ግዕዝ
Home Formaciones Libros Biblioteca Ge'ez Contacto
Sinaxario · Tikimt

8 de Tikimt

አመ፡፰፡ለጥቅምት
1በስመ፡ኣብ፡ወወልድ፡ወመንፈስ፡ቅዱስ፡፩፡አምላክ፡አመ፡፰፡ለጥቅምት፡በዛቲ፡ዕለት፡ኮነ፡ሰማዕተ፡ቅዱስ፡አባ፡መጥራ፡አረጋዊ፡ወብዙኃን፡ሰማዕታት፡ምስሌሁ።
2ወዝንቱ፡ቅዱስ፡ኮነ፡እምሀገረ፡እስክንድርያ፡ክርስቲያናዊ፡ምእመን። ወሶበ፡ነግሠ፡ዳኬዎስ፡ከሐዲ፡አቀመ፡አምልኮ፡ጣዖታት፡ወአመንደቦሙ፡ለኵሎሙ፡ሕዝበ፡ክርስቲያን፡ወበጽሐ፡ትእዛዙ፡ኀበ፡ሀገረ፡እስክንድርያ፡ወአመንደቦሙ፡ለኵሎሙ፡ሰብአ፡ዚኣሃ፡እስከ፡ከዓዉ፡ደሞሙ።
3ወአስተዋደይዎ፡ለቅዱስ፡መጥራ፡ኀበ፡መኰንን፡ከመ፡ውእቱ፡ክርስቲያናዊ፡ወአብጽሖ፡መኰንን፡ኀቤሁ፡ለቅዱስ፡መጥራ፡ወሶበ፡ቆመ፡ቅድሜሁ፡ወተአመነ፡በእግዚእነ፡ኢየሱስ፡ክርስቶስ፡ከመ፡ውእቱ፡አምላክ፡ዘበኣማን።
4ወይቤሎ፡መኰንን፡ስግድ፡ለአማልክት፡ወእነ፡እሁበከ፡ንዋየ፡ብዙኃ። ወኢተወክፈ፡እምኔሁ፡ዘንተ፡ኪዳነ፡ወአውሥአ፡ወይቤሎ፡ኪዳናቲከ፡ወንዋይከ፡ይሑር፡ምስሌከ፡ውስተ፡ሲኦል።
5ወተምዐ፡ላዕሌሁ፡መኰንን፡ወይቤሎ። አንሰ፡እኴንነከ፡ዓቢየ፡ኵነኔ። ወኢፈርሀ፡እምኔሁ፡ቅዱስ፡መጥራ፡ወኢተመይጠ፡እምክሩ፡ሠናይ፡አላ፡ይቤሎ። አንሰ፡እሰግድ፡ለእግዚእየ፡ኢየሱስ፡ክርስቶስ፡ፈጣሬ፡ሰማያት፡ወምድር። ወእፎ፡ይደልወኒ፡እኀድጎ፡ለአምላክ፡ዘበአማን፡ወእስግድ፡ለጣዖታት፡ዘተገብሩ፡በእደ፡ሰብእ፡አእባን፡ወዕፀው፡ወኢይሬእዩ፡ወኢይሰምዑ፡ወኢያፄንዉ፡ወኢያንሶስዉ።
6ወተምዐ፡መኰንን፡ወአዘዘ፡ከመ.፡ይቅሥፍዎ፡መቅሠፍተ፡ዓቢየ።
7ወእምዝ፡ሰቀልዎ፡በመዝራዕቱ፡ወሠጠጡ፡ገጾ፡ወገበዋቲሁ፡በኅለት፡ይብስት፤ ወእግዚእነ፡ኢየሱስ፡ክርስቶስ፡ይፌውስ፡ቍስላቲሁ፡ወያነሥኦ፡ጥዐየ፡ዘእንበለ፡ሙስና።
8ወሶበ፡ደክመ፡እምኵነኔሁ፡ኣዘዘ፡ይምትሩ፡ርእሶ፡በሰይፍ፡ወነሥአ፡አክሊለ፡ስምዕ፡በመንግሥተ፡ሰማያት፡ወብዙኃን፡ኮኑ፡ሰማዕተ፡ምስሌሁ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለመጥራ፡ምስለ፡ሰማዕታት፡ማኅበሩ፤አመ፡አሰፈዎ፡ንጉሥ፡ይጸግዎ፡ሀብታተ፡እምነ፡ክብሩ፤ዘኢተመይጠ፡ምንተኒ፡እምነ፡ሠናይ፡ምግባሩ፤በኅለት፡ይቡስ፡እስከ፡ገቦሁ፡ሰተሩ፤ወእስከ፡በሰይፍ፡ክሣዶ፡መተሩ።
9ወበዛቲ፡ዕለት፡ኮኑ፡ሰማዕተ፡ቅዱስ፡ባኮስ፡ወቅዱስ፡በላግያ፡ወተዝካሩ፡ለአብሖር፡ወተዝካራ፡ለሶስና፡ወለደቂቃ፡ሰማዕታት፡በሀገረ፡ፃምዋህ፡ወተዝካሩ፡ለአባ፡ዓጋቶን፡ባሕታዊ፡ጸሎቶሙ፡ወበረከቶሙ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለክሙ፡ደቂቀ፡ሶስና፡አኃው፤ዘኮንክሙ፡ስምዐ፡በሀገረ፡ጽምሀው፤ለሖር፡ሰላም፡ወለዓጋቶን፡ብሕትው፤ሥነ፡ጽድቅክሙ፡እምሥነ፡ጽጌ፡ፍትውወመዓዛክሙ፡እምኵሉ፡አፈው።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።