Sinaxario · Tikimt
15 de Tikimt
አመ፡፲ወ፭፡ለጥቅምት1በስመ፡ኣብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፭፡ለጥቅምት፡በዛቲ፡ዕለት፡ኮነ፡ቅዱስ፡ቢላሞን፡ሰማዕት፡ወዝንቱ፡ቅዱስ፡ኮነ፡እምሀገረ፡ኒቆምድያ።
2ወኮነ፡አቡሁ፡ለዝንቱ፡ቅዱስ፡ያመልክ፡ጣዖተ፡ወእሙሰ፡ክርስቲያናዊት፡ይእቲ።
3ወመሀርዎ፡ጥበበ፡ወኮነ፡ጠቢበ፡ወምስሌሁ፡ሀሎ፡፩፡ቀሲስ፡ዘስሙ፡አርማላስ፡ወመሀሮ፡ውእቱ፡ቀሲስ፡ሃይማኖተ፡እግዚእነ፡ኢየሱስ፡ክርስቶስ፡ወአጥመቆ፡ጥምቀተ፡ክርስትና፡ወተጋደለ፡ተጋድሎ፡ዐቢየ፡ወገብረ፡እግዚአብሔር፡በእደዊሁ፡ወመንክራተ፡ዐበይተ።
4ወመጽአ፡፩፡ብእሲ፡ዕውር፡ተአምራተ፡ኀቤሁ፡ከመ፡ይግበር፡ሎቱ፡መድኀኒተ፡ዲበ፡አዕይንቲሁ፡በጥበቡ፡ወገብረ፡ቅዱስ፡ቢላሞን፡ትእምርተ፡መስቀል፡ዲበ፡አዕይንቲሁ፡ለውእቱ፡ዕውር፡እንዘ፡ይብል፡በስመ፡አብ፡ወወልድ፡ወመንፈስ፡ቅዱስ፡ወሐይወ፡ሶቤሃ፡ወኮኑ፡አዕይንቲሁ፡ጥዑየ፡ከመ፡ቀዳሚ።
5ወሶበ፡ሰምዐ፡ንጉሥ፡ዜናሁ፡ለውእቱ፡ዕውር፡ዘሐይወ፡እምደዌሁ፡አብጽሖ፡ወተስእሎ፡ወይቤሎ፡መኑ፡ውእቱ፡ዘፈወሰከ፡አዕይንቲከ፡ወይቤሎ፡ቅዱስ፡ቢላሞን፡ፈወሰኒ፡ሶበ፡አንበረ፡እዴሁ፡ዲበ፡አዕይንትየ፡ወዓተበ፡ላዕሌየ፡በትእምርተ፡መስቀል፡እንዘ፡ይብል፡በስመ፡አብ፡ወወልድ፡ወመንፈስ፡ቅዱስ፡ወሶቤሃ፡ርኢኩ፡ብርሃነ፡ዓቢየ።
6ወእምዝ፡ከልሐ፡ውእቱ፡ዕውር፡ዘሐይወ፡በቅድመ፡ንጉሥ፡ወይቤ፡አነ፡ክርስቲያናዊ፡ግሃደ።
7ወእምዝ፡ፈነወ፡ንጉሥ፡ወአብጽሖ፡ኀቤሁ፡ለቅዱስ፡ቢላሞን፡ወተስእሎ፡በእንተ፡ሃይማኖቱ። ወአምነ፡በቅድሜሁ፡ወይቤሎ፡አነ፡ውእቱ፡ክርስቲያናዊ፡ገሃደ። ወኄጦ፡ንጉሥ፡ኂጠተ፡ብዙኃ፡ወተካየዶ፡ኪዳናተ፡ብዙኀ፡ወኢፈቀደ፡ወኢምንተኒ፡እምዘተካየዶ።
8ወእምዝ፡ተምዐ፡ላዕሌሁ፡በዐቢይ፡ቃል፡ወይቤሎ፡ለእመ፡ኢሰማዕከኒ፡ቃልየ፡አነ፡እኴንነከ፡ዐቢየ፡ኵነኔ። አውሥአ፡ቅዱስ፡ቢላሞን፡ወይቤሎ፡አንሰ፡ኢይፈርህ፡እም፡ኵነኔከ።
9ወሶቤሃ፡ኰነኖ፡ኵነኔ፡ዓቢየ፡ብዙኀ፡መዋዕለ፡በብዙኅ፡መክፈልት፡ቦ፡በመቅሠፍት፡ወቦ፡በውግረት፡ውስተ፡እሳት፡ወባሕር፡ወቦ፡በስቅለት።
10ወእንዘ፡ሀሎ፡ውስተ፡ዝንቱ፡ኵነኔ፡ዓቢይ፡አስተርአዮ፡እግዚእነ፡ኢየሱስ፡ክርስቶስ፡ሎቱ፡ስብሐት። በአምሳለ፡ኤርሜላዎስ፡ቀሲስ፡ዘአጥመቆ፡ወኣስምዖ፡ቃለ፡ዘምሉእ፡ፍሥሐ፡እንዘ፡ይብል፡ተፈሣሕ፡ኦ፡ኀሩይየ፡ቢላሞን፡እስመ፡አስተዳለውኩ፡ለከ፡ትፍሥሕተ፡ሰማያዌ፡ዘለዓለም።
11ወሶበ፡ሰምዑ፡ዘንተ፡ቃለ፡ትፍሥሕት፡ሐራሁ፡ለንጉሥ፡አምኑ፡በእግዚእነ፡ኢየሱስ፡ክርስቶስ፡ወልደ፡እግዚአብሔር፡ሕያው፡ወሶቤሃ፡አዘዘ፡ንጉሥ፡ከመ፡ይምትሩ፡አርእስቲሆሙ፡በሰይፍ፡ምስለ፡ቅዱስ፡ቢላሞን፡ወከመዝ፡ፈጸሙ፡ስምዖሙ፡ወነሥኡ፡አክሊለ፡ስምዕ፡በመንግሥተ፡ሰማያት፡በረከቶሙ፡የሀሉ፡ምስሌነ፡ለዓለመ፡ዓለም፡አሜን።
12ወበዛቲ፡ዕለት፡ኮኑ፡ሰማዕተ፡፶፻ወ፷፡ቅዱሳን፡ማኅበራነ፡ቅዱስ፡ጰንጠሌዎን፡ወዕረፍቶሙ፡ለአጥራኪስ፡ወአባ። ይርፍስ፡ወአድራኒቆስ፡ወአርሞሊስ፡ወእርሜሳስ፡ወአርምቅዮስ፡ወቅድስት፡አድማንያ፡ወቅድስት፡ጾመታ፡ወኢሳይያስ፡ኣብ፡ወሲላስ፡ረድአ፡ጳውሎስ።
13ወተዝካረ፡ማኅበር፡ዘሐዋርያት፡በእንተ፡አስተጋብኦተ፡መጻሕፍት፡ዘቤተ፡ክርስቲያን። በረከቶሙ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ሰላም፡ሐዋርያቲሁ፡ለአብ፤ዘአዘዙ፡ዮም፡በቃለ፡ጥበብ፤ለቤተ፡ክርስቲያን፡አሐቲ፡ጉባኤ፡አሕዛብ፡ወሕዝብ፤ያስተጋብኡ፡መጻሕፍተ፡እምባሕረ፡መለኮት፡ርኂብ፤ከመ፡ጽጌያተ፡ያስተጋብእ፡ንህብ።
14ወበዛቲ፡ዕለት፡አዕረፈ፡አብ፡ቅዱስ፡አባ፡ጴጥሮስ፡መምህረ፡ደብረ፡ሊባኖስ፡ትሩፈ፡ምግባር፡ወገድል፡ወማኅቶተ፡ዓለም።
15ወለዝንቱ፡ብፁዕ፡ኀረዮ፡እግዚእነ፡ከመ፡ይኩን፡ኖላዌ፡ኄረ፡ላዕለ፡መርዔቱ።
16ወዜና፡ነገሩሰ፡ሀሎ፡ጽሑፈ፡ውስተ፡መጽሐፈ፡ገድሉ፡ዘይትነበብ፡አመ፡፲ወ፭፡ለወርኀ፡ጥቅምት።
17ወውእቱ፡እምኍልቆው፡ለአበው፡መምህራን፡፲ወ፪ቱ፡ወፈጸመ፡ገድሎ፡ወመዋዕሊሁ፡በርስዓን፡ጥሉል፡ወፈለሰ፡እምዓለመ፡ፃማ፡ውስተ፡ሕይወት፡ዘለዓለም። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡እብል፡ለርክበተ፡አዕፅምቲክሙ፡ወርቅ፤አዝቂር፡ወኪርያቅ፤ወሰላም፡ለሲላስ፡ረድአ፡ጳውሎስ፡ማዕነቅ፤ዘተከለለ፡በጌጋይ፡እምነፅሮታ፡ለጽድቅ፤ዓይነ፡ሕሊናየ፡ፈውሱ፡በምራቅ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።