Sinaxario · Tir
28 de Tir
አመ፡፳ወ፰፡ለጥር1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፰፡ለጥር፡በዛቲ፡ዕለት፡ኮነ፡ሰማዕተ፡ቅዱስ፡ቀሌምንጦስ፡ወዝንቱ፡ቅዱስ፡ኮነ፡ወልደ፡መበለት፡ብእሲት፡መሃይምንት፡እምሀገረ፡ኪራስ፡ወስማ፡አክሮስና፡በመዋዕሊሆሙ፡ለአርያኖስ፡ወሉቅዮስ፡ነገሥት፡ገላትያውያን።
2ወሶበ፡ልኅቀ፡ውእቱ፡ሕፃን፡መሠረቶ፡እሙ፡ኵሎ፡ሕገ፡ወትምህርተ፡ቤተ፡ክርስቲያን፡ወሶበ፡ኮኖ፡መዋዕሊሁ፡፲ወ፪፡ዓመተ፡ተጋደለ፡ተጋድሎ፡ዐቢየ፡በጾም፡ወበጸሎት፡ብዙኅ፡ወተፀምደ፡በገድል፡ዐቢይ፡እስከ፡ኢይበልዕ፡ምንተኒ፡ዘአብሰልዎ፡በእሳት፡ወኢሥጋ፡አላ፡ኮነ፡ይሴሰይ፡በቍላተ፡ምድር፡ከመ፡፫፡ደቂቅ።
3ወሶበ፡ተሠይመ፡ዲያቆነ፡ተወሰከ፡አእ፡ምሮ፡ወጥበበ፡ወኮነ፡ጸጋ፡እግዚአብሔር፡ላዕሌሁ፡ወተሰምዐ፡ዜናሁ፡ኀበ፡ንጉሥ፡ዲዮ፡ቅልጥያኖስ፡ወአብጽሖ፡ኀቤሁ፡ወኄጦ፡ብዙኀ፡ወተካየዶ፡ከመ፡ይረስዮ፡ሎቱ፡ወልደ፡ለእመ፡ሰምዐ፡ትእዛዞ፡ወሦዐ፡ለአማልክቲሁ። ወሶበ፡አበዮ፡ኰነኖ፡በዘዘዚአሁ፡ኵነኔ፡ዐቢየ፡ወአፅንዖ፡እግዚእነ፡በውስተ፡ኵነኔ፡ወያነሥኦ፡ጥዑየ፡ዘእንበለ፡ሙስና፡ወአስተኀፈሮሙ፡ለዓላውያን፡ወውእቱ፡ስምዕ፡፩ዱ፡በእደ፡ዲዮቅልጥያኖስ፡እስከ፡በጽሐ፡ኀበ፡፯ቱ፡ዐውደ፡ምኵናን።
4ወዳግም፡ስምዕ፡ሶበ፡ደክመ፡እምኵንኖቱ፡ፈነዎ፡ኀበ፡መኰንነ፡ሮሜ፡ወጸሐፈ፡እንዘ፡ይብል፡እስመ፡ዝንቱአ፡መሠርይአ፡ዘከማሁኡ፡ኢርኢኩአ፡እስመ፡ኵነኔየ፡በኀቤሁ፡ከመ፡ኢምንትአ፡ወናሁ፡ፈነውክዎ፡ኀቤከ፡ዮጊ፡እመ፡ትክል፡ትሚጥ፡ልቦ፡ከመ፡ይሡዕ፡ለአማልክት።
5ወሶበ፡በጽሐ፡ኀበ፡መኰንነ፡ሮሚ፡አምጽኡ፡ሎቱ፡አልባሳተ፡ዘወርቅ፡ወኢነፀረ፡ኀቤሆሙ፡ወኢነሥኦሙ፡ግሙራ፡ወተምዐ፡ላዕሌሁ፡መኰንን፡ብዙኀ፡ወኢፈርሀ፡እምኔሁ፡ወኰነኖ፡ኵነኔ፡ዐቢየ፡በመንኰራኵር፡ወቀሠፍዎ፡ዓቢየ፡ቅሥፈት፡ወመተሩ፡መለያልያቲሁ፡ወእግዚአብሔር፡ያነሥኦ፡ጥዑየ፡ዘእንበለ፡ሙስና።
6ወስምዕ፡ሣልሳይ። ሶበ፡ደክመ፡ኵነኔሁ፡ፈነዎ፡ኀበ፡መክስምያኖስ፡ኀበ፡ሀገረ፡ኒቆምድያ። ወበህየኒ፡ፈተንዎ፡በኵነኔያት፡ብዙኃት፡እስከ፡ተኀፍሩ፡ኵሎሙ፡ጸላእቱ፡ወእግዚእነ፡ያነሥኦ፡ጥዑየ፡ዘእንበለ፡ሙስና፡ከመ፡ቀዲሙ።
7ስምዕ፡ራብዕ። ወሶበ፡ደክመ፡እም፡ኰንኖቱ፡ሜጦ፡ውስተ፡ሀገረ፡ኪራስ፡ዘተሐፅነ፡ባቲ፡ኀበ፡መኰንነ፡ዚአሃ፡ወኰነኖ፡ውእቱ፡ኵነኔ፡ዐቢየ፡ወኢክህልዎ።
8ወስምዕ፡ኃምስ። ወእምዝ፡ወሰድዎ፡ኀበ፡ዱድያኖስ፡ንጉሥ፡ወረከበ፡በህየ፡ብዙኃነ፡ተአማንያነ፡ናዘዞሙ፡ወአፅንዖሙ፡እስመ፡ውእቱ፡ኮነ፡ፍጹመ፡በጸጋ፡እግዚአብሔር፡ዘላዕሌሁ፡ወኰነንዎ፡በህየ፡ዐቢየ፡ኵነኔ።
9ስምዕ፡ሳድስ። ሜጥዎ፡ኀበ፡መክስምያኖስ፡ወኰነንዎ፡ዕፁበ፡ኵነኔ፡ወበህየ፡ረከቦ፡ለቅዱስ፡ጋኒካላዎስ፡ወለብዙኃን፡ሰማዕታት፡ወተኰነነ፡ምስሌሆሙ፡ወስእንዎ።
10ስምዕ፡ሳብዕ። በእዴሁ፡ለሉቅያኖስ፡ወኰነኖ፡ኵነኔ፡ብዙኀ፡ወመተሩ፡ርእሶ፡በሰይፍ፡ወነሥአ፡፯ተ፡አክሊላተ፡ስምዕ፡ወመጽአት፡ብእሲት፡መሃይምንት፡እንተ፡ስማ፡ሶፍያ። ወነሥአት፡ሥጋሁ፡ለቅዱስ፡ወገነዘቶ፡ወቀበረቶ። በረከቱ፡ቅድስት፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለቀሌምንጦስ፡ዘተበፅዐ፡ትዕግሥቱ፤በዐውደ፡ምኵናን፡፭ቱ፤በብዙኅ፡ኵነኔ፡እምድኅረ፡ኰነንዎ፡ሎቱ፤እግዚአብሔር፡አስተቄጸሎ፡ህየንተ፡ፍሉሕ፡ሩፀቱ፤ከመ፡ጊዮርጊስ፡በአክሊል፡፯ቱ።
11ወበዛቲ፡ዕለት፡ስምዐ፡ኮነ፡ቅዱስ፡አካውህ፡ወዝንቱኒ፡ቅዱስ፡እምሀገረ፡ፍዩም፡ወተጋደለ፡ተጋድሎ፡ዐቢየ፡በምንኵስናሁ፡ቀዳሚ። ወአስተርአዮ፡ሰይጣን፡ገሀደ፡ወአኀዞ፡ቅዱስ፡ለሰይጣን፡ወአሰሮ፡ወኰነኖ፡ብዙኀ፡ወአምሐሎ፡ሰይጣን፡ለቅዱስ፡ወይቤሎ፡በእንተ፡ሕማማቲሁ፡ለክርስቶስ፡ፍትሐኒ፡ወኀደጎ፡ወኮነ፡ከመ፡ጢስ።
12ወእምዝ፡ሖረ፡ቅዱስ፡ኀበ፡ዓውደ፡ምኵናን፡በመዋዕለ፡ስደት፡ወምንዳቤ፡ከልሐ፡እንዘ፡ይብል፡ክርስቲያናዊ፡አነ፡ገሀደ። አሜሃ፡አኀዝዎ፡ወኰነንዎ፡ኵነኔ፡ዐቢየ፡ወእምዝ፡መተሩ፡ርእሶ፡በሰይፍ፡ወነሥአ፡አክሊለ፡ስምዕ፡በመንግሥተ፡ሰማያት። ወሥጋሁሰ፡ሀሎ፡እስከ፡ዮም፡ውስተ፡ደብረ፡ነቅሎን፡እንዘ፡ያስተርኢ፡እምኔሁ፡ተአምራት፡ወመንክራት፡ብዙኃት። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለአባ፡አካውህ፡ጸዋሬ፡ማኅቶት፡ዘተቅዋም፤ዘብሔረ፡ፍዩም።ትእምርተ፡ስምዑ፡እሙን፡ወምንኵስናሁ፡ፍጹም፣እምነ፡ሥጋሁ፡በላዕለ፡ኵሉ፡ሕሙም፣እስከ፡ዮም፡ሀሎ፡ይትገበር፡መድምም።
13ወበዛቲ፡ዕለት፡ኮኑ፡ሰማዕተ፡፰፻፡ማኅበራነ፡ቅዱስ፡አካውህ። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለክሙ፡አምአት፡፰ቱ፤ዘደለወክሙ፡በስምዕ፡ምስለ፡አካውህ፡ትሙቱ፤ገብርክሙ፡ዓብድ፡ከመ፡ኢይጥፋዕ፡በከንቱ፤በግዕዛንክሙ፡አግዕዝዎ፡ሎቱ፤ጊዜ፡ተአተተ፡እምዓለም፡ሕይወቱ።ሰላም፡ለክሙ፡ማኅበራነ፡ሥምረቱ፡ወፈቃዱ፤ለዘአስተርአየ፡ወልድ፡ዘእምኔክሙ፡ከመ፡፩ዱ፤እምሐዋርያት፡ኄራን፡አህጉራተ፡ዓለም፡ዘዖዱ፤እንተ፡ተፈነወ፡ለቀሌምንጦስ፡በእዱ፤ሕገ፡ሃይማኖት፡ለኵሉ፡አግህዱ።ሰላም፡ለአብርሃም፡ለእግዚአብሔር፡ገብሩ፤ለይስሕቅ፡ቍልዔሁ፡ወለያዕቆብ፡ፍቁሩ፤እሎንተ፡አበወ፡ሶበ፡አዘከሩ፤ካህናተ፡ደብተራ፡ዘጽሌ፡ትእዛዛት፡ዓሥሩ፤በበዘመኖሙ፡መዓተ፡አቊረሩ።
14ወበዛቲ፡ዕለት፡አዕረፈ፡ቅዱስ፡ዮሴፍ፡ወልደ፡ማኅው፡አይሁዳዊ፡ወዝንቱ፡ቅዱስ፡እስራኤላዊ፡ልኀቀ፡በሥርዓተ፡አይሁድ፡ወተምህረ፡መጻሕፍቲሆሙ፡ወሃይማኖቶሙ።
15ወአሐተ፡ዕለተ፡ርእዮሙ፡ለደቂቀ፡ክርስቲያን፡እንዘ፡ይትሜሀሩ፡መጽሐፈ፡ወሰአላ፡ለእሙ፡ከመ፡ትደምሮ፡ምስሌሆሙ፡ወሶበ፡ደመረቶ፡ተምህረ፡ኵሎ፡መጻሕፍተ፡ቤተ፡ክርስቲያን፡ወቦአ፡ውስተ፡ልቡ፡ፍቅሮ፡ለክርስቶስ፡ወሃይማኖቶ።
16ወእምዝ፡አሐተ፡ዕለተ፡ተራከበ፡ምስለ፡ወሬዛ፡ክርስቲያናዊ፡ዘኮነ፡ያፈቅሮ፡ወይሜህሮ፡ሕገ፡ክርስቲያን። ወወሰዶ፡ውስተ፡ቤተ፡ክርስቲያን፡በጊዜ፡ቅዳሴ፡ወተመጠወ፡ዮሴፍ፡እምሥጢር፡ቅዱስ፡ምስለ፡ደቂቀ፡ክርስቲያን። ወበሣኒታ፡ተጋብኡ፡አናጕንስጢስ፡ወመዘምራን፡ምስለ፡ዮሴፍ፡ወገብሩ፡አልባሲሆሙ። አምሳለ፡ደብተራ፡ወመንጠዋልዕ፡ወአምጽኡ፡ኅብስተ፡እምቤተ፡አበዊሆሙ፡ወሤሙ፡ሊቀ፡ጳጳሳት፡ወኤጲስቆጶሳት፡እምኔሆሙ፡ወገብሩ፡ሥርዓተ፡ቍርባን፡እንዘ፡ይትለሃዩ፡ወሐዊሮሙ፡ውስተ፡ቤተ፡ቀሲስ፡መምህሮሙ፡ይበልዑ፡ወይሰትዩ፡ወነበሩ፡ከመዝ፡፫፡መዋዕለ።
17ወእምዝ፡ሶበ፡ሰምዐ፡አቡሁ፡ለዮሴፍ፡ተመልአ፡መዐተ፡ወአሰሮ፡ድኅሪተ፡ለወልዱ፡ዮሴፍ፡ወወሰዶ፡ውስተ፡ቤተ፡ሐኖት፡ዘምሉእ፡እሳተ፡ወወደዮ፡ውስቴቱ፡ወዓፀወ፡ላዕሌሁ፡አፈ፡እቶን፡ወመልአከ፡እግዚአብሔር፡አጥፍኦ፡ለእሳት፡ወአቍረሮ።
18ወእሙሰ፡ሶበ፡ኀጥአቶ፡ለወልዳ፡በከየት፡ወአስቆቀወት፡ወኀጥአት፡ዘትገብር። ወእምድኅረ፡፯ቱ፡መዋዕል፡ሰምዐ፡ዮሐንስ፡ዜናሁ፡ለዮሴፍ፡ዘከመ፡ተወድየ፡ውስተ፡እቶን፡ወሖረ፡ምስለ፡አብያፂሁ፡ወበከዩ፡ላዕሌሁ፡እንዘ፡ይኬልሑ፡ወይጼውዑ፡ስሞ፡ወይቤሎሙ፡ዮሴፍ፡ኢትብክዩ፡ኦ፡አኀውየ፡እስመ፡አነ፡ሀሎኩ፡ዳኅነ፡በረድኤተ፡እግዝእትነ፡ማርያም፡እሙ፡ለእግዚእነ፡ኢየሱስ፡ክርስቶስ፡እስመ፡ይእቲ፡ሠወረተኒ፡በልብሳ፡እምእቶነ፡እሳት።
19ወሰሚዖሙ፡ነገርዎ፡ለሊቀ፡ጳጳሳት፡ውእቱኒ፡ነሥኦሙ፡ለካህናት፡ምስለ፡ወንጌላት፡ወማዕጠንታት፡ወመስቀላት፡ወበጽሑ፡ኀበ፡እቶን፡ወገብሩ፡ጸሎተ፡እማእከለ፡እሳት፡ወአውፅእዎ፡እንዘ፡አልቦ፡ዘይለክፎ። ወፈትሕዎ፡እማእሰሩ፡ወሰአሎ፡ዮሴፍ፡ለሊቀ፡ጳጳሳት፡ያጥምቆ፡ጥምቀተ፡ክርስትና፡ወአጥመቆ።
20ወሰሚዖ፡አቡሁ፡ለዮሴፍ፡መጽአ፡ወወድቀ፡ታሕተ፡እገሪሁ፡ለሊቀ፡ጳጳሳት፡ወእምነ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወተጠምቀ፡ጥምቀተ፡ክርስትና፡ምስለ፡ኵሉ፡ሰብአ፡ቤቱ።
21ወዮሴፍሰ፡ነበረ፡እንዘ፡ይጸውም፡በበ፯ቱ፡ዕለት፡እስከ፡፳ወ፰፡ዓመት፡በዊኦ፡ውስተ፡ጾማዕት።
22ወእምዝ፡ሶበ፡አእመረ፡ከመ፡ቀርበ፡ዕረፍቱ፡ቦአ፡ውስተ፡ቤተ፡ክርስቲያን፡ዘቅዱስ፡ጊዮርጊስ፡ሰማዕት፡ወቆመ፡ቅድመ፡ሥዕላ፡ለእግዝእትነ፡ማርያም፡ድንግል፡ወሰ፡አላ፡ከመ፡ትተንብል፡ኀበ፡ፍቁር፡ወልዳ፡በእንቲኣሁ።
23ወትቤሎ፡እምውስተ፡ሥዕል፡ተፈሣሕ፡ኦ፡ዮሴፍ፡ፍቁርየ፡ወፍቁረ፡ወልድየ፡እስመ፡ትመጽእ፡ኀቤየ፡ጌሠመ፡በጊዜ፡ሠለስቱ፡ሰዓት፡ወአዕረፈ፡በከመ፡ትቤሎ፡እግዝእትነ። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለዮሴፍ፡እምእቶነ፡እሳት፡ዘድኅነ፤በርደተ፡መልአክ፡ግሩም፡እንተ፡ይትዓፀፍ፡ብርሃነ፤ማርያም፡ትቤሎ፡እንዘ፡ታሴፍዎ፡ኪዳነ፤ተፈሣሕ፡ፍቁረ፡ወልድየ፡ዘአልቦ፡ኀዘነ፤እስመ፡ጌሠመ፡ትመጽእ፡ኀቤነ።
24ወበዛቲ፡ዕለት፡ባረከ፡እግዚእነ፡፯ተ፡ኅብስተ፡ወኅዳጠ፡ዓሣ፡በከመ፡ተብህለ፡በወንጌል፡ቅዱስ፡ወተዝካሮሙ፡ለ፫ቱ፡ደቂቅ፡ወቃቤላ። ሣህሉ፡ወምሕረቱ፡የሀሉ፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።