Sinaxario · Sene
13 de Sene
አመ፡፲ወ፫፡ለሰኔ1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። አመ፡፲ወ፫፡ለሰኔ፡በዛቲ፡ዕለት፡አዕረፈ፡አብ፡ቅዱስ፡አባ፡ዮሐንስ፡ኤጲስቆጶስ፡ዘኢየሩሳሌም።
2ወዝንቱ፡ቅዱስ፡መንኮሰ፡እምንእሱ፡ውስተ፡ደብረ፡አባ፡ኤላርዮን፡ዘዓቢ፡ምስለ፡አባ፡ኤጲፋንዮስ፡ተፀምደ፡ወተጋደለ፡ተጋድሎ፡ዓቢየ፡ወሶበ፡ተሰምዐ፡ዜና፡አእምሮቱ፡ወትሩፋቱ፡ኀረይዎ፡ወሤምዎ፡ኤጲስቆጶሰ፡ውስተ፡ኢየሩሳሌም፡ወዝንቱኒ፡እምድኅረ፡ተሠይመ፡ኤጲፋንዮስ፡ላዕለ፡ሀገረ፡ቆጵሮስ።
3ወእምድኅረ፡ነበረ፡ውስተ፡ሢመቱ፡አስሐቶ፡ሰይጣን፡በአፍቅሮ፡ብሩር፡ወወርቅ፡ለአስተጋብኦ፡ንዋይ፡ብዙኅ፡ወገብረ፡ፃሕለ፡ብሩር፡ወወርቅ፡ለማእዱ፡ወኢኮነ፡ዘይሁብ፡ምጽዋተ፡ለነዳያን፡ወለምስኪናን፡ወኢ፡እምፍርፋራተ፡ማእዱ።
4ወሰምዐ፡ዜናሁ፡ቅዱስ፡ኤጲፋንዮስ፡ወተዘከረ፡ገድሎ፡ዘቀዳሚ፡ወመንኖቶ፡ዘንተ፡ዓለመ፡ወተፀምዶቶ፡ገዓረ፡ወበከየ፡እማዕምቀ፡ልቡ፡እስመ፡ተዘከረ፡ፍቅሮ፡ወእኍሁ፡ውእቱ፡በመንፈስ፡ወሶቤሃ፡ተንሥአ፡ኤጲፋንዮስ፡እም፡ቆጵሮስ፡ወበጽሐ፡ሀገረ፡ኢየሩሳሌም፡በእንተ፡ዝንቱ፡አብ፡አባ፡ዮሐንስ፡ከመ፡ያድኅኖ፡በኅቡእ፡እምስሕተት።
5ወሶበ፡በጽሐ፡ሀገረ፡ኢየሩሳሌም፡ጸውዖ፡ውስተ፡ቤቱ፡አባ፡ዮሐንስ፡ወአንበረ፡በቅድሜሁ፡ማእደ፡በእማንቱ፡ፃሕላት፡ዘወርቅ፡ወዘብሩር፡ወኤጲፋንዮስኒ፡ርእየ፡ከመ፡አልቦ፡ውስቴቱ፡ምሕረት፡ላዕለ፡ነዳያን፡ወምስኪናን፡ኀዘነ፡በልቡ፡ወሐመ፡ፈድፋደ፡በነፍሱ።
6ወእምድኅረዝ፡ወፅአ፡እምኔሁ፡ወኀደረ፡ውስተ፡፩፡ደብር፡እምአድባራተ፡ኢየሩሳሌም፡ወተመክነየ፡ምክንያተ፡በእንቲአሁ፡ወፈነወ፡ኀበ፡አባ፡ዮሐንስ፡እንዘ፡ይብል፡እስመ፡ልኂቃነ፡ሀገረ፡ቆጵሮስ፡ወረበናተ፡ሕዝብ፡መጽኡ፡ኀቤየ፡ወአነ፡እፈቅድ፡ከመ፡ታክብረኒ፡በቅድሜሆሙ፡ወትፈኑ፡ሊተ፡ንዋያተ፡ማእድከ፡ዘወርቅ፡ወዘብሩር፡ከመ፡ይብልዑ፡ቦሙ።
7ወሶበ፡በጽሐት፡መልእክቱ፡ፈነወ፡ሎቱ፡ወነሥኦን፡ቅዱስ፡ኤጲፋንዮስ፡ሤጦን፡ወወሀቦን፡ምጽዋተ፡ለነዳያን፡ወለምስኪናን።
8ወእምድኅረ፡ኅዳጥ፡መዋዕል፡ይቤሎ፡አባ፡ዮሐንስ፡ለአባ፡ኤጲፋንዮስ፡አግብእ፡ሊተ፡ንዋያተ፡ማእድየ፡ዘፈኖኩ፡ለከ፡ወይቤሎ፡ኦሆ። ወእምዝ፡ይቤሎ፡ዳግመ፡ወሥልሰ፡ጊዜ፡ሀበኒ፡ንዋይየ፡ወኢወሀቦ፡እንዘ፡ይብል፡ኦሆ።
9ወሶበ፡ኢወሀቦ፡አኀዞ፡በጽንፈ፡ልብሱ፡ውስተ፡ቤተ፡ክርስቲያን፡ወይቤሎ፡ኢየኀድገከ፡እስከ፡ትሁበኒ፡ንዋይየ። ወሶበ፡ጸለየ፡ቅዱስ፡እግዚአብሔር፡ወአዖሮ፡አዕይንቲሁ፡ለአባ፡ዮሐንስ፡ወሶቤሃ፡ሰአለ፡ወአስተብቍዐ፡ኀበ፡ቅዱስ፡ኤጲፋንዮስ፡ከመ፡ይምሐሮ።
10ወኤጲፋንዮስኒ፡ጸለየ፡ሎቱ፡ወከሠተ፡አሐተ፡ዓይኖ፡ወይቤሎ፡ናሁ፡እግዚእነ፡ኢየሱስ፡ክርስቶስ፡ኀደገ፡ለከ፡አሐተ፡ዓይነከ፡ዕውርተ፡ከመ፡ትዘከር፡ነፍሰከ፡ወገሠፆ፡ወይቤሎ፡ተዘከር፡ገድለከ፡ሠናየ፡ወአእምር፡ከመ፡አነ፡ጥክዎሙ፡ለንዋያተ፡ማእድከ፡ወወሀብክዎሙ፡ለነዳያን፡ወለምስኪናን፡ምጽዋተ፡በእንቲአከ፡ወአንሰ፡እምኢመጻእኩ፡ኀበ፡ኢየሩሳሌም፡ዘእንበለ፡ሶበ፡ኢሰማዕኩ፡ከመ፡አንተ፡አፍቀርከ፡ንዋየ።
11ወእምውእቱ፡ጊዜ፡ነቅሐ፡ቅዱስ፡ዮሐንስ፡በመንፈሱ፡ወሖረ፡ውስተ፡ፍኖተ፡ምሕረት፡ወኮነ፡ኄረ፡ፍጹመ፡ወመጽወተ፡ኵሎ፡ጥሪቶ፡እስከ፡አልባሲሁ፡ወመነነ፡አጥርዮ፡ጥሪታት፡እስከ፡ኢተረክበ፡በኀቤሁ፡በጊዜ፡ዕረፍቱ፡፩ዱ፡ድርኀም።
12ወወሀቦ፡እግዚአብሔር፡ጸጋ፡ፈውስ፡ወገብረ፡ተአምራተ፡ወመንክራተ፡ወኮነ፡ዘይፌውስ፡ኵሎ፡ሕሙማነ፡ወድዉያነ፡ወይቀብዖሙ፡እምነ፡ዘይት፡ዘመቃብረ፡እግዚእነ፡ኢየሱስ፡ሎቱ፡ስብሐት። ወየዓትብ፡ገጾሙ፡በትእ፡ምርተ፡መስቀል፡ማሕየዊ።
13ወሶበ፡ፈጸመ፡ገድሎ፡ሠናየ፡ወአሥመሮ፡ለእግዚአብሔር፡ወአዕረፈ፡በሰላም። በረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ዕብል፡ለዮሐንስ፡ፍጹም።ኤጲስቆጶስ፡ዘኢየሩሳሌም።ገዲፎ፡ዕበየ፡ወክብረ፡ዝንቱ፡ዓለም።መጽወተ፡ለነዳያን፡እንበለ፡መስፈርት፡ወዓቅም።እስከ፡በዕረፍቱ፡ኢተረክበ፡፩፡ድርህም።
14ወበዛቲ፡ዕለት፡ኮነ፡ልማዶሙ፡ለሕዝበ፡ክርስቲያን፡ዘብሔረ፡ግብፅ። ከመ፡ይግበሩ፡በዓለ፡ለመልአክ፡ክቡር፡ገብርኤል፡ሰባኬ፡ዜና፡ሐዲስ።
15ቀዲሙሰ፡ዘሰበከ፡ውእቱ፡ለዳንኤል፡ሶበ፡ይጼሊ፡ወያስተበቍዕ፡ኀበ፡እግዚአብሔር፡በእንተ፡ሚጠቶሙ፡ለደቂቀ፡እስራኤል፡እምነ፡ፄዋዌ፡ወድኀነቶሙ፡እምእደ፡ሰይጣን፡ወአስተርአዮ፡ዝንቱ፡መልአክ፡ክቡር፡ወዜነዎ፡በእንተ፡ድኅነቶሙ፡ለደቂቀ፡እስራኤል፡እምፄዋዌ፡ወተመይጦቶሙ፡ወሕንፀተ፡ቤተ፡መቅደስ፡ዘኢየሩሳሌም።
16ወእምዝ፡ዜነዎ፡በእንተ፡ምጽአቱ፡ለእግዚእነ፡ኢየሱስ፡ክርስቶስ፡ወወሰነ፡ሎቱ፡ዓመታተ፡በዘቦቱ፡ይመጽእ፡ክርስቶስ፡ሎቱ፡ስብሐት። ወአጠየቆ፡ካዕበ፡ከመ፡ይትቀተል፡ክርስቶስ፡ወእምድኅሬሁ፡ያመዘብርዋ፡ለቤተ፡መቅደስ፡ወለኢየሩሳሌም፡ወከመ፡ኢይመጽእ፡ካልእ፡መሢሕ፡ዘእንበለ፡ሐሳዊ፡መሢሕ።
17ወሶበ፡ተፈጸማ፡ዓመታት፡ዘወሰነ፡ሎቱ፡ቀርበ፡ምጽአቱ፡ለመድኀን፡መጽአ፡ዝንቱ፡ክቡር፡መልአክ፡ገብርኤል፡ሊቀ፡ሠራዊተ፡ኃይላት፡ተፈኒዎ፡እምኀበ፡እግዚአብሔር፡ኀበ፡እግዝእትነ፡ቅድስት፡ድንግል፡ማርያም፡ወላዲተ፡አምላክ፡ወዜነዋ፡በእንተ፡ምጽአቱ፡ለወልደ፡እግዚአብሔር፡ወተሠግዎቱ፡እምኔሃ፡ወአስተርእዮቱ፡በሥጋ።
18ወበእንተ፡አክብሮቱ፡ኪያሁ፡ፈነዎ፡እግዚአብሔር፡ልዑል፡ለዝንቱ፡መልአክ፡በእሉ፡ክልኤቱ፡መልእክታት፡ክቡራን።
19ወበእንተዝ፡ኣዘዙነ፡መምህራነ፡ቤተ፡ክርስቲያን፡ከመ፡ንግበር፡ሎቱ፡በዓለ፡ወንስአሎ፡ከመ፡ይተንብል፡በእንቲአነ፡ኀበ፡እግዚእነ፡ኢየሱስ፡ክርስቶስ፡ሎቱ፡ስብሐት። ከመ፡ያድኅነነ፡እምእደ፡ጸላእትነ፡እስመ፡ውእቱ፡ቅሩብ፡ወልጹቅ፡ወይቀውም፡ቅድመ፡መንበሩ፡ለክርስቶስ፡ሎቱ፡ስብሐት። ከመ፡በትንብልናሁ፡ንርከብ፡ሞገሰ፡በቅድመ፡አምላክነ። ወሎቱ፡ይደሉ፡ስባሔ፡ወክብር፡ወአኰቴት፡ወክሂል፡በኵሉ፡አዝማን፡ለዓለመ፡ዓለም፡አሜን።
ሰላም፡ለገብርኤል፡በእደዊሁ፡ዘተአሥሩ።መላእክተ፡ሰማይ፡ጌጋየ፡በትውልደ፡ሰብእ፡ዘገብሩ።ለዝንቱ፡መልአክ፡በእንተ፡ዕበዩ፡ወክብሩ።በብሔረ፡ግብጽ፡መምህራነ፡ሥርዓት፡አንበሩ።በዛቲ፡ዕለት፡ይትገበር፡ተዝካሩ።
20ወበዛቲ፡ዕለት፡ተዝካሩ፡ለቃይናን፡ወልደ፡ሄኖስ፡እምድኅረ፡ሐይወ፡፰፻ወ፵፡ዓመተ፡ወወለዶ፡ለመላልኤል፡ወእምዝ፡ሐይወ፡፸፡ዓመተ፡ወአዕረፈ፡ወኵሉ፡መዋዕሊሁ፡፱፻ት፡ወ፲ቱ፡ዓመት። በረከተ፡አምላኩ፡የሀሉ፡ምስሌነ፡ለዓለመ፡ዓለም፡አሜን።
21ወበዛቲ፡ዕለት፡ካዕበ፡ተዝካሩ፡ለአቡላግ፡ሰማዕት፡ወ፪፻፡ሰማዕታት፡ወተዝካሩ፡ለአቡነ፡ማትያን፡ዘተሰደ፡በእንተ፡ጽድቅ። እግዚአብሔር፡ይምሐረነ፡በጸሎቶሙ፡ለዓለመ፡ዓለም፡አሜን።።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።