Sinaxario · Ginbot
4 de Ginbot
አመ፡፬፡ለግንቦት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፬፡ለግንቦት፡በዛቲ፡ዕለት፡አዕረፈ፡አብ፡ቅዱስ፡አባ፡ዮሐንስ፡ሊቀ፡ጳጳሳት፡ዘእስክንድርያ።
2ወውእቱ፡እምኍልቆሙ፡ለአበው፡ሊቃነ፡ጳጳሳት፡፳ወ፱ቱ። ወዝንቱ፡ቅዱስ፡ኮነ፡እምሀገረ፡እስክን፡ድርያ፡ወመንኰሰ፡እምንእሱ፡በገዳመ፡አስቄጥስ፡ወሶበ፡አዕረፈ፡አባ፡አትናቴዎስ፡ሊቀ፡ጳጳሳት፡ዘእምቅድሜሁ፡ኀረይዎ፡ኤጲስቆጶሳት፡ማእምራን፡ወኵሎሙ፡ሕዝብ፡ወነሥእዎ፡በኵርህ፡ዘእንበለ፡ፈቃዱ፡ከመ፡ይሢምዎ፡ወሰአልዎ፡ብዙኀ፡ስእለታተ፡ከመ፡ኢይኅድግ፡መርዔቶ፡ወካልእ፡ኢይሠየም፡ወኢያሕስም፡ላዕለ፡መርዔት።
3ወሶበ፡ርእዮሙ፡ለኤጲስቆጶሳት፡ማእምራን፡ወረበናት፡እንዘ፡ይስእልዎ፡ፈርሀ፡ወይቤ፡በልቡ፡ዮጊ፡ይከውንኑ፡ዝንቱ፡በፈቃዱ፡ለእግዚእነ፡ኢየሱስ፡ክርስቶስ፡ሎቱ፡ስብሐት፡ወሤምዎ።
4ወሶበ፡ነበረ፡ዲበ፡መንበረ፡ማርቆስ፡ወንጌላዊ፡ሐለየ፡በእንተ፡መርዔቱ፡ሕሊና፡ውሱከ፡በእንተ፡ትምህርት፡ወአንብቦ፡መጻሕፍት፡ወያፀንዖሙ፡ውስተ፡ሃይማኖት፡ርትዕት፡ወሤሞሙ፡ለካህናት፡ማእምራን፡ኤጲቆጶሳተ።
5ወሀሎ፡ንጉሥ፡በውእቱ፡መዋዕል፡ዘስሙ፡ዘይኑን፡መሃይምን፡ወፈራሄ፡እግዚአብሔር፡ወረድኦ፡ለዝንቱ፡አብ፡ወሰፍሐ፡እዴሁ፡ላዕለ፡አህጉር፡ወሰፍሐት፡ሃይማኖት፡ርትዕት፡ውስተ፡ኵሉ፡አድያመ፡ግብፅ።
6ወበውእቱ፡መዋዕል፡ፈነወ፡ንጉሥ፡ዘይ፡ኑን፡ኀበ፡ገዳመ፡አስቄጥስ፡ዘአባ፡መቃርስ፡ማራተ፡ዘምስሌሆሙ፡ሥርናይ፡ወወይን፡ወዘይት፡ወንዋያት፡ብዙኀት፡ዘይከውን፡ለአብያተ፡ክርስቲያናት፡ወለመፍቅደ፡አኀው፡ዘውስተ፡ገዳም።
7ወኮነ፡ኵሉ፡መዋዕሊሁ፡ለዝንቱ፡አብ፡በኀድአት፡ወበሰላም፡ወሠምረ፡እግዚአብሔር፡ላዕለ፡ሰብእ፡በጸሎቱ፡ወትምህርቱ።
8ወእምዝ፡ሐወፆ፡እግዚአብሔር፡በሕማም፡ንስቲት፡ወአዕረፈ፡በሰላም፡እምድኅረ፡ነበረ፡በሢመቱ፡፰፡ዓመተ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለዮሐንስ፡እምውሉደ፡ነገሥት፡ክቡራን፤ዘተሠይመ፡ሊቀ፡ዲበ፡ጳጳሳት፡ኄራን፤በእዴሁ፡ተሐንፃ፡አብያተ፡ክርስቲያን፡ኵሎን፤እንዘ፡ይትራድኦ፡ንጉሥ፡ዘይኑን፤በፍሬ፡ሥርናይ፡ምስለ፡ዘይት፡ወወይን።
9ወበዛቲ፡ዕለት፡ኮኑ፡ሰማዕተ፡ሶሲማ፡ወአባ፡ኖዳ፡አግብርቲሁ፡ለቡሩክ፡ፊቅጦር። በረከቶሙ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለሩፀትክሙ፡ለሥቃየ፡ስምዕ፡ውስተ፡ዓውዳ፤በመዓዛ፡ፊቅጦር፡ጽጌረዳ፤ጸውዑኒ፡ሊተ፡አመ፡ሳዐ፡ዕሤት፡ወፍዳ፤ለስብሐቲክሙ፡እትካፈል፡ክበዳ፤ክቡራነ፡ግዕዝ፡ሶሲማ፡ወኖዳ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።