ግዕዝ
Home Formaciones Libros Biblioteca Ge'ez Contacto
Biblia Etíope · Biblia Etíope en Ge'ez

Lucas 12

ወንጌል፡ዘሉቃስ።

በእንተ፡ብኁኦሙ፡ለፈሪሳውያን

1ወተጋብኡ፡ኀቤሁ፡አእላፍ፡ሰብእ፡እስከ፡ይትካየዱ፡በበይናቲሆሙ፡ወአኀዘ፡ይበሎሙ፡ለአርዳኢሁ፡ቅድመ፡ተዐቀቡ፡እምነብሑኦሙ፡ለፈሪሳውያን፡ዘውእቱ፡አድልዎ።
2እስመ፡አልቦ፡ክዱን፡ዘኢይትከሠት፡ወአልቦ፡ኅቡእ፡ዘኢያስተርኢ።
3ወዘተናገርክምዎ፡በጽልመት፡ይትናገርዎ፡በብርሃን፡ወይሰማዕ፡ወዘሂ፡አልኆሰስክሙ፡በእዝን፡ይሰብክዎ፡በአጽራሕ፡ወበአንሕስት።
4እብለክሙ፡ለክሙ፡ለአዕርክትየ፡ኢትፍርህዎሙ፡ለእለ፡ይቀትሉክሙ፡ነፍስተክሙ፡ወእምዝ፡አልቦ፡ፈድፋደ፡ዘይክሉ፡ገቢረ።
5ወባሕቱ፡አርእየክሙ፡ዘትፈርሁ፡ፍርህዎሰ፡ለዘእምድኅረ፡ቀተለ፡ብዉሕ፡ሎቱ፡ይደይ፡ነፍሰኒ፡ወሥጋኒ፡ውስተ፡ገሃነም፡እወ፡እብለክሙ፡ኪያሁ፡ፍርሁ።
6አኮኑ፡ኀምስ፡አዕዋፍ፡ይሠየጣ፡በክልኤ፡ጸሪቀ፡አሶርዮን፡ወኢአሐቲ፡እምኔሆን፡ኢትትረሳዕ፡በቅድመ፡እግዚአብሔር።
7ወለክሙሰ፡ሥዕርተ፡ርእስክሙኒ፡ኵሉ፡ኍሉቅ፡ውእቱ፡ኢትፍርሁ፡እንከ፡እስመ፡እምብዙኅ፡አዕዋፍ፡ትኄይሱ፡አንትሙ።
8እብለክሙ፡ኵሉ፡ዘየአምን፡ብየ፡በቅድመ፡ዕጓለ፡እመሕያው፡አአምኖ፡አነሂ፡በቅድመ፡መላእክተ፡እግዚአብሔር።
9ወዘሰ፡ክሕደኒ፡በቅድመ፡ዕጓለ፡እመሕያው፡እክሕዶ፡አነሂ፡በቅደመ፡መላእክተ፡እግዚአብሔር።
10ወኵሉ፡ዘነበበ፡ቃለ፡ፅርፈት፡ላዕለ፡ወልደ፡ዕጓለ፡እመሕያው፡ይትኀደግ፡ሎቱ፡ወዘሰ፡ነበበ፡ቃለ፡ፅርፈት፡ላዕለ፡መንፈስ፡ቅዱስ፡ኢይትኀደግ፡ሎቱ፡ኢበዝ፡ዓለም፡ወኢበዘ፡ይመጽእ፡ዓለም።
11ወሶበሂ፡ይወስዱክሙ፡አዕዋዳተ፡ወኀበሂ፡መላእክት፡ወነገሥት፡ወመኳንንት፡ኢተኀልዩ፡ዘከመ፡ትብሉ፡ወዘከመሂ፡ትትናገሩ።
12እስመ፡መንፈስ፡ቅዱስ፡ውእቱ፡ዘይነብብ፡በላዕሌክሙ፡ሶቤሃ።

በእንተ፡ዘፈቀደ፡ይትካፈል፡ርስተ

13ወይቤሎ፡አሐዱ፡እምሕዝብ፡ሊቅ፡በሎ፡ለእኁየ፡ይክፍለኒ፡ርስትየ።
14ወይቤሎ፡እግዚእ፡ኢየሱስ፡አንተ፡ብእሲ፡መኑ፡ሤመኒ፡ከፋሌ፡ወመኰንነ፡ላዕሌክሙ።
15ወይቤሎሙ፡ዑቁ፡ወተዐቀቡ፡እምነ፡ኵሉ፡ትዕግልት፡እስመ፡አኮ፡በአብዝኆ፡ንዋይ፡ዘየሐዩ፡ሰብእ።

በእንተ፡ምሳሌ፡ባዕል፡ዘሠምረ፡ሎቱ፡ገራህቱ

16ወመሰለ፡ሎሙ፡ወይቤሎሙ፡አሐዱ፡ብእሲ፡ባዕል፡ዘሠምረ፡ሎቱ፡ተግባሩ፡ወደለዎ፡ብሔር።
17ወኀለየ፡በልቡ፡ወይቤ፡ምንተ፡እሬሲ፡ዘአልብየ፡ኀበ፡እዘግብ፡እክልየ፡ወበረከትየ።
18ወይቤ፡ከመዝ፡እገብር፡እነሥት፡ዘትካት፡መዛግብትየ፡ወአሐንጽ፡ካልአ፡ዘየዐቢ፡እምኔሁ፡ወእዘግብ፡ህየ፡እክልየ፡ወበረከትየ።
19ወእብላ፡ለነፍስየ፡ኦ፡ነፍስየ፡ብኪ፡ብዙኅ፡በረከት፡ዘዘገብኩ፡ለኪ፡ንቡረ፡ዘየአክለኪ፡ለብዙኅ፡ዓመታት፡አዕርፊ፡እንከሰ፡ብልዒ፡ወስትዪ፡ወተፈሥሒ።
20ወይቤሎ፡እግዚአብሔር፡ኦአብድ፡በዛቲ፡ሌሊት፡ይነሥእዋ፡ለነፍስከ፡እምላዕሌከ፡ለመኑ፡እንከ፡ይከውን፡ዘአስተዳለውከ።
21ከማሁኬ፡ዘይዘግብ፡ሎቱ፡መዝገበ፡ዘኢኮነ፡እምእግዚአብሔር፡ብዕሉ።

ዘከመ፡ኢይደሉ፡ተዐፅቦ፡በከንቱ

22ወይቤሎሙ፡ለአርዳኢሁ፡በእንተ፡ዝንቱ፡እብለክሙ፡ኢተኀልዩ፡ለነፍስክሙ፡ዘትበልዑ፡ወዘትሰትዩ፡ወለሥጋክሙ፡ዘትለብሱ።
23እስመ፡ነፍስ፡ተዐፅብ፡እምሲሲት፡ወሥጋ፡የዐፅብ፡እምዐራዝ።
24ርእዩ፡ዕጕለ፡ቋዓት፡ዘኢይዘርዑ፡ወኢየአርሩ፡ወአልቦሙ፡መዛግብት፡ወኢውሳጥያት፡ወእግዚአብሔር፡ይሴስዮሙ፡እፎ፡እንከ፡ፈድፋደ፡ትኄይሱ፡አንትሙ፡እምአዕዋፍ።
25መኑ፡እምኔክሙ፡ኀልዮ፡ዘይክል፡ወስኮ፡አሐደ፡እመተ፡በዲበ፡ቆሙ።
26ወሶበ፡ኢትክሉ፡ዘንተ፡ዘይቀልል፡ለምንት፡ትኄልዩ፡ዘየዐፅብ።
27ናሁ፡ጽጌያተ፡ገዳም፡ርእዩ፡ዘከመ፡ይልህቁ፡ኢይፈትሉ፡ወኢይጻምዉ፡እብለክሙ፡ከመ፡ሰሎሞን፡ጥቀ፡ኢለብሰ፡ከመ፡አሐዱ፡እምእሉ፡በኵሉ፡መዋዕለ፡ክብሩ።
28ወለእመ፡ኮነ፡ሥርወ፡ጽጌ፡ዘዮም፡ሀሎ፡ወጌሠመ፡ውስተ፡እሳት፡ይትወደይ፡ከማሁኬ፡ይሬሲ፡እግዚአብሔር፡እፎ፡እንከ፡ፈድፋደ፡ለክሙ፡ኦ፡ሕጹጻነ፡ሃይማኖት።
29አንትሙሂ፡ኢትኅሥሡ፡ዘትበልዑ፡ወዘትሰትዩ፡ወኢትትፋለሱ።
30እስመ፡ዘንተሰ፡ኵሎ፡አሕዛበ፡ዓለም፡ዘአፍኣ፡የኀሥሥዎ፡ወለክሙሰ፡የአምር፡አቡክሙ፡ከመ፡ተኀሥሥዎ፡ለዝንቱ፡ኵሉ።
31ወባሕቱ፡ኅሡ፡መንግሥተ፡እግዚአብሔር፡ወጽድቆ፡ወዝሰ፡ኵሉ፡ይትዌሰክ፡ለክሙ።
32ኢትፍራህ፡ኦ፡ንኡስ፡መርዔት፡እስመ፡ሠምረ፡አቡክሙ፡የሀብክሙ፡መንግሥቶ።
33ሢጡ፡ንዋየክሙ፡ወሀቡ፡ምጽዋተ፡ግበሩ፡ለክሙ፡ቍናማተ፡ዘኢይበሊ፡ወመዛግብተ፡በሰማያት፡ዘኢየኀልቅ፡ኀበ፡ኢይረክቦ፡ሰራቂ፡ወኢያማስኖ፡ፃፄ፡ወቍንቍኔ።
34ወኀበ፡ሀሎ፡መዝገብክሙ፡ህየ፡ይሄሉ፡ልብክሙ።

በእንተ፡ትጋሀ፡ግብር

35ወይኩን፡ቅኑተ፡ሐቌክሙ፡ወኅትወ፡መኃትዊክሙ።
36ወአንትሙኒ፡ኩኑ፡ከመ፡ዕደው፡እለ፡ይጸንሑ፡እግዚኦሙ፡እስከ፡የአቱ፡እምከብካብ፡ከመ፡መጺኦ፡ወጐድጕዶ፡ያርኅውዎ፡ሶቤሃ።
37ብፁዓን፡እሙንቱ፡አግብርት፡እለ፡ይረክቦሙ፡እግዚኦሙ፡መጺኦ፡እንዘ፡ከመዝ፡ይገብሩ፡ወይተግሁ፡አማን፡እብለክሙ፡ከመ፡ይቀንት፡ሐቌሁ፡ወያረፍቆሙ፡ወያንሶሱ፡ማእከሎሙ፡ወይትለአኮሙ።
38ወእመኒ፡በካልእት፡ወእመኒ፡በሣልስት፡ሰዓተ፡ሌሊት፡መጽአ፡ወረከቦሙ፡ከመዝ፡ብፁዓን፡እሙንቱ፡እልክቱ፡አግብርት።
39ወዘንተ፡ባሕቱ፡አእምሩ፡ሶበሁ፡የአምር፡በዓለ፡ቤት፡እንተ፡ጊዜ፡ይመጽእ፡ሰራቂ፡እምተግሀ፡ወእምሐለወ፡ወእምኢያብሐ፡ይክርዩ፡ቤቶ።
40ወአንትሙሂ፡ድልዋኒክሙ፡ሀልዉ፡እስመ፡በጊዜ፡ኢተሐዘብክሙ፡ይመጽእ፡ወልደ፡ዕጓለ፡እመሕያው።
41ወይቤሎ፡ጴጥሮስ፡እግዚኦ፡ለነኑ፡ትሜስል፡ዘንተ፡ምሳሌ፡አው፡ለኵሉኑ።
42ወይቤሎ፡እግዚእነ፡መኑ፡እንጋ፡ውእቱ፡መጋቢ፡ኄር፡ወምእመን፡ወጠቢብ፡ዘይሠይሞ፡እግዚኡ፡ላዕለ፡ኵሉ፡ሰብአ፡ቤቱ፡ከመ፡የሀቦሙ፡ሲሳዮሙ፡በበጊዜሁ።
43ብፁዕ፡ውእቱ፡ገብር፡ዘመጺኦ፡እግዚኡ፡ይረክቦ፡እንዘ፡ከመዝ፡ይገብር።
44አማን፡እብለክሙ፡ከመ፡ላዕለ፡ኵሉ፡ንዋዩ፡ያሜግቦ።
45ወእመሰ፡ይቤ፡ውእቱ፡ገብር፡እኩይ፡በልቡ፡ይጐነዲ፡አቲወ፡እግዚእየ፡ወይእኅዝ፡ይዝብጥ፡ወያመንዝዝ፡ደቀ፡ወአዋልደ፡ዘቤተ፡እግዚኡ፡ወይበልዕ፡ወይሰቲ፡ምስለ፡ሰካርያን፡ወይሰክር።
46ወይበጽሕ፡እግዚኡ፡ለውእቱ፡ገብር፡በዕለተ፡ኢተሐዘበ፡ወበጊዜ፡ኢያእመረ፡ወይመትሮ፡እማእከሉ፡ወያገብእ፡መክፈልቶ፡ምስለ፡እለ፡ኢየአምኑ።
47ወለገብርሰ፡ዘየአምር፡ፈቃደ፡እግዚኡ፡ወኢይገብር፡ወኢያስተዳሉ፡ዘከመ፡ይፈቅድ፡ብዙኅ፡መቅሠፍቱ።
48ወዘሰ፡ኢየአምር፡ለእመ፡ኢገብረ፡ውኁድ፡መቅሠፍቱ፡ወለኵሉ፡ዘብዙኀ፡ወሀብዎ፡ብዙኀ፡ይትኃሠሥዎ፡ወለዘኒ፡ውኁደ፡አማሕፀንዎ፡ውኁደ፡ይትኃሠሥዎ።
49እሳተ፡አምጻእኩ፡ለብሔር፡ወምንተ፡እፈቅድ፡ዘእንበለ፡አንድዶታ።
50ወባሕቱ፡ብየ፡ጥምቀት፡ዘእጠመቅ፡ወጥቀ፡እትዔገሥ፡እስከ፡እፌጽማ።
51ወይቤሎሙ፡ለሕዝብ፡ይመስለክሙኑ፡ሰላመ፡ዘአምጻእኩ፡ለምድር፡አልቦ፡እብለክሙ፡ዘእንበለ፡መጥባሕት፡ወፍልጣን።
52ወእምይዜሰ፡ለእመ፡ኀምስቱ፡ሀለዉ፡ውስተ፡አሐዱ፡ቤት፡ይትፈለጡ፡ሠለስቱ፡እምክልኤቱ፡ወይትፈለጡ፡ክልኤቱ፡እምሠለስቱ፡ወይትፈለጥ፡አሐዱ፡እምካልኡ።
53ወይትፈለጥ፡አብ፡እምወልዱ፡ወወልድኒ፡እምአቡሁ፡ወትትፈለጥ፡እም፡እምወለታ፡ወወለትኒ፡እምእማ፡ወሐማት፡እመርዓታ፡ወመርዓትኒ፡እምሐማታ።
54ወእምዝ፡ይቤሎሙ፡ለሕዝብ፡ሶበ፡ትሬእዩ፡ደመና፡ዘይዴምን፡መንገለ፡ዓረብ፡ዝናም፡ለመጺእ፡ከመዝ፡ይከውን፡ትብሉ።
55ወሶበ፡ይነፍኅ፡ነፋሰ፡አዜብ፡ሐሩር፡ለመጺእ፡ከመዝ፡ይከውን፡ትብሉ።
56ኦ፡መደልዋን፡ለገጸ፡ሰማይ፡ወምድር፡ተአምሩ፡አመክሮቶ፡ወእፎ፡ኢተአምሩ፡አመክሮቶን፡ለእላንቱ፡መዋዕል።
57ወለምንትኑ፡ለሊክሙ፡ኢትፈትሑ፡ጽድቀ።

በእንተ፡ዕርቅ

58ወሶበ፡ተሐውር፡ምስለ፡ዕድውከ፡ኀበ፡መልአክ፡ተዐረቅ፡በፍኖት፡ወሰልጥ፡ዘትፈድዮ፡ከመ፡ኢይትባጻሕከ፡ኀበ፡መኰንን፡ወመኰንን፡ይሜጥወከ፡ለወዓሊሁ፡ወወዓሊሁ፡ይሞቅሐከ።
59እብለከ፡ከመ፡ኢትወፅእ፡እምህየ፡እስከ፡ሶበ፡ትሴልጥ፡ደኃሪተ፡ገመስ፡ዘላዕሌከ።