Biblia Etíope · Biblia Etíope en Ge'ez
Lucas 15
ወንጌል፡ዘሉቃስ።በእንተ፡ምሳሌ፡ዘምእት፡አባግዕ
1ወቀርቡ፡ኀቤሁ፡መጸብሓን፡ወኃጥኣን፡ይስምዕዎ።
2ወአንጐርጐሩ፡ጸሐፍት፡ወፈሪሳውያን፡እንዘ፡ይብሉ፡ዝንቱሰ፡ኃጥኣነ፡ይትዌከፍ፡ወይበልዕ፡ምስሌሆሙ።
3ወመሰለ፡ሎሙ፡ከመዝ፡ወይቤሎሙ።
4እመቦ፡ብእሲ፡እምኔክሙ፡ዘቦ፡ምእት፡አባግዕ፡ወለእመ፡ተገድፈቶ፡አሐቲ፡እምኔሆን፡አኮኑ፡የኀድግ፡ተስዓ፡ወተስዐተ፡ውስተ፡ገዳም፡ወየሐውር፡ኀበ፡እንተ፡ተገድፈቶ፡እስከ፡ይረክባ።
5ወእምከመ፡ረከባ፡ይጸውራ፡ዲበ፡መትከፍቱ፡እንዘ፡ይትፌሣሕ።
6ወአቲዎ፡ቤቶ፡ይጼውዕ፡አዕርክቲሁ፡ወጎሮ፡ወይብሎሙ፡ተፈሥሑ፡ሊተ፡እስመ፡ረከብኩ፡በግዕትየ፡እንተ፡ተገድፈተኒ።
7እብለክሙ፡ከመ፡ከመዝ፡ይከውን፡ትፍሥሕት፡በሰማያት፡በበይነ፡አሐዱ፡ኃጥእ፡ዘይኔስሕ፡ፈድፋደ፡እምነ፡ተስዓ፡ወተስዐቱ፡ጻድቃን፡እለ፡ኢይፈቅዱ፡ይነስሑ።
በእንተ፡ምሳሌ፡ገመስ
8ወእመኒ፡ብእሲት፡ዘባቲ፡ዐሥሩ፡ጠፋልሐ፡አግሙስ፡ወለእመ፡ተገድፈታ፡አሐቲ፡እምኔሆን፡አኮኑ፡ታኀቱ፡ማኅቶተ፡ወትፈነቅል፡ኵሎ፡ዘውስተ፡ቤታ፡ወተኀሥሥ፡አስተሐሚማ፡እስከ፡ትረክብ።
9ወእምከመ፡ረከበት፡ትጼውዕ፡አዕርክቲሃ፡ወጎራ፡ወትብሎን፡ተፈሥሓ፡ሊተ፡እስመ፡ረከብኩ፡ገመስየ፡እንተ፡ተገድፈተኒ።
10እብለክሙ፡ከመ፡ከማሁ፡ይከውን፡ፍሥሓ፡በሰማያት፡በቅድመ፡መላእክተ፡እግዚአብሔር፡በእንተ፡አሐዱ፡ኃጥእ፡ዘይኔስሕ።
በእንተ፡ብእሲ፡ዘቦ፡ክልኤቱ፡ደቂቅ
11ወካዕበ፡ይቤ፡አሐዱ፡ብእሲ፡ቦቱ፡ክልኤቱ፡ደቂቅ።
12ወይቤሎ፡ዘይንእስ፡ለአቡሁ፡አባ፡ሀበኒ፡መክፈልተ፡ርስትየ፡ዘይረክበኒ፡እምንዋይከ፡ወከፈሎ፡ንዋዮ።
13ወእምድኅረ፡ኅዳጥ፡መዋዕል፡አስተጋብአ፡ኵሎ፡ንዋዮ፡ዝኩ፡ወልዱ፡ዘይንእስ፡ወሖረ፡ወነገደ፡ርኁቀ፡ብሔረ፡ወበህየ፡ዘረወ፡ወአማሰነ፡ኵሎ፡ንዋዮ፡እንዘ፡የሐዩ፡በምርዓት።
14ወአኅሊቆ፡ኵሎ፡ንዋዮ፡መጽአ፡ረኃብ፡ዐቢይ፡ውስተ፡ውእቱ፡ብሔር፡ወተጸነሰ።
15ወሖረ፡ወተፀምደ፡ኀበ፡አሐዱ፡እምሰብአ፡ውእቱ፡ብሔር፡ወፈነዎ፡ውስተ፡አዕጻደ፡ወፍሩ፡ይርዐይ፡አሕርወ።
16ወፈተወ፡ይጽገብ፡እምሖመረ፡ጽራእ፡ዘይሴሰዩ፡አሕርው፡ወአልቦ፡ዘይሁቦ።
17ወኀለየ፡በልቡ፡ወይቤ፡ሚመጠን፡አግብርቲሁ፡ወገባእቱ፡ለአቡየ፡እለ፡ያተርፍዎ፡ለእክል፡ወአንሰ፡እመውት፡በረኃብ፡በዝየ።
18እትነሣእ፡ወአሐውር፡ኀበ፡አቡየ፡ወእብሎ፡አባ፡አበስኩ፡በሰማይኒ፡ወበቅድሜከኒ።
19ወኢይደልወኒ፡እንከ፡እሰመይ፡ወልደከ፡አላ፡ረስየኒ፡ከመ፡አሐዱ፡እምአግብርቲከ።
20ወተንሥአ፡ወሖረ፡ኀበ፡አቡሁ፡ወርእዮ፡አቡሁ፡እምርኁቅ፡ምህሮ፡ወሮጸ፡ወሐቀፎ፡ክሣዶ፡ወሰዓሞ።
21ወይቤሎ፡ወልዱ፡አባ፡አበስኩ፡በሰማይኒ፡ወበቅድሜከኒ፡ወኢይደልወኒ፡እንከ፡እሰመይ፡ወልደከ፡አላ፡ረስየኒ፡ከመ፡አሐዱ፡እምአግብርቲከ።
22ወይቤሎሙ፡አቡሁ፡ለአግብርቲሁ፡አምጽኡ፡ፍጡነ፡አልባሰ፡ቅድዋተ፡ወአልብስዎ፡ወደዩ፡ኅልቀተ፡ውስተ፡አጻብዒሁ፡ወአሣእነ፡ውስተ፡እገሪሁ።
23ወአምጽኡ፡ላሕመ፡መግዝአ፡ወጥብሑ፡ንብላዕ፡ወንትፈሣሕ።
24እስመ፡ዝንቱ፡ወልድየ፡ሞተሂ፡ወሐይወ፡ተኀጕለሂ፡ወተረክበ፡ወአኀዙ፡ይትፈሥሑ።
25ወወልዱሰ፡ዘይልኅቅ፡ሀለወ፡ውስተ፡ሐቅል፡ወአቲዎ፡ሶበ፡በጽሐ፡ኀበ፡ጽንፈ፡ሀገር፡ሰምዐ፡እንዚራ፡ወማኅሌተ።
26ወጸውዐ፡አሐደ፡እምአግብርተ፡አቡሁ፡ወይቤሎ፡ምንትኑ፡ዝንቱ፡ዘእሰምዕ።
27ወይቤሎ፡እስመ፡አተወ፡እኁከ፡ወጠብሐ፡አቡከ፡ላሕመ፡መግዝአ፡እስመ፡ረከቦ፡ሕያዎ።
28ወተምዐ፡ወአበየ፡በዊአ፡ወወፅአ፡አቡሁ፡ወአስተብቍዖ።
29ወአውሥአ፡ወይቤሎ፡ለአቡሁ፡ናሁ፡መጠነዝ፡ዓመተ፡ተቀነይኩ፡ለከ፡ወግሙራ፡ኢኀለፍኩ፡እምትእዛዝከ፡ወሊተሰ፡ኢወሀብከኒ፡ማሕስአ፡ጠሊ፡ጥቀ፡በዘእትፌሣሕ፡ምስለ፡አዕርክትየ፡ወቢጽየ።
30ወአቲዎሰ፡ዝንቱ፡ወልድከ፡ዘአኅለቀ፡ወበልዐ፡ኵሎ፡ንብረተከ፡ምስለ፡ዘማት፡ጠባሕከ፡ሎቱ፡ላሕመ፡መግዝአ።
31ወይቤሎ፡አቡሁ፡ወልድየ፡አንተሰ፡ዘልፈ፡ሀለውከ፡ምስሌየ፡ወኵሉ፡ዘዚኣየ፡ዚኣከ፡ውእቱ።
32ወባሕቱ፡ርቱዕሰ፡ንትፈሣሕ፡ወንትሐሠይ፡እስመ፡ዝንቱ፡እኁከ፡ሞተሂ፡ወሐይወ፡ተኀጕለሂ፡ወተረክበ።