ግዕዝ
Home Formaciones Libros Biblioteca Ge'ez Contacto
Biblia Etíope · Biblia Etíope en Ge'ez

Lucas 14

ወንጌል፡ዘሉቃስ።

ዘከመ፡ፈወሶ፡እግዚእ፡ኢየሱስ፡ለቅብው፡በዕለተ፡ሰንበት

1ወእምዝ፡ሖረ፡ወቦአ፡ቤተ፡አሐዱ፡ብእሲ፡እምነ፡መልአኮሙ፡ለፈሪሳውያን፡በሰንበት፡ከመ፡ይብላዕ፡እክለ፡ወእሙንቱሰ፡ይትዐቀብዎ።
2ወሀሎ፡አሐዱ፡ብእሲ፡ቅብው፡ቅድሜሁ።
3ወአውሥአ፡እግዚእ፡ኢየሱስ፡ወተስእሎሙ፡ለጸሐፍተ፡ሀገር፡ወለፈሪሳውያን፡እንዘ፡ይብል፡ይከውንሁ፡በሰንበት፡ፈውሶ፡ወሚመ፡ኢይከውንሁ።
4ወአርመሙ፡ወነሥኦ፡ወፈወሶ፡ወፈነዎ።
5ወይቤሎሙ፡እመቦ፡አሐዱ፡እምኔክሙ፡ለእመ፡ወድቆ፡ላሕሙ፡አው፡አድጉ፡ውስተ፡ዐዘቅት፡አኮኑ፡በጊዜሃ፡ያነሥኦ፡በዕለተ፡ሰንበት።
6ወስእኑ፡አውሥኦቶ፡በእንተ፡ዝንቱ፡ነገር።

በእንተ፡ኢያፍቅሮ፡ርእሰ፡ምርፋቅ

7ወይቤሎሙ፡ለእለ፡ሀለዉ፡ውስተ፡ምሳሕ፡ወመሰለ፡ሎሙ፡ወመሀሮሙ፡ሶበ፡ርእዮሙ፡እንዘ፡ይትባደሩ፡ውስተ፡ርእሰ፡ምርፋቅ።
8ወይቤሎሙ፡እመቦ፡ዘጸውዐከ፡ውስተ፡ምሳሕ፡ወሖርከ፡ኢትርፍቅ፡ውስተ፡ርእሰ፡ምርፋቅ፡ክቡር፡እመቦ፡ዮጊ፡ይመጽእ፡ዘይከብረከ።
9እስመ፡መጺኦ፡ድኅረ፡ይብለከ፡ዝኩ፡ዘጸውዐከ፡ኅድግ፡ሎቱ፡ዘንተ፡ገጸ፡ወትገብእ፡ወትትኀፈር፡ውእተ፡ጊዜ፡ወትወርድ፡ውስተ፡ምርፋቅ፡ዘይቴሐት።
10ወእመሰ፡ቦ፡ዘጸውዐከ፡ወሖርከ፡ርፍቅ፡ውስተ፡ታሕታይ፡ምርፋቅ፡ከመ፡ሶበ፡መጽአ፡ዘጸውዐከ፡ይበልከ፡ዐርክየ፡ዕርግ፡ውስተ፡ዘይትሌዐል፡ምርፋቅ፡ወውእተ፡ጊዜ፡ይከውነከ፡ክብረ፡በቅድመ፡ኵሎሙ፡እለ፡ይረፍቁ፡ወይመስሑ፡ምስሌከ።
11እስመ፡ኵሉ፡ዘአዕበየ፡ርእሶ፡የኀሥር፡ወዘአትሐተ፡ርእሶ፡ይከብር።
12ወይቤሎ፡ለዘጸውዖ፡ሶበ፡ትገብር፡በዓለ፡ወምሳሐ፡አው፡ድራረ፡ኢትጸውዕ፡አዕርክቲክ፡ወአኀዊከ፡ወአዝማዲከ፡ወጎረከ፡ወቢጸከ፡አብዕልተ፡ከመ፡ይጸውዑከ፡እሙንቱሂ፡ወይከውነከ፡ፍዳ፡በኀቤሆሙ።
13አላ፡ሶበ፡ትገብር፡በዓለ፡ወምሳሐ፡ጸውዕ፡ነዳያነ፡ወምስኪናነ፡ወዕዉራነ፡ወስቡራነ።
14ወብፁዕ፡አንተ፡እስመ፡አልቦሙ፡ዘይፈድዩከ፡ወባሕቱ፡ትትዐሠይ፡አመ፡ይትነሥኡ፡ጻድቃን።
15ወሰሚዖ፡ዘንተ፡አሐዱ፡እምእለ፡ይረፍቁ፡ይቤሎ፡ብፁዕ፡ውእቱ፡ዘይበልዕ፡እክለ፡በመንግሥተ፡እግዚአብሔር።

በእንተ፡እለ፡ተጸውዑ፡ውስተ፡ድራር

16ወይቤሎሙ፡እግዚእ፡ኢየሱስ፡አሐዱ፡ብእሲ፡ገብረ፡ምሳሐ፡ዐቢየ፡ወዐሠሮሙ፡ለብዙኃን።
17ወሶበ፡በጽሐ፡ዐሡር፡ፈነወ፡ገብሮ፡ይጸውዖሙ፡ለእለ፡ዐሠሮሙ፡ወሶበ፡በጽሐ፡ጊዜ፡ምሳሕ፡ሖረ፡ገብሩ፡ወይቤሎሙ፡ለእለ፡ዐሠሮሙ፡ንዑ፡እስመ፡ወዳእነ፡አስተዳለውነ፡ምሳሐ።
18ወአበይዎ፡ኵሎሙ፡ኅቡረ፡በአሐዱ፡ቃል፡ወይቤሎ፡ቀዳማዊ፡ገራህተ፡ተሣየጥኩ፡ወእጽሕቅ፡ከመ፡እፃእ፡ወእሑር፡እርአያ፡ወበሎ፡ረሲ፡ሊተ፡ከመ፡ዘኢአበይኩ።
19ወይቤሎ፡ካልኡኒ፡ኀምስተ፡ፅምደ፡አልሕምት፡ተሣየጥኩ፡ወአሐውር፡እርአዮሙ፡ወእፍትኖሙ፡ወበሎ፡ረሲ፡ሊተ፡ከመ፡ዘመጻእኩ፡ወኢአበይኩ።
20ወሣልሱኒ፡ይቤሎ፡ብእሲተ፡አውሰብኩ፡ወበእንተዝ፡ኢይክል፡መጺአ።
21ወገብአ፡ገብሩ፡ወነገሮ፡ከመዝ፡ለእግዚኡ፡ወእምዝ፡ተምዐ፡በዓለ፡ቤት፡ይእተ፡ጊዜ፡ወይቤሎ፡ለገብሩ፡ሑር፡ፍጡነ፡ውስተ፡መራሕብት፡ወውስተ፡አስኳተ፡ሀገር፡ወአምጽእ፡ሊተ፡ዝየ፡ነዳያነ፡ወጽኑሳነ፡ወምስኪናነ፡ወዕዉራነ፡ወስቡራነ።
22ወእምዝ፡ይቤሎ፡ገብሩ፡ገበርኩ፡እግዚኦ፡በከመ፡አዘዝከኒ፡ወዓዲ፡ቦ፡መካን።
23ወይቤሎ፡እግዚኡ፡ለገብሩ፡ሑር፡ፍጡነ፡ውስተ፡ፍናው፡ወውስተ፡ጥቅመ፡ሀገር፡ወበግብር፡አብእ፡ሰብአ፡ከመ፡ይምላእ፡ቤትየ።
24እብለክሙ፡ከመ፡አሐዱሂ፡እምእልክቱ፡ሰብእ፡እለ፡ጸዋዕኩ፡ኢይጥዕምዋ፡ለበዓልየ።

ዘከመ፡ይደሉ፡ተሊዎተ፡እግዚእ፡ኢየሱስ

25ወእምዝ፡እንዘ፡የሐውሩ፡ምስሌሁ፡ብዙኃን፡ሰብእ፡ተመይጠ፡ወይቤሎሙ።
26ዘይመጽእ፡ኀቤየ፡ወይፈቅድ፡ይትልወኒ፡ለእመ፡ኢጸልአ፡አባሁ፡ወእሞ፡ወብእሲቶ፡ወቤቶ፡ወውሉዶ፡ወአኀዊኡ፡ወአኃቲሁ፡ወዓዲ፡ነፍሶሂ፡ኢይክል፡ከዊነ፡ረድእየ።
27ወዘኢይጸውር፡መስቀሎ፡ወኢይመጽእ፡ይትልወኒ፡ኢይክል፡ከዊነ፡ረድእየ።

በእንተ፡ምሳሌ፡ዘሐነጸ፡ማኅፈደ

28ወእመቦ፡አሐዱ፡እምኔክሙ፡ዘይፈቅድ፡ይሕንጽ፡ማኅፈደ፡አኮኑ፡ይቀድም፡ወይነብር፡ወየሐስብ፡ፃእፃኦ፡እመቦ፡ዘየአክሎ፡ከመ፡ይሣርር፡መሠረቶ።
29ከመ፡ሣሪሮ፡መሠረተ፡ለእመ፡ስእነ፡ፈጽሞ፡ኵሎሙ፡እለ፡ርእይዎ፡ይእኅዙ፡ይሣለቁ፡ላዕሌሁ።
30እንዘ፡ይብሉ፡ዝንቱ፡ብእሲ፡አኀዘ፡ይሕንጽ፡ወስእነ፡ፈጽሞ።
31ወእመኒ፡ፈቀደ፡ንጉሥ፡ይሑር፡ይጽብኦ፡ለካልእ፡ንጉሥ፡አኮኑ፡ይቀድም፡ወይነብር፡ወይመክር፡ለእመ፡ይክል፡በእልፍ፡ጸቢኦቶ፡ለዘይመጽእ፡ኀቤሁ፡ምስለ፡ክልኤ፡እልፍ።
32ወእመ፡አኮሰ፡እንዘ፡ርኁቅ፡ውእቱ፡ይፌኑ፡ሐዋርያተ፡ትንብልና፡ኀቤሁ፡ወይዜንውዎ፡ሰላመ።
33ወከመዝ፡እንከ፡ኵሉ፡ዘእምኔክሙ፡ዘኢወፅአ፡እምኵሉ፡ወዘኢይትናከር፡ኵሎ፡ዘዚኣሁ፡ንዋየ፡ኢይክል፡ከዊነ፡ረድእየ።
34ሠናይ፡ውእቱ፡ጼው፡ወእመሰ፡ጼው፡ለስሐ፡በምንት፡እንከ፡ይቄስምዎ።
35አኮኑ፡ይገድፍዎ፡አፍኣ፡ወኢይበቍዕ፡ለምድር፡ወኢለምዕላደ፡ድኵዕ፡ዘቦ፡እዝን፡ሰሚዐ፡ለይስማዕ።