Biblia Etíope · Biblia Etíope en Ge'ez
Reyes I 7
መጽሐፈ፡ነገሥት፡ቀዳማዊ።1ወመጽኡ፡ሰብአ፡ቀርያተ፡ያርም፡ወነሥእዋ፡ለታቦተ፡ሕጉ፡ለእግዚአብሔር፡ወወሰድዋ፡ቤተ፡አሚናዳብ፡ዘውስተ፡ወግር፡ወቀብእዎ፡ለአልዓዘር፡ከመ፡ይዕቀባ፡ለታቦተ፡ሕጉ፡ለእግዚአብሔር።
2ወእምዝ፡እምድኅረ፡ነበረት፡ታቦት፡ውስተ፡ቀርያተ፡ያርም፡ወኮነ፡ብዙኀ፡መዋዕስ፡ወአከለ፡፳ዓመተ፡ወተመይጠ፡ኵሉ፡ቤተ፡እስራኤል፡ድኅሬሁ፡ለእግዚአብሔር።
3ወይቤሎሙ፡ሳሙኤል፡ለኵሉ፡ቤተ፡እስራኤል፡እንዘ፡ይብል፡ለእመ፡በኵሉ፡ልብክሙ፡ገባእክሙ፡ኀበ፡እግዚአብሔር፡አንትሙ፡አሰስሉ፡እምነ፡ማእከሌክሙ፡አማልክት፡ነኪር፡[ወአምሳሊሆሙ፡] ወአስተዳልዉ፡ልበክሙ፡ኀበ፡እግዚአብሔር፡ወተቀነዩ፡ሎቱ፡ለባሕቲቱ፡ወያድኅነክሙ፡እምነ፡እዴሆሙ፡ለኢሎፍሊ።
4ወአሰሰሉ፡ደቂቀ፡እስራኤል፡አማልክት፡በዓሊም፡ወአምሳላተ፡ዘአስጣሮት፡ወተቀንዩ፡ለእግዚአብሔር፡ለባሕቲቱ።
5ወይቤሎሙ፡ሳሙኤል፡አስተጋብእዎሙ፡ለኵሉ፡እስራኤል፡ውስተ፡መሴፋ፡ወእጼሊ፡ኀበ፡እግዚአብሔር፡በእንቲአክሙ።
6ወተጋብኡ፡ውስተ፡መሴፋ፡ወአምጽኡ፡ማየ፡ወከዐዉ፡ቅድመ፡እግዚአብሔር፡ውስተ፡ምድር፡ወጾሙ፡ይእተ፡አሚረ፡ወይቤሉ፡አበስነ፡ቅድመ፡እግዚአብሔር፡ወኰነኖሙ፡ሳሙኤል፡ለደቂቀ፡እስራኤል፡በመሴፋ።
7ወሰምዑ፡ኢሎፍሊ፡ከመ፡ተጋብኡ፡ደቂቀ፡እስራኤል፡ኵሎሙ፡ውስተ፡መሴፋ፡ወዐርጉ፡መሳፍንተ፡ኢሎፍሊ፡ላዕስ፡እስራኤል፡ወሶበ፡ሰምዑ፡ደቂቅ፡እስራኤል፡ፈርሁ፡እምቅድመ፡ገጾመ፡ለኢሎፍሊ።
8ወይቤልዎ፡ደቂቀ፡እስራኤል፡ለሳሙኤል፡ኢታርምም፡በእንቲአነ፡ወጽራኅ፡ኀበ፡እግዚአብሔር፡አምላክከ፡ወያድኅነነ፡እምነ፡እዴሆሙ፡ስኢሎፍሊ።
9ወነሥአ፡ሳሙኤል፡መሐስዐ፡በግዕ፡አሐደ፡ወገብሮ፡መሥዋዕተ፡ለእግዚአብሔር፡ምስለ፡ኵሉ፡ሕዝብ፡ወጸርኀ፡ሳሙኤል፡ኀበ፡እግዚአብሔር፡በእንተ፡እስራኤል፡ወሰምዖ፡እግዚአብሔር።
10ወእንዘ፡ሀሎ፡ሳሙኤል፡ይገብር፡መሥዋዕተ፡ተኣኀዝዎሙ፡ኢሎፍሊ፡ለእስራኤል፡ይትቃተልዎሙ፡ወአንጐድጐደ፡እግዚአብሔር፡በጸዓዕ፡በዐቢይ፡ቃል፡ላዕለ፡ኢሎፍሊ፡በይእቲ፡ዕለት፡ወደንገፁ፡ወወድቁ፡ቅድመ፡እስራኤል።
11ወወፅኡ፡እስራኤል፡ውስተ፡መሴፋ፡ወዴገንዎሙ፡ለኢሎፍሊ፡ወቀተልዎሙ፡እስከ፡መትሕተ፡ቤኮር።
12ወነሥአ፡ሳሙኤል፡እብነ፡አሐተ፡ወአቀማ፡ማእከለ፡ብሉይ፡ወሰመያ፡አቤኔዜር፡እብነ፡ረድኤት፡ብሂል፡ወይቤ፡እስከ፡ዝየ፡ረድአነ፡እግዚአብሔር።
13ወአሕመሞሙ፡እግዚአብሔር፡ለኢሎፍሊ፡ወኢደገሙ፡እንከ፡በዊኦተ፡ውስተ፡ደወሎሙ፡ለእስራኤል፡ወኮነት፡እዴሁ፡ለእግዚአብሔር፡ላዕለ፡ኢሎፍሊ፡በኵሉ፡መዋዕሊሁ፡ለሳሙኤል።
14ወገብኣ፡እልክቱሂ፡አህጉር፡እለ፡ነሥኡ፡ኢሎፍሊ፡እምኔሆሙ፡ለደቂቀ፡እስራኤል፡ወአስተጋብእዎን፡እስራኤል፡እምነ፡አስቃሎና፡እስከ፡ጌት፡ወአስተጋብኡ፡ደወሎሙ፡እስራኤል፡እምነ፡ኢሎፍሊ፡ወሰላም፡ውእቱ፡ማእከለ፡አሞሬዎን፡ወማእከለ፡እስራኤል።
15ወኰነኖሙ፡ሳሙኤል፡ለእስራኤል፡በኵሉ፡መዋዕሊሁ፡ዘሐይወ።
16ወየሐውር፡በበዓመት፡ወየዐውድ፡ቤቴል፡ወገልገላ፡ወመሴፋ፡ወይኴንኖሙ፡ለእስራኤል፡ለኵሎሙ፡እሉ፡ቅዱሳን።
17ወምእታዉሰ፡አርማቴም፡እስመ፡ህየ፡ቤቱ፡ወበህየኒ፡ይኴንኖሙ፡ለእስራኤል፡ወነደቀ፡ህየ፡ምሥዋፀ፡ለእግዚአብሔር።