Sinaxario · Tikimt
14 de Tikimt
አመ፡፲ወ፬፡ለጥቅምት1በስመ፡አብ፡መወልድ፡ወመንፈስ፡ቅዱስ፡፩፡አምላክ፡አመ፡፲ወ፬፡ለጥቅምት፡በዛቲ፡ዕለት፡አዕረፈ፡ሐዋርያ፡ቅዱስ፡ፊልጶስ፡ዘእም፸፡ወ፪ቱ፡አርድእት።
2ወዝንቱ፡ቅዱስ፡ኮነ፡እምሰብአ፡ሀገረ፡ቂሣርያ፡ዘፍልስጥኤም፡ወሶበ፡ኀለፈ፡እግዚእነ፡ኢየሱስ፡ክርስቶስ፡ሀገረ፡ቂሣርያ፡ወመሀረ፡ውስቴታ፡ወሶበ፡ሰምዐ፡ፊልጶስ፡ትምህርቶ፡አምነ፡ቦቱ፡ወተለዎ፡ሶቤሃ።
3ወሶበ፡ኀረዮሙ፡እግዚእነ፡ለ፸ወ፪ቱ፡አርድእቲሁ፡እምእለ፡ይተልውዎ፡ወፈነዎሙ፡ከመ፡ይስብኩ፡ወይፈውሱ፡ኵሎ፡ድውያነ፡ወኮነ፡ዝንቱ፡ረድእ፡እምኍልቆሙ።
4ወእምድኅረ፡ዕርገቱ፡ለእግዚእነ፡ኀረይዎ፡ሐዋርያት፡ወሤምዎ፡ምስለ፡፯፡ዲያቆናት፡ወሰበከ፡ውስተ፡ሀገረ፡ሳምር፡ወአብኦሙ፡ውስተ፡ሃይማኖተ፡እግዚእነ፡ወሲሞንኒ፡መሠርይ፡አምነ፡በእዴሁ፡ቀዳሚ፡ዘተሐጕለ፡በእንተ፡ዘሐለየ፡ከመ፡ያጥሪ፡በንዋዩ፡ጸጋሁ፡ለመንፈስ፡ቅዱስ።
5ወአስተርአዮ፡መልአከ፡እግዚአብሔር፡ለዝንቱ፡ረድእ፡ፊልጶስ፡ወአዘዞ፡ከመ፡ይሑር፡ሀገረ፡ጋዛ። ወተንሥአ፡ወሖረ፡ሀየ፡ወረከቦ፡ለሕፅው፡መጋቢሃ፡ለሕንደኬ፡ንግሥተ፡ኢትዮጵያ፡ወውእቱ፡እንዘ፡ያነብብ፡መጽሐፈ፡ኢሳይያስ፡ነቢይ፡ወቃለ፡መጽሐፍሰ፡ዘይብል፡በእንተ፡ሕማማቲሁ፡ለመድኀኒነ፡ሎቱ፡ስብሐት፡ወእምነ፡ሕፅው፡በእዴሁ፡ወሰአሎ፡ለፊልጶስ፡ከመ፡ያጥምቆ፡ወአጥመቆ።
6ወእምድኅረዝ፡መሠጦ፡መልአከ፡እግዚአብሔር፡ለፊልጶስ፡ረድእ፡ኀበ፡ሀገረ፡አዛጦን፡ወሰበከ፡ውስቴታ፡ወሖረ፡ኀበ፡ሀገረ፡እስያ፡ወበህየኒ፡ሰበከ፡በስብከተ፡ወንጌል።
7ወሀለዋሁ፡፬፡አዋልድ፡እለ፡ይትኔበያ፡ወእለ፡ይሰብካ፡ምስሌሁ፡ወሜጦሙ፡ለብዙኃን፡እምአይሁድ፡ወእምሣምራውያን፡ወእም፡አሕዛብ፡ወአብኦሙ፡ውስተ፡ሃይማኖተ፡እግዚእነ፡ኢየሱስ፡ክርስቶስ፡ሎቱ፡ስብሐት። ወአዕረፈ፡በሰላም፡በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለከ፡ፊልጶስ፡ሐዋርያ፤እም፡ሰብአ፡ፍልስጥኤም፡ዘቂሣርያ፤ምስለ፡ደናግል፡አርባዕ፡እለ፡ይትኔበያ፤አርውየኒ፡እም፡ትምህርትከ፡ከመ፡ትካት፡ረወያ፤ሀገረ፡ሣምር፡ወዓዲ፡እስያ።
8ወበዛቲ፡ዕለት፡አዕረፈ፡አብ፡ቅዱስ፡ሙሴ፡ብእሴ፡እግዚአብሔር።
9ወዝንቱ፡ቅዱስ፡ኮነ፡እምሀገረ፡ሮሜ፡ወስሙ፡ለአቡሁ፡አውፊምያኖስ፡ወስማ፡ለእሙ፡አግልያስ፡ወእሙንቱ፡ብዑላን፡ፈድፋደ፡እምኵሎሙ፡ብዑላን፡ዘሀገረ፡ሮሜ፡ሥርግዋን፡በአልባሰ፡ወርቅ፡ወቅኑታን፡በቅናተ፡ወርቅ።
10ወባሕቱ፡ይፈርህዎ፡ለእግዚአብሔር፡ወይገብሩ፡ፈቃዶ፡ወኮኑ፡ይጸውሙ፡ኵሎ፡አሚረ፡እስከ፡፱፡ሰዓት፡ወኢይበልዑ፡ዘእንበለ፡አሐቲ፡ጊዜ፡ኅቡረ፡ምስለ፡ነዳያን፡ወምስኪናን።
11ወአልቦሙ፡ውሉድ፡ወይስእልዎ፡ለእግዚአብሔር፡ከመ፡የሀቦሙ፡ወልደ፡ቡሩከ፡ዘይገብር፡ሥምረቶ፡ለእግዚአብሔር፡ወሰምዐ፡ስእለቶሙ፡ወወሀቦሙ፡ወልደ፡ዘሠናይ፡አርአያሁ፡ፈድፋደ፡ወጸጋ፡እግዚአብሔር፡ላዕሌሁ፡ወተፈሥሑ፡ቦቱ፡ዐቢየ፡ፍሥሐ፡ወገብሩ፡ምሳሐ፡ዐቢየ፡ለነዳያን፡ወለምስኪናን።
12ወወሰኩ፡ገቢረ፡ሠናይ፡ወሰመይዎ፡ለውእቱ፡ሕፃን፡ሙሴ፡ዘበትርጓሜሁ፡ብእሴ፡እግዚአብሔር፡እስመ፡እግዚእ፡ሰምዐ፡ስእለቶሙ፡በእንቲአሁ፡ወሐፀንዎ፡ሠናየ፡ሕፅነተ፡ወመሀርዎ፡ኵሎ፡ትምህርተ፡ወጥበበ፡መንፈሳዌ።
13ወሶበ፡ልኀቀ፡ወወርዘወ፡ይቤላ፡አውፊ፡ሚያኖስ፡ለብእሲቱ፡ናሁ፡ወልድነ፡ሙሴ፡ወርዘወ፡ወይደልወነ፡ናስተዋስቦ፡ብእሲተ፡ወተፈሥሐት፡ቦቱ፡በዝንቱ፡ነገር፡ወአስተዋሰብዎ፡አሐተ፡ወለተ፡እምልኂቃነ፡ሀገረ፡ሮሜ፡ዘሠናይ፡አርአያሃ፡ፈድፋደ፡ወገብሩ፡ሎቱ፡ከብካበ፡ዐቢየ፡ወአሠርገውዋ፡ለቤተ፡ክርስቲያን፡እንተ፡ይእቲ፡አግያ፡ሶፍያ፡ዘሀገረ፡ሮሜ፡ወአቀምዎ፡ለሙሴ፡ምስለ፡መርዓቱ፡ቅድመ፡ታቦት፡ወአልበስዎሙ፡አልባሳተ፡ተክሊል፡ቅድስተ፡ዘሰብሳብ፡ወተመጠዉ፡ምሥጢረ፡ቅድሳት፡ወአተዉ፡ቤቶሙ፡በሰላም።
14ወይቤሎ፡አውፊምያኖስ፡ለዓርኩ፡ንግሮ፡ለመርዓዊ፡ከመ፡ይባእ፡ውስተ፡ጽርሑ፡ኀበ፡መርዓቱ፡ወይትፌሣሕ፡ባቲ፡በእንተ፡ሥርዓተ፡ኵሎሙ፡ሰብእ።
15ወሶበ፡ሰምዐ፡ሙሴ፡ብእሴ፡እግዚአብሔር፡ዘንተ፡ነገረ፡ቦአ፡ውስተ፡ጽርሑ፡ወርእያ፡ለወለት፡ወአንከረ፡እምአርአያሃ፡ወሰብሖ፡ለእግዚአብሔር፡ወሐለየ፡በነፍሱ፡እንዘ፡ይብል፡አኮኑ፡ዝንቱ፡አርአያ፡ሠናይ፡የኀልፍ፡ወይማስን፡ወይከውን፡መሬተ፡ወሰአሎ፡ለእግዚአብሔር፡ከመ፡ይምርሖ፡ፍኖተ፡መንግሥተ፡ሰማያት።
16ወይቤላ፡ለይእቲ፡ወለት፡ሰላም፡ለኪ፡ኦ፡እኅትየ፡ወለት፡ቡርክት፡ወአውፅአ፡እም፡ላዕሌሁ፡አልባሲሁ፡ክቡራተ፡ወወሀባ፡ላቲ፡ወይቤላ፡ተዘከርኒ፡ኦ፡እኅትየ፡ክብርት፡እስከ፡አመ፡ንትራከብ፡በቅድመ፡እግዚእነ፡ኢየሱስ፡ክርስቶስ።
17ወዘንተ፡ብሂሎ፡ወፅአ፡እምኀቤሃ፡ወሖረ፡ፍኖቶ፡እስከ፡በጽሐ፡ኀበ፡ሀገር፡ዘዲበ፡ጽንፈ፡ባሕር፡ወሤጠ፡ኵሎ፡አልባሲሁ፡ወወሀበ፡ሤጦ፡ለነዳያን፡ወምስኪናን፡ወለብሰ፡አፅርቅተ፡ከመ፡ነዳያን፡ወኮነ፡የሐውር፡እመ፡ካን፡ውስተ፡መካን፡እንዘ፡ይስእል፡ኀብስተ፡ወይበልዕ፡እስከ፡በጽሐ፡ኀበ፡ሀገረ፡ሮሐ።
18ወቦአ፡ውስተ፡ቤተ፡ክርስቲያን፡ዘውስቴታ፡ሥዕሉ፡ለእግዚእነ፡ኢየሱስ፡ክርስቶስ፡ዘፈነወ፡ለንጉሠ፡ሮሐ፡አውግያኖስ፡ወጸለየ፡በቅድመ፡ሥዕላ፡ለእግዝእትነ፡ማርያም፡ወተባረከ፡እምኔሃ፡ወአእኰቶ፡ለእግዚእነ፡ወወፅአ፡እምቤተ፡ክርስቲያን፡ወነበረ፡ምስለ፡ነዳያን፡ወምስኪናን፡ወኮነ፡የሐዩ፡እምኅብስተ፡ምጽዋት።
19ወኮነ፡ይጸውም፡ወትረ፡እስከ፡ምሴት፡ወይጼሊ፡መዐልተ፡ወሌሊተ፡ወይበኪ፡ዘእንበለ፡ጽርዓት።
20ወሶበ፡ቦኡ፡አቡሁ፡ወእሙ፡ውስተ፡ቤተ፡መርዓ፡ወኢረከብዎ፡ለሙሴ፡ወልዶሙ፡ተወለጠ፡ፍሥሐሆሙ፡ውስተ፡ኀዘን።
21ወጸውዖሙ፡አውፊምያኖስ፡ለአግብርቲሁ፡ወወሀቦሙ፡ወርቀ፡ብዙኀ፡ወይቤሎሙ፡ሑሩ፡ውስተ፡ኵሉ፡በሐውርት፡በበ፪ቱ፡ወሀብዎሙ፡ለነዳያን፡ምጽዋተ፡እምውእቱ፡ወርቅ፡በእንተ፡ወልድየ፡ሙሴ፡ወበጽሑ፡፪ቱ፡አግብርተ፡ኣቡሁ፡ኀቤሁ፡ወወሀብዎ፡ምጽዋተ፡ምስለ፡ነዳያን።
22ወአእመሮሙ፡ሙሴ፡ቅዱስ፡ለአግብርተ፡አቡሁ፡ወውእቶሙሰ፡ኢያእመርዎ፡ወይቤ፡አአኵተከ፡እግዚእየ፡ወአምላኪየ፡እስመ፡ረሰይከኒ፡ድልወ፡ለዝንቱ፡ክብር፡ዐቢይ፡ከመ፡እንሣእ፡ምጽዋተ፡እምእዴሆሙ፡ለአግብርተ፡አቡየ፡በእንተ፡ፍቅረ፡ዚኣከ።
23ወአግብርተ፡አቡሁሰ፡ነበሩ፡ብዙኀ፡መዋዕለ፡እንዘ፡የዓውዱ፡ውስተ፡አህጉር፡ብዙኀ። ወእምድኅረዝ፡ተመይጡ፡ኀበ፡አውፊምያኖስ፡እግዚኦሙ፡ወይቤልዎ፡በጻሕነ፡ውስተ፡ኵሉ፡አህጉር፡ወኢረከብናሁ፡ለወልድከ።
24ወቅዱስሰ፡ሙሴ፡ኮነ፡ይጸውም፡በበ፪ቱ፡ወበበ፫ቱ፡መዐልት፡እስከ፡ኮነ፡ኢይጥዕም፡ዘእንበለ፡በዕለተ፡ሰንበት፡ባሕቲታ።
25ወእምድኅረዝ፡አስተርአየቶ፡እግዝእትነ፡ማርያም፡ወላዲተ፡አምላክ፡ለቀሲስ፡ጻድቅ፡እምካህናተ፡ይእቲ፡ቤተ፡ክርስቲያን፡ወትቤሎ፡በጽባሕ፡ፃእ፡አፍኣ፡ቤተ፡ክርስቲያን፡ወትረክብ፡ብእሴ፡ዘይቀውም፡ኀበ፡ዓምድ፡ወእብኦ፡ውስተ፡ቤተ፡መቅደስ፡እስመ፡ጸሎቱ፡ወጾሙ፡ወጽድቁ፡ዐርገ፡ውስተ፡ሰማይ፡ከመ፡ዕጣን፡ዘምዑዝ፡ፄናሁ።
26ወበሣኒታሁ፡መጽአ፡ውእቱ፡ቀሲስ፡በከመ፡አመረቶ፡እግዝእትነ፡ወይቤሎ፡ኦ፡ብእሴ፡እግዚአብሔር፡ባእ፡ውስተ፡ቤተ፡መቅደስ።
27ወበከየ፡ወይቤሎ፡ሥረይ፡ሊተ፡ኦ፡አቡየ፡እስመ፡አነ፡ኀጥእ፡ወአባሲ፡ወኢይደልወኒ፡ከመ፡እቁም፡ውስተ፡መካን፡ቅዱስ፡ወይቤሎ፡ውእቱ፡ቀሲስ፡ኦ፡ብእሴ፡እግዚአብሔር፡ባእ፡ውስተ፡መቅደስ፡እስመ፡አነ፡ተፈኖኩ፡ኀቤከ። ወነገሮ፡ዘከመ፡አስተርአየቶ፡እግዝእትነ፡ቅድስት፡ድንግል፡ማርያም፡ወዘከመ፡ትቤሎ፡በእንቲአሁ፡ወይቤሎ፡አባ፡ሙሴ፡አንሰ፡ብእሲ፡ኃጥእ፡ወአባሲ፡እም፡ኵሉ፡ዓለም።
28ወእምዝ፡አብኦ፡ውስተ፡ቤተ፡መቅደስ፡ወነበረ፡ኅዳጠ፡መዋዕለ።
29ወእምድኅረዝ፡ተንሥአ፡ከመ፡ይሑር፡ኀበ፡ሀገረ፡ተርሴስ፡እንተ፡ይእቲ፡ሀገሩ፡ለጳውሎስ፡ሐዋርያ፡እስመ፡ይቤ፡እነብር፡ውስቴታ፡እስከ፡ዕለተ፡ሞትየ፡እስመ፡ውእቱ፡ኮነ፡ይትባረክ፡እምነ፡ሥጋሁ፡ለቅዱስ፡ጳውሎስ፡ሐዋርያ፡እንዘ፡ሀሎ፡በሀገረ፡ሮሜ።
30ወሖረ፡ኀበ፡ጽንፈ፡ባሕር፡ወተፅዕነ፡ሐመረ፡ለሐዊር፡ኀበ፡ሀገረ፡ጠርሴስ። ወተንሥአ፡ላዕሌሆሙ፡ነፋሰ፡ዐውሎ፡ዐቢይ፡ወጸልመ፡መዐልት፡ወኢያእመሩ፡ኢ፡ሌሊተ፡ወኢ፡መዐልተ። ወእምድኅረዝ፡አርመመ፡ባሕር፡ወኮነ፡ዛኀነ፡ዐቢየ፡በፈቃደ፡እግዚአብሔር፡ወአስተርአየ፡ብርሃነ፡ፀሐይ፡ወኢያእመሩ፡ዳዕሙ፡ኀበ፡አይቴ፡ብሔር፡በጽሑ።
31ወሶቤሃ፡በጽሑ፡ኀበ፡መርሶ፡ሀገረ፡ሮሜ፡ወተአምኆሙ፡ቅዱስ፡ለሰብአ፡ሐመር፡ወይቤሎሙ፡አንሰ፡ውስተ፡ዛቲ፡ሀገር፡እነብር፡እስከ፡ዕለተ፡ሞትየ። ወእምዝ፡ሶበ፡አእመረ፡ከመ፡በጽሐ፡ሀገረ፡አቡሁ፡ወእሙ፡ሐለየ፡በልቡ፡ወይቤ፡በአማን፡ዝንቱ፡ፈቃዱ፡ለእግዚእየ፡ኢየሱስ፡ክርስቶስ፡ወሕያው፡ስሙ፡ኢይከሥት፡ርእስየ፡ለመኑሂ፡እምሰብእ፡ወኢ፡ይትፈለጥ፡እምአንቀጸ፡ቤተ፡አቡየ፡እስመ፡አልቦ፡ዘየአምረኒ።
32ወእንዘ፡የሐውር፡በፍኖት፡ረከቦ፡ለአቡሁ፡ወብዙኀን፡ሰብእ፡ይተልውዎ፡ወቀርበ፡ሙሴ፡ወአኀዘ፡ልጓሙ፡ፈረሱ፡ለአቡሁ፡እንዘ፡ፅዑን፡ላዕሌሁ፡ወይቤሎ፡ኦ፡ብእሲ፡ቡሩክ፡ወኄር፡እግዚአብሔር፡ይሥረይ፡ለከ፡ኀጣውኢከ፡ወየሀብከ፡ሥእለተ፡ልብከ፡አእምርኬ፡ከመ፡አነ፡ፈላሲ፡ወለእመ፡ፈቀድከ፡ትሴስየኒ፡እምፍርፋራተ፡ማእድከ፡ወለእመ፡መሐርከ፡ንዴትየ፡ወፍልሰትየ፡ወእግዚአብሔር፡ያዓቢ፡ዕሤተከ።
33ወሶበ፡ሰምዐ፡አውፊምያኖስ፡ዘንተ፡ነገረ፡ተዘከረ፡ፍልሰተ፡ወልዱ፡አውኀዘ፡አንብዐ፡እምአዕይንቲሁ፡ወገዐረ፡በውዑይ፡ልብ።
34ወነሥኦ፡ለሙሴ፡ብእሴ፡እግዚአብሔር፡ወወሰዶ፡ኀበ፡ቤቱ፡ወአዘዘ፡አግብርቲሁ፡ከመ፡ይግበሩ፡ሎቱ፡ማኅደረ፡በዓንቀጸ፡ቤቱ፡ወገብሩ፡ሎቱ፡በከመ፡አዘዞሙ።
35ወካዕበ፡አዘዞ፡ለ፩፡እምአግብርቲሁ፡ከመ፡ይትለአኮ፡ለሙሴ፡በኵሉ፡መዋዕለ፡ሕይወቱ፡ወይቤሎ፡ብእሴ፡እግዚአብሔር፡ለውእቱ፡ገብር፡እስእለከ፡ኦ፡እኍየ፡ከመ፡ኢታምጽእ፡ሊተ፡መብልዐ፡ወመስቴ፡ዘእንበለ፡በዕለተ፡እሑድ፡ባሕቲታ፡ዘውእቱ፡መንፈቀ፡ኅብስት፡ወጽዋዓ፡ማይ፡እምድኅረ፡ተመጠውኩ፡ምሥጢራተ፡ቅድሳት።
36ወነበረ፡ከመዝ፡እንዘ፡ይፀመድ፡ወይ፡ትጋደል፡መጠነ፡፲ወ፪ቱ፡ዓመት፡እንዘ፡ይነብር፡በኆኀተ፡ቤተ፡አቡሁ።
37ወሠምረ፡እግዚአብሔር፡ከመ፡ያፍልሶ፡እምፃማ፡ዝንቱ፡ዓለም። አስተርአዮ፡ወይቤሎ፡ብፁዕ፡አንተ፡ኦ፡ሙሴ፡ኅሩይየ፡እስመ፡አንተ፡ዝበርከ፡ሥምረትየ፡ወአፍቀርከ፡ኀዘነ፡እምነ፡ፍሥሐ፡ውኀደገ፡ብዕለ፡ወኀረይከ፡ንዴተ፡በእንተ፡ፍቅረ፡ዚአየ።
38እብለከ፡አነ፡ከመ፡ኵሉ፡ዘጸውዐ፡ስመከ፡ወገብረ፡ተዝካረከ፡አው፡ዘአጽገበ፡ርኁበ፡በዕለተ፡ተዝካርከ፡አው፡ዘአርወየ፡ፅሙዐ። ወዘአልበሰ፡ዕሩቀ፡አው፡ዘጸሐፈ፡ወዘአጽሐፈ፡መጽሐፈ፡ገድልከ፡አነ፡እዔሥዮ፡ዕሤተ፡ሠናየ፡በመንግሥተ፡ሰማያት። ወበዝኒ፡ዓለም፡አዓቅቦ፡እምኵሉ፡እኩይ፡ወኢያኀጥኦ፡እምሠናያት።
39ወይእዜኒ፡ኦ፡ፍቁርየ፡ሙሴ፡ብእሴ፡እግዚአብሔር፡እምድኅረ፡፬፡ዕለት፡እነሥኣ፡ለነፍስከ፡እምሥጋከ፡ወእሬስየከ፡ምስለ፡ነፍሳተ፡ጻድቃን፡ነቢያት፡ወሐዋርያት፡ወሰማዕት፡ወዘንተ፡ብሂሎ፡ዐርገ፡ውስተ፡ሰማያት።
40ወሶበ፡ርእየ፡ወሰምዐ፡ዘንተ፡እምእግዚእነ፡ተፈሥሐ፡ፈድፋደ፡ወይቤሎ፡ለውእቱ፡ገብር፡ዘይትለአኮ፡አምጽእ፡ሊተ፡ክርታሰ፡ወማየ፡ሕመት፡ወእምይእዜ፡ተዓርፍ፡እምፃማ፡ዚአየ። ወአንከረ፡ውእቱ፡ገብር፡እምነገሩ፡ወአምጽአ፡ሎቱ፡ክርታሰ፡ወማየ፡ሕመት፡ወጸሐፈ፡ሙሴ፡ቅዱስ፡ብእሴ፡እግዚአብሔር፡ኵሎ፡ገድሎ፡እምጥንቱ፡እስከ፡ተፍጻሜቱ።
41ወበራብዕት፡ዕለት፡ነሥአ፡ሙእተ፡ክርታሰ፡ዘጸሐፈ፡በእዴሁ፡ወአዕረፈ፡በዕለተ፡እሑድ፡ወዐርት፡ነፍሱ፡ውስተ፡ሰማያት፡ወተቀበልዎ፡መላእክት፡ጻድቃን፡ወሰማዕት፡ወኵሎሙ፡ማኅበረ፡ቅዱሳን፡ነቢያት፡ወሐዋርያት፡እንዘ፡ይብሉ፡ሃሌ፡ሉያ፡ፍርቃን፡ለአምላክነ፡ወአብእዎ፡ውስተ፡ኢየሩሳሌም፡ሰማያዊት።
42ወበይእቲ፡ዕለት፡እንዘ፡ጉቡአን፡ኵሎሙ፡ሕዝብ፡ውስተ፡ቤተ፡ክርስቲያን፡በጊዜ፡ቅዳሴ፡ወሰምዑ፡ቃለ፡እመልዕልተ፡ምሥዋዕ፡እንዘ፡ይጸርሕ፡ወይብል፡ብፁዓን፡እሙንቱ፡አግብርት፡ኄራን፡እለ፡ይገብሩ፡ትእዛዛቲሁ፡ወሥምረቶ፡ለእግዚአብሔር፡እስመ፡እሙንቱ፡ይበውኡ፡ውስተ፡ፍሥሐ፡ዘለዓለም።
43ወሰሚዖሙ፡ዘንተ፡ቃለ፡ሊቃነ፡ጳጳሳት፡ቀሳውስት፡ወዲያቆናት፡ኢጲስቆጶሳት፡ወኵሎሙ፡ሕዝብ፡ዘንተ፡ቃለ፡ፈርሁ፡ፈድፋደ፡ወወረደ፡ላዕሌሆሙ፡ዓቢይ፡ፍርሃት፡ወረዓድ፡ዕፁብ፡እስከ፡ተፍጻሜተ፡ቅዳሴ።
44ወእምድኅረ፡ነሥኡ፡ምሥጢራተ፡ቅድሳት፡ቆሙ፡ኵሎሙ፡ምስለ፡ሊቃነ፡ጳጳሳት፡አስተብቍዑ፡ኀበ፡እግዚእነ፡ኢየሱስ፡ክርስቶስ፡ከመ፡ይክሥት፡ሎሙ፡ዘንተ፡ምሥጢረ።
45ወሶቤሃ፡ሰምዑ፡ቃለ፡ዘይብል፡ኅሥዎ፡ለብእሴ፡እግዚአብሔር፡ውስተ፡ቤተ፡አውፊምያኖስ፡እስመ፡ናሁ፡መጠወ፡ነፍሶ፡ውስተ፡እዴሁ፡ለእግዚአብሔር።
46ወሶበ፡ሰምዐ፡ሊቀ፡ጳጳሳት፡ዘንተ፡ነገረ፡ጸውዖ፡ለአውፊምያኖስ፡ወይቤሎ፡ዝንቱ፡ዐቢይ፡ጸጋ፡እንዘ፡ይነብር፡ውስተ፡ቤትከ፡ለምንት፡ኢያይዳዕከኒ፡ኪያሁ፡ከመ፡ነሐውዖ፡በሕይወቱ፡ወንንሣእ፡በረከቶ፡ወአውሥኦ፡አውፊምያኖስ፡ወይቤሎ፡ጥዩቀ፡ጸሎትከ፡ቅድስት፡ታእምር፡ኦ፡አብ፡ቅዱስ፡አንሰ፡ኢያእመርኩ፡ከመ፡ውስተ፡ቤትየ፡ህልው፡ዝንቱ፡አምሳል።
47ወእምዝ፡ሖሩ፡ሊቀ፡ጳጳሳት፡ወካህናት፡ወኵሉ፡ሕዝብ፡በምልኦሙ፡ኀበ፡ቤተ፡አውፊምያኖስ፡ወረከብዎ፡ለሙሴ፡ብእሴ፡እግዚአብሔር፡ኀበ፡አዕረፈ፡ወክርታስ፡ውስተ፡እዴሁ። ወነሥኣ፡ሊቀ፡ጳጳሳት፡ለይእቲ፡ክርታስ፡እምውስተ፡እዴሁ፡ወአንበባ፡በቅድመ፡ኵሉ፡ሕዝብ፡እስከ፡በጽሐ፡ኀበ፡ስሙ፡ዘይብል፡ሙሴ፡ብእሴ፡እግዚአብሔር፡ወልደ፡አውፊምያኖስ፡ወእሙ፡አግልያስ።
48ወሶበ፡ሰምዑ፡አቡሁ፡ወእሙ፡ዘንተ፡ነገረ፡በከዩ፡ብካየ፡መሪረ።
49ወእምዝ፡ገነዞ፡ሊቀ፡ጳጳሳት፡በልብሰ፡ዲባጋት፡ወፆርዎ፡ወወሰድዎ፡ኀበ፡ቤተ፡ክርስቲያን፡ወአንበርዎ፡ውስተ፡ቤተ፡መቅደስ፡ከመ፡ይትባረኩ፡ኵሎሙ፡ካህናት፡ወኵሉ፡ሕዝብ፡እምኔሁ።
50ወሶቤሃ፡መጽኡ፡ኀቤሁ፡ኵሎሙ፡ድውያን፡ሐንካሳን፡ወዕውራን፡ወተባረኩ፡እምኔሁ፡ኵሎሙ፡እምሥጋሁ፡ቅዱስ፡ወተፈወሱ፡እምደዌሆሙ። ወሶበ፡በዝኁ፡ሕዝብ፡ፈርሀ፡አቡሁ፡ከመ፡ኢይውግሩ፡ሥጋሁ፡እምዲበ፡ዓራቱ፡ወአዘዞሙ፡ለአግብርቲሁ፡ከመ፡ይዝርዉ፡ወርቀ፡ውስተ፡መርኀብ፡ከመ፡ይኀድጉ፡ሥጋሁ፡ወይሐሩ፡ኀበ፡ወርቅ፡ወኢ፡ተመይጠ፡፩ዱሂ፡ግሙራ።
51ወእምድኅረዝ፡አንበሩ፡ሥጋሁ፡ለቅዱስ፡ውስተ፡ቤተ፡ክርስቲያን፡ዐባይ፡ዘሐዋርያት፡ጴጥሮስ፡ወጳውሎስ፡ወኮነ፡እምሥጋሁ፡ተአምራት፡ወመንክራት፡ዐበይት፡ዕውራን፡ይሬእዩ። ወሐንሳያን፡የሐውሩ። ወዕሙማን፡ይሰምዑ። ወእለ፡ለምፅ፡ይነጽሑ፡ወእለሂ፡ቦሙ፡አጋንንት፡ይወፅኡ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡እብል፡ዘሠርጐ፡መርዓሁ፡ገደፈ፤ወእልታሐ፡መንፈስ፡ተዓፅፈ፤ሙሴ፡አጥረየ፡ንጽሐ፡ድንግልና፡ትሩፈ፤ኀበ፡ዓምደ፡ወርቅ፡ዘላዕሉ፡ስሙ፡ተጽሕፈ፤በኢየሩሳሌም፡ለኀዲር፡ረኪቦ፡ምዕራፈ።
52ወበዛቲ፡ዕለት፡አዕረፈ፡ቅዱስ፡ገብረ፡ክርስቶስ፡ወልደ፡ቴዎዶስዮስ፡ንጉሠ፡ቍስጥንጥንያ፡መፍቀሬ፡እግዚአብሔር፡ወብእሲቱኒ፡ሠናይት፡ወፈራሂተ፡እግዚአብሔር።
53ወእሙንቱ፡የኀዝኑ፡በእንተ፡ዘአልቦሙ፡ውሉድ፡ወሖሩ፡ኀበ፡ኢየሩሳሌም፡መበፅዑ፡ብፅዓተ፡ለእግዚአብሔር፡ወሰምዖሙ፡ወወሀቦሙ፡ወልደ፡ወሰመይዎ፡ስሞ፡ዓብደል፡መሢሕ፡ዝብሂል፡ገብረ፡ክርስቶስ፡ወመሀርዎ፡ኵሎ፡ትምህርተ፡ወጥበበ፡ወአልቦ፡ዘኢተምህረ።
54ወእምዝ፡ሐፀዩ፡ሎቱ፡ወለተ፡ንጉሠ፡ሮምያ፡ወአእተዉ፡ሎቱ፡መርዓተ፡ወገብሩ፡ሎቱ፡በከመ፡ይደሉ፡ሕግ፡ስብሳብ፡በሥርዓተ፡ቤተ፡ክርስቲያን።
55ወከዊኖ፡መንፈቀ፡ሌሊት፡ቦአ፡መርዓዊ፡ገብረ፡ክርስቶስ፡ኀበ፡መርዓት፡ወአኀዛ፡እዴሃ፡ወተካየዳ፡ኪዳነ፡ወአምሐላ። ወእምዝ፡ጸለየ፡ጸሎተ፡ሃይማኖት፡እስከ፡ተፍጻሜቱ። ወአውፅአ፡እምላዕሌሁ፡አልባሲሁ፡ዘመርዓ፡ወለብሰ፡ልብሰ፡ፀምር፡ወሰዓማ፡ርእሳ፡ለመርዓት፡ወተፋነዋ፡ወይቤላ፡እግዚአብሔር፡የሀሉ፡ምስሌኪ፡ወያድኅንኪ፡እምኵሉ፡ምግባረ፡እከዩ፡ለሰይጣን።
56ወሶቤሃ፡በከየት፡ወትቤሎ፡አይቴ፡ተሐውር፡እግዚእየ፡ወለመኑ፡ተኀድገኒ፡ወይቤላ፡አኀድግኪ፡ኀበ፡እግዚአብሔር፡ወአንሰ፡አሐውር፡እትልዎ፡ለክርስቶስ፡እስመ፡መንግሥትሰ፡ዘአቡየ፡ኀላፊ፡ውእቱ። ወአንቲኒ፡ተዘከሪ፡መሐላኪ፡ወሰሚዓ፡አርመመት፡በአንብዕ፡ተዘኪራ፡መሐላ፡ዘተካየደት፡ምስሌሁ።
57ውእቱኒ፡ወፅአ፡በሌሊት፡እንዘ፡ይነውሙ፡እለ፡ተዓሠሩ፡ለመርዓ፡ወሖረ፡ርኁቀ፡ብሔረ፡ወበጽሐ፡ኀበ፡ጽንፈ፡ባሕር፡ወረከበ፡እለ፡ይነግዱ፡ወነሥእዎ፡ምስሌሆሙ።
58ወሶበ፡ጸብሐ፡ኢረከብዎ፡ውስተ፡ቤተ፡መርዓ፡አዝማዲሁ፡ወተሰአልዋ፡አቡሁ፡ወእሙ፡ለመርዓት፡ወይቤልዋ፡አይቴ፡ሀሎ፡ወልድነ። ወትቤሎሙ፡ቦአ፡ኀቤየ፡በሌሊት፡ወተካየደኒ፡ወአምሐለኒ፡ወሰዓመኒ፡ርእስየ፡ወወፅአ፡እምኀቤየ፡ወቤትኩ፡ባሕቲትየ፡እንዘ፡እበኪ።
59ወሶበ፡ሰምዑ፡ነገራ፡ወድቁ፡ዲበ፡ምድር፡በገጾሙ፡ወለሀዉ፡ወገዐሩ፡ዐቢየ፡ገዓረ፡ወፈነዉ፡፭ተ፡፻ተ፡አግብርተ፡ከመ፡ይኅሥሥዎ፡ምሕዋረ፡፩፡ዓመት፡ወወሀብዎሙ፡ብዙኀ፡ወርቀ፡ወብሩረ፡የሀቡ፡ለነዳያን፡ምጽዋተ።
60ወቅዱስሰ፡ገብረ፡ክርስቶስ፡በጽሐ፡ሀገረ፡አርማንያ፡ወበህየ፡ሀለወት፡ቤተ፡ክርስቲያን፡ዐባይ፡ዘሕንፅት፡በስመ፡እግዝእትነ፡ማርያም፡ወነበረ፡በህየ፡እንዘ፡ይትጋደል፡በጾም፡ወበጸሎት።
61ወበጽሑ፡ሆ፡ልኡካን፡አግብርተ፡አቡሁ፡፪ቱ፡ወሐተቱ፡በእንቲአሁ፡ወስእኑ፡ረኪበ፡ዜናሁ፡ወወሀቡ፡ምጽዋተ፡ለነዳያን፡ወተመጠወ፡ውእቱኒ፡ምጽዋተ፡ምስለ፡ነዳያን፡እም፡እደ፡አግብርተ፡አቡሁ፡ወነበረ፡ህየ፡፲ወ፭፡ዓመተ።
62ወእምዝ፡አስተርአየቶ፡እግዝእትነ፡ማርያም፡ለ፩፡ቀሲስ፡ወትቤሎ፡ንሥኦ፡ለብእሴ፡እግዚአብሔር፡ምስሌከ፡ወይኩን፡ማኅደሩ፡ውስጠ፡በቤተ፡መቅደስ፡ወገብረ፡ቀሲስ፡በከመ፡አዘዘቶ።
63ወሶበ፡ሰምዑ፡ሰብአ፡ሀገር፡ዜናሁ፡ለቅዱስ፡ወይቤ፡ለምንት፡ከሠትኪ፡እግዝእትየ፡ኅቡአትየ፡ወይእዜኒ፡ምርሕኒ፡ኀበ፡ዘይሤኒ። ወዘንተ፡ብሂሎ፡ተሳለመ፡ሥዕላ፡ወወፅአ፡በሌሊት፡ወሖረ፡ወበጽሐ፡ኀበ፡ጽንፈ፡ባሕር፡ወረከበ፡ሐመረ፡ወተፅዕነ፡ዲቤሁ፡እንዘ፡ይፈቅድ፡ይሑር፡ኀበ፡ካልእ፡ብሔር፡ወበፈ፡ቃደ፡እግዚአብሔር፡በጽሐ፡ሀገረ፡አቡሁ፡ወነበረ፡በዴዴሁ፡፲ወ፪፡ዓመተ፡እንዘ፡ኢየአም፡ርዎ።
64ወአመንደብዎ፡አግብርተ፡አቡሁ፡ወእሙ፡ወየሐፅቡ፡ንዋየ፡ልሕኵት፡ዘጸብሕ፡ወይክዕዉ፡ዲቤሁ፡ምስለ፡ፍርፋራት፡ወብዙኀ፡ሥቃያተ፡ፈጸሙ፡ላዕሌሁ።
65ወይቤ፡ገብረ፡ክርስቶስ፡ከመ፡ኢይኩኖሙ፡ጌጋየ፡ለአግብርተ፡አቡየ፡ንሥአኒ፡ኀቤከ፡ወሶቤሃ፡አስተርአዮ፡እግዚእነ፡ወተካየዶ፡ኪዳነ፡ወከሠተ፡ሎቱ፡ከመ፡ያዓርፎ፡እምፃማ፡ብዙኀ።
66ወሶቤሃ፡ፀውዖ፡ለዘይትለአኮ፡ወይቤሎ፡ኦ፡እኁየ፡አምጽእ፡ሊተ፡ክርታሰ፡ወማየ፡ሕመት፡ወአምጽአ፡ሎቱ፡ወአጽሐፎ፡መንፈስ፡ቅዱስ፡ኵሎ፡ገድሎ፡እምጥንቱ፡እስከ፡ተፍጻሜቱ፡ወነሢኦ፡ይእተ፡ክርታሰ፡ወጸበጣ፡በእዴሁ፡ወመጠወ፡ነፍሶ፡ቅድስተ።
67ወበይእቲ፡ዕለት፡እንዘ፡ጉቡአን፡ሕዝብ፡ውስተ፡ቤተ፡ክርስቲያን፡ምስለ፡ሊቀ፡ጳጳሳት፡ወኵሎሙ፡ኤጲስ፡ቆጶሳት፡ወካህናት፡ሰምዑ፡ቃለ፡እምሰማይ፡ዘይብል፡ኀሥዎ፡ለብእሴ፡እግዚአብሔር፡ውስተ፡ቤተ፡ቴዎዶስዮስ፡ንጉሥ።
68ወሶቤሃ፡ፈነወ፡ሊቀ፡ጳጳሳት፡ኀበ፡ንጉሥ፡እንዘ፡ይብል፡ሀሎአ፡ብእሲ፡ጻድቅ፡ውስተ፡ቤትከ፡ዘአዕረፈ፡ዮም፡እስመ፡ሰማዕነ፡በእንቲአሁ፡ቃለ፡እምሰማይ፡ወሰሚዖ፡ንጉሥ፡ተሰአለ፡አግብርቲሁ። ወመጽኡ፡፪ቱ፡እምአግብርቲሁ፡እለ፡አዘዞሙ፡ንጉሥ፡ይትለአክዎ፡በኵሉ፡መዋዕለ፡ሕይወቱ፡ለብእሴ፡እግዚአብሔር፡ወዜነውዎ፡በእንቲአሁ፡ከመ፡አዕረፈ፡ወከመ፡ጻድቅ፡ውእቱ፡ወንጉሥኒ፡አይድዖ፡ለሊቀ፡ጳጳሳት፡ከመ፡እሙን፡ውእቱ፡ዘተናገሮ፡ቃል፡እምሰማይ።
69ወሶቤሃ፡መጽአ፡ሊቀ፡ጳጳሳት፡ምስለ፡እሊአሁ፡ወምስለ፡ኵሎሙ፡ሕዝብ፡ውስተ፡ቤተ፡ንጉሥ፡ወረከብዎ፡ለብእሴ፡እግዚአብሔር፡በዘአዕረፈ፡ወርእዩ፡ውስተ፡እዴሁ፡ክርታሰ፡ጥብልልተ፡ወፈቀዱ፡ይንሥእዋ፡እምእዴሁ፡ወስእኑ፡ነሢኦታ፡ወጸለዩ፡ኀበ፡እግዚእነ፡ወተፈትሐት፡እዴሁ፡ወነሥኣ፡ሊቀ፡ጳጳሳት፡ወአንበባ፡ወአእመረ፡ከመ፡ውእቱ፡ወልዱ፡ለንጉሥ፡ወበከየ፡ወወሀቦ፡ለንጉሥ፡ወአንበባ፡ወአእመሩ፡አቡሁ፡ወእሙ፡ከመ፡ወልዶሙ፡ውእቱ፡ወበከዩ፡ወአውየዉ፡ወለሃዉ፡ዐቢየ፡ላሃ፡ወመጽአት፡ይእቲ፡መርዓቱ፡ወበከየት፡ወአግብርቲሁኒ፡በከዩ፡ብካየ፡መሪረ፡ወኮነ፡ዓቢይ፡ኣውያት፡ውስተ፡ቤተ፡ንጉሥ።
70ወእምዝ፡ነሥእዎ፡ወፆርዎ፡ወወሰድዎ፡ውስተ፡ቤተ፡ክርስቲያን፡ወቀበርዎ፡ወኮነ፡መቃብሩ፡ዘይፌውስ፡ድውያነ፡ወተከሥቱ፡እመቃብሪሁ፡ተአምራት፡ወመንክራት፡ዘአልቦ፡ኍልቍ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለገብረ፡ክርስቶስ፡እንተ፡አንደየ፡አባሎ፤በዴዴ፡አቡሁ፡አክልብት፡እስከነ፡ለሐሱ፡ቍስሎ፤አዕረፈ፡ዮም፡ለእግዚኣብሔር፡ከመ፡ሰአሎ፤እምነ፡አግብርት፡ተኰንኖ፡ወእምአፈ፡አእማት፡ተፅዕሎ፤እምድኅረ፡ፈጸመ፡ወሠለጠ፡ኵሎ።
71ወበዛቲ፡ዕለት፡ኮነ፡ተዝካሩ፡ለአቡነ፡ቅዱስ፡አባ፡ዘሚካኤል፡ዘይሰመይ፡አረጋዊ፡ወዝንቱ፡ቅዱስ፡ኮኖሙ፡መርሐ፡ለአግብርተ፡እግዚአብሔር።
72ወዓርገ፡ውስተ፡ደብረ፡ዳሞ፡ቅድስት፡እኂዞ፡ዘነበ፡ተመን፡ወበህየ፡ተጋደለ፡ገድለ፡ዐቢየ፡ዘአልቦ፡መምሰል፡ወተጸገወ፡ኪዳነ፡እምኀበ፡እግዚአብሔር፡ለኵሉ፡ለዘይጼውዕ፡ስሞ፡ወይገብር፡ተዝካሮ።
73ወእምዝ፡ተከብተ፡እምገጸ፡ሞት፡በጸጋ፡እግዚአብሔር፡አቂሞ፡ለደቂቁ፡ሥርዓተ፡ምንኵስና፡በከመ፡ተምህረ፡እምቤተ፡ጳኵሚስ፡አቡሁ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለዘሚካኤል፡ዘተሰምየ፡አረጋዌ፤እስመ፡ሑረቱ፡ጥበብ፡ወፍናዊሁኒ፡ልባዌ፤ምስሌሁ፡ኀቡረ፡ዘበ፩፡ህላዌ፤ወሰላም፡ለቅዱሳን፡ዘተሠነዓዉ፡ሥንዓዌ፤ከመ፡በጸሎቱ፡ይሥዓሩ፡መንግሥቶ፡ለአርዌ።
74ወበዛቲ፡ዕለት፡ኮነ፡ተዝካሮሙ፡ለመራክዋ፡ወዱማቴዎስ፡ወእምራይስ፡ወእለ፡ምስሌሆሙ፡ሰማዕታት፡፬፻፡፴ወ፩። ጸሎ፡ቶሙ፡ወበረከቶሙ፡የሀሉ፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።