Biblia Etíope · Biblia Etíope en Ge'ez
Lucas 13
ወንጌል፡ዘሉቃስ።በእንተ፡ንስሓ
1ወበውእቱ፡መዋዕል፡መጽኡ፡ሰብእ፡ኀቤሁ፡ወዜነውዎ፡በእንተ፡ገሊላውያን፡እለ፡ደመረ፡ጲላጦስ፡ደሞሙ፡ምስለ፡መሥዋዕቶሙ።
2ወአውሥአ፡እግዚእ፡ኢየሱስ፡ወይቤሎሙ፡ይመስለክሙኑ፡እሙንቱ፡ገሊላውያን፡ኃጥኣን፡እምኵሉ፡ሰብአ፡ገሊላ፡እስመ፡ዛቲ፡ሕማም፡ረከበቶሙ።
3አልቦ፡እብለክሙ፡እመሰ፡ኢነሳሕክሙ፡አንትሙኒ፡ከማሆሙ፡ትትኀጐሉ፡ኵልክሙ።
4ወሚመ፡ይመስለክሙኑ፡እሉ፡ዐሠርቱ፡ወሰመንቱ፡እለ፡ወድቀ፡ላዕሌሆሙ፡ማኅፈድ፡በሰሊሆሙ፡ወቀተሎሙ፡ከመ፡እሙንቱ፡ኃጥኣን፡እምኵሉ፡ሰብአ፡ኢየሩሳሌም።
5አልቦ፡እብለክሙ፡እመሰ፡ኢነሳሕክሙ፡ከማሆሙ፡ትትኀጐሉ፡አንትሙሂ፡ኵልክሙ።
በእንተ፡በለስ፡ዘአልባቲ፡ፍሬ
6ወመሰለ፡ሎሙ፡ወይቤሎሙ፡አሐዱ፡ብእሲ፡በለስ፡ቦቱ፡ውስተ፡ዐጸደ፡ወይኑ፡እምርት፡ወሖረ፡ኀቤሃ፡ይንሣእ፡ፍሬሃ፡ወኢረከበ።
7ወሶበ፡ኢረከበ፡ይቤሎ፡ለዐቃቤ፡ወይን፡ናሁ፡ሠለስተ፡ዓመተ፡እንዘ፡እመጽእ፡እንሣእ፡ፍሬሃ፡ለዛቲ፡በለስ፡ወኢረከብኩ፡ግዝማ፡እንከሰ፡ከመ፡ኢታጽርእ፡ምድረነ።
8ወአውሥአ፡ወይቤሎ፡ኅድጋ፡እግዚኦ፡ኀሪፈኒ፡እስከ፡እከሪ፡መሬተ፡ወእወዲ፡ወእክዑ፡ድኵዐ፡ታሕቴሃ።
9ለእመቦ፡ከመ፡ትፈሪ፡ለዓሙ፡ወእመ፡አኮሰ፡ንገዝማ፡ለእመ፡ሐዮነ።
በእንተ፡ብእሲት፡ዘድኅነት፡በዕለተ፡ሰንበት
10ወመሀሮሙ፡በሰንበት፡በአሐዱ፡ምኵራብ።
11ወሀለወት፡አሐቲ፡ብእሲት፡እንተ፡አድወያ፡ጋኔን፡ዐሠርተ፡ወሰመንተ፡ዓመተ፡ወጕሕቈት፡ወኢትክል፡ርቱዐ፡ቀዊመ፡ግሙራ።
12ወርእያ፡እግዚእ፡ኢየሱስ፡ወመሐራ፡ወጸውዓ፡ወይቤላ፡ኦ፡ብእሲቶ፡ተስዕርኪ፡እምደዌኪ።
13ወአንበረ፡እዴሁ፡ላዕሌሃ፡ወረትዐት፡ሶቤሃ፡ወአእኰተቶ፡ለእግዚአብሔር።
14ወአውሥአ፡መጋቤ፡ምኵራብ፡እንዘ፡ይትመዐዕ፡እስመ፡በሰንበት፡ፈወሰ፡እግዚእ፡ኢየሱስ፡ወይቤሎሙ፡ለሕዝብ፡አኮኑ፡ሰዱስ፡መዋዕል፡ውእቱ፡በዘትገብሩ፡ግብረክሙ፡ውእተ፡አሚረ፡ንዑ፡ተፈወሱ፡ወአኮ፡በዕለተ፡ሰንበት።
15ወአውሥአ፡እግዚእ፡ኢየሱስ፡ወይቤሎሙ፡ኦ፡መደልዋን፡አንትሙሰ፡ኢትፈትሑኑ፡አድገክሙ፡ወላሕመክሙ፡እምነ፡ምቅማሑ፡ወኢትወስድዎኑ፡ታስትይዎ፡ማየ፡በዕለተ፡ሰንበት።
16ወዛቲ፡ወለተ፡አብርሃም፡ናሁ፡ዐሠርቱ፡ወሰመንቱ፡ዓመት፡እምዘአሰራ፡ሰይጣን፡አኮኑ፡ርቱዕ፡ትትፈታሕ፡እምነ፡ማእሰራ፡ይእቲሂ፡በዕለተ፡ሰንበት።
17ወዘንተ፡ብሂሎ፡ተኀፍሩ፡ኵሎሙ፡እለ፡ቆሙ፡ላዕሌሁ፡ወተፈሥሑ፡ኵሉ፡ሕዝብ፡በእንተ፡ኵሉ፡መንክር፡ዘይትገበር፡እምኔሁ።
በእንተ፡ኅጠተ፡ሰናፔ፡ወበእንተ፡ዘርዕ፡ወብኁእ
18ወይቤሎሙ፡ምንተ፡ትመስል፡መንግሥተ፡ሰማያት፡ወበምንት፡አስተማስላ።
19ትመስል፡ኅጠተ፡ሰናፔ፡እንተ፡ነሥኣ፡ብእሲ፡ወዘርዓ፡ውስተ፡ገራህቱ፡ወልህቀት፡ወኮነት፡ዕፀ፡ዐባየ፡ወአጽለሉ፡አዕዋፈ፡ሰማይ፡ውስተ፡አዕጹቂሃ።
20ወካዕበ፡ይቤ፡በምንት፡አስተማስላ፡ለመንግሥተ፡እግዚአብሔር።
21ትመስል፡ብኁአ፡ዘነሥአቶ፡ብእሲት፡ወደፈነቶ፡ውስተ፡ሐሪጽ፡ዘሠለስቱ፡መስፈርት፡ወአብኅአ፡ኵሎ።
በእንተ፡ኅሩያን፡እለ፡ይድኅኑ
22ወየሐውር፡አህጉረ፡ወአዕጻዳተ፡ያንሶሱ፡በኢየሩሳሌም፡ወይሜህር።
23ወይቤሎ፡አሐዱ፡እግዚኦ፡ውኁዳንኑ፡እንጋ፡እሙንቱ፡እለ፡ይድኅኑ።
24ወይቤሎሙ፡ተኀየሉ፡ትባኡ፡እንተ፡ጸባብ፡አንቀጽ፡እብለክሙ፡ብዙኃን፡እለ፡የኀሥሡ፡ይባኡ፡ወኢይክሉ።
25እስመ፡ይትነሣእ፡በዓለ፡ቤት፡ወየዐጹ፡ኆኅቶ፡ወይእተ፡ጊዜ፡ይእኅዙ፡ይቁሙ፡አፍኣ፡ወይጐድጕዱ፡እንዘ፡ይብሉ፡እግዚኦ፡እግዚኦ፡አርኅወነ፡ወያወሥእ፡ወይብሎሙ፡ኢየአምረክሙ፡እምአይቴ፡አንትሙ።
26ወእምዝ፡ይእኅዙ፡ይበልዎ፡በላዕነሂ፡ወሰተይነሂ፡በቅድሜከ፡ወመሀርከ፡በመራሕብቲነ።
27ወይቤሎሙ፡እብለክሙ፡ኢየአምረክሙ፡እምአይቴ፡አንትሙ፡ረኀቁ፡እምኔየ፡ኵልክሙ፡ገበርተ፡ዐመፃ።
28ወሑሩ፡ውስተ፡ብካይ፡ወሐቅየ፡ስነን፡ወአመ፡ርኢክምዎሙ፡ለአብርሃም፡ወለይስሐቅ፡ወለያዕቆብ፡ወለኵሎሙ፡ነቢያት፡በመንግሥተ፡እግዚአብሔር፡ወለክሙሰ፡ያውፅኡክሙ፡አፍኣ።
29ወይመጽኡ፡እምጽባሕ፡ወእምዕራብ፡ወእምሰሜን፡ወእምደቡብ፡ወይረፍቁ፡ወይትፌሥሑ፡በመንግሥተ፡እግዚአብሔር።
30ወይከውኑ፡ደኀርት፡ቀደምተ፡ወቀደምት፡ይከውኑ፡ደኀርተ።
ዘከመ፡ነገርዎ፡ለእግዚእ፡ኢየሱስ፡በእንተ፡ሄሮድስ
31ወበይእቲ፡ዕለት፡መጽኡ፡ፈሪሳውያን፡ወይቤልዎ፡ሑር፡እምዝየ፡እስመ፡ሄሮድስ፡ይፈቅድ፡ይቅትልከ።
32ወይቤሎሙ፡ሑሩ፡በልዋ፡ለዛቲ፡ቍንጽል፡ናሁ፡አወፅእ፡አጋንንተ፡ወእሁብ፡ሕይወተ፡ዮም፡ወጌሠመ፡ወበሣልስት፡እፌጽም።
33ወባሕቱ፡ዮምሰ፡ወጌሠመ፡ሀለውኩ፡ወበሣልስት፡አሐውር፡እስመ፡ኢይደልዎ፡ለነቢይ፡መዊት፡በአፍኣ፡ዘእንበለ፡በኢየሩሳሌም።
ዘከመ፡ተናገረ፡እግዚእ፡ኢየሱስ፡ተኃድጎታ፡ለኢየሩሳሌም
34ኢየሩሳሌም፡ኢየሩሳሌም፡እንተ፡ትቀትሊዮሙ፡ለነቢያት፡ወትዌግሪዮሙ፡ለሐዋርያት፡እለ፡ተፈነዉ፡ኀቤኪ፡ሚመጠነ፡ፈቀድኩ፡አስተጋብኦሙ፡ለደቂቅኪ፡ከመ፡እንተ፡ታስተጋብእ፡ዶርሆ፡ዕጐሊሃ፡ታሕተ፡ክነፊሃ፡ወአበይክሙ።
35ናሁ፡ይትኀደግ፡ለክሙ፡ቤትክሙ፡በድወ፡እብለክሙ፡ከመ፡ኢትሬእዩኒ፡እምይእዜ፡እስከ፡ሶበ፡ትብሉ፡ቡሩክ፡ዘይመጽእ፡በስመ፡እግዚአብሔር።