Sinaxario · Ginbot
5 de Ginbot
አመ፡፭፡ለግንቦት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፭፡ለግንቦት፡በዛቲ፡ዕለት፡አዕረፈ፡ዓቢይ፡ነቢይ፡ኤርምያስ፡ጻድቅ፡ወልደ፡ኬልቅዩ፡ካህን፡ዘውእቱ፡፩፡እምነቢያት፡ዓበይት።
2ወዝንቱ፡ነቢይ፡ጻድቅ፡ተነበየ፡በመዋዕሊሁ፡ለኢዮስያስ፡ወልደ፡ዓሞፅ፡ወኢዮአቄም፡ወሴዴቅያስ።
3ወለዝንቱ፡ንጹሕ፡ነበበ፡በእንቲአሁ፡እግዚአብሔር፡ወይቤ፡እስመ፡ኣነ፡ቀደስኩከ፡እምቅድመ፡ትፃእ፡እምከርሠ፡እምከ፡ወረሰይኩከ፡ነቢየ፡ወመገሥፆሙ፡ለእስራኤል።
4ወዝንቱ፡ነቢይ፡ገሠፆሙ፡ለደቂቀ፡እስራኤል፡በእንተ፡ዘኀደጉ፡አምልኮተ፡እግዚአብሔር፡ወመነኑ፡ሕጎ፡ወይቤሎሙ፡ተዓቀቡ፡ወነስሑ፡ከመ፡ኢይምጻእ፡መዓቱ፡ለእግዚአብሔር፡ላዕሌክሙ።
5ወአጠየቆሙ፡ወይቤሎሙ፡ለእመ፡ኢተ፡መየጥክሙ፡ኀበ፡እግዚአብሔር፡ወእመ፡አኮ፡ውእቱ፡ያነሥኦ፡ለናቡከደነፆር፡ንጉሡ፡ከላውዴዎን፡ወይፄውወክሙ፡ወከማሁ፡ኮነ።
6ወተነበየ፡ካዕበ፡በእንተ፡ንብረቶሙ፡ለሕዝብ፡ውስተ፡ፄዋዌ፡፸፡ዓመተ፡ወተነበየ፡በእንተ፡ምጽኣቱ፡ለእግዚእነ፡ኢየሱስ፡ክርስቶስ፡ሎቱ፡ስብሐት። ወሕማማቲሁ፡ወበእንተ፡፴፡ብሩር፡ዘነሥኦ፡ይሁዳ፡አስቆሮታዊ።
7ወተነበየ፡በእንተ፡ምግባራት፡ብዙኀት፡በእንተዝ፡ፈቀዱ፡አይሁድ፡ይቅትልዎ፡ወቀሠፍዎ፡ወሞቅሕዎ፡ብዙኅ፡ጊዜያተ፡ውእቱሰ፡ይጼሊ፡ኀበ፡እግዚአብሔር፡ወይስእል፡በእንቲአሆሙ፡እንዘ፡ይብሎ፡እግዚእ፡ኢትተንብል፡ኀቤየ፡እስመ፡ኢይሰምዕ፡አነ፡በእንቲአሆሙ።
8ወእምድኅረ፡ተፈጸመ፡መዋዕለ፡ትንቢቱ፡ወአሥመሮ፡ለእግዚአብሔር፡አዕረፈ፡በሰላም፡ውስተ፡ሀገረ፡እስክንድርያ፡ወኮኑ፡ግብፃውያን፡ዘይገብሩ፡ሎቱ፡ተዝካረ፡በዓሉ፡በዛቲ፡ዕለት። በረከተ፡አምላኩ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለኤርምያስ፡እምነቢያት፡ዓቢያን፤ወልደ፡ኬልቅዩ፡ካህን፤ዓረፍተ፡ብርት፡ተሰምየ፡ወዓምደ፡ሐፂን፤እስመ፡ተነበየ፡በእንተ፡ክርስቶስ፡መድኀን፤እስከ፡ወገርዎ፡እስራኤል፡በእብን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።