Sinaxario · Tir
29 de Tir
አመ፡፳ወ፱፡ለጥር1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፱፡ለጥር፡በዛቲ፡ዕለት፡አዕረፈት፡ቅድስት፡አክሳኒ፡ዘበትርጓሜሁ፡ፈላሲት።
2ወዛቲ፡ቅድስት፡እምሀገረ፡ሮም፡ወአበዊሃኒ፡ክቡራን፡ወብዑላን፡ወባሕቱ፡ኢኮነ፡ሎሙ፡ውሉድ፡ዘእንበሌሃ። ወይእቲ፡ኮነት፡መስተጋድልተ፡እምንእሳ፡ትጸውም፡ወትጼሊ፡ወትረ፡መዓልተ፡ወሌሊተ፡ወተሐውር፡ኀበ፡ደብረ፡ደናግል፡ዘሀገረ፡ሮሜ፡ወትፀመድ፡ምስሌሆን፡ወዘያመጽኡ፡ላቲ፡ሲሳያ፡እምቤተ፡አቡሃ፡ኢትበልዕ፡አላ፡ትሁብ፡ለነዳያን፡ወለምስኪናን፡ወትበልዕ፡እምሲሳየ፡ደናግል።
3ወኮነት፡ወትረ፡ታነብብ፡ዜናሆን፡ለመነኮሳይያት፡ወትስእሎ፡ለእግዚአብሔር፡ብዙኀ፡ከመ፡ያስተሳትፋ፡ምስሌሆን፡ወበሥምረተ፡አበዊሃ፡ተፍኅረት፡ለ፩፡እምልኂቃነ፡ሀገረ፡ሮሜ፡ወአስተዳለወ፡ላቲ፡አልባሳተ፡ዘወርቅ፡ወሠርጓተ፡ዘዕፁብ፡ሤጡ።
4ወሶበ፡በጽሐ፡ዕለተ፡ሰብሳብ፡ትቤላ፡ለእማ፡ኦ፡እምየ፡ሶበ፡አስተዋሰብክሙኒ፡ኢይትከሀለኒ፡ከመ፡እሑር፡ኀበ፡ደናግል፡ወአንሰ፡እፈቅድ፡እሑር፡ይእዜ፡ከመ፡አአምኆን፡ወእትመየጥ፡ፍጡነ። ወትቤላ፡እማ፡ሑሪ፡ወግብኢ፡ፍጡነ።
5ወሶቤሃ፡ነሥአት፡ኵሎ፡አልባሲሃ፡ዘወርቅ፡ወሠርጓቲሃ፡ወነሥአት፡ምስሌሃ፡፪ተ፡ጽንፈ፡ባሕር፡አእማቲሃ። ወሖረት፡ኀበ፡ወረከበት፡ሐመረ፡እንተ፡ተሐውር፡ኀበ፡ደሴተ፡ቆጵሮስ፡ወተፅዕነት፡ዲቤሁ፡ወበጽሐት፡ኀበ፡ደሴተ፡ቆጵሮስ፡ወሰመየት፡ስማ፡አክሳኒ፡ዘበትርጓሜሁ፡ፈላሲት፡ወበጽሐት፡ኀበ፡ቅዱስ፡ኤጲፋንዮስ፡ወነገረቶ፡ኵሎ፡ዘውስተ፡ልባ፡ወውእቱ፡ፈነዋ፡ኀበ፡ሀገረ፡እስክንድርያ።
6ወሶበ፡በጽሐት፡ህየ፡አስተርአያ፡ሐዋርያ፡ቅዱስ፡ጳውሎስ፡በሕልም፡ወመሀራ፡ኵሎ፡ዘትገብር፡ወስሞሂ፡ነገራ።
7ወበሣኒታ፡ቦአት፡ኀበ፡ቅዱስ፡ቴዎፍሎስ፡ወቀረፀ፡ሥዕርታ፡ወአልበሳ፡አልባሰ፡ምንኵስና።
8ወእምዝ፡ሤጠት፡ኵሎ፡ዘሀሎ፡ምስሌሃ፡እምወርቅ፡ወእምብሩር፡ወእምአልባስ፡ወሐነፀት፡ቤተ፡ክርስቲያን፡በስሙ፡ለቅዱስ፡እስጢፋኖስ፡ቀዳሜ፡ሰማዕት። ወአስተጋብአ፡ላቲ፡አባ፡ቴዎፍሎስ፡ብዙኀተ፡ደናግለ፡መነኮሳይያት፡ውኀደራ፡ኵሎን፡ውስተ፡ይእቲ፡ቤተ፡ክርስቲያን።
9ወተጋደለት፡ዛቲ፡ቅድስት፡ተጋድሎ፡ዐቢየ፡ወኢትጥዕም፡ምንተኒ፡ዘአብሰልዎ፡በእሳት፡ዘእንበለ፡በቍላተ፡ምድር፡ወትሰክብ፡ዲበ፡ምድር፡ዘእንበለ፡መንጸፍ። ወነበረት፡ከሙዝ፡እንዘ፡ትትጋደል፡በዝንቱ፡ገድል፡ሠናይ፡በገቢረ፡ጽድቅ፡መጠነ፡፳፡ዓመት፡ወዘይፈደፍድ።
10ወእምዝ፡ሐመት፡ንስቲተ፡ወአዕረፈት፡ወከሠተ፡እግዚአብሔር፡ልዑል፡በዕለተ፡ዕረፍታ፡ዘያኤምር፡ዘከመ፡ረከበት፡ጸጋ፡ሰማያዊተ፡ወውእተ፡ጊዜ፡እስመ፡ሰብእ፡ርእዩ፡በጊዜ፡ዕረፍታ፡በመንፈቀ፡መዓልት፡መስቀለ፡ብሩሃ፡ወብርሃኑ፡ይከድን፡ብርሃነ፡ፀሐይ፡ወየዓውድዎ፡ከዋክብት፡ብሩሃን፡ወኮነ፡ያበርህ፡ከመዝ፡እስከ፡አንበሩ፡ሥጋሃ፡ውስተ፡መካኑ፡ምስለ፡ሥጋ፡ደናግል፡ወእምዝ፡ተኀብኣ፡ወአእመሩ፡ሕዝብ፡እለ፡ነበሩ፡ህየ፡ከመ፡ውእቱ፡ብርሃን፡አስተርአየ፡በእንቲአሃ።
11ወእምድኅረዝ፡ተናገራ፡እላንቱ፡፪ቲ፡አእማቲሃ፡ለሊቀ፡ጳጳሳት፡ወለኵሎሙ፡ሕዝብ፡ገድላ፡ለዛቲ፡ቅድስት፡እምጥንታ፡እስከ፡ዕለተ፡ዕረፍታ፡ዘከመ፡ወፅአት፡እምቤታ፡ወዘከመ፡ወለጠት፡ስማ፡ወሰመየት፡አክሳኒ፡ወዘከመ፡አምሐለቶን፡ከመ፡ይኅብኣ፡ስማ፡ወምሥጢራ፡ወይስምያሃ፡እኀቶን፡ወአኮ፡እግዝእቶን። ወአንከረ፡ሊቀ፡ጳጳሳት፡ወኵሎሙ፡ሕዝብ፡እምዝንቱ፡ግብራ፡ወአጽሐፈ፡ገድላ፡ሊቀ፡ጳጳሳት። በረከታ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለአክሳኒ፡ዘሰመይዋ፡አበዊሃ፤ብሂለ፡ፈላሲት፡ትርጓሜሃ፤በመንፈቀ፡መዓልት፡ያጤይቅ፡ትእምርተ፡ሞታ፡ወዕበየ፡ጸጋሃ፤ምስለ፡ደናግል፡እስከ፡አንበሩ፡ሥጋሃ፤አምሳለ፡ከዋክብት፡መስቀል፡በሰማይ፡አብርሀ።
12ወበዛቲ፡ዕለት፡ተዝካሩ፡ለቅዱስ፡ሳርያኮስ፡ሰማዕት፡ኃያል፡ወመስተጋድል፡በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለከ፡ሳርያኮስ፡ኃያል፡ወመስተጋድል፤ውስተ፡ፍና፡ሕይወት፡ምርሐኒ፡እምፍኖተ፡ኃጕል፤ከመ፡እትልዎ፡ለክርስቶስ፡በፀዊረ፡ቅዱስ፡መስቀል፤እስመ፡አርዑቱ፡ሠናይ፡ወፆሩ፡ቀሊል።
13ወበዛቲ፡ዕለት፡ተዝካሮን፡ለአንስት፡ቅዱሳት፡እምሀገረ፡ሮሜ፡ወፊልሞና፡ወኢይልኒ፡ወሰረባሞን፡ወአባ፡ገብረ፡ናዝራዊ፡ዘቃውት፡ወጻድቃን፡ዘደብረ፡ዴጓ። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለገብረ፡ናዝራዊ፡እንተ፡ነፀረ፡ወርእየ፣ለእግዚአብሔር፡ገሀደ፡ስብሐተ፡ገጹ፡ውኩየ፤በላዕለ፡ምጥማቅ፡ሶበ፡ውእቱ፡ጸለየ፤አምሳለ፡መብረቅ፡ሠጢቆ፡ሰማየ፤ብርሃነ፡ጸጋ፡ወረደ፡ከመ፡ይቀድስ፡ማየ።ሰላም፡ለክሙ፡ሥርናየ፡መንፈስ፡ፀዓድዒድ፤ዘደብረ፡ዴጓ፡ምዕላድ፤ዘፈለጠክሙ፡ዮም፡እምነ፡ክርዳድ፤እንዘ፡ትረፍቁ፡ውስተ፡አሐቲ፡ማዕድ፤መሥኤ፡ምግባራት፡ዘይፀውር፡በእድ።
14ወበዛቲ፡ዕለት፡ተዝካረ፡በዓለ፡ልደቱ፡ለእግዚእነ፡ኢየሱስ፡ክርስቶስ፡እምእግዝእትነ፡ቅድስት፡ድንግል፡ማርያም፡በሥጋ፡ሣህሉ፡ወምሕረቱ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለልደትከ፡ማኅቶተ፡ዓለም፡ሥኑ፤ወጥዒና፡ዓለም፡ብርሃኑ፤መንፈሰከ፡ሐድስ፡እግዚኦ፡ለገብርከ፡ውስተ፡ርሥዓኑ፤ፅቡራንኒ፡ለእዴከ፡ኪኑ፤ሶበ፡ነፋሕኮሙ፡ኣዕዋፈ፡ኮኑ።
15ወበዛቲ፡ዕለት፡አዕረፈ፡አባ፡እስጢፋኖስ፡ፈላሲ፡ዘገዳመ፡ፍዩም፡ወዝንቱ፡ቅዱስ፡ኮነ፡መስተጋድለ፡ወውእቱ፡የኃሥሥ፡ቅዱሳነ፡እለ፡ውስተ፡ገዳም።
16ወአሐተ፡ዕለተ፡እንዘ፡የዓይል፡ውስተ፡በድው፡ረከበ፡ርእሰ፡ብእሲ፡ግድፍተ፡ወይእቲ፡ዓፅም፡ባሕቲታ፡ወአልባቲ፡ሥጋ፡ወርእዮ፡ቅዱስ፡ሰአለ፡ኀበ፡እግዚአብሔር፡ከመ፡ያጠይቆ፡ግብራ።
17ወሶቤሃ፡ወፅአ፡ቃል፡እምይእቲ፡ርእስ፡ዘይብል፡ኣነ፡ኮንኩ፡ነጋዴ፡ዘእረብኅ፡በርዴ፡ወኢየአምር፡ምጽዋተ፡ወኢይጸግብ፡እምብዝኀ፡ንዋይ። ወበአሐቲ፡ዕለት፡እንዘ፡አሐውር፡ኀበ፡ነጊድ፡ርኁቅ፡ብሔረ፡በጻሕኩ፡ውስተ፡መካነ፡በድው፡ዘአልቦ፡ማይ፡ወሶበ፡ፀንዐ፡ዋዕየ፡ፀሐይ፡ሞቱ፡አግማል፡ወነፍጹ፡አግብርትየ፡ወተረፍኩ፡ባሕቲትየ።
18ወአመ፡ሣልስት፡ዕለት፡ከብደ፡አዕይንትየ፡ወሰማዕኩ፡በአምሳለ፡ፋፃ፡ወይእተ፡ጊዜ፡ወፅአት፡መንፈስየ፡ወወሰዱኒ፡ውስተ፡መካነ፡ኵነኔ፡ወእትፈደይ፡በከመ፡ምግባርየ። ወይእዜኒ፡እስእለከ፡ከመ፡ትስአል፡ሊተ፡ኀበ፡እግዚአብሔር፡ምሕረት፡ወሰአለ፡ቅዱስ፡ኀበ፡እግዚአብሔር፡በእንቲአሁ፡ከመ፡ኢይሚጦ፡ውስተ፡መካነ፡ኵነኔ፡ወሰምዐ፡ቃለ፡ዘይብል፡መሐርክዎ፡በእንቲአከ።
19ወሶበ፡ሰምዐ፡ዘንተ፡ቃለ፡አእኰቶ፡ለእግዚእነ፡ወሖረ፡ኀበ፡በዓት፡እንዘ፡ይበኪ፡ወይጐድዕ፡እንግድዓሁ፡ወነበረ፡በተጋድሎ፡ፅኑዕ፡እስከ፡አዕረፈ። እግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።
ሰላም፡ለእስጢፋኖስ፡በኀሢሠ፡ጻድቃን፡እንግልጋ፤አመ፡ውስተ፡በድው፡ረከበ፡ዓፅመ፡ርእሰ፡ምዉት፡ዕሩቀ፡ሥጋ፤አንሢኦ፡ኪያሁ፡እንዘ፡ይስእል፡እንበለ፡ንትጋ፤ሶበ፡ተዜነወ፡ለመካነ፡ሥቃይ፡ፁጋ፤ተጋድሎ፡ፍትወት፡ፈጸመ፡ወአድምዐ፡ጸጋ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።