Sinaxario · Tahsas
11 de Tahsas
አመ፡፲ወ፩፡ለታኅሣሥ1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፩፡ለታኅሣሥ፡ዕለት፡ኣዕረፈ፡አብ፡ቅዱስ፡አባ፡በኪሞስ፡ወዝንቱ፡ቅዱስ፡ኮነ፡እምሰብአ፡ሀገረ፡ፌስ፡ዘእምደወለ፡መጺል፡እምደቡበ፡ግብፅ፡ወኮነ፡የዓቅብ፡ወይሬዒ፡አባግዐ፡አቡሁ፡እንዘ፡መዋዕሊሁ፡፲ወ፪፡ዓመት።
2ወአስተርአዮ፡መልአከ፡እግዚአብሔር፡በአምሳለ፡ብእሲ፡ወሬዛ፡ወይቤሎ፡ትመጽእኑ፡ከመ፡ንሑር፡ኅቡረ፡ወንኩን፡መነኮሳተ፡ወይቤሎ፡እወ፡ወተሠነዓዉ፡፪ሆሙ፡ወተንሥኡ፡ወሖሩ፡ኅቡረ፡ገዳመ፡አስቄጥስ። ወረከቡ፡አረጋውያነ፡መነኮሳተ፡ወነበረ፡አባ፡በኪሞስ፡ኀቤሆሙ፡፳ወ፬፡ዓመተ። ወእምዝ፡አዕረፉ፡እሉ፡አዕሩግ።
3ወእምድኅረዝ፡ቦአ፡አባ፡በኪሞስ፡ውስተ፡ገዳም፡ርኁቅ፡መጠነ፡ምሕዋረ፡፫ቱ፡ዕለታት፡ወአስተርአዩ፡ሎቱ፡ሰይጣናት፡በአምሳለ፡አራዊት፡አኀርው፡ወአክይስት። ወአርኀዉ፡አፉሆሙ፡ዘከመ፡ይነስክዎ፡ወዓገትዎ፡ወአእመረ፡በመንፈስ፡ቅዱስ፡ሕሊናሆሙ፡ወነ፡ፍሐ፡ላዕሌሆሙ፡ወተዘርዉ፡በኃይለ፡እግዚአብሔር።
4ወረከበ፡ካዕበ፡ፈለገ፡ወነበረ፡ውስቴቱ፡፫ተ፡ዓመተ፡እንዘ፡ይጸውም፡በበሱባኤ፡ወበ፡ተፍጻሜተ፡ሱባኤ፡ይመልእ፡በሕፍኑ፡ተምረ፡እምውእቱ፡ፈለግ፡ይበልዕ፡ወይሰቲ፡ንስቲተ፡ማየ።
5ወኮነ፡ይጼሊ፡፳፻ተ፡ወ፬፻ተ፡ጸሎታተ፡በሌሊት፡ወበመዓልትሂ፡፳፻ተ፡ወ፬፻ተ፡ወጸሎ፡ቱሂ፡ኮነት፡ኣቡነ፡ዘበሰማያት። ወነበረ፡ብዙኀ፡ዓመታተ፡እንዘ፡ይፀመድ፡በጾም፡ወበጸሎት፡ወበ፡፵፡መዓልት፡ይበልዕ፡አሐተ፡ጊዜ፡እስከ፡ለፀቀ፡ማእሱ፡ዲበ፡አዕፅምቲሁ።
6ወእምዝ፡አምጽአ፡ሎቱ፡መልአክ፡ኅብስተ፡ከመ፡ይብላዕ፡ወማየ፡ከመ፡ይስተይ፡ወነበረ፡ብዙኅ፡ዓመታተ፡ወኢኀልቀ፡ውእቱ፡ኅብስት፡ወማይ፡እስከ፡አመ፡አዕረፈ።
7ወእምድኅረዝ፡አስተርአዮ፡እግዚእነ፡በራእየ፡ሌሊት፡ለቅዱስ፡አባ፡በኪሞስ፡ወአዘዞ፡ከመ፡ይትመየጥ፡ኀበ፡ሀገሩ። ወተንሥአ፡ወሖረ፡ወበጽሐ፡ኀበ፡አፍአ፡ሀገሩ፡ወሐነፀ፡በህየ፡በዓተ፡ንኡሰ፡ወኀደረ፡ውስቴቱ፡ባሕቲቶ።
8ወኮነ፡ጸወነ፡ወመርሶ፡ለኵሉ፡ዘይመጽእ፡ኀቤሁ፡ወተስፋ፡ሠናየ፡ለኵሎሙ፡ሰብእ፡ወነበሩ፡እንዘ፡ይትናዘዙ፡ቦቱ፡በትምህርታቲሁ፡ወይቀንኡ፡ላዕለ፡አምልኮቱ፡ወጽድቁ፡ወተጋድሎቱ።
9ወአሐተ፡ዕለተ፡ዶሮ፡መልአክ፡ወኣብጽሖ፡ኀበ፡ሰብአ፡ምድረ፡ኤፍራጥስ፡እስመ፡እሙንቱ፡ኮኑ፡ይትዓደዉ፡እምፍኖተ፡ጽድቅ፡ወሜጦሙ፡ውስተ፡ፍኖተ፡ጽድቅ፡ለኵሎሙ፡ወኀበ፡ሃይማኖት፡ርትዕት፡ወገብአ፡ውስተ፡መካኑ።
10ወአሐተ፡ዕለተ፡እንዘ፡የሐውር፡ውስተ፡ሀገር፡ፀዊሮ፡መሣይምተ፡ከመ፡ይሢጥ፡ወይርከብ፡ሲሳዮ፡ደክመ፡እምሐዊረ፡ፍኖት፡ወነበረ፡ንስቲተ፡ወፆሮ፡ኀይለ፡እግዚአብሔር፡ምስለ፡መሣይምቱ፡ወአንበሮ፡ውስተ፡መካን፡ዘይፈቅድ።
11ወውእተ፡አሚረ፡ርእየ፡አባ፡ሲኖዳ፡ዓምደ፡ዕንቈ፡ባሕርይ፡ልዑለ፡ፈርሀ፡ወደንገፀ፡ወይቤ፡ምንት፡ውእቱ፡ዝንቱ፡ዓምድ፡ዐቢይ። ወአስተርአዮ፡መልአከ፡እግዚአብሔር፡ለአባ፡ሲኖዳ፡ወከሠተ፡ሎቱ፡ከመ፡ውእቱ፡ዓምድ፡አባ፡በኪሞስ።
12ወእምዝ፡አንሶሰወ፡ወበጽሐ፡ኀበ፡ሀሎ፡አባ፡በኪሞስ፡ወእምቅድመ፡ይእቲ፡ዕለት፡ኢርእየ፡ገጾ፡ለአባ፡በኪሞስ፡ግሙራ። ወሶበ፡ተራከቡ፡፪ሆሙ፡ተአምኁ፡በበይናቲሆሙ።
13ወፈቀደ፡አባ፡በኪሞስ፡ያብስል፡ጸብሐ፡ንስቲተ፡ወይቤሎ፡ለአባ፡ሲኖዳ፡ንሣእ፡ዛተ፡ቀሡተ፡ሑር፡ወቅዳሕ፡ማየ፡ወአምጽእ፡ሊተ። ወሶቤሃ፡ተንሥአ፡አባ፡ሲኖዳ፡ወዖራ፡ለይእቲ፡ቀሡት፡ወቀድሐ፡ማየ፡ወመልአ፡ወአምጽኣ፡ሎቱ፡ወረከቦ፡ለጸብሕ፡ፍሉሐ፡ወብሱለ፡ወውእተ፡ጊዜ፡አእመረ፡ከመ፡ውእቱ፡አባ፡በኪሞስ፡ወደገመ፡ምስሌሁ፡ሰላመ፡ወተአምኆ።
14ወእምዝ፡ነገሮ፡ዘከመ፡ርእየ፡ራእየ፡በእንቲአሁ፡ወነበረ፡ኀቤሁ፡ኅዳጠ፡መዋዕለ።
15ወካዕበ፡እንዘ፡እሙንቱ፡ያንሶስዉ፡ኅቡረ፡በአሐቲ፡ዕለት፡ረከቡ፡ርእሰ፡ምዉት፡ወነክነኮ፡አባ፡ሲኖዳ፡በበትሩ፡እንዘ፡ይብል፡ተንሥእ፡ኦ፡ምዉት፡ከመ፡ትንግሩነ፡ዘርኢከ፡ወታጠይቀነ።
16ወተንሥአ፡ሶቤሃ፡በትእዛዘ፡እግዚአብሔር፡ወሰገደ፡ሎሙ፡ለቅዱሳን፡ወነገሮሙ፡ኵሎ፡ግብረ፡ዘውስተ፡ሲኦል፡ወእለ፡ይትኴነኑ፡ውስቴታ፡በበፆታሆሙ። ወነገሮሙ፡ዓዲ፡በእንተ፡ርእሱ፡ከመ፡ውእቱ፡አረማዊ፡እስመ፡ቦ፡እለ፡ሀለዉ፡እምታሕቴነ፡ሰብእ፡ክርስቲያን፡እለ፡አምኑ፡በስሙ፡ለክርስቶስ፡ወኢገብሩ፡ትእዛዞ፡አላ፡ሖሩ፡በሑረተ፡አሕዛብ፡ወአረሚ። ወይቤልዎ፡ቅዱሳን፡ስክብ፡ይእዜ፡ወኑም፡ወሶቤሃ፡ሰከበ፡ከመ፡ቀዲሙ።
17ወእምድኅረዝ፡ተአምኆ፡አባ፡ሲኖዳ፡ወተመይጠ፡ኀበ፡ደብሩ።
18ወሶበ፡ቀርበ፡ጊዜ፡ፍልሰቱ፡ለብፁዕ፡አባ፡በኪሞስ፡እምዝንቱ፡ዓለም፡ኃላፊ፡ጸውዖ፡ለላእኩ፡ወአጠየቆ፡ከመ፡በጽሐ፡ጊዜ፡ዕረፍቱ፡ወአዘዞ፡ከመ፡ይቅብሮ፡ውስተ፡በዓቱ።
19ወእምዝ፡ንስቲተ፡ሐመ፡በሕማመ፡ፈጸንት፡ወርእዮሙ፡ለማኅበረ፡ቅዱሳን፡እንዘ፡ይመጽኡ፡ኀቤሁ። ወሶቤሃ፡መጠወ፡ነፍሶ፡ውስተ፡እዴሁ፡ለእግዚአብሔር፡ወመላእክት፡ነሥኡ፡ነፍሶ፡ወአዕረግዋ፡እንዘ፡ይዜምሩ፡ቅድሜሃ፡ወአብእዋ፡ኢየሩሳሌም፡ሰማያዊተ።
20ወኮነ፡ኵሉ፡መዋዕለ፡ሕይወቱ፡ዓመት፡ወነበረ፡ውስተ፡ቤተ፡አበዊሁ፡፲ተ፡ወ፪ተ፡ዓመተ፡ወበገድለ፡ምንኵስና፡፶ወ፰ተ፡ዓመተ፡በገድል፡ዕፁብ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለከ፡መንሥኤ፡ምዉት፡ዓፀዳ፤ከመ፡ታፁር፡አስፌሬዳ፤ዓስበ፡ፃማከ፡በኪሞስ፡ወዘተቀንዮትከ፡ፍዳ፤መንበረ፡ብርሃናዌ፡ወአክሊለ፡ክብር፡ፀዓዳ፤ እግዚአብሔር፡አርአዮ፡ለአባ፡ሲኖዳ።
21ወበዛቲ፡ዕለት፡ተዝካሩ፡ለቅዱስ፡በርተሎሜዎስ፡ኤጲስቆጶስ፡ወበጥላን፡ሰማዕት፡ወቅዱስ፡ቴዎድሮስ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለከ፡በርተሎሜዎስ፡ኣቡነ፤ዘደለወከ፡በርትዕ፡ኤጲስቆጶሰ፡ከዊነ፤እም፡ጽድቅ፡ኵሉ፡ዘይጸንሐነ፤ኃይለ፡ጸሎትከ፡ይዕቀብ፡ኪያነ፤በአምሳለ፡ብንት፡ዘየዓቅብ፡ዓይነ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።