Biblia Etíope · Biblia Etíope en Ge'ez
Reyes I 8
መጽሐፈ፡ነገሥት፡ቀዳማዊ።1ወእምዝ፡ሶበ፡ረሥአ፡ሳሙኤል፡ሤሞሙ፡ለደቂቁ፡መኳንንተ፡ላዕለ፡እስራኤል።
2ወዝንቱ፡ውእቱ፡አስማቲሆሙ፡ለደቂቁ፤ በኵሩ፡ኢዮኤል፡ወስሙ፡ለካልኡ፡አብያ፤ መኳንንት፡እሙንቱ፡በቤርሳቤሕ።
3ወኢሖሩ፡ደቂቁ፡በፍኖቱ፡ወተግሕሡ፡ወተለዉ፡ዐመፃ፡ወነሥኡ፡ሕልያነ፡ወገመጹ፡ፍትሐ።
4ወተጋብኡ፡ሰብአ፡እስራኤል፡ወሖሩ፡አርማቴም፡ኀበ፡ሳሙኤል።
5ወይቤልዎ፡ናሁ፡ረሣእከ፡አንተ፡ወደቂቅከኒ፡ኢየሐውሩ፡በፍኖትከ፡ወይእዜኒ፡ሤም፡ለነ፡ንጉሠ፡ዘይኴንነነ፡ከመ፡ኵሉ፡አሕዛብ።
6ወኮነ፡እኩየ፡ዝንቱ፡ነገር፡ቅድመ፡አዕይንቲሁ፡ለሳሙኤል፡እስመ፡ይቤልዎ፡ሀበነ፡ንጉሠ፡ዘይኴንነነ፡ወጸለየ፡ሳሙኤል፡ኀበ፡እግዚአብሔር።
7ወይቤሎ፡እግዚአብሔር፡ለሳሙኤል፡ስምዖሙ፡ቃሎሙ፡ለሕዝብ፡ዘይቤሉከ፡እስመ፡አኮ፡ኪያከ፡ዘመነኑ፡አላ፡ኪያየ፡መነኑ፡ከመ፡ኢይንግሥ፡ሎሙ።
8በከመ፡ኵሉ፡ዘገብሩ፡ላዕሌየ፡እምአመ፡አውጻእክዎሙ፡እምግብጽ፡እስከ፡ዮም፡ወእስከ፡ዛቲ፡ዕለት፡ኀደጉኒ፡ወተቀንዩ፡ለባዕዳን፡አማልክት፡ከማሁ፡ይሬስዩከ፡ለከኒ።
9ወይእዜኒ፡ስምዖሙ፡ቃሎሙ፡ወባሕቱ፡አስምዖ፡አስምዕ፡ላዕሌሆሙ፡ወንግሮሙ፡ኵነኔሁ፡ለውእቱ፡ንጉሥ፡ዘይነግሥ፡ሎሙ።
10ወነገሮሙ፡ሳሙኤል፡ኵሎ፡ቃለ፡እግዚአብሔር፡ለሕዝብ፡እለ፡ሰአሉ፡በኀቤሁ፡ንጉሠ።
11ወይቤሎሙ፡ዝንቱ፡ውእቱ፡ኵነኔሁ፡ለውእቱ፡ንጉሥ፡ዘይነግሥ፡ለክሙ፤ ይነሥእ፡ደቂቀክሙ፡ወይሠይሞሙ፡ውስተ፡ሰረገላቲሁ፡ወአፍራሲሁ፡ወይሬስዮሙ፡እለ፡ይረውጹ።
12ቅድመ፡ሰረገላቲሁ።
13ወይሬስዮሙ፡ሐራሁ፡ወወዓሊሁ፡ወያአርሮሙ፡ማእረሮ፡ወያቀሥሞሙ፡ቅሥሞ፡ወያገብሮሙ፡ንዋየ፡ሐቅሉ፡ወንዋየ፡ሰረገላቲሁ።
14ወይነሥእ፡አዋልዲክሙ፡ለመጽዕጣት፡ወለመበስላት፡ወለኀባዝያት።
15ወየሀይደክሙ፡ዘሠናየ፡ገራውሂክሙ፡ወይሁቦሙ፡ለአግብርቲሁ።
16ወያጼብሐክሙ፡ዓሥራተ፡እደ፡ዘርእክሙ፡ወአዕጻደ፡ወይንክሙ፡ወይሁቦሙ፡ለኅጽዋኒሁ፡ወለአግብርቲሁ።
17ወየሀይደክሙ፡አግብርቲክሙ፡ወአእማቲክሙ፡ወመራዕዪክሙ፡ወበረከተክሙ፡ወአእዱጊክሙ፡ወያጼብሐክሙ፡ዐሥራተ፡ለተግባረ፡ዚአሁ፤ ወአዕጻዲክሙ፡ወወፍረክሙ፡ይዔሥረክሙ፡ወትከውንዎ፡አንትሙ፡አግብርቲሁ።
18ወትግዕሩ፡ይእተ፡አሚረ፡እምቅድመ፡ገጹ፡ለንጉሥክሙ፡ዘኀረይክምዎ፡ለክሙ፡ወኢይሰምዐክሙ፡እግዚአብሔር፡በእማንቱ፡መዋዕል፡እስመ፡ለሊክሙ፡ኀረይክሙ፡ለክሙ፡ንጉሠ።
19ወአበዩ፡ሰሚዖቶ፡ሕዝብ፡ለሳሙኤል፡ወይቤሉ፡አልቦ፤ ዳእሙ፡አንግሥ፡ለነ።
20ወንኩን፡ንሕነኒ፡ከመ፡ኵሉ፡አሕዛብ፡ወይሎንነነ፡ንጉሥነ፡ወይፃእ፡ቅድሜነ፡ወይፅባእ፡ፀረነ።
21ወሰምስ፡ሳሙኤል፡ኵሎ፡ቃሎሙ፡ለሕዝብ፡ወነገሮ፡ለእግዚአብሔር።
22ወይቤሎ፡እግዚአብሔር፡ለሳሙኤል፡ስማሰ፡ቃሎሙ፡ወአንግሥ፡ሎሙ፡ንጉሠ፡ወይቤሎሙ፡ሳሙኤል፡ለሰብአ፡እስራኤል፡እትዉ፡ኵልክሙ፡ውስተ፡አብያቲክሙ።