Sinaxario · Tikimt
21 de Tikimt
አመ፡፳ወ፩፡ለጥቅምት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፩፡ለጥቅምት፡በዛቲ፡ዕለት፡ተዝካረ፡በዓላ፡ለእግዝእትነ፡ቅድስት፡ድንግል፡ማርያም፡ወላዲተ፡አምላክ። ጸሎታ፡ወበረከታ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለኪ፡ለፀሐየ፡ጽድቅ፡ሰማዩ፤እንተ፡ሠረቀ፡እምኔኪ፡ወአንበልበለ፡ዋዕዩ፤ማርያም፡ክብርኪ፡ደቂቀ፡እስራኤል፡ያርእዩ፤በልብሰ፡አሮን፡ካህን፡ደርከኖ፡አጽገዩ፤ወሮማናተ፡ወርቅ፡ካዕበ፡በዓውዱ፡አፍረዩ።
2ወበዛቲ፡ዕለት፡ኮነ፡ፍልሰተ፡ሥጋሁ፡ለቅዱስ፡አልዓዛር፡ዘአንሥኦ፡እግዚእነ፡እሙታን፡ወአፍልሶ፡ሥጋሁ፡ጥንጥንያ፡፩፡እምነገሥተ፡ሰምዐ፡ዜናሁ፡ከመ፡ውስተ፡ሀሎ፡ሥጋሁ።
3ኀበ፡ሀገረ፡ቍስ፡ክርስቲያን፡ሶበ፡ደሴተ፡ቆጵሮስ፡ወሶበ፡ፈቀዱ፡ከመ፡ያፍልስዎ፡ረከቡ፡ሥጋሁ፡ውስተ፡ሣፁን፡ዘእብን፡ክቡር፡ወጽሑፍ፡ዲቤሁ፡በወርቅ፡ዘይብል፡ዝንቱ፡ሥጋሁ፡ለቅዱስ፡አልዓዛር፡ዓርኩ፡ለእግዚእነ፡ኢየሱስ፡ክርስቶስ፡ሎቱ፡ስብሐት። ዘአንሥኦ፡እሙታን፡እምድኅረ፡ረቡዕ፡መዋዕል።
4ወሶበ፡ርእይዎ፡ተፈሥሑ፡ዐቢየ፡ፍሥሐ፡ወፆርዎ፡ኀበ፡ሀገረ፡ቍስጥንጥንያ፡ወወፅኡ፡ካህናት፡ወተቀበልዎ፡በዐቢይ፡ክብር፡ወበማኅሌት፡በዝማሬ፡ወበጸሎታት። ወማዕጠንታት፡ወአንበርዎ፡ውስተ፡ቤተ፡መቅደስ፡እስከ፡ሐነፁ፡ሎቱ፡ቤተ፡ክርስቲያነ፡ወሶበ፡ፈጸሙ፡ሐኒፆታ፡አብኡ፡ሥጋሁ፡ውስቴታ፡ወገብሩ፡ሎቱ፡በዓለ፡በከመ፡ዛቲ፡ዕለት። ጸሎቱ፡ወበረከቱ፡የሀሉ፡ምስሌነ፡ለዓለሙ፡አሜን።
ሰላም፡እብል፡ለዘአፍለሶ፡ንጉሥ፤ለቍስጥንጥንያ፡እምቆጵሮስ፣አመ፡ውስተ፡ሣፁን፡ተረክበ፡ምስለ፡መጽሐፈ፡ወርቅ፡ሐዲስ፤ዝንቱ፡ዘይቤ፡አልዓዛር፡ቅዱስ፤ዓርከ፡እግዚእነ፡ኢየሱስ፡ክርስቶስ።
5ወበዛቲ፡ዕለት፡አዕረፈ፡አባ፡ዮሐንስ፡ሊቀ፡ጳጳሳት፡ዘሀገር፡ቅድስት፡ኢየሩሳሌም፡በመዋዕሊሁ፡ለንጉሥ፡መፍቀሬ፡እግዚአብሔር፡ዳዊት፡ወልዱ፡ለንጉሥ፡ሰይፈ፡አርዕድ።
6ወዝንቱሰ፡አብ፡ኮነ፡ወልደ፡አበው፡መሢሐውያን፡ወፈራህያነ፡እግዚአብሔር፡ወእሉ፡ልኂቃነ፡ሀገረ፡ምስር፡ወሐፀንዎ፡ለዝንቱ፡ቅዱስ፡ወሰመይዎ፡ስሞ፡ዮሐንስ።
7ወሶበ፡ልኀቀ፡መሀርዎ፡ትምህርተ፡ቤተ፡ክርስቲያን፡ወተሠይመ፡ዲያቆነ፡ወአመ፡አሠነየ፡ሥርዓተ፡ክህነቱ፡ተሠይመ፡ዓዲ፡መዓርገ፡ቅስና። ወኮነ፡ፅሙደ፡በጾም፡ወበጸሎት፡ወፈድፋደሰ፡በፈሪሃ፡እግዚአብሔር፡ወበፍቅረ፡ነጋድያን።
8አሜሃ፡ደለወቶ፡ሥርዓት፡ሐዋርያዊት፡ወበፈቃደ፡እግዚአብሔር፡ተሠይመ፡ጳጳሰ፡ውስተ፡ሀገር፡ቅድስት፡ኢየሩሳሌም። ወተጋደለ፡በውስቴታ፡ገድለ፡ሠናየ፡ወኮነ፡ይሜህር፡ሕዝቦ፡በትሕትና፡ወበፈሪሀ፡እግዚአብሔር፡ወእሙንቱሰ፡ያፈቅርዎ፡ፈድፋደ፡በእንተ፡ቅድስናሁ፡ወሠናይ፡መክሥተ፡አፉሁ፡ወራእዩ፡ከመ፡መልአከ፡እግዚአብሔር።
9ወእምድኅረ፡ነበረ፡ላዕለ፡መንበረ፡ሢመቱ፡ኅዳጠ፡ዓመታተ፡አምጽአ፡ላዕሌሁ፡መከራ፡ሰይጣን፡እስከ፡አርኀቆ፡እምሕዝቡ፡ወእምሀገሩ።
10ወዝንቱ፡ውእቱ፡በመዋዕለ፡ሢመቱ፡ለአብ፡ሊቀ፡ጳጳሳት፡አባ፡ማርቆስ፡እስመ፡ንጉሡ፡ግብፅ፡አገበሮ፡ለሊቀ፡ጳጳሳት፡አባ፡ማርቆስ፡ከመ፡ይፈኑ፡መልእክተ፡ኀበ፡ንጉሠ፡ኢትዮጵያ፡ዘስሙ፡ሰይፈ፡አርዕድ፡በእንተ፡ተንባላት፡እለ፡ይነብሩ፡ታሕተ፡መንግሥቱ፡እስመ፡ንጉሠ፡ኢትዮጵያ፡ሰይፈ፡አርዕድ፡ዘይሰመይ፡ዓዲ፡ቈስጠንጢኖስ፡ቀተለ፡እምነ፡ተንባላት፡ብዙኃነ፡ሶበ፡ዓለዉ፡ትእዛዞ፡ወቦ፡እለ፡ሰደዶሙ፡እምሀገሩ።
11ወሖሩ፡ኀበ፡ንጉሠ፡ምስር፡ወተማኅፀኑ፡ኀቤሁ፡ወይቤልዎ፡እስመ፡ንጉሠ፡ኢትዮጵያ፡አኅለቆሙ፡ለተንባላት፡ወቦ፡እለ፡ረሰዮሙ፡ክርስቲያነ፡ወቦ፡እለ፡ቀተሎሙ።
12ወሶበ፡ሰምዐ፡ንጉሠ፡ምስር፡ቀንአ፡ለሃይማኖቱ፡ወአገበሮ፡ለሊቀ፡ጳጳሳት፡አባ፡ማርቆስ፡ከመ፡ይፈኑ፡ልኂቃነ፡አበው፡ኀበ፡ንጉሠ፡ኢትዮጵያ፡ወያጠይቆ፡ምሕፅንታቲሆሙ፡ለእለ፡ተርፉ፡ተንባላት፡ወየአዝዞ፡ከመ፡ይሠሃል፡ላዕለ፡ተንባላት፡እለ፡ውስተ፡ሀገረ፡መንግሥቱ።
13ወተሰነዓወ፡ሊቀ፡ጳጳሳት፡በምክር፡ምስለ፡ንጉሥ፡ወምስለ፡መኳንንት፡በእንተ፡ፈንዎተ፡ኤጲስ፡ቆጶሳት፡ኀበ፡ንጉሠ፡ኢትዮጵያ።
14ወኀረዩ፡እሎንተ፡አበወ፡ከዋክብተ፡ብሩሀነ፡እንበይነ፡ቅድስናሆሙ፡ወጥበቦሙ፡ዘውእቶሙ፡አብ፡ክቡር፡አባ፡ዮሐንስ፡ወአብ፡ማእምር፡ወለባዊ፡አባ፡ቄርሎስ፡ኤጲስቆጶስ፡ዘሀገረ፡አህናስ፡ወአገበርዎሙ፡ከመ፡ይሑሩ፡ኀበ፡ሀገረ፡ኢትዮጵያ፡ኀበ፡ንጉሥ።
15ወሶበ፡በጽሑ፡ኀበ፡ጽንፈ፡ኢትዮጵያ፡ሰምዐ፡በእንቲአሆሙ፡ንጉሥ፡መፍቀሬ፡እግዚአብሔር፡ተፈሥሐ፡ዐቢየ፡ፍሥሐ፡ወፈነወ፡ኀቤሆሙ፡ወዓልያኒሁ፡ብዙኀ፡ወአብቅልተ፡ከመ፡ይትቀበልዎሙ፡ወሶበ፡በጽሑ፡ኀበ፡ንጉሥ፡ተፈሥሐ፡ወተኃሥየ፡ቦሙ፡ወአክበሮሙ፡ፈድፋደ፡ክብራተ።
16ወእምድኅረ፡አንበቡ፡ሎቱ፡መልእክተ፡አብ፡ሊቀ፡ጳጳሳት፡ወኀሠሠ፡ገቢአ፡ኀበ፡መናብርቲሆሙ፡ወሕዝቦሙ፡ወንጉሥሰ፡ከልኦሙ፡እንበይነ፡ዘአፍቀረ፡ቅድስናሆሙ፡ወእንበይነ፡አፍቅሮቱ፡ኪያሆሙ፡ወክህነቶሙ፡ወገጻቲሆሙ፡ዘምሉእ፡ጸጋ፡እስመ፡ከመ፡መላእክተ፡እግዚአብሔር፡እሙንቱ፡ወያበርሁ፡ከመ፡ፀሐይ፡ወአፍቀሮሙ፡እግዚእ፡ንጉሥ፡ፍቅረ፡ዐቢየ፡በእንተ፡ቅድስናሆሙ፡ወጸሎቶሙ።
17ወእምድኅረ፡ኅዳጥ፡ዘመን፡ሶበ፡ፈቀደ፡እግዚአብሔር፡በምሕረቱ፡ከመ፡ያፍልሶ፡እምፃማ፡ዝንቱ፡ዓለም፡ኀላፊ፡ለዝንቱ፡አብ፡አባ፡ዮሐንስ፡አምጽአ፡ደዌ፡ንስቲተ፡ወአዕረፈ፡በርስዕ፡ሠናይ። ወመሥመሬ፡ከዊኖ፡ለእግዚአብሔር፡በ፲፻ወ፩፻ወ፯፡ዓመት፡እም፡ዓመተ፡ሰማዕታት። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
18ወበዛቲ፡ዕለት፡አዕረፈ፡ዐቢይ፡ነቢይ፡ኢዩኤል፡ጻድቅ፡ወልደ፡ባቱኤል፡ወተነበ፡በመዋዕሊሁ፡ለአብያ፡ወልደ፡ሮብዓም፡ወልደ፡ሰሎሞን፡ንጉሥ።
19ወመሀሮሙ፡ለሕዝብ፡ወገሠፆሙ፡ወተነበየ፡በእንተ፡ኅድረቱ፡ለእግዚአብሔር፡በጽዮን። ወበእንተ፡ሕማማቲሁ፡ለእግዚእነ። ወበእንተ፡ርደተ፡መንፈስ፡ቅዱስ፡ጰራቅሊጦስ፡ላዕለ፡ሐዋርያት። ወከመ፡ይትኔበዩ፡አዋልዲሆሙ፡ወውሉዶሙ፡ወአዕሩጊሆሙ፡ወወራዙቶሙ፡ወአንስት፡እለ፡ይነብራ፡ምስሌሆሙ።
20ወይቤ፡በውስተ፡ትንቢቱ፡እጐሥዕ፡እምነ፡መንፈስየ፡ላዕለ፡ኵሉ፡ሰብእ፡ወኢጐሥዓ፡ዘእንበለ፡ላዕለ፡ሐዋርያት። ዝንቱሰ፡ቦቱ፡፪፡ትርጓሜያት፡እስመ፡ሐዋርያት፡ቅዱሳን፡ፍጹማነ፡በገቢረ፡በእንተ፡እሙንቱ፡ኮኑ፡ጽድቅ፡ሰመዮሙ፡ሰብአ፡እስመ፡ዘኢኮነ፡ፍጹመ፡በገቢረ፡ጽድቅ፡ኢይሰመይ፡ሰብአ።
21ወዳግም፡ትርጓሜ፡እስመ፡እምሐዋርያት፡ጐሥዐ፡መንፈሰ፡አእምሮ፡ላዕለ፡ኵሎሙ፡ቅዱሳን፡መሃይምናን፡እምጊዜ፡ስብከቶሙ።
22ወተነበየ፡በእንተ፡ፀዓተ፡ሕገ፡ወንጌል፡እምጽዮን፡ሶበ፡ይቤ፡ይውኅዝ፡ነቅዕ፡እምቤተ፡እግዚአብሔር፡ሰጢም፡ወይሠቂ፡ፈለገ፡ምሥጢር።
23ወከሠተ፡ከመ፡እምድኅረ፡ምጽአቱ፡ለእግዚእነ፡ይትነሣእ፡ፀብዕ፡ውስተ፡ምድር፡ወተናገረ፡በእንተ፡ዕለተ፡ትንሣኤ፡ወይቤ፡ፀሐይ፡ይጸልም፡ወወርኅኒ፡ደመ፡ይከውን፡ወለከዋክብትኒ፡ይትኀባእ፡ብርሃኖሙ።
24ወተነበየ፡እምቅድመ፡ምጽአቱ፡ለእግዚእነ፡በ፲፻፡ዓመት። ወኮነ፡ዝንቱ፡እምነገደ፡ሮቤል፡ወበጽሐ፡እስከ፡ርስዕና፡ሠናይ፡ወአ፡ሥመሮ፡ለእግዚአብሔር፡ወአዕረፈ፡በሰላም፡ወተቀብረ፡ውስተ፡ገራህቱ።በረከተ፡አምላኩ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለከ፡ነቢየ፡ምህሮ፡ወግሣፄ፤ወልደ፡ባቱኤል፡ኢዩኤል፡በሊሐ፡ልሳን፡እምነ፡ማኅፄ፤ከመ፡ትብል፡አንተ፡እስመ፡ኀልቀ፡ወርኀ፡ድንጋፄ፤በረከት፡ቆመ፡በክርስቶስ፡ዘአልቦ፡ኍፃሜ፤ህየንተ፡ዘበልዑ፡ቅድመ፡አንበጣ፡ወዕፄ።
25ወበዛቲ፡ዕለት፡ገብረት፡እግዝእትነ፡ማርያም፡ተአምረ፡ወአድኀነቶ፡ለማትያስ፡ረድእ፡እምቤተ፡ሞቅሕ። ጸሎታ፡ወበረከታ፡የሀሉ፡ምስሌነ፡ለዓለም፡አሜን።
ሰላም፡ለኪ፡ገነተ፡ሚዓ፡ወሰሊክ፤ዘኢያይበሰኪ፡ምንተ፡ነፋሰ፡መርቄ፡ወደደክ፤እማእሰረ፡ጌጋይ፡ፍትሕኒ፡ወላዲተ፡ክርስቶስ፡አምላክ፤እምነ፡ሞቅሕ፡ጽኑዕ፡ወእምነ፡ማእሰር፡ድሩክ፤ከመ፡ፈታሕኪዮ፡ዮም፡ለማትያስ፡ላእከ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።