ግዕዝ
Home Formaciones Libros Biblioteca Ge'ez Contacto
Biblia Etíope · Biblia Etíope en Ge'ez

Lucas 11

ወንጌል፡ዘሉቃስ።

በእንተ፡ጸሎት

1ወእምዝ፡ጸለየ፡በአሐቲ፡መካን፡ወፈጺሞ፡ጸሎተ፡ይቤሎ፡አሐዱ፡እምአርዳኢሁ፡እግዚኦ፡መሀረነ፡ጸሎተ፡በከመ፡መሀሮሙ፡ዮሐንስ፡ለአርዳኢሁ።
2ወይቤሎሙ፡ሶበ፡ትጼልዩ፡ከመዝ፡በሉ፡አቡነ፡ዘበሰማያት፡ይትቀደስ፡ስምከ፡ትምጻእ፡መንግሥትከ፡ወይኩን፡ፈቃድከ፡በከመ፡በሰማይ፡ከማሁ፡በምድርኒ።
3ሲሳየነ፡ዘለለዕለትነ፡ሀበነ፡ዮም።
4ኅድግ፡ለነ፡አበሳነ፡ወጌጋየነ፡ከመ፡ንሕነኒ፡ንኅድግ፡ለዘአበሰ፡ለነ፡ወኢታብአነ፡እግዚኦ፡ውስተ፡መንሱት፡አላ፡አድኅነነ፡ወባልሐነ፡እምኵሉ፡እኩይ።
5ወይቤሎሙ፡እመቦ፡እምውስቴትክሙ፡ዘቦ፡ዐርክ፡ወሖረ፡ኀቤሁ፡መንፈቀ፡ሌሊት፡ወይቤሎ፡ዐርክየ፡ለቅሐኒ፡ሠላሰ፡ኅብስተ።
6እስመ፡በጽሐኒ፡ማኅፈርየ፡እምሐቅል፡ወአልብየ፡ዘአቀርብ፡ሎቱ፡ወአሠብጦ።
7ወይሠጠዎ፡ዝኩ፡ዐርኩ፡እምውስጥ፡ወይብሎ፡ኢታንጥየኒ፡ወዳእነ፡ቀተርነ፡ኆኅተ፡ወደቂቅኒ፡ይሰክቡ፡ምስሌየ፡ውስተ፡ዓራት፡ወኢይክል፡ተንሥኦ፡አሀብከ።
8እብለክሙ፡ለእመሂ፡ኢተንሥአ፡የሀቦ፡እስመ፡ዐርኩ፡ውእቱ፡ከመ፡ኢያንጥዮ፡ይትነሣእ፡ወይሁቦ፡መጠነ፡ፈቀደ።
9ወአነሂ፡እብለክሙ፡ሰአሉ፡ወይትወሀበክሙ፡ጐድጕዱ፡ወይትረኀወክሙ፡ኅሡ፡ወትረክቡ።
10እስመ፡ኵሉ፡ዘሰአለ፡ይነሥእ፡ወዘሂ፡ኀሠሠ፡ይረክብ፡ወለዘሂ፡ጐድጐደ፡ይትረኀዎ።
11ወእመቦ፡እምውስቴትክሙ፡ዘሰአሎ፡ወልዱ፡ለአቡሁ፡ኅብስተ፡እብነኑ፡ይሁቦ፡ወእመኒ፡ዓሣ፡ሰአሎ፡አርዌ፡ምድርኑ፡ይሁቦ፡ህየንተ፡ዓሣ።
12ወእመኒ፡አንቆቅሖ፡ሰአሎ፡ዐቅራበኑ፡ይሁቦ፡ህየንቴሁ።
13ወሶበ፡አንትሙ፡እንዘ፡እኩያን፡አንትሙ፡ተአምሩ፡ሠናየ፡ሀብተ፡ውሂበ፡ለውሉድክሙ፡እፎ፡ፈድፋደ፡አቡክሙ፡ዘበሰማያት፡ይሁብ፡ሠናየ፡ሀብተ፡መንፈስ፡ቅዱስ፡ለእለ፡ይስእልዎ።

በእንተ፡ዘአኀዞ፡ጋኔን፡ጽሙም

14ወሀሎ፡ያወፅእ፡ጋኔነ፡በሃመ፡ወጽሙመ፡ወወፂኦ፡ጋኔኑ፡ነበበ፡ወሰምዐ፡ውእቱ፡በሃም፡ወጽሙም፡ወአንከርዎ፡ሰብእ።
15ወቦ፡እምውስቴቶሙ፡እለ፡ይቤሉ፡በብኤል፡ዜቡል፡በመልአኮሙ፡ለአጋንንት፡ያወፅኦሙ፡ለአጋንንት፡ወአውሥአ፡ወይቤ፡እፎ፡ይክል፡ሰይጣን፡ለሰይጣን፡አውፅኦቶ።

በእንተ፡መናፍስት፡ርኩሳን

16ወቦ፡እለ፡ያሜክርዎ፡ወየኀሥሡ፡ትእምርተ፡እምሰማይ፡በኀቤሁ።
17ወውእቱሰ፡አእመሮሙ፡ዘይኄልዩ፡ወይቤሎሙ፡ኵላ፡መንግሥት፡እንተ፡ትትናፈቅ፡በበይናቲሃ፡ትማስን፡ወቤትኒ፡እመ፡ተናፈቀ፡በበይናቲሁ፡ይወድቅ፡ውእቱ፡ቤት።
18ወእመሰ፡ሰይጣን፡ተናፈቀ፡በበይናቲሁ፡እፎ፡ይቀውም፡መንግሥቱ፡እስመ፡ትብሉ፡በብኤል፡ዜቡል፡በመልአኮሙ፡ለአጋንንት፡ያወፅኦሙ፡ለአጋንንት።
19ወእመሰ፡አነ፡በብኤል፡ዜቡል፡አወፅኦሙ፡ለአጋንንት፡ደቂቅክሙ፡በምንትኑ፡ያወፅእዎሙ፡ወበእንተ፡ዝንቱ፡እሙንቱ፡ይዛለፉክሙ።
20ወእመሰ፡አነ፡በአጽባዕተ፡እግዚአብሔር፡አወፅኦሙ፡ለአጋንንት፡ዮጊኬ፡በጽሐት፡እንከሰ፡ኀቤክሙ፡መንግሥተ፡እግዚአብሔር።
21ወአምጣነ፡የዐቅብ፡ኀያል፡ዐጸዶ፡ርሡየ፡በንዋየ፡ሐቅል፡ዳኅን፡ኵሉ፡ጥሪቱ።
22ወእመሰ፡ይመጽእ፡ዘይኄሎ፡ይመውኦ፡ወይሰልቦ፡ንዋየ፡ሐቅሉ፡ዘቦቱ፡ይትአመን፡ወይከፍል፡በርበሮ።
23ዘኢሀሎ፡ምስሌየ፡ዕድውየ፡ውእቱ፡ወዘኢይትጋባእ፡ምስሌየ፡ይዘርወኒ።
24ወሶበ፡ይወፅእ፡ጋኔን፡እኩይ፡እምሰብእ፡የዐውድ፡በድወ፡ኀበ፡አልቦ፡ማይ፤ ወየኀሥሥ፡ምንባረ፡ወመካነ፡ኀበ፡የዐርፍ፡ወእምከመ፡ኢረከበ፡ይብል፡እገብእ፡ቤትየ፡እምኀበ፡ወፃእኩ።
25ወመጺኦ፡ይረክቦ፡እንዘ፡ያስተራክብ፡እዳወ፡ወሥርግወ፡ወኵስቱረ።
26ወእምዝ፡የሐውር፡ወያመጽእ፡ምስሌሁ፡ሰብዐተ፡ቢጾ፡አጋንንተ፡እለ፡የአክይዎ፡ወይበውኡ፡ወየኀድሩ፡ውስቴቱ፡ወይብእሶ፡ደኃሪቱ፡ለውእቱ፡ብእሲ፡እምቀዳሚቱ።

በእንተ፡ብእሲት፡እንተ፡ጸርሐት፡በማእከለ፡አሕዛብ

27ወእምዝ፡እንዘ፡ዘንተ፡ይትናገር፡ከልሐት፡አሐቲ፡ብእሲት፡በማእክለ፡ሰብእ፡ወትቤሎ፡ብፅዕት፡ከርሥ፡እንተ፡ፆረተከ፡ወአጥባት፡እለ፡ሐፀናከ።
28ወይቤላ፡ውእቱኒ፡ብፁዓንሰ፡እለ፡ይሰምዑ፡ቃለ፡እግዚአብሔር፡ወየዐቅቡ።

በእንተ፡እለ፡የኀሥሡ፡ትእምርተ

29ወእንዘ፡ጉቡኣን፡ብዙኃን፡ሰብእ፡አኀዘ፡ይበሎሙ፡ዛቲ፡ትውልድ፡እኪት፡ይእቲ፡ትእምርተ፡ተኀሥሥ፡ወትእምርትሰ፡ኢይትወሀባ፡ዘእንበለ፡ትእምርተ፡ዮናስ፡ነቢይ።
30ወበከመ፡ዮናስ፡ኮኖሙ፡ትእምርተ፡ለሰብአ፡ነነዌ፡ከማሁ፡ይከውና፡ትእምርተ፡ወልደ፡ዕጓለ፡እመሕያው፡ለዛቲ፡ትውልድ።
31ንግሥተ፡አዜብ፡ትትነሣእ፡ምስለ፡ዛቲ፡ትውልድ፡አመ፡ደይን፡ወትትኳነኖሙ፡እስመ፡መጽአት፡እምአጽናፈ፡ምድር፡ትስማዕ፡ጥበቢሁ፡ለሰሎሞን፡ወናሁ፡ዘየዐቢ፡እምሰሎሞን፡ሀሎ፡ዝየ።
32ሰብአ፡ነነዌ፡ይትነሥኡ፡አመ፡ደይን፡ምስለ፡ዛቲ፡ትውልድ፡ወይትኳነንዋ፡ወያስተኀፍርዋ፡እስመ፡ነስሑ፡አመ፡ሰበከ፡ሎሙ፡ዮናስ፡ወናሁ፡ዘየዐቢ፡እምዮናስ፡ሀሎ፡ዝየ።
33ወአልቦ፡ዘያኀቱ፡ማኅቶተ፡ከመ፡ያንብራ፡ውስተ፡ምኅባእ፡ወእመ፡አኮ፡ታሕተ፡ከፈር፡ዘእንበለ፡ዲበ፡ተቅዋማ፡ከመ፡ይርአዩ፡ብርሃነ፡እለ፡ያንሶስዉ።
34ማኅቶቱ፡ለሥጋከ፡ዐይንከ፡ውእቱ፡ወአምጣነ፡ዐይንከ፡ብሩህ፡ውእቱ፡ኵሉ፡ነፍስትከ፡ብሩህ፡ውእቱ፡ወእመሰ፡ዐይንከ፡ሐማሚ፡ውእቱ፡ኵሉ፡ነፍስትከ፡ጽልመት፡ውእቱ።
35ዑቅ፡እንከ፡ብርሃንከ፡ጽልመተ፡ኢይኩን።
36ወእምከመሰ፡ኵሉ፡ነፍስትከ፡ብሩህ፡ውእቱ፡አልቦ፡ምንትኒ፡ጽልመት፡ላዕሌከ፡ወትከውን፡ኵለንታከ፡ብሩሀ፡ወከመ፡ማኅቶተ፡መብረቅ፡ያበርሀከ።

በእንተ፡ፈሪሳዊ፡ዘጸውዖ፡ለእግዚእ፡ኢየሱስ፡ውስተ፡ምሳሕ

37ወእንዘ፡ይነግሮሙ፡ዘንተ፡ይቤሎ፡አሐዱ፡ፈሪሳዊ፡ከመ፡ይምሳሕ፡ኀቤሁ፡ወቦአ፡ወረፈቀ።
38ወርእዮ፡ፈሪሳዊ፡አንከረ፡እስመ፡ኢተኀፅበ፡እዴሁ፡ለመሲሕ።
39ወይቤሎ፡እግዚእ፡ኢየሱስ፡አንትሙሰ፡ፈሪሳውያን፡ይእዜ፡እንተ፡አፍኣሁ፡ተኀፅብዎ፡ወታነጽሕዎ፡ለጽዋዕኒ፡ወለፃሕልኒ፡ወእንተ፡ውስጡሰ፡ምሉእ፡ሀዪደ፡ወእከየ።
40ኦ፡አብዳን፡አኮኑ፡ዘፈጠረ፡እንተ፡አፍኣ፡ወእንተ፡ውሥጥኒ፡ፈጠረ።
41ወባሕቱ፡ዘይትፈቀድሰ፡ሀቡ፡ለምጽዋት፡ወኵሉ፡ንጹሐ፡ይከውነክሙ።
42አሌ፡ለክሙ፡ጸሐፍት፡ወፈሪሳውያን፡እለ፡ታበውኡ፡ዐሥራተ፡እዴሁ፡ለአዛብ፡ወለጼናታም፡ወለኵሉ፡አሕማላት፡ወትትዔወርዎ፡ለጽድቅ፡ወለፍቀረ፡እግዚአብሔር፡ወዘንተኒ፡ርቱዕ፡ትግበሩ፡ወዝክተኒ፡ኢትኅድጉ።
43አሌ፡ለክሙ፡ጸሐፍት፡ወፈሪሳውያን፡መደልዋን፡እስመ፡ታፈቅሩ፡ነቢረ፡ፍጽም፡በውስተ፡አዕዋዳት፡ወተአምኆ፡በውስተ፡ምሥያጣት።
44አሌ፡ለክሙ፡ጸሐፍት፡ወፈሪሳውያን፡መደልዋን፡እስመ፡አንትሙ፡ከመ፡መቃብር፡ዘኢይትዐወቅ፡ዘያንሶሱ፡ሰብእ፡ላዕሌሁ፡ወኢየአምሮ።
45ወአውሥአ፡አሐዱ፡እምጸሐፍተ፡ሀገር፡ወይቤሎ፡ሊቅ፡ዘንተ፡እንዘ፡ትብል፡ኪያነሁ፡ትጼእል።
46ወይቤሎ፡ለክሙሂ፡ለጸሐፍተ፡ሀገር፡አሌ፡ለክሙ፡እስመ፡ታጸውርዎ፡ለሰብእ፡ጾረ፡ክቡደ፡ወለሊክሙሰ፡ኢትለክፍዎ፡ጥቀ፡በአሐቲ፡አጽባዕትክሙ፡ለውእቱ፡ጾር።
47አሌ፡ለክሙ፡ጸሐፍት፡ወፈሪሳውያን፡እስመ፡ተሐንጹ፡መቃብሪሆሙ፡ለነቢያት፡እለ፡አበዊክሙ፡ቀተልዎሙ።
48አደመክሙኑ፡ምግባሮሙ፡ለአበዊክሙ፡ወለሊክሙ፡ሰማዕቶሙ፡እስመ፡ዘእሙንቱ፡ቀተሉ፡አንትሙ፡ተሐንጹ፡መቃብሪሆሙ።
49ወበእንተ፡ዝንቱ፡ትቤ፡ጥበቢሁ፡ለእግዚአብሔር፡ናሁ፡አነ፡እፌኑ፡ኀቤሆሙ፡ነቢያተ፡ወሐዋርያተ፡ወይቀትሉ፡እምኔሆሙ፡ወይሰድዱ።
50ከመ፡ይትበቀሎሙ፡በእንተ፡ደመ፡ኵሉ፡ነቢያት፡ዘተክዕወ፡እምፍጥረተ፡ዓለም፡እስከ፡ዛቲ፡ትውልድ።
51እምደመ፡አቤል፡ጻድቅ፡እስከ፡ደመ፡ዘካርያስ፡ዘቀተልዎ፡በማእከለ፡ቤተ፡መቅደስ፡ወምሥዋዕ፡እወ፡እብለክሙ፡ይትኀሠሥዋ፡ወይትቤቀልዋ፡ለዛቲ፡ትውልድ።
52አሌ፡ለክሙ፡ጸሐፍተ፡ሀገር፡ወፈሪሳውያን፡እስመ፡ትነሥኡ፡መራኁተ፡ጽድቅ፡ወአእምሮ፡ወተኀብኡ፡ለሊክሙኒ፡ኢትበውኡ፡ወለእለሂ፡ይበውኡ፡ትከልእዎሙ፡በዊአ።
53ወእንዘ፡ይነግሮሙ፡ዘንተ፡በቅድመ፡ኵሉ፡ሕዝብ፡አኀዙ፡ጸሐፍት፡ወፈሪሳውያን፡ያመንዝዝዎ፡ወይትቀየምዎ።
54ወይንዕውዎ፡ከመ፡ያስሕትዎ፡በቃለ፡አፉሁ፡በዘያስተዋድይዎ።