Biblia Etíope · Biblia Etíope en Ge'ez
Reyes I 6
መጽሐፈ፡ነገሥት፡ቀዳማዊ።1ወነበረት፡ታቦት፡ውስተ፡ገዳም፡ሰብዐተ፡አውራኀ፡ወአውፅአት፡ምድሮሙ፡አናጹተ።
2ወጸውዕዎሙ፡ኢሎፍሊ፡ለማርያን፡ወለሰብአ፡መቅስም፡ወለሰብአ፡ሥራይ፡ወይቤልዎሙ፡ምንተ፡ንሬስያ፡ለታቦተ፡እግዚአብሔር፡አይድዑነ፡ወበምንት፡ንፌንዋ፡ውስተ፡መካና።
3ወይቤልዎሙ፡ፈንውዋ፡ለታቦተ፡ሕጉ፡ለእግዚአብሔር፡አምላከ፡እስራኤል፡ወኢትፈንውዋ፡ዕራቃ፡አላ፡ሀብዋ፡ሞጻ፡በእንተ፡ዘአሕመምክምዋ፡ወውእተ፡ጊዜ፡ይሣሀለክሙ፡ወይሰሪ፡ለክሙ፡ወእመ፡አኮሰ፡ኢተኀድግ፡እዴሁ፡እምላዕሌክሙ።
4ወይቤልዎሙ፡ምንት፡ሞጻ፡ዘንሁብ፡ወይቤልዎሙ፡በኍልቈ፡ምስፍናሆሙ፡ለኢሎፍሊ፡ኀምስተ፡ምስለ፡ነፍስትክሙ፡ኀበ፡ተቀሠፍክሙ፡እስመ፡ኀጢአት፡ላዕሌክሙ፡ወላዕለ፡መላእክቲክሙ፡ወላዕለ፡ሕዝብክሙ።
5ወአናጹተ፡ዘወርቅ፡ምስለ፡አናጹቲክሙ፡እለ፡አማሰንዋ፡ለምድርክሙ፡ወሰብሕዎ፡ለእግዚአብሔር፡ከመ፡ያቅልል፡አዴሁ፡እምላዕሌክሙ፡ወእምአማልክቲክሙ፡ወእምድርክሙ።
6ወለምንት፡ታከብዱ፡ልበክሙ፡ከመ፡አክበዱ፡ግብጽ፡ወፈርዖን፡ልቦሙ፤ አኮኑ፡ሶበ፡ተሣለቀ፡ላዕሌሆሙ፡ፈነዎሙ፡ወሖሩ።
7ወይእዜኒ፡ንሥኡ፡ወግበሩ፡ሰረገላ፡ሐዲሰ፡ወክልኤ፡እጐላተ፡እለ፡ተበኵራ፡ዘእንበለ፡እገሙሊሆን፡ወይስሕባ፡እጐላት፡ውስተ፡ሰረገላ፡ወአሰስሉ፡እጐሊሆን፡እምድኅሬሆን፡ወአንብሩ፡ውስተ፡ቤት።
8ወንሥኡ፡ታቦተ፡ወአንብርዋ፡ውስተ፡ውእቱ፡ሰረገላ፡ወዝክተኒ፡ንዋየ፡ወርቅ፡ዘትሁብዋ፡ሞጻ፡ወሥርዑ፡ሥርዐተ፡ቤርሴክታን፡በገቦሃ፡ወፈንውዋ፡ትእቱ።
9ወትሬእዩ፡ፍኖተ፡ደወል፡ኀበ፡ተሐሡር፡ወለእመ፡መንገስ፡ቤተ፡ሳሚስ፡ውእቱ፡ገብረ፡ላዕሌክሙ፡ዘንተ፡ዐቢየ፡ወለእመ፡ኢኮነት፡እዴሁ፡እንተ፡ረከበተነ፡ወበከ፡ተስሕትነ።
10ወገብሩ፡ኢሎፍሊ፡ከማሁ፡ወነሥኡ፡ክልኤ፡እጐላተ፡እለ፡ተበኵራ፡ወሰሐባ፡ክልኤቲ፡እጐላት፡እለ፡ተበኵራ፡ወዐፀዉ፡እጐሊሆን፡ውስተ፡ቤት።
11ወአንበርዋ፡ውስተ፡ውእቱ፡ሰረገላ፡ወአፍቃደ፡አርጋብ፡ወአናጹተ፡ዘወርቅ።
12ወአርትዓ፡ሐዊረ፡እማንቱ፡እጐላት፡ውስተ፡ፍኖት፡ዘቤተ፡ሳሚስ፡ወሖራ፡ውስተ፡መጽያሕት፡ወኢተግሕሣ፡ኢለየማን፡ወኢለፀጋም፡ወተለውዋ፡መሳፍንተ፡ኢሎፍሊ፡ወሖሩ፡እስከ፡ደወለ፡ቤተ፡ሳሚስ።
13ወሰብአ፡ቤተ፡ሳሚስሰ፡የዐፅዱ፡ስርናየ፡በውስተ፡ገራውህ፡ወሶበ፡አልዐሉ፡አዕይንቲሆሙ፡ወርእይዋ፡ለታቦተ፡እግዚአብሔር፡ወተፈሥሑ፡ወተቀበልዋ።
14ወቦአ፡ዝክቱ፡ሰረገላ፡ውስተ፡ገራህተ፡አሤ፡ዕ፡ዘቤተ፡ሳሚስ፡ወአቆሙ፡ህየ፡እብነ፡ዐቢየ፡ወሠፀሩ፡ዕፀዊሁ፡ለውእቱ፡ሰረገላ፡ወገብርዎን፡መሥዋዕተ፡ለእግዚአብሔር፡ለእልክቱ፡እጐላት።
15ወሌዋውያን፡ወሰድዋ፡ለይእቲ፡ታቦተ፡እግዚአብሔር፡ወተሜርገብ፡ዘምስሌሃ፡ወንዋየ፡ወርቅ፡ዘኀቤሃ፡ወአንበሩ፡ውስተ፡ውእቱ፡እብን፡ዐቢይ፡ወሰብአ፡ቤተ፡ሳሚስ፡አብኡ፡መሥዋዕተ፡ወቍርባነ፡ለእግዚአብሔር፡ይእተ፡አሚረ።
16ወርእዩ፡እልክቱ፡ኀምስቱ፡መሳፍንት፡ዘኢሎፍሊ፡ወተመይጡ፡ውስተ፡አስቃሎና፡በይእቲ፡ዕለት።
17ወዝንቱ፡ምስሌነፍስቶሙ፡ዘወርቅ፡ዘወሀቡ፡ኢሎፍሊ፡ሞጻ፡ለእግዚአብሔር፤ ዘአዛጦን፡አሐቲ፡ወዘጌት፡አሐቲ፡ወዘአቃሮን፡አሐቲ፡ወዘጋዛ፡አሐቲ፡ወዘአስቃሎና፡አሐቲ።
18ወአናጹትኒ፡ዘወርቅ፡በኍልቈ፡ኵሉ፡አህጉሪሆሙ፡ለኢሎፍሊ፡ዘኀምስቱ፡ምስፍና፡አምውስተ፡አህጉር፡እለ፡ቦን፡ቅጽረ፡እስከ፡ዐጸደ፡ፌርዜዎን፡ወእስከ፡አብን፡ዐባይ፡እንተ፡ውስቴታ፡አንበርዋ፡ህየ፡ለታቦተ፡ሕጉ፡ለእግዚአብሔር፡እንተ፡ውስተ፡ገራህቱ፡ለአሴዕ፡ዘቤተ፡ሳሚስ።
19ወኢተቀበልዋ፡ደቂቀ፡ኢያኮንዩ፡ምስለ፡ሰብአ፡ቤተ፡ሳሚስ፡እንዘ፡ይሬእይዋ፡ለታቦተ፡ሕጉ፡ለእግዚአብሔር፡ወቀተለ፡እምውስቴቶሙ፡ኀምስተ፡እልፈ፡ወሰብዓ፡ብእሴ፡ወላሐዉ፡ሕዝብ፡እስመ፡ቀተለ፡እግዚአብሔር፡እምሕዝብ፡ዐቢየ፡ቀትለ፡ጥቀ።
20ወይቤሉ፡ሰብአ፡ቤተ፡ሳሚስ፡መኑ፡ይክል፡ኀሊፈ፡ቅድሜሁ፡ለዝንቱ፡ቅዱስ፡ወኀበ፡መኑ፡ተፀርግ፡ታቦተ፡እግዚአብሔር፡እምኀቤነ።
21ወለአኩ፡ሐዋርያተ፡ኀበ፡እለ፡ይነብሩ፡ቀርያተ፡ያርም፡እንዘ፡ይብሉ፡አግብእዋ፡ኢሎፍሊ፡ለታቦተ፡እግዚአብሔር፤ ረዱአ፡ወንሥእዋአ፡ኀቤክሙአ።