Sinaxario · Nehase
3 de Nehase
አመ፡፫፡ለነሐሴ1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፤ አመ፡፫፡ለነሐሴ፡በዛቲ፡ዕለት፡አዕረፈ፡አብ፡ቅዱስ፡ፅኑዐ፡ገድል፡ክቡር፡ወፅሙድ፡አባ፡ስምዖን፡ዘዓምድ።
2ወዝንቱ፡ቅዱስ፡ኮነ፡እምደሴተ፡ሶርያ፡ወሶበ፡ኮነ፡መዋዕሊሁ፡፯ተ፡ዓመተ፡ረሰዮ፡አቡሁ፡ይዕቀብ፡አባግዒሁ፡ወኮነ፡ወትረ፡የሐውር፡ኀበ፡ቤተ፡ክርስቲያን፡ኵሎ፡ጊዜ፡ወይሰምዕ፡መጻሕፍተ።
3ወእምዝ፡ጸጋ፡ሀከቶ፡ዘእግዚእነ፡ወሖረ፡ውስተ፡፩ዱ፡ደብር፡ወመንኰሰ፡ወነበረ፡እንዘ፡ይፀመድ፡ወይትጋደል፡ብዙኀ፡ዓመታተ፡ወይፀውር፡መሬተ፡ወሐመደ፡ዲበ፡ርእሱ፡ወያመ፡ነድብ፡ነፍሶ፡በጾም፡ወበጸሎት፡ብዙኅ፡ወበጽምእ፡ወእምዝ፡አሰረ፡ውስተ፡ሐቌሁ፡ሐብለ፡እስከ፡ቦአ፡ውስተ፡ሥጋሁ፡ወኮነ፡ይወፅእ፡ዕፄ፡እምኔሁ፡ዘዕዩዕ፡ጥቀ።
4ወኀዘኑ፡እምኔሁ፡ኵሎሙ፡አኀው፡በእንተ፡ፄናሁ፡ወአስቈረርዎ፡ወተጋብኡ፡ኀበ፡አበ፡ምኔት፡ወይቤልዎ፡ለእመ፡ኢያውፃእኮ፡ለዝንቱ፡ስምዖን፡እምኀቤነ፡ወእመ፡አኮ፡ነኀድከ፡ወነሐውር፡ኵልነ፤ ወይቤሎሙ፡ምንተ፡ገብረ፧ ወይቤልዎ፡ጸውዖ፡ወርኢ፡ዘገብረ።
5ወጸውዖ፡አበ፡ምኔት፡ለቅዱስ፡ስምዖን፡ወሶበ፡ቆመ፡ቅድሜሁ፡ወርእየ፡ደመ፡ድሙረ፡ምስለ፡መግል፡እንዘ፡ይውኅዝ፡ዲበ፡እገሪሁ፡ወዓፀቦ፡ለአበ፡ምኔት፡ፈድፋደ፡ወከ፡ሠተ፡አልባሲሁ፡ወርእዮ፡ለሐብል፡በዊኦ፡ውስተ፡ሥጋሁ፡ወተቈጥዐ፡ላዕሌሁ፡አበ፡ምኔት፡ወይቤሎ፡ለምንት፡ደፈርከ፡ከመ፡ትግበር፡ዘንተ፡ግብረ፤ ወበዓቢይ፡ፃማ፡ኣውፅእዎ፡ለውእቱ፡ሐብል፡እምውስተ፡ሥጋሁ፤ ወነበሩ፡እንዘ፡ይገብሩ፡ሎቱ፡መድኃኒተ፡መጠነ፡፶፡መዓልት፡እስከ፡ተፈወሰ፡ቍስሉ።
6ወእምዝ፡ይቤሎ፡አበ፡ምኔት፡ኦ፡ወል፡ድየ፡ስምዖን፡ሑር፡ኀበ፡ዘፈቀድከ፡ወወፅአ፡እምኀቤሆሙ፡ሖረ፡ወቦአ፡ውስተ፡ግብ፡ይቡስ፡ወነበረ፡ምስለ፡አክይስት፡ወአቃርብት፡ወርእየ፡አበ፡ምኔት፡ራእየ፡በሌሊት፡ከመ፡ዘይቤሎ፡ለምንት፡ሰደድኮ፡ለገብርየ፡ስምዖን፧ ወይእዜኒ፡ኀሥሦ፡ወሚጦ፡እስመ፡ውእቱ፡ይኄይስ፡እምኔከ፡በዕለተ፡ደይን፡ወገሠፆ፡ተግሣፀ፡ዓቢየ፡በእንተ፡ፀአቱ፡ለአባ፡ስምዖን።
7ወበጽባሕ፡ነገሮሙ፡አበ፡ምኔት፡ለኣ፡ኀው፡ዘከመ፡ርእየ፡ወዘከመ፡ገሠፆ፡በእንተ፡አባ፡ስምዖን፡ወሰሚዖሙ፡ደንገፁ፡ወኀዘኑ፡ወይቤሎሙ፡አበምኔት፡ሑሩ፡ውስተ፡ኵሉ፡መካን፡እስከ፡ትረክብዎ፡ኢትትመየጡ፡ኀቤየ።
8ወሖሩ፡ወሐተቱ፡ወኢረከብዎ፡ወእ፡ምድኅረዝ፡ሖሩ፡ኀበ፡ወግር፡ወአብርሁ፡ማኅቶተ፡ወርእይዎ፡ውስተ፡ግብ፡እንዘ፡ይነብር፡ምስለ፡አክይስት፡ወአቃርብት፡ዘእንበለ፡መብልዕ፡ወመስቴ፡ወአውረዱ፡ሎቱ፡ሐብለ፡ወአውፅእዎ፡እምህየ፡ወወሰድዎ፡ምስሌሆሙ፡ወይቤልዎ፡ሥረይ፡ለነ፡አበሳነ፡ውእቱኒ፡ይቤሎሙ፡ሊተኒ፡ኀድጉ፡አበሳየ፡እስመ፡አኀዘ፡ንኩክሙ፡ለኵልክሙ፡ወተዓደውኩ፡ትእዛዘ፡መምህርየ፡በአምጣነ፡ነበረ፡ውስተ፡ውእቱ፡ግብ፡ኢበልዐ፡ወኢሰትየ፡ምንተኒ፤ ወቦአ፡ምስለ፡አኀው፡ውስተ፡ደብሩ፡ወነበረ፡እንዘ፡ይትጋደል፡ተጋድሎ፡ዓቢየ።
9ወሶበ፡አንበርዎ፡ውስተ፡ውእቱ፡ደብር፡ኢፈተወ፡ክብረ፡ዝንቱ፡ዓለም፡ኀላፊ፡ወኀደጎሙ፡ወጐየ፡ወሖረ፡እምኔሆሙ፡በኅቡእ፡ወበጽሐ፡ኀበ፡አሐቲ፡ኰኵሕ፡ወቆመ፡ዲቤሃ፡፰፡መዓልተ፡ዘእንበለ፡ንዋም።
10ወእምድኅረዝ፡መጽአ፡ኀቤሁ፡መልአከ፡እግዚአብሔር፡ወናዘዞ፡ወኣይድዶ፡ከመ፡ፀውዖ፡እግዚአብሔር፡በእንተ፡መድኃኒተ፡ብዙኃት፡ነፍሳት።
11ወእምዝ፡ቆመ፡፲ወ፭ተ፡ዓመተ፡ዲበ፡ዓምድ፡ዘኑኁ፡ሠላሳ፡በእመት፡ወይገብር፡ተአ፡ምረ፡ወመንክረ፡ብዙኀ፡ወፈውሰ፡ዓቢየ፡ወይፌውሶሙ፡ለእለ፡ይመጽኡ፡ኀቤሁ።
12ወአቡሁሰ፡ኀሠሦ፡ወኢረከቦ፡ወአዕረፈ፡እምቅድመ፡ይርአዮ።
13ወእሙሰ፡እምድኅረ፡ብዙኅ፡ዓመታት፡ሰምዓት፡ዜናሁ፡ወበጽሐት፡ኀቤሁ፡እንዘ፡ሀሎ፡ይቀውም፡ዲበ፡ዓምድ፡ወበከየት፡ብዙኀ፡ወኖመት፡ታሕተ፡ዓምዱ፡ወሰአለ፡ላቲ፡ቅዱስ፡ኀበ፡እግዚአብሔር፡ከመ፡ይግበር፡ሠናየ፡ምስሌሃ፡ወተወክፈ፡ስእለቶ፡ወነሥአ፡ነፍሳ፡እንዘ፡ትነውም፡ታሕተ፡ዓምድ፡ወተቀብረት፡በህየ።
14ወቀንአ፡ላዕሌሁ፡ሰይጣን፡ወዘበጦ፡ውስተ፡እግሩ፡ዝብጠተ፡ዓቢየ፡ወቆመ፡በአሐቲ፡እግሩ፡ብዙኀ፡ዓመታተ፡እስከ፡ዓፀየ፡ወወድቀ፡ዕፄ፡ታሕተ፡ዓምዱ።
15ወመጽአ፡ኀቤሁ፡ሊቀ፡ፈያት፡ወነስሐ፡በኀቤሁ፡ወነበረ፡ኅዳጠ፡መዋዕለ፡ወሞተ፡ወቦአ፡ውስተ፡ሕይወት።
16ወእምዝ፡ኀሠሠ፡እምኀበ፡እግዚእነ፡ኢየሱስ፡ክርስቶስ፡ሎቱ፡ስብሐት፤ በእንተ፡እለ፡ይመጽኡ፡ኀቤሁ፡ከመ፡ኢያዕፅቦሙ፡ጽምአ፡ማይ፡ወሶቤሃ፡ነቅዐ፡ማይ፡እምታሕተ፡ዓምዱ።
17ወእምህየ፡ፈለሰ፡ኀበ፡ካልእ፡ዓምድ፡ነዊኅ፡ወቆመ፡ዲቤሁ፡፴፡ዓመተ፡ወሶበ፡ፈጸመ፡ተጋድሎቶ፡ፈለሰ፡ኀበ፡እግዚአብሔር፡ዘአፍቀሮ፡እምድኅረ፡ሜጦሙ፡ለብዙኀን፡ከሐድያን፡ወአረማውያን፡ወአብኦሙ፡ውስተ፡አሚነ፡ክርስቶስ፡ሎቱ፡ስብሐት፤ ወመሀሮሙ፡ለብዙ፡ኀን፡ወአልበሶሙ፡አልባሰ፡ምንኵስና፡ወረሰ፡ዮሙ፡ከመ፡መላእክት፡ወአዕረፈ፡እምብዙኅ፡ፃማ፡ወቦአ፡ውስተ፡ዕረፍት፡ዘለዓለም።
18ወእምዝ፡መጽአ፡ሊቀ፡ጳጳሳት፡ዘአንጾኪያ፡ሶበ፡ሰምዐ፡ከመ፡አዕረፈ፡አባ፡ስም፡ዖን፡መስተጋድል፡ወነሥአ፡ምስሌሁ፡ካህናተ፡ወመኳንንተ፡ወኵሎ፡ሕዝበ፡ወበጽሐ፡ኀበ፡ሥጋሁ፡ለቅዱስ፡አባ፡ስምዖን፡ወፆርዎ፡በዓቢይ፡ክብር፡በዝማሬ፡ወበማኅሌት፡ወአብጽሕዎ፡ኀበ፡ሀገረ፡እስክንድርያ፡ወአንበርዎ፡ውስተ፡ቤተ፡ክርስቲያን፡ወኮኑ፡እምሥጋሁ፡ተአምራት፡ወመንክራት፡ብዙኃት፡ወፈውስ፡ዓቢይ፤ እግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።
ሰላም፡ለስምዖን፡እንተ፡ለሐቌሁ፡አፅንዖ፤በሐብለ፡በቀልት፡ይቡስ፡ዘይገምዶ፡ወይበልዖ፤በእንተ፡ዝንቱ፡እምደብር፡ሶበ፡አበ፡ምኔት፡ኣውፅኦ፤በቃለ፡ተግሣፅ፡እግዚአብሔር፡አውሥኦ፤ለገብርየ፡ስምዖን፡እንዘ፡ይብል፡አግብኦ።
19ወበዛቲ፡ዕለት፡አዕረፈት፡ቅድስት፡ሶፍያ፡ወዛቲ፡ቅድስት፡እምዘመደ፡ነገሥት፡ወባቲ፡ብዕል፡ብዙኅ፡ወነገደት፡ብሔረ፡ሮሜ፡ምስለ፡አዋልዲሃ፡ሠላስ፡ከመ፡ትንሣእ፡ማዕተቦ፡ለክርስቶስ፡ሎቱ፡ስብሐት፤ ወአእሚር፡እንድርያኖስ፡ንጉሥ፡ዓላዊ፡ከመ፡ክርስቲያናዊት፡ይእቲ፡ወአብጽሓ፡ኀቤሁ፡ወተሰአላ፡በእንተ፡ሀገራ፡ወበእንተ፡ስማ፡ወትቤሎ፡ዘይቀድም፡ስምየ፡ክርስቲያናዊት፡ወሰመዩኒሰ፡አዝማድየ፡ሶፍያ፡ወክብርተ፡ዘመድ፡አነ፡በአጣልያ፡ወበምሕረቱ፡ለሊሁ፡እግዚእነ፡ኢየሱስ፡ክርስቶስ፡ሎቱ፡ስብሐት፤ አብጽሐኒ፡ኀቤከ፡ከመ፡አቅርብ፡ደቂቅየ፡መባአ።
20ወእምዝ፡አፅንዓቶን፡ለአዋልዲሃ፡ከመ፡ኢይፍርሃ፡እምኵነኔሁ፡ለመምዓሊ፡ወሶቤሃ፡ወረውዎን፡ውስተ፡እቶን፡ዘእሳት፡ወእምድኅረ፡ፈጸማ፡ስምዖን፡መላስ፡አዋልዲሃ፡ገነዘቶን፡ወቀበረቶን፡አፍአ፡እምሀገረ፡ሮሜ፡ወበሠሉስ፡ዕለት፡ሖረት፡ኀቤሆን፡ከመ፡ትግበር፡ተዝካሮን፡ምስለ፡ብዙኃት፡አንስተ፡ሀገር፡ወበጺሐ፡ሰገደት፡እንዘ፡ትጼሊ፡ወትብል፡ኦ፡አዋልድየ፡ፍጹማት፡ወክሉላት፡በአክሊል፡ዘኢይማስን፡ንሥኣ፡ኪያየ፡ምስሌክን፡ወዘንተ፡እምድኅረ፡ትቤ፡አዕረፈት፡በሰላም፡ወተቀብረት፡ምስሌሆን፡እግዚአብሔር፡ይምሐረነ፡በጸሎታ፡ለዓለመ፡ዓለም፡አሜን።
ሰላም፡ለሶፍያ፡እንተ፡አንደየት፡ርእሳ፤መንግሥተ፡ሰማያት፡አብዲራ፡እምነ፡ምድራዊት፡ንግሣ፤ተዝካረ፡ደቂቃ፡ሠላስ፡ወአኮ፡ሠላሳ፤ድኅረ፡ገብረት፡ዮም፡በዘይትመጦ፡ማኀሠሣ፤እግዚአብሔር፡ይፈጽም፡ተመጠወ፡ነፍሳ።ሰላም፡ሰላም፡ለመስተጋድል፡መርቆሬዎስ፤እስከነ፡ሥጋሁ፡አውዓዩ፡አምሳለ፡ዕፅ፡ይቡስ፤ኀበ፡ይደፍንዎ፡ሎቱ፡ከመ፡አለ፡በዎ፡መንፈስ፤ወሰዱ፡ሥጋሁ፡ውስተ፡መቃብር፡ሐዲስ፤ዲበ፡ዘባኖሙ፡ለቶራት፡ሠላስ።
ዘአቅረብኩ፡ማኅሌተ፡አዘኪርየ፡አእላፈ። እምእለ፡ተጸምዱከ፡ዘልፈ። ለለአነብብ፡ተወከፍ፡ዘንዴትየ፡መጽሐፈ። እንተ፡ረሰይከ፡እግዚኦ፡ጸሪቀ፡መበለት፡ውኩፈ። እምእለ፡አብኡ፡ብዑላን፡ዘተርፈ።
ነቢያት፡ቅዱሳን፡ወሐዋርያት፡ሰባኪያን። ሰማዕት፡ወጻድቃን፡ወመላእክት፡ትጉሃን። ደናግል፡ዓዲ፡ወመነኰሳት፡ኄራን። ባርኩ፡ባርኮ፡ጉባኤ፡ዛቲ፡መካን። እስከ፡አረጋዊ፡ልሒቅ፡ወንኡስ፡ሕፃን።
ለዘጸሐፎ፡በክርታስ፡ወለዘአጽሐፎ፡እንዘ፡ይደርስ። ለዘአንበቦ፡ወለዘተርጐሞ፡በልሳን፡ሐዲስ። ወለዘሰምዐ፡ቃሎ፡በዕዝነ፡መንፈስ። በጸሎተ፡እሙ፡ማርያም፡ዐራቂተ፡ኵሉ፡እምባእስ። ኅቡረ፡ይምሐረነ፡ኢየሱስ፡ክርስቶስ።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ።