Sinaxario · Ginbot
3 de Ginbot
አመ፡፫፡ለግንቦት1በስመ፡አብ፡ወወልድ፡ወመንፈስ፡ቅዱስ፡፩፡አምላክ። አመ፡፫፡ለግንቦት፡በዛቲ፡ዕለት፡አዕ፡ረፈ፡ቅዱስ፡ሐዋርያ፡ያሶን።
2ወዝንቱ፡ቅዱስ፡ኮነ፡እምኍልቆሙ፡ለ፸ወ፪፡አርድእት፡እለ፡ኀረዮሙ፡እግዚእነ። ወሰበከ፡ምስለ፡ሐዋርያት፡ወተወክፈ፡ሕማማቲሁ፡ለእግዚእነ፡ወመድኀኒነ፡ኢየሱስ፡ክርስቶስ፡ሎቱ፡ስብሐት። ወገብረ፡ተአምራተ፡ወመንክራተ።
3ወወረደ፡ላዕሌሁ፡ኀይል፡ወጸጋ፡መንፈስ፡ቅዱስ፡ጰራቅሊጦስ፡ምስለ፡ሐዋርያት፡በጽርሐ፡ጽዮን። ወሖረ፡ውስተ፡ስብከቱ።
4ወኮነ፡ልደቱ፡እምሀገረ፡ተርሴስ፡ወውእቱ፡ዘአምነ፡ቀዳሚ፡እምጠርሴስ።
5ወእምድኅረዝ፡ተለዎ፡ለቅዱስ፡ጳውሎስ፡ሐዋርያ፡ለስብከተ፡ወንጌል፡ወሖረ፡ምስሌሁ፡ውስተ፡አህጉር፡ብዙኀት።
6ወአኀዝዎ፡ምስለ፡ጳውሎስ፡ወሲላስ፡በሀገረ፡ተሰሎንቄ፡ወሰሐብዎሙ፡ወአብጽሕዎሙ፡ኀበ፡መኰንነ፡ሀገረ፡ተሰሎንቄ።
7ወእምድኅረዝ፡አንበረ፡እዴሁ፡ቅዱስ፡ጳውሎስ፡ላዕሌሁ፡ወሤሞ፡ኤጲስቆጶሰ፡ላዕለ፡ሀገረ፡ጠርሴስ። ወዓቀበ፡ቤተ፡ክርስቲያኑ፡ለወልደ፡እግዚአብሔር፡ሕያው፡በሠናይ፡ተዓቅቦ፡ወኂሩት።
8ወሶበ፡አፅንዖሙ፡ለመሃይምናን፡ውስተ፡ሃይማኖት፡ርትዕት፡ወመሀሮሙ፡ኵሎ፡ሥርዓተ፡ቤተ፡ክርስቲያን፡ወምግባራተ፡ሠናያተ።
9ወእምህየ፡ሖረ፡ሀገረ፡ምዕራብ፡ወሰበከ፡ውስቴታ፡በስብከተ፡ወንጌል፡ቅዱስ። ወበጽሐ፡ኀበ፡ደሴት፡ዘስማ፡ኮራኮራስ፡ወሰበከ፡ውስቴታ፡ወሐነፀ፡ቤተ፡ክርስቲያን፡በስሙ፡ለእስጢፋኖስ፡ሐዋርያ፡ወሰማዕት፡ሊቀ፡ዲያቆናት።
10ወሶበ፡አእመረ፡መኰንነ፡ይእቲ፡ሀገር፡ዘንተ፡አኀዞ፡ወሞቅሖ። ወበቤተ፡ሞቅሕ፡ረከበ፡፯ተ፡ፈያተ፡ወመህሮሙ፡ሃይማኖተ፡ወአምኑ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወአጥመቆሙ፡ጥምቀተ፡ክርስትና።
11ወጸርሑ፡በቅድመ፡መኰንን፡እንዘ፡ይብሉ፡ንሕነ፡ክርስቲያን፡ገሀደ፡ወወደዮሙ፡መኰንን፡ውስተ፡ጤገን፡ዘምሉእ፡ዝፍተ፡ወተየ፡ወነሥኡ፡አክሊለ፡ስምዕ።
12ወእምድኅረዝ፡አውፅኦ፡ለቅዱስ፡እምቤተ፡ሞቅሕ፡ወኰነኖ፡ኵነኔ፡ዓቢየ፡ወኢበጽሖ፡ምንትኒ፡እሙስና።
13ወርእየቶ፡ወለተ፡መኰንን፡እመስኮተ፡ቤታ፡ወአምነት፡በእግዚእነ፡ኢየሱስ፡ክርስቶስ፡ሎቱ፡ስብሐት። ወአውፅአት፡አልባሲሃ፡ቀጠንተ፡ወሠርጓቲሃ፡ወወሀበት፡ለነዳያን፡ወለምስኪናን።
14ወተምዓ፡አቡሃ፡ወአዘዘ፡ይደይዋ፡ውስተ፡ቤተ፡ሞቅሕ። ወገብሩ፡በከመ፡አዘዞሙ፡ወአጤሱ፡ላዕሌሃ። ወእምዝ፡አዕረቅዋ፡ወነደፍዋ፡በአሕፃ፡ወመጠወት፡ነፍሳ፡ውስተ፡እደ፡እግዚአብሔር።
15ወእምድኅረዝ፡ፈነዎ፡ለቅዱስ፡ያሶን፡ኀበ፡አሐቲ፡ደሴት፡ወምስሌሁ፡ተፅዕነ፡ውእቱ፡መኰንን፡ውስተ፡ሐመር፡ምስለ፡ሠራዊቱ፡ከመ፡ይኰንኖ፡በህየ፡ወአስጠሞ፡እግዚአብሔር፡ለመኰንን፡ውስተ፡ባሕር፡ምስለ፡ሠራዊቱ።
16ወአእኰቶ፡ቅዱስ፡ያሶን፡ለእግዚእነ፡ወነበረ፡ቅዱስ፡ውስተ፡ውእቱ፡መካን፡እንዘ፡ይሰብክ፡ወይሜህር፡ብዙኀ፡ዓመታተ።
17ወካዕበ፡ተሠይመ፡ካልእ፡መኰንን፡ወአብጽሖ፡ለቅዱስ፡ያሶን፡ወለእለ፡ምስሌሁ፡ወመልኦ፡ለጤገን፡ተየ፡ወዝፍተ፡ወሰምዐ፡ወአን፡ደደ፡እሳተ፡መትሕቴሁ፡እስከ፡ተመስወ፡ወወደይዎ፡ለቅዱስ፡ውስቴቱ፡ወአድኀኖ፡እግዚእነ፡ወኢበጽሖ፡ምንትኒ፡እሙስና።
18ወሶበ፡ርእየ፡መኰንን፡ዘንተ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወቦአ፡ውስተ፡ሃይማኖት፡ርትዕት፡ምስለ፡ሰብአ፡ቤቱ። ወምስለ፡ኵሎሙ፡ሰብአ፡ሀገር፡ወመሀሮሙ፡ሐዋርያ፡ቃለ፡ወንጌል፡ወአጥመቆሙ፡ወሐነፀ፡ሎሙ፡አብያተ፡ክርስቲያናት።
19ወገብረ፡ውስቴቶን፡ተአምራተ፡ወመንክራተ፡ብዙኀተ፡ወአዕረፈ፡በርስዕ፡ሠናይ፡ወበገጽ፡ብሩህ፡እምድኅረ፡አሥመሮ፡ለእግዚአብሔር። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለከ፡ያሶን፡ረድኡ፤ለወልደ፡ማርያም፡ድንግል፡መጥበቤ፡ሕፃናት፡በስምዑ፤ለጤገነ፡እሳት፡ውዑይ፡ዘኢያሕመ፡መከፍልሐተ፡ቅብዑ፤ለወለተ፡ንጉሥ፡ሰላም፡ዘምስለ፡ፈያት፡ሰብዑ፤እለ፡በእዴከ፡አምኑ፡ወጥምቀተ፡ነሥኡ።
20ወበዛቲ፡ዕለት፡ኮነ፡ስምዐ፡አባ፡ብሃይ፡ዘእምሰብአ፡ቤልገት።
21ወለዝንቱ፡ቅዱስ፡ኰነንዎ፡በመጥወይ፡ወበሐቅረት።
22ወእምዝ፡አስተርአዮ፡መልአክ፡እንዘ፡ውስተ፡እዴሁ፡አክሊል፡ወይቤሎ፡ኢት፡ፍራህ፡ነዋ፡አክሊል፡ውስተ፡እዴየ።
23ወእምድኅረዝ፡ኰነንዎ፡ብዙኀ፡ወወረውዎ፡ውስተ፡እቶነ፡እሳት፡ወከመዝ፡ፈጸመ፡ሩፀቶ፡ሠናየ፡ወአዕረፈ፡በሰላም። በረከቱ፡ትኩን፡ምስሌነ፡ለዓለመ፡ዓለም፡ኣሜን።
ሰላም፡ለአባ፡ብሶይ፡በላህበ፡ማኅቶት፡ዘውዕየ፤አነዳ፡ገጹ፡ፍጹመ፡እስከ፡ተላጸየ፤በዝንቱ፡አክሊል፡ዘውስተ፡እዴየ፤እኬልለከ፡መልአክ፡እንዘ፡ይብሎ፡አመ፡በርእሱ፡ወደየ፤በዋዕየ፡እሳት፡ፈጸመ፡ሩፀቶ፡ሠናየ።
24ወበዛቲ፡ዕለት፡ተዝካረ፡ዕረፍታ፡ለቡርክት፡ወለተ፡ማርያም፡እሙ፡ለወናግ፡ሰገድ፡ንጉሥ። በረከታ፡የሀሉ፡ምስሌነ፡አሜን።
25ወበዛቲ፡ዕለት፡ካዕበ፡ተዝካሩ፡ለቅዱስ፡ወክቡር፡አውሳብዮስ፡ቀሲስ፡ወቅዱስ፡ሲም፡ሰማዕት። እግዚአብሔር፡ይምሐረነ፡በጸሎቶሙ፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።