Sinaxario · Sene
14 de Sene
አመ፡፲ወ፬፡ለሰኔ1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፲ወ፬፡ለሰኔ፡በዛቲ፡ዕለት፡ኮኑ፡ሰማዕተ፡ቅዱሳን፡አባ፡አክራ፡ወእኍሁ፡ፊልጶስ፡እምሀገረ፡ደምንሑር፡እምደወለ፡ብጺር፡እምደቡበ፡ግብፅ፡እምዕራበ፡ባሕረ፡ምስር፡ወውእቱ፡ባዕል፡ፈድፋደ፡ምስለ፡እኍሁ፡ፊልጶስ።
2ወተሠነዓዉ፡ምስለ፡ክልኤቱ፡ቀሳ፡ውስት፡ለ፩ዱ፡ስሙ፡ዮሐንስ፡ወለካልኡ፡አብ፡ጥልማ፡ወበጽሑ፡ኀበ፡ሀገረ፡ቀርጤስ፡ወተአመኑ፡በቅድመ፡መኰንን፡በእግዚእነ፡ኢየሱስ፡ክርስቶስ፡ወአዘዘ፡ይንድፍዎሙ፡በአሕፃ፡ወባሕቱ፡ኢለከፎሙ፡አሕፃ፡ግሙራ።
3ወእምዝ፡አዘዘ፡ይግድፍዎሙ፡ውስተ፡እቶነ፡እሳት፡እንተ፡ትነድድ፡ወገብሩ፡ቦሙ፡ዘንተ፡ወፈነወ፡እግዚአብሔር፡መልአኮ፡ወአድኃኖሙ።
4ወዓዲ፡ካዕበ፡ኣዘዘ፡ከመ፡ይእሥርዎሙ፡ውስተ፡ዘነበ፡አፍራስ፡ወይስሐብዎሙ፡እምሀገረ፡ቀርጤስ፡እስከ፡ሀገረ፡ደምንሑር፡ወገብሩ፡ቦሙ፡ዘንተ፡ወባሕቱ፡ኢበጽሖሙ፡ምንተኒ፡እሙስና፡ወሶበ፡ደክመ፡እምኰንኖቶሙ፡አዘዘ፡ከመ፡ይምትሩ፡ርእሶሙ፡በሰይፍ፡ወነሥኡ፡አክሊለ፡ስምዕ፡በመንግሥተ፡ሰማያት።
5ወመጽኡ፡ሰብእ፡መሃይምናን፡እምሀገረ፡ፃ፡ወነሥኡ፡ሥጋሁ፡ለቅዱስ፡አክራ፡ወሐነፁ፡ሎቱ፡ቤተ፡ክርስቲያን፡ወአንበሩ፡ውስቴታ፡ሥጋሁ፡ወኮኑ፡እምኔሁ፡ተአምራት፡ወመንክራት፡ብዙኃት።
6ወከማሁ፡ለእሉ፡ሠለስቱ፡ቅዱሳን፡ፊልጶስ፡ወአብጥልማ፡ወዮሐንስ፡ነሥእዎም፡ሰብአ፡ሀገረ፡ደምንሑር፡ወገነዝዎሙ፡ወሐነፁ፡ሎሙ፡ቤተ፡ክርስቲያን፡ሠናይተ፡ወአንበርዎሙ፡ውስቴታ፡ወኮነ፡እምኔሆሙ፡ተአምር፡ወመንክር፡ብዙኅ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለአብጥልማ፡ወፊልጶስ፡አብያጽ፤ዮሐንስ፡ወአክራ፡እምደቡበ፡ግብፅ፤አመ፡ቆሙ፡ለስምዕ፡በዓውደ፡መኰንን፡ስሑፅ፤እግዚአብሔር፡ባልሖሙ፡እምነ፡ዘይሠርር፡ሐፅ፤ወአድኀኖሙ፡እምእሳት፡ብቍፅ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።