Sinaxario · Tikimt
20 de Tikimt
አመ፡፳ሁ፡ለጥቅምት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ሁ፡ለጥቅምት፡በዛቲ፡ዕለት፡አዕረፈ፡አብ፡ቅዱስ፡ብርሃነ፡ዓለም፡ዐቢይ፡አባ፡ዮሐንስ፡ሐፂር።
2ወዝንቱ፡ቅዱስ፡ኮነ፡እምሀገር፡እንተ፡ስማ፡ታንስ፡እምላዕላይ፡ግብፅ፡ወኮነ፡ሎቱ፡፩፡እኅው፡ወአበዊሁኒ፡ኄራን፡ወፈህራያነ፡እግዚአብሔር፡ወኢኮነ፡ሎሙ፡ብዕለ፡ዝንቱ፡ዓለም፡አላ፡ኮኑ፡ብዑላነ፡በምግባረ፡ሠናይ።
3ወሶበ፡ኮኖ፡ለዝንቱ፡ቅዱስ፡፲ተ፡ወ፰ተ፡ዓመተ፡ሆከቶ፡ጸጋ፡መንፈሳዊት፡ከመ፡ይሑር፡ገዳመ፡አስቄጥስ፡ወፈተወ፡ከመ፡ይልበስ፡አልባሰ፡መንፈሳውያን፡ዘመላእክት፡ዘውእቱ፡ምንኵስና።
4ወሶበ፡ቦአ፡ገዳመ፡ረከቦ፡ለ፩፡አረጋዊ፡ጽኑዓ፡ወፍቱነ፡ዘስሙ፡አባ፡ባይሞይ፡እምሀገረ፡ስሐ፡ዘውእቱ፡ይነብር፡በገዳመ፡አስቄጥስ።
5ወሰገደ፡ሎቱ፡ቅዱስ፡ዮሐንስ፡ወሰአሎ፡ከመ፡ይንበር፡ኀቤሁ፡ወቅዱስ፡አባ፡ባይሞይ፡ፈቀደ፡ከመ፡ይፍትኖ፡ወያመክሮ፡ወይቤሎ፡ኦ፡ወልድየ፡ኢትክል፡ትንበር፡ዝየ፡እስመ፡ዛቲ፡ገዳም፡ዕፅብት፡ወእለ፡ይነብሩ፡ውስቴታ፡በእደዊሆሙ፡ይትጌበሩ፡ወይፃምዉ፡ወይሴሰዩ።
6ወእምዝንቱ፡ካዕበ፡ዘይፈደፍድ፡ጾም፡ወጸሎት፡ብዙኃ፡መዓልተ፡ወሌሊተ፡ወሰኪብ፡ዲበ፡ምድር፡ዕራቁ፡ዘእንበለ፡መንጸፍ፡ወዕፅብና፡ሀሎ፡ውስተ፡ዛቲ፡ገዳም፡ወባሕቱ፡ተመየጥ፡ወልድየ፡ውስተ፡ዓለም፡ወሕየው፡ሠናየ፡ከመ፡ኵሉ፡ሰብእ።
7ወይቤሎ፡አባ፡ዮሐንስ፡ኦ፡አቡየ፡ኢትሚጠኒ፡በእንተ፡እግዚአብሔር፡እስመ፡እነ፡መጻእኩ፡ከመ፡እኩን፡ታሕተ፡ትእዛዝከ፡ወታሕተ፡ጽላሎቱ፡ለጸሎትከ፡ወለእመ፡ተወከፍከኒ፡አነኒ፡አአምን፡ከመ፡እግዚአብሔር፡ያሠኒ፡ለከ፡በእንቲአየ።
8ወኮነ፡አባ፡ባይሞይ፡ኢይገብር፡ምንተኒ፡ፍጡነ፡ወሰአሎ፡ለእግዚአብሔር፡በእንተ፡አባ፡ዮሐንስ፡ከመ፡ይክሥት፡ሎቱ፡ግብሮ፡ወአስተርአዮ፡መልአከ፡እግዚአብሔር፡ወይቤሎ፡እስመ፡እግዚእ፡ይቤለከ፡ከመ፡ትትወከፎ፡እስመ፡ውእቱ፡ይከውን፡ፅሙደ፡ለእግዚአብሔር።
9ወሶበ፡ሰምዐ፡ዘንተ፡እምነ፡መልአክ፡አብኦ፡ውስተ፡ቤተ፡ክርስቲያን፡ወላፀየ፡ሥዕርተ፡ርእሱ፡ወአንበረ፡አልባሰ፡ምንኵስና፡ወቆመ፡ይጼሊ፡ላዕሌሁ፡፫ተ፡መዓልተ፡ወ፫ተ፡ሌሊተ። ወእምዝ፡አስተርአዮ፡መልአከ፡እግዚአብሔር፡ወዓተበ፡በትእምርተ፡መስቀል፡ዲበ፡አልባሰ፡ምንኵስና፡ወአልበሶ፡ለአባ፡ዮሐንስ።
10ወእምዝ፡ወጠነ፡አባ፡ዮሐንስ፡ተፀምዶ፡ዐቢየ፡ወተጋድሎ፡ብዙኀ፡ዘምግባረ፡ሠናይ።
11ወአሐተ፡ዕለተ፡ፈቀደ፡አባ፡ባይሞይ፡ያመክሮ፡ለአባ፡ዮሐንስ፡ወሰደዶ፡እንዘ፡ይብል፡አንሰ፡ኢይክል፡እኅድር፡ምስሌከ። ወወፅአ፡አባ፡ዮሐንስ፡ወቆመ፡አፍአ፡፯፡መዋዕለ፡ኀበ፡አንቀጸ፡ደብር፡ወኮነ፡አባ፡ባይሞይ፡ኵሎ፡አሚረ፡ይወፅእ፡ኀበ፡አባ፡ዮሐንስ፡ወይዘብጦ፡በበትር፡ወአባ፡ዮሐንስ፡ይሰግድ፡ሎቱ። ወይብሎ፡ሥረይ፡ሊተ፡ኦ፡አቡየ።
12ወአመ፡ሳብዕት፡ዕለት፡አባ፡ባይሞይ፡ወፅአ፡ከመ፡ይሑር፡ውስተ፡ቤተ፡ክርስቲያን፡ወርእየ፡፯ተ፡መላእክተ፡ወምስሌሆሙ፡አክሊላት፡፯ቱ፡ወእሙንቱ፡እንዘ፡ያነብርዎሙ፡ዲበ፡ርእሱ፡ለአባ፡ዮሐንስ፡ወአብኦ፡ውስተ፡በዓቱ።
13ወእምይእቲ፡ዕለት፡ኮነ፡በኀቤሁ፡ክቡረ፡ወግሩመ።
14ወአሐተ፡ዕለተ፡ረከበ፡አባ፡ባይሞይ፡ዕፀ፡ይቡሰ። ወወሀቦ፡ለአባ፡ዮሐንስ፡ወይቤሎ፡ንሣእ፡ዘንተ፡ዕፀ፡ወትክሎ፡ወሥቅዮ፡ማየ፡እስከ፡ይሠርፅ፡ወይፈሪ። ወተአዘዘ፡አባ፡ዮሐንስ፡ለአባ፡ባይሞይ፡አቡሁ፡ወነሥኣ፡ለይእቲ፡ዕፅ፡ወተከላ፡ወኮነ፡ይሠቅያ፡ኵሎ፡አማረ፡፪ተ፡ጊዜ፡ለለዕለቱ፡ወመካነ፡ማይሂ፡ርኁቅ፡ውእቱ፡መጠነ፡፲ወ፪፡ምዕራፍ።
15ወእምድኅረ፡፫ቱ፡ዓመት፡ሠረፀት፡ይእቲ፡ዕፅ፡ወኮነት፡ዕፀ፡ፀባየ፡ወፈረየት። ወነሥአ፡አረጋዊ፡አባ፡ባይሞይ፡እምነ፡ፍሬሃ፡ወወሰደ፡ለኵሎሙ፡አረጋውያን፡መነኮሳት፡ወይቤሎሙ፡ንሥኡ፡ብልዑ፡እምፍሬ፡ተአዛዚ፡ወትሑት።
16ወሶበ፡ርእዩ፡መነኮሳት፡ዘንተ፡ተአምረ፡አንከሩ፡ፈድፋደ፡ወሰብሕዎ፡ለእግዚአብሔር፡ዘይሁብ፡ዘንተ፡ጸጋ፡ዐቢየ፡ለእለ፡ይትኤዘዙ፡ለመምህራኒሆሙ።
17ወእምድኅረ፡ዝንቱ፡ደወየ፡ደዌ፡ዐቢየ፡አባ፡ባይሞይ፡ወነበረ፡ውስተ፡ውእቱ፡ደዌ፡፲ወ፰ተ፡ዓመተ፡ወአባ፡ዮሐንስ፡ነበረ፡እንዘ፡ይትለአኮ። ወኢይብሎ፡አባ፡ባይሞይ፡ለአባ፡ዮሐንስ፡አሐተሂ፡ዕለተ፡ሠናየ፡ገበርከ፡እስመ፡ውእቱ፡አረጋዊ፡ኮነ፡ዘያሜክሮ፡ፈድፋደ። ወበእንተዝ፡አመከሮ፡እግዚእነ፡ለአባ፡ባይሞይ፡በደዌ፡ዓቢይ፡እስከ፡ኮነ፡ከመ፡ዕፅ፡ይቡስ፡ከመ፡ይኩን፡ቍርባነ፡ኅሩየ፡ለእግዚአብሔር።
18ወበጊዜ፡ዕረፍቱ፡ለአባ፡ባይሞይ፡አስተጋብኦሙ፡ለአረጋውያን፡መነኮሳት፡ወአኀዞ፡እዴሁ፡ለአባ፡ዮሐንስ፡ወመጠዎሙ፡ኪያሁ፡እንዘ፡ይብል፡ንሥእዎ፡ወዕቀብዎ፡ለዝንቱ፡እስመ፡መልአክ፡ወኢኮነ፡ሰብአ።
19ወካዕበ፡ይቤሎ፡ለአባ፡ዮሐንስ፡እምድኅረ፡ሞትኩ፡አነ፡ኀድር፡ውስተ፡መካን፡ኀበ፡ተከልኮ፡ለዕፅ፡ይቡስ፡ወሠረፀ፡ወፈረየ፡እስመ፡ለከ፡ውእቱ፡መንከ፡ወውስተ፡ውእቱ፡መካን፡ይከውን፡መሥዋዕት፡ኀሩይ፡ወውኩፍ፡በኀበ፡እግዚአብሔር፡ወብዙኃን፡ይድኅኑ፡በእዴከ፡ወበህየ፡ይከውን፡ተዝካርከ፡እስከ፡ለዓለም።
20ወሶበ፡ይቤሎ፡ዘንተ፡መጠወ፡ነፍሶ፡ውስተ፡እደ፡እግዚአብሔር።
21ወእምድኅረዝ፡ሖረ፡አባ፡ዮሐንስ፡ወኀደረ፡ውስተ፡ውእቱ፡መካን፡በከመ፡አዘዞ፡መምህሩ፡አባ፡ባይሞይ፡ወኮነ፡ይትጋደል፡በገቢረ፡ጽድቅ፡እስከ፡ተለዓለ፡ስሙ፡ፈድፋደ።
22ወእምድኅረ፡ዝንቱ፡ተሠይመ፡አበምኔት፡ላዕለ፡ቤተ፡ክርስቲያነ፡ዚአሁ፡ወእንዘ፡ሊቀ፡ጳጳሳትኒ፡ያነብር፡እዴሁ፡ዲበ፡ርእሱ፡መጽአ፡ቃል፡እምሰማይ፡ዘይብል፡አክስዮስ፡አክስዮስ፡ዝ፡ብሂል፡“ይደልዎ፡ይደልዎ።”
23ወኮነ፡ሎቱ፡ጸጋ፡ዐቢይ፡ለአባ፡ዮሐንስ፡እስመ፡ውእቱ፡ሶበ፡ይቄድስ፡ቊርባነ፡ይሬኢ፡ዘይደልዎ፡ቍርባን። ወእመሂ፡ዘኢይደልዎ።
24ወሐነፀ፡አባ፡ቴዎፍሎስ፡ሊቀ፡ጳጳሳት፡ቤተ፡ክርስቲያን፡በስሞሙ፡ለ፫፡ደቂቅ፡ቅዱሳን፡በሀገረ፡እስክንድርያ፡ወፈቀደ፡ከመ፡ያምጽእ፡ሥጋሆሙ፡ለ፫ቱ፡ደቂቅ፡እምሀገረ፡ባቢሎን።
25ወፈነዎ፡ለዮሐንስ፡አብ፡ቅዱስ፡ያምጽእ፡ሎቱ፡ወሶበ፡ወፅአ፡ለሐዊር፡አባ፡ዮሐንስ፡ፆረቶ፡ደመና፡ወአብጽሐቶ፡ኀበ፡ሀገረ፡ባቢሎን፡ወርእያ፡ለይእቲ፡ሀገር፡ወለአፍላጋቲሃ፡ወለአጽርሕቲሃ፡ወርእየ፡ሥጋሆሙ፡ለቅዱሳን፡፫ቱ፡ደቂቅ፡ወሥጋሁ፡ለናቡከደነፆር፡ንጉሥ፡ዘይነብር፡በገቦሆሙ።
26ወሰገደ፡አባ፡ዮሐንስ፡ተኣምን፡ሥጋቲሆሙ፡ቅዱሳተ፡እንዘ፡ይጸርሕ፡ወይብል፡ምስለ፡አንብዕ፡ኦ፡አበውየ፡ባርኩ፡ላዕሌየ። ወሶቤሃ፡ሰምዐ፡ቃለ፡ዘይብል፡እምሰማይ፡እግዚአብሔር፡አምላከ፡እስራኤል፡ይባርክ፡ላዕሌከ፡ወሰሚዖ፡ዘንተ፡ቃለ፡ተመልአ፡መንፈስ፡ቅዱስ፡ወተፈሥሐ፡በበረከት፡መንፈሳዊት።
27ወካዕበ፡ይቤ፡ኦ፡አበውየ፡ሰማዕታቲሁ፡ለእግዚአብሔር፡አምላክ፡እብለክሙ፡እስመ፡ሊቀ፡ጳጳሳት፡አቡነ፡አባ፡ቴዎፍሎስ፡ሐነፀ፡ቤተ፡ክርስቲያነ፡በስምክሙ፡በሀገረ፡እስክንድርያ። ወፈነወኒ፡ኀቤክሙ፡ወይስእለክሙ፡ከመ፡ትብጽሑ፡ወትኅድሩ፡ውስተ፡ውእቱ፡ቤተ፡ክርስቲያንክሙ፡ወሥጋክሙኒ፡ከመ፡ይኩን፡ፈውሰ፡ወመድኀኒተ፡ለኵሎሙ፡ለእለ፡የአምኑ፡በእግዚእነ፡ክርስቶስ፡ሎቱ፡ስብሐት።
28ወአውሥእዎ፡ቅዱሳን፡በ፩፡ቃል፡እንዘ፡ይብሉ፡ከመዝ፡በሎ፡ለሊቀ፡ጳጳሳት፡እግዚአብሔር፡የሀብከ፡ዓሥብ፡ፃማከ፡በውስተ፡ሕይወት፡ዘለዓለም፡ወለነሰ፡አዘዘ፡እግዚአብሔር፡ከመ፡ኢይፍልስ፡ሥጋነ፡እምዝንቱ፡መካን፡እስከ፡ዕለተ፡ትንሣኤ፡ወባሕቱ፡በእንተ፡ተጋድሎትከ፡ወፃማከ፡ወሃይማኖትከ፡ፍጽምት፡አመ፡ቅዳሴሃ፡ለቤተ፡ክርስቲያን፡አስተዳልዉ፡ወስቅሉ፡መኀትወ፡ወግበሩ፡ውስቴቶሙ፡ቅብዐ፡ወፈትለ፡ወኢታኀትዉ።
29ወበጊዜ፡መንፈቀ፡ሌሊት፡ንበጽሕ፡ንሕነ፡ወንከሥት፡ኀይሎ፡ለእግዚአብሔር፡በቅድመ፡ጉቡአን፡ሕዝብ።
30ወሰሚዖ፡አባ፡ዮሐንስ፡ሰገደ፡ዲበ፡ምድር፡ወወፅአ፡እምኀቤሆሙ፡እንዘ፡ይትፌሣሕ፡በእግዚአብሔር፡ወናሁ፡ፆረቶ፡ደመና፡ወአብጽሐቶ፡አፍአ፡ኀበ፡ሀገረ፡እስክንድርያ፡ወቦአ፡ኀበ፡ሊቀ፡ጳጳሳት፡ወነገሮ፡ዘከመ፡ይቤልዎ፡ቅዱሳን፡፫፡ደቂቅ፡ወተፈሥሐ፡ወገብረ፡በከመ፡አዘዝዎ።
31ወሶበ፡ኮነ፡መንፈቀ፡ሌሊት፡በጊዜ፡ቅዳሴ፡ቤተ፡ክርስቲያን፡አስተርአዩ፡፫ቱ፡ደቂቅ፡ቅዱሳን፡በብርሃን፡ዐቢይ፡ወአብርሁ፡እሎንተ፡መኀትወ፡ወፄነወ፡ፄና፡ምዑዝ፡ፈድፋደ፡ወኮነ፡ዐቢይ፡ፍሥሐ፡አንከሩ፡ኵሎሙ፡እለ፡ርእዩ፡ወሰብሕዎ፡ለእግዚአብሔር። ወእምዝ፡ተመይጠ፡አባ፡ዮሐንስ፡ውስተ፡ገዳም፡ኀበ፡አስቄጥስ፡ወኮነ፡ይትጋደል፡መዐልተ፡ወሌሊተ።
32ወበአሐቲ፡ዕለት፡መጽአ፡፩፡መነኮስ፡ኀበ፡በዓቱ፡ለአባ፡ዮሐንስ፡ወረከቦ፡እንዘ፡ይሰክብ፡ወመላእክተ፡እግዚአብሔር፡እንዘ፡ያን፡ዘፈዝፉ፡ክነፊሆሙ፡ላዕሌሁ፡ወለለ፡፩፡እምኔሆሙ፡ይብሉ፡በበይናቲሆሙ፡ኅድገኒ፡አንብር፡ክንፍየ፡ላዕሌሁ።
33ወእምድኅረዝ፡መጽኡ፡በርበር፡አረማውያን፡ኀበ፡ገዳመ፡አስቄጥስ፡ከመ፡ያመዝብሩ፡አብያተ፡ክርስቲያናት፡ወአብያተ፡መነኮሳት፡ወይቅትልዎሙ።
34ወእምህየ፡ሖረ፡አባ፡ዮሐንስ፡ኀበ፡ደብረ፡አባ፡እንጦንስ፡ውስተ፡ደብረ፡ቍልዝም፡አኮ፡ፈሪሆ፡ሞተ፡አላ፡ይቤ፡ከመ፡ኢይምጻእ፡ብእሲ፡አረማዊ፡ወኢይቅትለኒ፡ወኢይሑር፡በእንቲአየ፡ውስተ፡ሲኦል። ወለ፡እመ፡ኮነ፡ይትቃረነኒ፡በአምልኮ፡እግዚአብሔር፡ወውእቱ፡እኍየ፡በፍጥረትነ። ለዓፀድ።
35ወኀደረ፡አባ፡ዮሐንስ፡በገቦሁ፡ወአምጽኡ፡ሎቱ፡እግዚአብሔር፡ብእሴ፡መሃይምነ፡ወኮነ፡ይትለአኮ፡እስከ፡ጊዜ፡ዕረፍቱ።
36ወፈቀደ፡እግዚአብሔር፡ያዕርፎ፡እምፃማ፡ዝንቱ፡ዓለም፡ፈነወ፡ሎቱ፡ጻድቃኒሁ፡አባ፡እንጦንስሃ፡ወአባ፡መቃርስሃ፡ወአባ፡መቃቢስሃ፡ወአባ፡ጳኵሚስሃ፡ከመ፡ይናዝዝዎ፡ወያጠይቅዎ፡ፍልሰቶ። ወአባ፡ባይሞይ፡አቡሁ፡መንፈሳዊ፡ምስሌሆሙ፡ወናዘዝዎ፡ወይቤልዎ፡ፅናዕ፡በእግዚአብሔር፡ወተፈሣሕ፡በፍሥሐ፡ዘለዓለም፡ዘአስተዳለወ፡ለከ፡እግዚአብሔር።
37ወኩን፡ድልወ፡እስመ፡ንሕነ፡ንመጽእ፡ኀቤከ፡በዕለተ፡እሑድ፡በጽባሕ፡ወንነሥአከ፡ኀቤነ፡በከመ፡አዘዘ፡እግዚአብሔር፡መባረኩ፡ላዕሌሁ፡ቅዱሳን፡ወተኀብኡ፡እምኔሁ።
38ወበዕለተ፡ዓርብ፡ፈነዎ፡ለላእኩ፡ኀበ፡ዓፀድ፡ውእቱሰ፡ደወየ፡ንስቲተ፡ወሶበ፡ኮነ፡ንቅወተ፡ዶርሆ፡በሌሊተ፡እሑድ፡ቅድስት። ወናሁ፡በጽሑ፡ብዙኀን፡ሠራዊተ፡መላእክት፡ወኵሎሙ፡ማኅበረ፡ቅዱሳን፡ወሶበ፡ርእዮሙ፡ተፈሥሐ፡ወሰገደ፡ወመጠወ፡ነፍሶ፡ውስተ፡እዴሁ፡ለእግዚአብሔር፡ወተቀበልዎ፡መላእክት፡በስብሐት፡ወበዝማሬ፡ወአዕረግዎ፡ወአብእዎ፡ውስተ፡ኢየሩሳሌም፡ሰማያዊት።
39ወውእተ፡ጊዜ፡መጽአ፡ላእኩ፡ወርእየ፡ነፍሶ፡ለቅዱስ፡እንዘ፡ያዓርግዋ፡መላእክት፡ውስተ፡ሰማይ፡ወእንዘ፡ይዜምሩ፡ቅድሜሃ፡ምስለ፡ኵሎሙ፡ቅዱሳን። ወ፩፡እምኔሆሙ፡ይበርህ፡ከመ፡ፀሐይ፡ይዜምር፡ወይዌድሶ፡ለብፁዕ፡አባ፡ዮሐንስ፡ወቆመ፡መጠነ፡አሐቲ፡ሰዓት፡እንዘ፡ያነክር፡በእንተ፡ዘርእየ።
40ወሶቤሃ፡መጽአ፡፩፡እመላእክት፡ወአጠየቆ፡ስሞሙ፡ለለ፩ዱ፡እምቅዱሳን፡እንዘ፡ያኤምር፡በአጽባዕቱ፡ኀበ፡ቅዱሳን፡ወይቤሎ፡ዝ፡አባ፡እገሌሃ፡ወዝ፡አባ፡ጳኵሚስ። ወዝ፡አባ፡መቃርስ፡ወዝ፡አባ፡ባይሞይ፡ወይቤ፡ላእክ፡ለመልአክ፡መኑ፡ውእቱ፡በቅድሜሆሙ፡ዘይበርህ፡ከመ፡ፀሐይ። ወይቤሎ፡ዝንቱ፡ውእቱ፡አባ፡እንጦንዮስ፡አበ፡ኵሎሙ፡መነኮሳት።
41ወሶበ፡በጽሐ፡ላእክ፡ኀበ፡በዓት፡ረከቦ፡ለአባ፡ዮሐንስ፡በዘአዕረፈ፡እንዘ፡ስጉድ፣ በከየ፡ላዕሌሁ፡ዐቢየ፡ብካየ፡ወእፍጠነ፡ወሖረ፡ኀበ፡ዐፀድ፡ወነገሮሙ፡ለሰብእ፡ዘከመ፡አዕረፈ፡ቅዱስ፡ዮሐንስ፡ወመጽኡ፡ወነዝዎ፡ወፆሩ፡በዐቢይ፡ክብር፡ወሶበ፡አብእዎ፡ውስተ፡ይእቲ፡ዓፀድ፡ወኮኑ፡እምኔሁ፡ተአምራት፡ወመንክራት፡ዐበይት።
42ወእምዝ፡መጽኡ፡ውሉዱ፡መነኮሳት፡ወፆሩ፡ሥጋሁ፡ወወሰድዎ፡ኀበ፡ገዳመ፡አስቄጥስ፡ወአንበርዎ፡ውስተ፡ቤተ፡ክርስቲያን፡ዘዚአሁ፡ወኮነ፡መርሶ፡ወዛኀን፡ለኵሉ፡ዘይጼወን፡ኀቤሁ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ሰላም፡እብሎ፡በሕቁ።ለዮሐንስ፡ሐፂር፡ዘነዊኅ፡ኂሩተ፡ጽድቁ።እምትርሲተ፡ዓለም፡ማሳኒ፡በዘይርኅቁ።ከመ፡ያለብዎሙ፡ለእለ፡ኃሠሡ፡ወጽሕቁ።ግብረ፡ምንኲስና፡ርእየ፡ቀዊሞ፡ዕራቁ።
43ወበዛቲ፡ዕለት፡አዕረፈ፡ዐቢይ፡ነቢይ፡ኤልሳዕ፡ቅዱስ፡ዘብዙኅ፡መንክራቲሁ፡ዘበትርጓሜሁ፡መድኅን፡ወዓቃቢ፡ወንጉሥ።
44ወዝንቱ፡ጻድቅ፡ኮነ፡እምዐፀድ፡እንተ፡ስማ፡ብዔላሞን፡ዘእምነገደ፡ይሳኮር፡ወተነበየ፡ትንቢታተ፡ብዙኃተ፡ላዕለ፡ደቂቀ፡እስራኤል።
45ወተነበየ፡ካዕበ፡በእንተ፡ርደቱ፡ለእግዚእነ፡ወበእንተ፡ሐዋርያቲሁ፡እንዘ፡ይብል፡ወይከውን፡፲ወ፪፡ክፍለ፡ዕፀ፡ባሉጥ። ወይከውኑ፡በቍዔተ፡ወተአዛዝያነ፡ለእግዚአብሔር፡ንጹሕ፡ዘይወርድ፡ዲበ፡ምድር፡ወቦቱ፡ድኅነት፡ኵላ፡ምድር።
46ወሶበ፡ፈጸመ፡መዋዕለ፡ትንቢቱ፡አዕረፈ፡በሰላም፡ወተቀብረ፡ውስተ፡ምድሩ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለኤልሳዕ፡ዘእምቀዲሙ፡ተሠይመ፤መድኅነ፡ወዓቃቤ፡በከመ፡ትንቢት፡ቀደመ፤ህየንተ፡ኤልያስ፡ነቢይ፡አመ፡ለእስራኤል፡ቆመ፤ፈወሰ፡በጣዕመ፡ፄው፡ማየ፡ሕሙመ፤ወበቅራፈ፡ዕፅ፡አውፅአ፡ማኀፄ፡ሥጡመ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።