፡በከመ፡ጽሑፍ፡በመጽሐፈ፡ገድላ፡ወእምዝ፡አዕረፈት። በረከታ፡የሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ለሰሎሜ፡ጠባብ፤ጸቃውዓ፡መዐር፡ዘትትዔለድ፡አምሳለ፡ተገብሮታ፡ለንህብ፤ምስለ፡ደናግል፡ትትዓሠይ፡በቤተ፡ከብካብ፤አኅለቀት፡ሥጋሃ፡በሥቃየ፡ፃማ፡ዕፁብ፤እስከ፡ወደይዋ፡በንስቲት፡መሶብ።
50ወበዛቲ፡ዕለት፡አዕረፈ፡አብ፡ቅዱስ፡ዲዮናስዮስ፡ዘፈጸመ፡ገድሎ፡በአፈ፡መጥባሕት። እግዚአብሔር፡ይምሐረነ፡በጸሎቱ፡አሜን።
ሰላም፡ለዲዮናስዮስ፡ለይስሐቅ፡ማእምሩ፤እስመ፡ተፄወወ፡በተአምሩ፤መኰንን፡ጠግዐ፡ወተላፀቀ፡ምስለ፡መንበሩ፤ከመ፡ኢይሑር፡ለምሳህ፡ኀበ፡ተነጽፈ፡ማኅደሩ፤እስከ፡በመጥባሕት፡ፈጸማ፡ለበድሩ፤ሰላም፡ለልደትከ፡እምነ፡ኅሪት፡ማኅፀን፤ዘየዓውዳ፡መልአክ፡በሰይፈ፡እሳት፡ርሡን፤ሲኖዳ፡ርእሶሙ፡ለባሕታውያን፤ከመ፡ገብረ፡እኅወ፡እምከ፡አመ፡ለሊከ፡ሕፃን፤መልዕልተ፡ድማኅየ፡ይንበር፡እዴከ፡ዘይምን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።