ግዕዝ
Home Formaciones Libros Biblioteca Ge'ez Contacto
Sinaxario · Tahsas

12 de Tahsas

አመ፡፲ወ፪፡ለታኅሣሥ
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፪፡ለታኅሣሥ፡በዛቲ፡ዕለት፡በዓሉ፡ለመልአክ፡ክቡር፡ቅዱስ፡ሚካኤል፡ሊቀ፡መላእክት፡ትንብልናሁ፡የሀሉ፡ምስሌነ፡አሜን።
2ወቦ፡እለ፡ይብሉ፡በዛቲ፡ዕለት፡ፈነዎ፡እግዚአብሔር፡ኀበ፡ሀገረ፡ባቢሎን፡ወኮነ፡ራብዓየ፡ገጸ፡ምስለ፡፫ቱ፡ደቂቅ፡አናንያ፡ወአዛርያ፡ወሚሳኤል፡አመ፡ገደፎሙ፡ናቡከደነፆር፡ውስተ፡እቶነ፡እሳት፡ወተለዓለ፡ነበልባል፡መጠነ፡፵ወ፱፡በእመት፡ወኣውዓዮሙ፡ለመስ፡ተዋድያን፡እለ፡በአፍአ።
3ወሚካኤልኒ፡ዘበጦ፡ለነበልባለ፡እሳት፡በበትረ፡ዚአሁ፡ወአጥፍኦ፡እምላዕለ፡፫፡ደቂቅ፡ወአድኀኖሙ፡ወኢለከፎሙ፡ግሙራ፡እሳት፡ወረሰዮ፡ለእቶነ፡እሳት፡ከመ፡ጠል፡ቈሪረ፡ዘጊዜ፡ጽባሕ።
4ወበውእቱ፡ጊዜ፡ሰብሕዎ፡ለእግዚአብሔር፡እንዘ፡ይብሉ፡ይትባረክ፡እግዚአብሔር፡አምላከ፡አበዊነ፡ስቡሕኒ፡ውእቱ፡ወልዑልኒ፡ውእቱ፡ለዓለም። ወዘንተ፡ቃለ፡ይቤሉ፡፮ተ፡ጊዜያተ፡ወበዝንቱ፡አመሩ፡ወተነበዩ፡ከመ፡እምድኅረ፡፮ቱ፻፡ዓመት፡ይትወለድ፡ክርስቶስ።
5ወካዕበ፡ሰብሕዎ፡፴ወ፫፡ጊዜ፡እንዘ፡ይብሉ፡ይባርክዎ፡ኵሉ፡ግብረ፡እግዚእ፡ለእግዚአብሔር። ወበዝንቱኒ፡አመሩ፡ወተነበዩ፡ከመ፡እግዚእ፡ክርስቶስ፡ይነብር፡ዲበ፡ምድር፡ሠላሳ፡ወሠለስተ፡ዓመተ፡ወመንፈቀ፡ዓመት።
6ወበእንተዝ፡ሠርዑ፡አበዊነ፡ከመ፡ንግበር፡በዓሎ፡ለመለአክ፡ክቡር፡ሚካኤል፡ሊቀ፡ኃይላተ፡ሰማይ። ትንብልናሁ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለከ፡ዓቃቤ፡ቅዱሳን፡እም፡ተሀውኮ፤ወለፀረ፡ነፍሶሙ፡ዘሞቃሕኮ፤አመ፡መጽአ፡ወልድ፡በአፈ፡ነቢያት፡ተሰቢኮ፤ከመ፡ያስተፋኑ፡ሐራ፡መልአኮ፤እስከ፡ምፅንዓት፡ኃምስ፡ሚካኤል፡ተለውኮ።
7ወበዛቲ፡ዕለት፡አዕረፈ፡አባ፡ሳሙኤል፡ዘዋልድባ። ለዝንቱ፡ቅዱስ፡ኮነ፡ስመ፡አቡሁ፡እስጢፋኖስ፡ወስማ፡ለእሙ፡አመተ፡ማርያም፡ወእሙንቱ፡ኄራን፡ወክቡራነ፡ዘመድ። ወወለድዎ፡ለዝንቱ፡ቅዱስ፡በምድረ፡አክሱም፡ወሶበ፡ልኅቀ፡መሀርዎ፡መጻሕፍተ፡ቤተ፡ክርስቲያን።
8ወእምዝ፡ሞቱ፡አቡሁ፡ወእሙ፡ወሖረ፡ደብረ፡በንኰል፡ኀበ፡አባ፡መድኀኒነ፡እግዚእ፡ወለብሰ፡አልባሰ፡ምንኵስና፡ወነበረ፡እንዘ፡ይትጋደል፡በጾም፡ወበጸሎት። ወኢይበልዕ፡ዘእንበለ፡ሐምል፡ዘፄዐ፡ወዓፀየ። ወስቴሁኒ፡ማይ፡ሕሙግ፡ወነበረ፡እንዘ፡ይትለአኮሙ፡ለመነኮሳት፡በግብረ፡ማኅረፅ፡ወበቀዲሐ፡ማይ።
9ወሶበ፡በጽሑ፡ኀቤሁ፡አዝማዲሁ፡አጽሐብዎ፡ወተግኀሠ፡ኀበ፡ካልእ፡መካን፡ወተፀምደ፡በጾም፡ወበጸሎት፡ወበሰጊድ፡እስከ፡ሐብጠ፡እገሪሁ። ወእምህየ፡ሖረ፡ገዳመ፡ወነበረ፡፵፡መዓልተ፡ወ፵፡ሌሊተ፡እንዘ፡ኢይጥዕም፡ምንተኒ። ወይመጽኡ፡ኀቤሁ፡አናብስት፡ወአናምርት፡ወኵሎሙ፡አራዊት፡ግሩማን፡ይሰግዱ፡ሎቱ፡ወይልሕሱ፡ፀበለ፡እገሪሁ።
10ወአሐተ፡ዕለተ፡እንዘ፡የሐውር፡ውስተ፡ፍኖት፡በጽሐ፡ኀበ፡ፈለግ፡ዐቢይ፡ዘምሉእ፡ማዩ፡ወሀሎ፡ምስሌሁ፡መጽሐፍ፡ወእሳት፡ወገቢሮ፡ጸሎተ፡ቦአ፡ውስተ፡ፈለግ፡ወውሕጦ፡ማይ፡ወአውረዶ፡ታሕተ። ወእምዝ፡ገደፎ፡ማዕዶተ፡ወረከቦ፡ለእሳት፡እንዘ፡ኢይ፡ጠፍእ፡ወለመጽሐፍ፡እንዘ፡ኢይደመሰስ።
11ወሰይጣንኒ፡ያሜክሮ፡ብዙኀ፡ጊዜያተ፡ተመሲሎ፡በዘዘዚአሁ፡አርአያ፡ከመ፡አራዊት፡ግሩማን። ውእቱሰ፡ኢይደነግፅ፡ሕሊናሁ፡እስመ፡ትውክልቱ፡ፅኑዕ፡ላዕለ፡ፈጣሪሁ።
12ወእንዘ፡ሀሎ፡አባ፡ሳሙኤል፡ውስተ፡በዓቱ፡መጽአ፡ኀቤሁ፡እግዚእነ፡ኢየሱስ፡ክርስቶስ፡ሎቱ፡ስብሐት። ወኀተሞኵሎ፡መለያልያቲሁ፡በምራቁ፡ቅዱስ፡ወመልኦ፡ኀይለ።
13ወለኵሉ፡ለያልይ፡ይበውእ፡ውስተ፡ማይ፡ወያበጽሕ፡መዝሙረ፡ዳዊት፡በበ፶፡ወይቀሥፍ፡ዘባኖ፡ዘአልቦ፡ኍልቍ፡ወአናብስት፡ይትረአዩ፡ውስተ፡በዓቱ፡ከመ፡አባግዕ። ቦ፡አመ፡ይሰፍር፡አካሎሙ። ወቦ፡አመ፡ይቡጥሕ፡ቍስሎሙ፡ወያወፅእ፡ሎው፡ሦከ።
14ወእምዝ፡ተጋብኡ፡ብዙኃን፡አርድእት፡ቀዳማይ፡እምኔሆሙ፡አባ፡ዘሩፋኤል።
15ወአሐተ፡ዕለተ፡ተራከበ፡ምስለ፡አባ፡ገብረ፡መስቀል፡ዘደብረ፡ለጋሶ፡እስመ፡ኢኮኑ፡እምቅድመ፡ዝንቱ፡ኢተናፀሩ፡ገጸ፡በገጽ፡ዘእንበለ፡በአሚን፡ወወዓሉ፡ይእተ፡ዕለተ፡እንዘ፡ይዜያነዉ፡ዕበያቲሁ፡ለእግዚአብሔር፡ወበጊዜ፡ድራር፡ሶበ፡ገብሩ፡ጸሎተ፡ወረደ፡ሎሙ፡ማእድ፡እምሰማይ፡ወበልዑ፡ወአእኰትዎ፡ለእግዚአብሔር።
16ወእምዝ፡አሐተ፡ዕለተ፡ተራከበ፡ምስለ፡፩፡ገዳማዊ፡ወሶበ፡ወጠኑ፡ይትናገሩ፡በምሥጢራት፡ዘገብረ፡ሎሙ፡እግዚእነ፡ይቤ፡ሳሙኤል፡ናሁ፡፲ቱወ፪ቱ፡ዓመት፡ሊተ፡እንዘ፡እቀውም፡ውስተ፡አርያም፡ወአዓጥን፡መንበረ፡አምላክ፡ምስለ፡፳ወ፬፡ካህናተ፡ሰማይ።
17ወሶበ፡ይበውእ፡ይቀድስ፡ቍርባነ፡ይወርድ፡ሎቱ፡ኅብስት፡ወጽዋዕ፡እምሰማይ።
18ወሶበ፡ያነብብ፡ውዳሴሃ፡ለእግዝትነ፡ቅድስት፡ድንግል፡ማርያም፡ይትሌዐል፡እምድር፡መጠነ፡እመት። ወመጽአት፡እግዝእትነ፡ቅድስት፡ድንግል፡ማርያም፡ወወሀበቶ፡ዕንቈ፡ዘያበርህ፡ወዕጣነ፡ንጹሐ።
19ወእምዝ፡ሶበ፡ቀርበ፡ጊዜ፡ፍልሰቱ፡መጽአ፡ኀቤሁ፡ሚካኤል፡ሊቀ፡መላእክት፡ወመሠጦ፡በክነፊሁ፡ወአርአዮ፡ኵሎ፡ተድላሃ፡ለኢየሩሳሌም፡ሰማያዊት፡ወአብጽሖ፡ቅድመ፡መንበረ፡እግዚአብሔር። ወነሥአ፡ኪዳነ፡ለዘይጼውዕ፡ስሞ፡ወይገብር፡ተዝካሮ፡ወእምዝ፡ሶበ፡ተመይጠ፡ኀበ፡ማኀደሩ፡ነገሮሙ፡ለአርዳኢሁ፡ኵሎ፡ዘርእየ፡ወሶቤሃ፡አዕረፈ፡በሰላም። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለከ፡እንተ፡ፈረይከ፡ሕገ፤ሳሙኤል፡ዘኮንከ፡ለአስካለ፡ሕይወት፡ሐረገ፤በረድኤትከ፡ክፍለነ፡ወእደ፡ሀሎከ፡ዐሪገ፤ረድኤትከሰ፡ወለተ፡ከለባት፡መዘገዘምስለ፡ኄራን፡ከመ፡አሀሉ፡ደርገ።
20ወበዛቲ፡ዕለት፡ኮነ፡ጉባኤ፡ማኅበረ፡ቅዱሳን፡ኤጲስቆጶሳት፡ቀሳውስት፡ወዲያቆናት፡በሀገረ፡ሮሜ፡በቀዳሚት፡ዓመተ፡መንግሥቱ፡ለዳኬዎስ፡ከሐዲ። በመዋዕለ፡ቆርኔሌዎስ፡ሊቀ፡ጳጳሳት፡ዘሮሜ። ወድዮናስዮስ፡ሊቀ፡ጳጳሳት፡ዘእስክንድርያ፡ወበላንድዮስ፡ሊቀ፡ጳጳሳት፡ዘአንጾኪያ፡ወግርማኖስ፡ኤጲስቆጶስ፡ዘሀገረ፡ኢየሩሳሌም።
21ወኮነ፡ዝንቱ፡ጉባኤ፡በእንተ፡ብናጥስ፡ቀሲስ፡እስመ፡ይቤ፡ኵሉ፡ዘክሕደ፡ሃይማኖቶ፡በጊዜ፡ስደት፡አው፡ዘወድቀ፡ውስተ፡ዝሙት፡ኢይደሉ፡ይትወከፍዎ፡እመኒ፡ይኔስሕ፡አል፡ቦቱ፡ሥርየት። ወገሠፆ፡ቆርኔሌዎስ፡በእንተ፡ዝንቱ፡ምዕረ፡ዳግመ፡ወሥልሰ። ውእቱሰ፡ኢሰምዖ።
22ወእምዝ፡አስተጋብአ፡በእንቲአሁ፡፰፡ኤጲስቆጶሳተ፡፲ወ፰ተ፡ቀሳውስተ፡ማእምራነ፡መጻሕፍት። ወ፵፡ዲያቆናት፡እለ፡ከማሆሙ፡ምሁራነ፡ወተዋሥእዎ፡ለብናጥስ፡ቀሲስ፡በእንተ፡ዝንቱ፡ነገር።
23ወአመክነየ፡ውእቱኒ፡በቃለ፡ጳውሎስ፡ሐዋርያ፡ዘጸሐፎ፡ለዕብራውያን፡ዘይቤ፡ወባ፡ሕቱ፡ኢይትከሀል፡እምድኅረ፡ነሥኡ፡ጥምቀተ፡ወጥዕሙ፡ጸጋሁ፡ዘበሰማያት፡ወተሳተፉ፡በመንፈስ፡ቅዱስ፡ወጥዕሙ፡ቃለ፡እግዚአብሔር፡ወኃይለ፡ዓለም፡ዘይመጽእ፡ኢይደሉ፡ከመ፡ይደቁ፡የሐድስዋ፡ካዕበ፡ለንስሐሆሙ።
24ወተሠጥውዎ፡እሉ፡አበው፡መከሠቱ፡ሎቱ፡ወይቤልዎ፡እስመ፡ሐዋርያ፡ጳውሎስ፡ኢይቤ፡በእንተ፡ዘይኔስሕ፡አላ፡ዘንተ፡ይቤ፡በእንተ፡ዘይጠመቅ፡ጥምቀተ፡ክርስትና፡ኵሎ፡ጊዜ፡ሶበ፡ይወድቅ፡ውስተ፡ኃጢአት፡አው፡ዘይገብር፡ኃጢኣተ፡ወኢይኔስሕ። ወበእንተዝ፡አትለወ፡ሐዋርያ፡ቃለ፡ዘይቤ፡ዳግመኑ፡ይሰቅልዎ፡ሎሙ፡ለወልደ፡እግዚአብሔር፡ወይሜንንዎ።
25ወአጠየቀ፡ሐዋርያ፡ከመ፡ኮነ፡መስቀል፡ወጥምቀት፡ምዕረ፡ወንስሐሰ፡ኵሎ፡ጊዜ፡ለዘወድቀ፡ውስተ፡ኃጢአት፡አው፡በክሕደት፡ወበከመ፡ትቤ፡አንተ፡ለዘከመዝ፡ኢይትወከፍኑ፡ንስሐሁ፡እግዚእ። ኢተወክፈኑ፡ንስሐሁ።
26ወለዳዊትኒ፡ወለጴጥሮስኒ፡ዘክሕዶ፡ለእግዚእነ፡ኢተወክፈኑ፡ንስሐሁ። ወኢወሀቦኑ፡ጸጋ፡መንፈስ፡ቅዱስ፡ጰራቅሊጦስ፡ወከንቶሂ፡ሤሞ፡ላዕለ፡አባግዒሁ፡ነባብያን፡ወኵሎሙ፡እለ፡ተጠምቁ፡በእዴሁ፡ተሐጕልኑ፡በከመ፡ትቤ፡አንተ።
27ወዝንቱሰ፡ዕበድ፡ውእቱ፡እስመ፡እግዚእነ፡ኢየሱስ፡ሎቱ፡ስብሐት። ረሰያ፡ለንስሐ፡ትትረከብ፡ለኵሎሙ፡እለ፡ይኤብሱ፡ወይጌግዩ፡ኦ፡አብናጥስ፡ቀሲስ፡ረኃቅ፡እምዝንቱ፡ምክር፡ርኩስ፡ወነስሕ፡ወኢትኩን፡ጸላኢሁ፡ለእግዚአብሔር፡ወለርእስከ፡ወጸላኢሆሙ፡ለኵሎሙ፡ዕጓለ፡እመሕያው።
28ወኢተመይጠ፡እምክሩ፡እኪት፡ወኢተወክፈ፡ነገሮሙ፡ለኵሎሙ፡ማኅበረ፡ቅዱሳን፡ወረምዎ፡ወመተርዎ፡ወሰደድዎ፡ምስለ፡እለ፡ተወክፉ፡ትምህርቶ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለጉባኤክሙ፡ውስተ፡አሐቲ፡ከኒሳ፤ኤጲስቆጶሳት፡፷ሳ፣ባህለ፡ብናጥስ፡ያፅርዑ፡ዘተመሰለ፡እንስሳ፤ኢይትዌከፉ፡ንስሐሃ፡ዘይቤ፡ለዘገብረት፡አበሳ፤እስመ፡ኢትነጽሕ፡ነፍስ፡ዳግመ፡እምርኵሳ።
29ወበዛቲ፡ዕለት፡ስምዐ፡ኮነ፡ቅዱስ፡አንቂጦስ፡በመዋዕሊሁ፡ለዲዮቅልጥያኖስ፡ከሐዲ፡ወዝንቱሰ፡አንቂጦስ፡ሰማዕት፡ሶበ፡ርእየ፡መቃኒተ፡ሥቃይ፡ዘአግበሮሙ፡ንጉሥ፡ከመ፡ያፍርሆሙ፡ለምእመናን፡ተንሥአ፡ቅዱስ፡አንቂጦስ፡እማእከለ፡ሕዝብ፡በጥቡዕ፡ልብ፡ወተዛለፎ፡ለንጉሥ። ወሰሚዖ፡ንጉሥ፡አዘዘ፡ይእሥርዎ፡ወያዕርግዎ፡ውስተ፡ተያጥሮን፡ወይስድድዎሙ፡ለአናብስት፡ላዕሌሁ፡ወበጺሖ፡፩፡አንበሳ፡ኀቤሁ፡ሰፍሐ፡የማነ፡እዴሁ፡ወመዝመዘ፡ገጸ፡ወመላትሒሁ፡ለቅዱስ።
30ወርእዮ፡ዲዮቅልጥያኖስ፡አዘዘ፡ይምትሩ፡ርእሶ፡በሰይፍ፡ወሶበ፡መልሐ፡መጥባሕቶ፡ሐራዊ፡ርዕደ፡ወስእነ፡ተሐውሶ።
31ወካዕበ፡ወደይዎ፡ውስተ፡መንኰራኵር፡ዘርቡብ፡ታሕቴሁ፡አፍሐመ፡እሳት፡ወመናሥግተ፡መንኰራኵር፡ከመ፡ትትመላሕ፡መንፈሱ፡ፍጡነ፡እምዝኒ፡ኣድኃኖ፡እግዚአብሔር፡ወዓዲ፡ወደይዎ፡ውስተ፡ጽሕርት፡ዘኣፍልሑ፡ውስቴቱ፡ዓረረ።
32ወእንዘ፡ይኔፅሩ፡ሕዝብ፡መጽአ፡መልአከ፡እግዚአብሔር፡ወመሠጦ፡እምውስተ፡ጽሕርት፡ወአቀሞ፡ቅድመ፡ዲዮቅልጥያኖስ፡ትእ፡አን፡ወሶበ፡ርእየ፡እኍሁ፡ፎጢኖስ፡ዘንተ፡ምርተ፡ተንሥአ፡ወተአምኆ፡ለእኍሁ፡ቂጦስ፡ወረገሞ፡ለመምዓሊ፡እንዘ፡ይብል፡ኦ፡ኀሡር፡እፎ፡ተመዋዕከ፡እምእኁየ።
33ወሰሚዖ፡ዲዮቅልጥያኖስ፡አዘዘ፡ከመ፡ይደዩ፡ጋጋተ፡ወገንዱራተ፡ውስተ፡ክሣውዲሆሙ፡ወወሰድዎሙ፡ውስተ፡ቤተ፡ሞቅሕ፡ወካዕበ፡አዘዘ፡ያውፅእዎሙ፡ውስተ፡ተያጥሮን፡ወይውግርዎሙ፡በአእባን፡ወአልቦ፡ዘለከፎሙ፡ወአዘዘ፡ይስትርዎሙ፡በአጽፋረ፡ሐፂን፡ከመ፡ይዘርዘር፡ሥጋሆሙ፡ወአዕፅምቲሆሙ፡ወቀሠፍዎሙ፡ጥቀ፡ወወደዩ፡ውስተ፡ቍስሎሙ፡ጼወ።
34ወካዕበ፡ወደይዎሙ፡ውስተ፡ምንዳደ፡ቤተ፡ብለኔ፡ወአንደድዎ፡ሠሉሰ፡ዕለታተ፡ወኮነ፡ሎሙ፡ከመ፡ጠል፡ቈሪር፡ወሶበ፡አር፡ኀዉ፡ቤተ፡ብለኔ፡ረከብዎሙ፡እንዘ፡ይዜያነዉ፡ዕበያቲሁ፡ለእግዚአብሔር።
35ወርእዮ፡መምዓሊ፡ተምዓ፡ፈድፋደ፡ወአዘዘ፡ከመ፡ያንድዱ፡እሳተ፡እስከ፡ይትሌዓል፡ነበልባሉ፡ጥቀ፡ወይውርውዎሙ፡ውስቴቱ፡ወሶበ፡ወረውምሙ፡ገብሩ፡ጸሎተ፡ውስቴቱ፡ቀዊሞሙ፡ነዋኀ፡ሰዓተ። ወኀተሙ፡ገጾሙ፡በስመ፡አብ፡ወወልድ፡ወመንፈስ፡ቅዱስ፡፩፡አምላክ። ወመጠዉ፡ነፍሶሙ፡ውስተ፡እደ፡እግዚአብሔር፡ወነበረ፡ሥጋ፡ሆሙ፡ዲበ፡አፍሐመ፡እሳት፡እምጊዜ፡፪ቱ፡ሰዓት፡ዘመዓልት፡እስከ፡፱ቱ፡ሰዓት፡ወአልቦ፡ዘለከፈ፡ሥጋሆሙ፡እሳት፡ወኢሥዕርተ፡ርእሶሙ።
36ወመጽኡ፡መሃይምናን፡ሰብእ፡ሌሊተ፡ወነሥኡ፡ሥጋሆሙ፡ወገነዝዎሙ፡በክብር፡ወወደይዎሙ፡ውስተ፡መቃብር፡ሠናይ፡ወአስተርአየ፡እምኔሆሙ፡ተአምራት፡ወመንክራት። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡እንዘ፡አኀሊ፡ሐዋዘ፤ለአንቂጦስ፡ሰማዕት፡ምስለ፡ፎጢኖስ፡እኁዘ፤ይውግርዎ፡ሎቱ፡ሶበ፡ቃለ፡ንጉሥ፡አዘዘ፤ፁገተ፡ወሁከተ፡አንበሳ፡መንገለ፡የዋሃት፡አግዓዘ፤እስከ፡መልታሕቶ፡ወጽሕሞ፡መዝመዘ።ሰላም፡እብል፡ለአንቂጦስ፡ማኅበሮ፤እለ፡በእሳት፡ፈጸሙ፡ረዊፀ፡ወተባድሮ፤ያብጽሑኒ፡እሉ፡ምስለ፡መላእክት፡ድርጉተ፡ዘምሮ፤ህየ፡አሀሉ፡ወሬዛ፡ነዳየ፡ኵሉ፡አእምሮ፣ኀበ፡ይዘብጣ፡ደናግል፡ከበሮ።
37ወበዛቲ፡ዕለት፡ተዝካሮሙ፡ለአውሲ፡ሰማዕት፡ወአባ፡እንጦንዮስ፡ወዮሐንስ፡ተአማኒ፡ወአባ፡መሐር፡ዘሮሜ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።