Sinaxario · Tikimt
7 de Tikimt
አመ፡፯፡ለጥቅምት1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፯፡ለጥቅምት፡በዛቲ፡ዕለት፡አዕረፈ፡አብ፡ቅዱስ፡አባ፡ባውላ፡እምሀገረ፡ጠማው።
2ወዝንቱ፡ቅዱስ፡መንኰሰ፡እምንእሱ፡ወተጋደለ፡ተጋድሎ፡ዓቢየ፡ወኀደረ፡ውስተ፡ደብረ፡እንጽላ፡ዘላዕላይ፡ግብፅ፡ወምስሌሁ፡ሕዝቅኤል፡ረድኡ፡ወውእቱ፡ዘኮነ፡ስምዐ፡በእንተ፡ትሩፋቲሁ፡ለመምህሩ፡ወተጋድሎቱ።
3ወዝንቱ፡ቅዱስ፡አባ፡ባውላ፡ተጋደለ፡በእንተ፡ፍቅረ፡ክርስቶስ፡ብዙኃ፡ገድለ፡ወቀተለ፡ነፍሶ፡፯ተ፡ጊዜ፡ቀዳሚ፡ሰቀለ፡ርእሶ፡ዲበ፡ዕፅ፡ቍልቍሊተ፡ወነበረ፡፵፡መዓልተ፡ወ፵፡ሌሊተ፡እንዘ፡ስቍል፡ውእቱ፡እስከ፡ውኅዘ፡ደሙ፡እምአንፉ፡ወመጠወ፡ነፍሶ፡ወአንሥኦ፡እግዚእነ፡እሞት።
4ወእምዝ፡ወደየ፡ርእሶ፡ውስተ፡ባሕር፡ዮጊ፡እመ፡ይበልዕዎ፡ዓሣት፡ወአናብርት፡ወእሙንቱኒ፡ኢሠሥዎ፡ግሙራ፡ወነበረ፡ስጠመ፡ውስተ፡ማይ፡ብዙኃ፡መዋዕለ፡ወሞተ። ወአንሥኦ፡ካዕበ፡እግዚእነ፡ኢየሱስ፡ክርስቶስ፡እሞት።
5ወሣልስ፡ምዕረ፡ደፈነ፡ርእሶ፡ውስተ፡ኆፃ፡ወሞተ፡ወአንሥኦ፡እግዚእነ።
6ወራብዕ፡አንኰርኰረ፡ርእሶ፡እመልዕልተ፡ደብር፡ነዋኅ፡ወቦ፡ውስተ፡ውእቱ፡ደብር፡አእባን፡በሊሐት፡ከመ፡መጥባሕት። ወቦኡ፡ውስተ፡ገበዋቲሁ፡ወውስተ፡ኵሉ፡ሥጋሁ፡ወሞተ፡ሶቤሃ።
7ወኮነ፡ሕዝቅኤል፡ረድኡ፡ይበኪ፡ላዕሌሁ፡ወመጽአ፡እግዚእነ፡ወአንሥኦ፡ወናዘዞ።
8ወኃምስ፡ወገረ፡ርእሶ፡እምዲበ፡ዕፅ፡ልዕልት፡ላዕለ፡እብን፡ዓቢይ፡ወበሊሕ፡ከመ፡ሰይፍ፡ወተከፍለ፡ለክልኤ፡ክፍል፡ወሞተ፡አሜሃኒ፡አንሥኦ፡እግዚእነ።
9ወሳድስ፡ምዕረ፡አሰረ፡ርእሶ፡ምስለ፡እገሪሁ፡ወነበረ፡ከመዝ፡፵፡መዓልተ፡ወ፵፡ሌሊተ፡ወሞተ፡ወፈነወ፡እግዚአብሔር፡መልአኮ፡ኀቤሁ፡ወአንሥኦ፡ወናዘዞ።
10ወዝንቱ፡ቅዱስ፡ከመዝ፡ኰነና፡ለነፍሱ፡ወሞተ፡፯፡ጊዜያተ፡ወለለይመውት፡ውእቱ፡ያነሥኦ፡እግዚእነ።
11ወሳብዕ፡ምዕረ፡ሰፍሐ፡እገሪሁ፡ዲበ፡ዓዘቅተ፡ማይ፡ነዊኅ፡ወቆመ፡፵፡መዓልተ፡ወ፵፡ሌሊተ፡ወሞተ።
12ወአስተርአዮ፡እግዚእነ፡ወአንሥኦ፡እሞት፡ወአፅንዖ፡ወይቤሎ፡የአክለከ፡ኦ፡ፍቁርየ፡ባውላ፡እምዘታፃሙ፡ወትቀትል፡ነፍሰከ።
13ወይቤሎ፡ኅድገኒ፡ኦ፡እግዚእየ፡ከመ፡እፃሙ፡በእንተ፡ስምከ፡ቅዱስ፡በከመ፡ፃመውከ፡አንተ፡በእንተ፡ዘመደ፡እጓለ፡እመሕያው፡እንዘ፡አንተ፡አምላክ፡ወወልደ፡አምላክ፡ወሞትከ፡በእንተ፡ኃጥአን፡ወለነሰ፡ዘኢይደልወነ፡ከመ፡ትፃሙ፡በእንቲአነ።
14ወናዘዞ፡ወአጽንዖ፡ወዓርገ፡ውስተ፡ሰማያት።
15ወሶበ፡መጽአ፡አብ፡ቅዱስ፡አባ፡ብሶይ፡ኀበ፡ሀገረ፡እንጽና፡ተጋብአ፡ምስሌሁ፡አባ፡ባውላ፡ወአስተርአዮ፡እግዚእነ፡ለአባ፡ባውላ፡ወይቤሎ፡ይኩን፡ሥጋከ፡ምስለ፡ሥጋሁ፡ለአባ፡ብሶይ።
16ወሶበ፡አዕረፈ፡ቅዱስ፡አባ፡ባውላ፡ረሰዩ፡ሥጋሁ፡ምስለ፡ሥጋ፡አባ፡ብሶይ፡በከመ፡ይቤሎ፡እግዚእነ።
17ወእምድኅረዝ፡ፈቀዱ፡ከመ፡ይንሥኡ፡ሥጋሁ፡ለአባ፡ብሶይ፡ኀበ፡ገዳመ፡አስቄጥስ፡ዘውእቱ፡ደብረ፡አባ፡መቃርስ፡ወአንበርዎ፡ውስተ፡ሐመር፡ወኀደጉ፡ህየ፡ሥጋሁ፡ለአባ፡ባውላ።
18ወሖረት፡ሐመር፡ወሶበ፡በጽሐት፡ገዳመ፡አስቄጥስ፡ረከብዎ፡ለሥጋ፡አባ፡ባውላ፡ምስለ፡ሥጋ፡አባ፡ብሶይ፡ወእስከ፡ይእዜ፡ይነብር፡ውስተ፡ቤተ፡ክርስቲያን፡ዘአባ፡ብሶይ፡ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለርእስከ፡ዘመንፈሰ፡ኃይል፡አጥብዓ፤ከመ፡ትሰቀል፡ቍልቍሊተ፡መጠነ፡መዋዕል፡፵፤ባውላ፡ጻድቅ፡ዘትፄኑ፡ቆዓ፤ውስተ፡ግበ፡ገድል፡ዘአልቦ፡ምምዓ፤ወደቀ፡ስብዐ፡ወተንሣእከ፡ስብዐ።
19ወበዛቲ፡ዕለት፡ተዝካሮሙ፡ለሚናስ፡ወሐናሲ፡ሰማዕት፡ጸሎቶሙ፡ወበረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለሚናስ፡ለእግዚአብሔር፡ስምዑ፤ወለሐናሲ፡ካልኡ፤እምቀደምቶ፡ፈድፋደ፡እለ፡ኃየሉ፡ወፀንዑ፤አመ፡ይቤሎሙ፡ወልድ፡ቡሩካነ፡አቡየ፡ንዑ፤ኀበ፡ቦኡ፡ቤተ፡ወይን፡ኪያየ፡ያብኡ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።