Sinaxario · Nehase
4 de Nehase
አመ፡፬፡ለነሐሴ1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፬፡ለነሐሴ፡በዛቲ፡ዕለት፡አዕረፈ፡ሕዝቅያስ፡ንጉሥ፡ወልደ፡አካዝ፡እምዘርአ፡ዳዊት፡እምነገደ፡ይሁዳ።
2ወከመ፡ዝንቱ፡ጻድቅ፡ኢተሠይመ፡እምውስተ፡እስራኤል፡ንጉሠ፡ንጹሐ፡እምድኅረ፡ዳዊት፡ነቢይ፡እስመ፡ኵሎሙ፡ነገሥተ፡እስራኤል፡አምለኩ፡ጣዖተ፡እንበሌሁ፡ወእንበለ፡ኢዮስያስ፡ዘእምድኅሬሁ።
3ወሶበ፡ነግሠ፡ውእቱ፡ሰዓሮሙ፡ለጣዖታት፡ወአንሃለ፡ምሥዋዒሆሙ፡ወአሥመሮ፡ለእግዚአብሔር፡በመዋዕሊሁ፡ፈድፋደ።
4ወአመ፡፲ወ፬ቱ፡ዓመተ፡መንግሥቱ፡መጽአ፡ሰናክሬም፡ንጉሠ፡ፋርስ፡ወዓገታ፡ለኢየሩሳሌም፡ወውእቱ፡ንጉሥ፡ፅኑዕ፡ወኃያል፡ፈድፋደ፡ዘኢኮነ፡በመዋዕሊሁ፡ዘከማሁ፡ወፈርህዎ፡ኵሎሙ፡ነገሥተ፡አሕዛብ፡ወተአዘዙ፡ሎቱ።
5ወሕዝቅያስኒ፡ፈርሀ፡እምኔሁ፡ወፈነወ፡ሎቱ፡አምኀ፡ብዙኀ፡ወኢሠምረ፡ቦቱ፡ወባሕቱ፡ፈነወ፡ሰናክሬም፡ኀበ፡ሕዝቅያስ፡እንዘ፡ይትቈጣዕ፡ላዕሌሁ፡ወፈነወ፡መልእክተ፡ዘውስቴቱ፡ፅርፈት፡ላዕለ፡እግዚአብሔር፡ልዑል፡ወተካየዶ፡ኪዳናተ፡ጽልእ፡ከመ፡ያጥፍእ፡ሀገሮ፡ኢየሩሳሌምሃ፡ወይቤ፡ኢይክል፡አምላክከ፡ያድኅንከ፡እምእዴየ።
6ወሰሚዖ፡ሕዝቅያስ፡በከየ፡ወሠጠጠ፡አልባሲሁ፡ወጸለየ፡ኀበ፡እግዚአብሔር፡እንዘ፡ይብል፡አንተ፡እግዚኦ፡ተአምር፡ዘይቤ፡ሰናክሬም፡ንጉሠ፡ፋርስ፡እስመ፡አጥፍኦሙ፡ለአማልክተ፡አሕዛብ፡እስመ፡እሙንቱ፡ኢኮኑ፡አማልክተ፡አላ፡ዕፀው፡ወአእባን፡ግብረ፡እደ፡ሰብእ፡ነዮሙ፡ወአንተ፡ባሕቲትከ፡አምላክ፡ሕያው፡ዘለዓለመ፡ዓለም።
7ወእምዝ፡ፈነወ፡ሕዝቅያስ፡ኀበ፡ኢሳ፡ይያስ፡ነቢይ፡ወአይድዖ፡ዘከመ፡ይቤ፡ሰናክ፡ሬም፡ወሰአሎ፡ከመ፡ይጸሊ፡ኀበ፡እግዚአብሔር፡ከመ፡ያድኅን፡ሀገሮ፡ወሕዝቦ፡ወተሠ፡ጥዎ፡ኢሳይያስ፡እምቃለ፡እግዚአብሔር፡ወይ፡ቤሎ፡ፅናዕ፡ወኢትፍራህ፡እስመ፡እግዚአብሔር፡ሀለዎ፡ይግበር፡ግብረ፡ዕፁበ፡ላዕለ፡ሰና፡ክሬም፡ዘኢተሰምዐ፡ከማሁ፡ውስተ፡ኵሉ፡ምድር።
8ወበይእቲ፡ሌሊት፡ወረደ፡መልአከ፡እግዚአብሔር፡ቅዱስ፡ሚካኤል፡ወቀተለ፡እምት፡ዕይንቱ፡ለሰናክሬም፡ዓሠርተ፡ወሰመንተ፡እልፈ፡ወኃምሳ፡ምእተ፡ወሶበ፡ነቅሑ፡እለ፡ተርፉ፡ረከቡ፡ሠራዊቶሙ፡ቅቱላነ፡ወጐዩ፡ምስለ፡ንጉሦሙ፡ውስተ፡ብሔረ፡ፋርስ፡ወበዊኦ፡ንጉሥ፡ውስተ፡ቤተ፡አምላኩ፡እንዘ፡ይሰግድ፡ቀተልዎ፡ውሉዱ፤ ወሕዝቅያስኒ፡ድኅነ፡ወአድኀነ፡ሕዝቦ፡ወሀገሮ፡በጽድቁ፡ወአስተጋብኡ፡ሠራዊቱ፡ንዋየ፡ሰናክሬም፡ዘኀደጎ፡እንዘ፡ይጐይይ።
9ወእምዝ፡ደወየ፡ሕዝቅያስ፡ወአልፀቀ፡ይሙት፡ወቦአ፡ኀቤሁ፡ኢሳይያስ፡ነቢይ፡ወረከቦ፡እንዘ፡ይደዊ፡ደዌ፡ፅኑዐ፡ወይቤሎ፡ሥራዕ፡ቤተከ፡እስመ፡አንተ፡ትመውት፡ወጸለየ፡ሕዝቅያስ፡ኀበ፡እግዚአብሔር፡በብካይ፡ወተሠሃሎ፡ወፈነወ፡ሎቱ፡ኢሳይያስሃ፡ዳግመ፡ወአይድዖ፡ከመ፡እግዚአብሔር፡ወሰከ፡ሎቱ፡፲ወ፭ተ፡ዓመተ፡ካልአ።
10ወሶበ፡ኀሠሠ፡ትእምርተ፡እምኢሳይያስ፡ተመይጠ፡ፀሐይ፡ዲበ፡፲፡መዓርጋት፡ወበእንተዝ፡ፈርህዎ፡ለሕዝቅያስ፡ኵሎሙ፡ነገሥተ፡ምድር፡ወአብኡ፡ሎቱ፡አምኀ፡እስመ፡እሙንቱ፡አእመሩ፡ከመ፡እግዚአብሔር፡ምስሌሁ፡ወነበረ፡ዲበ፡መንበረ፡መንግሥቱ፡፳ወ፱፡ዓመተ፤ ወኮነ፡ኵሉ፡መዋዕሊሁ፡፶ወ፬፡ዓመት፤ ወአሥመሮ፡ለእግዚአብሔር፡ወእምዝ፡አዕረፈ፡በሰላም፡ጸሎቱሰ፡ዘተናገረ፡ወይእቲ፡ጽሕፍት፡ውስተ፡መጽሐፈ፡ኢሳይያስ፡ነቢይ፡ዘ፳ወ፰ቱ፡ምዕራፍ፤ በረከተ፡አምላኩ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለሕዝቅያስ፡ሶበ፡ጸለየ፡በሕቁ፤ተወሰከ፡ዘመኑ፡ወፈድፈደ፡እምነ፡ኍልቁእመኒ፡ሶቤሃ፡ተዓየርዋ፡ለጽድቁ፤በእደ፡መልአክ፡ሠራዊተ፡ፋርስ፡ወድቁ፤ወለመልአኮሙ፡ቀተልዎ፡ደቁ።
11ወበዛቲ፡ዕለት፡ኮኑ፡ሰማዕተ፡ዳዊት፡ወአኀዊሁ፡ወፊልጶስ፡በሀገረ፡ሰንጋር፡በደቡበ፡ግብፅ፤ በረከቶሙ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለዳዊት፡ወአኀዊሁ፡ማኅበር፤ እለ፡ኮኑ፡ስምዐ፡በምድረ፡ሰንጋር፤ ሣህለ፡ክርስቶስ፡ይክዓዉ፡በውስተ፡ዛቲ፡ሀገር፤ ወሣህሉሰ፡ለእግዚአብሔር፡ኄር፤ ኀበ፡ኢይዘንም፡ይየብስ፡ብሔር።
12ወበዛቲ፡ዕለት፡አዕረፈ፡አባ፡ማቴዎስ፡ዝንቱ፡ቅዱስ፡ነበረ፡ገዳመ፡እንዘ፡ይለብስ፡ሠቀ፡ፀጕር፡ከመ፡በግዕ፡ወውእቱ፡አእመኖሙ፡በክርስቶስ፡ሎቱ፡ስብሐት፤ ለመርምህናም፡ወለሣራሂ፡ዘአንጽሓ፡እምለምፃ፤ እግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።
ሰላም፡ለማቴዎስ፡ነቢረ፡ገዳም፡ዘአመንኀ፤ኣምሳለ፡በግዕ፡ፀጕረ፡እስከ፡ተሞጥሐ፤ከመ፡ያርኢ፡ጽድቆ፡ወተአምሪሁ፡ስቡሐ፤ሐፀበ፡በማየ፡ጥምቀት፡አባለ፡መርምህናም፡ርሱሐ፤ወኣባለ፡ሣራ፡እምለምፅ፡በህየ፡አንጽሐ።
ዘአቅረብኩ፡ማኅሌተ፡አዘኪርየ፡አእላፈ። እምእለ፡ተጸምዱከ፡ዘልፈ። ለለአነብብ፡ተወከፍ፡ዘንዴትየ፡መጽሐፈ። እንተ፡ረሰይከ፡እግዚኦ፡ጸሪቀ፡መበለት፡ውኩፈ። እምእለ፡አብኡ፡ብዑላን፡ዘተርፈ።
ነቢያት፡ቅዱሳን፡ወሐዋርያት፡ሰባኪያን። ሰማዕት፡ወጻድቃን፡ወመላእክት፡ትጉሃን። ደናግል፡ዓዲ፡ወመነኰሳት፡ኄራን። ባርኩ፡ባርኮ፡ጉባኤ፡ዛቲ፡መካን። እስከ፡አረጋዊ፡ልሒቅ፡ወንኡስ፡ሕፃን።
ለዘጸሐፎ፡በክርታስ፡ወለዘአጽሐፎ፡እንዘ፡ይደርስ። ለዘአንበቦ፡ወለዘተርጐሞ፡በልሳን፡ሐዲስ። ወለዘሰምዐ፡ቃሎ፡በዕዝነ፡መንፈስ። በጸሎተ፡እሙ፡ማርያም፡ዐራቂተ፡ኵሉ፡እምባእስ። ኅቡረ፡ይምሐረነ፡ኢየሱስ፡ክርስቶስ።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ።