ግዕዝ
Home Formaciones Libros Biblioteca Ge'ez Contacto
Sinaxario · Meskerem

25 de Meskerem

አመ፡፳ወ፭፡ለመስከረም
1በስመ፡ኣብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፳ወ፭፡ለመስከረም፡በዛቲ፡ዕለት፡ኣዕረፈ፡ዓቢይ፡ነቢይ፡ዮናስ፡ጻድቅ።
2ወዝንቱ፡ነቢይ፡ወልደ፡መበለት፡ዘሰራጵታ፡ዘአንሥኦ፡ኤልያስ፡እምነ፡ሙታን፡አመ፡ሕፃን፡ውእቱ። ወተለዎ፡ለኤልያስ፡ወተልእኮ፡ወፃመወ፡ምስሌሁ፡ወደ፡ለዎ፡ጸጋ፡ትንቢት፡በተአዝዞቱ፡ሎቱ።
3ወአዘዞ፡እግዚአብሔር፡ቡሩክ፡ስሙ፡ወልዑል፡ወይቤሎ፡ሑር፡ኀበ፡ሀገረ፡ነነዌ፡ወስብክ፡ሎሙ፡ለሰብአ፡ዚአሃ፡ወበሎሙ፡ከመ፡እምድኅረ፡ሠሉስ፡ዕለት፡ትትገፈታዕ፡ሀገርክሙ።
4ወሶበ፡ይቤሎ፡እግዚአብሔር፡ዘንተ፡ሐለየ፡በልቡ፡ዮናስ፡ነቢይ፡ወይቤ፡ለእመ፡ኮነ፡እግዚአብሔር፡ይፈቅድ፡አጥፍኦቶሙ፡እምኢኮነ፡ዘይኤዝዘኒ፡ከመ፡እሑር፡ወእስብክ፡ሎሙ።
5ወለእመሰ፡ሖርኩ፡ወሰበኩ፡ሎሙ፡ይኔስሑ፡እስመ፡እግዚእ፡መሐሪ፡ውእቱ፡ይምሕሮሙ፡ወአንሰ፡እከውን፡በኀቤሆሙ፡ሓሳዌ፡ወኢይሰምዑ፡ቃልየ፡ወእመ፡አኮ፡ይቀትሉኒ፡እስመ፡ተፈኖኩ፡በሐሰት፡እምኀበ፡እግዚአብሔር፡ወአንሰ፡እጐይይ፡እምኔሁ፡ወአሐውር፡ኀበ፡ካልእት፡ሀገር።
6ኦ፡አኃውየ፡ይትከሀሎኑ፡ለመኑሂ፡ይጕየይ፡እምኀበ፡እግዚአብሔር፡ልዑል፡ወለእመ፡ኮነ፡ልቡ፡ከመዝ፡ለዝንቱ፡ነቢይ፡ዘእምነቢያተ፡ደቂቀ፡እስራኤል፡ከመዝ፡እፎ፡ይከውን፡ልቦሙ፡ለሕዝብ። ወባሕቱ፡አንሰ፡እሔሊ፡ከመ፡እግዚአብሔር፡ቡሩክ፡ስሙ፡ገብረ፡ዘንተ፡በኪነ፡ጥበቡ፡ከመ፡ይጕየይ፡ዝንቱ፡ነቢይ፡እስከ፡አስተርአየት፡ዛቲ፡ትእምርት፡ዓባይ፡በነቢሮቱ፡ውስተ፡ከርሠ፡አንበሪ፡ሠሉሰ፡ዕለታተ፡ወሠሉሰ፡ለያልየ፡ወእምዝ፡ወፅአ፡ጥዑየ፡ዘእንበለ፡ሙስና።
7ወኮነት፡ይእቲ፡ትእምርት፡ለነቢሮተ፡እግዚእነ፡ውስተ፡መቃብር፡ሠሉሰ፡ዕለታተ፡ወሠሉሰ፡ለያልየ፡ወእምዝ፡ተንሥአ፡ዘእንበለ፡ሙስና።
8ወተንሥአ፡ነቢይ፡ወጐየ፡ወፈቀደ፡ይሑር፡ብሔረ፡ተርሴስ፡ወተፅዕነ፡ሐመረ፡ወሖረ፡ንስቲተ፡ወበማእከለ፡ባሕር፡ተንሥአ፡ላዕሌሆሙ፡ነፋሰ፡ዓውሎ፡ወተለዓለ፡ሞገደ፡ባሕር፡ወአልፀቁ፡ለተሰጥሞ፡ወለተሐጕሎ።
9ወወደየ፡እግዚአብሔር፡ሕሊና፡ውስተ፡ልቡ፡ለሊቀ፡ሐመር፡ወይቤሎሙ፡ለእለ፡ተፅዕኑ፡ውስተ፡ሐመር፡ተዓፀዉ፡በበይናቲክሙ፡ከመ፡ናእምር፡መኑ፡ውእቱ፡ዘበእንቲአሁ፡መጽአ፡ላዕሌነ፡ዝንቱ፡ምንዳቤ። ወተዓፀዉ፡ሶቤሃ፡ወወፅአ፡ዕፃ፡ላዕለ፡ዮናስ፡ነቢይ። ወይቤሎ፡ሊቀ፡ሐመር፡ምንተ፡ገበርከ፡እስመ፡መጽአ፡ዝንቱ፡ምንዳቤ፡ላዕሌነ፡በእንቲአከ፡ወይቤሎሙ፡ዮናስ፡ውግሩኒ፡ውስተ፡ባሕር፡ወአንትሙ፡ትድኀኑ።
10ወሊቀ፡ሐመርኒ፡ወእለ፡ምስሌሁ፡አስተብቍዑ፡ኀበ፡እግዚአብሔር፡ወይቤሉ፡ኦ፡እግዚኦ፡ኢትትኃሠሠነ፡ደሞ፡ለዝ፡ብእሲ፡ወእምዝ፡ነሥእዎ፡ወወገርዎ፡ውስተ፡ባሕር፡ወውሕጦ፡አንበሪ፡ዓቢይ፡ኣሜሃ፡ወነበረ፡ዮናስ፡ውስተ፡ከርሠ፡አንበሪ፡ሠሉሰ፡ዕለታተ፡ወሠሉሰ፡ለያልየ፡ወእምዝ፡ጐስዖ፡ኀበ፡ጽንፈ፡ነነዌ።
11ወተንሢኦ፡ሶቤሃ፡ቦአ፡ሀገረ፡ነነዌ፡ወሰበከ፡ሎሙ፡በከመ፡አዘዞ፡እግዚአብሔር፡ወይቤ፡ኣእምሩ፡ከመ፡እምዛቲ፡ዕለት፡እስከ፡ሠሉስ፡ዕለት፡ትትገፈታዕ፡ሀገርክሙ፡ወትጠፍኡ፡ኵልክሙ፡ወዑደታ፡ለነነዌ፡ሀገር፡መጠነ፡ምሕዋረ፡፫ቱ፡ዕለት።
12ወሶበ፡ሰምዑ፡ስብከቶ፡ለዮናስ፡ነቢይ፡ፈርሁ፡ፈድፋደ፡ወአምኑ፡በእግዚአብሔር፡ወነስሑ፡ወጾሙ፡ወለብሱ፡ሠቀ፡ፀጕር፡ልኂቃን፡ወንኡሳን። ወበጽሐ፡ስብከተ፡ዮናስ፡ነቢይ፡ኀበ፡ንጉሠ፡ነነዌ፡ወወረደ፡እመንበሩ፡ወአውረደ፡አክሊለ፡እምዲበ፡ርእሱ፡ወለብሰ፡ሠቀ፡ፀጕር፡ወነበረ፡ውስተ፡ሐመድ።
13ወአዘዘ፡ከመ፡ይዑድ፡ዓዋዲ፡ውስተ፡ሀገረ፡ነነዌ፡እንዘ፡ይብል፡አዘዘ፡ንጉሥ፡ለመኳንንቲሁ፡ወለኵሉ፡ሰብአ፡ነነዌ፡ዓቢያን፡ወንኡሳን፡ዕድ፡ወአንስት፡ደቂቅ፡ወሕፃናት፡መርዓዊ፡ወመርዓት፡ይፃኡ፡እመንጦላዕቶሙ። ኣልሕምት፡ወአባግዕ፡ወኵሎሙ፡እምሰብእ፡እስከ፡እንስሳ፡ኢይጥዓሙ፡ምንተኒ፡ወኢይስተዩ፡ማየ፡ወይልበሱ፡ሠቀ፡ፀጕር፡ወከማሁ፡እንስሳኒ፡ኢይብልዑ፡ሣዕረ። ወኵሎሙ፡ሰብእ፡ይኅድጉ፡እከየ፡ምግባሮሙ፡እሉ፡እሙንቱ፡ዓመፃ፡ዝሙት፡ወሐሰት፡ወሰሪቅ፡ወፅርፈት። ከመ፡ይሣሃል፡እግዚአብሔር፡ላዕሌነ፡ዮጊ፡ወያእትት፡መዓቶ፡እምላዕሌነ።
14ወሶቤሃ፡ነስሑ፡ኵሎሙ፡ወጾሙ፡ወኀሠሡ፡ምሕረተ፡እግዚአብሔር፡ዘቡሩክ፡ስሙ፡ወመሐሮሙ፡እግዚአብሔር።
15ወኀዘነ፡እንከ፡ዮናስ፡ነቢይ፡ዓቢየ፡ኀዘነ፡ወይቤ፡እግዚኦ፡ንሥኣ፡ለነፍስየ፡እስመ፡ይኄይሰኒ፡መዊት፡እምሐይው።
16ወወፅአ፡ዮናስ፡አፍአ፡ሀገር፡ወገብረ፡ንስቲተ፡ልጎተ፡ወነበረ፡በህየ፡ወኖመ፡ወአስተዳለወ፡እግዚአብሔር፡ሐምሐመ፡አብቈለ፡ወአልኀቀ፡ወቈጽሉኒ፡ዓርገ፡ላዕለ፡ወሶበ፡ወጸለሎ፡እንዘ፡ይነውም፡ነቅሐ፡ወርእዮ፡ወተፈሥሐ፡ቦቱ፡ዮናስ፡ዓቢየ፡ፍሥሐ።
17ወበሣኒታ፡አምጽአ፡እግዚአብሔር፡ላዕለ፡ዮናስ፡ድቃሰ፡ወኖመ፡ወኣዘዞ፡ለዕፄ፡ከመ፡ይምትሮ፡ወተመትረ፡ሥርዉ፡ለውእቱ፡ሐምሐም፡ወአምጽአ፡እግዚአብሔር፡ነፋሰ፡መስዕ፡ውዑየ፡ወአይበሶ፡ወአልሐቦ፡ለዮናስ፡ፀሐይ፡ወነቂሖ፡እምንዋሙ፡ርእያ፡ለሐምሐም፡ከመ፡የብሰት፡ኀዘነ፡ፈድፋደ፡ወኀሠሠ፡ለርእሱ፡ሞተ።
18ወይቤሎ፡እግዚአብሔር፡ለዮናስ፡በእንተ፡ይብሰተ፡ሐምሐም፡ኀዘንከኑ፧ ወይቤ፡ዮናስ፡እወ፡እግዚኦ፡ኀዘንኩ፡እስከ፡ለሞት፡ፈድፋደ።
19ወይቤሎ፡እግዚአብሔር፡ለእመ፡አንተ፡ተኀዝን፡በእንተ፡ሐምሐም፡ዘኢተከልካ፡ወኢያብቈልካ፡ወኢፃመውከ፡ባቲ፡በአሐቲ፡ዕለት፡በቊላ፡ወበአሐቲ፡ዕለት፡የብሰት፡ወለምንት፡ኢይምህካ፡አነ፡ለነነዌ፡ሀገር፡ዓባይ። ዘውስቴታ፡ይነብሩ፡ዘይፈ፡ደፍዱ፡እም፲ወ፪፡እልፍ፡እለ፡ኢፈለጡ፡የማኖሙ፡ወጸጋሞሙ። ወእንስሳኒ፡ብዙኀ። እስመ፡አነ፡መሐሪ፡ወመስተሣህል፡ላዕለ፡ኵሉ፡ዘይትመየጥ፡እምአበሳሁ፡ወይኔስሕ።
20ወተመይጠ፡ዮናስ፡ምድረ፡እስራኤል፡ወባቲ፡ኣዕረፈ። ወኮነ፡ትንቢቱ፡እምቅድመ፡ምጽኣቱ፡ለእግዚእነ፡ኢየሱስ፡ክርስቶስ፡በሥጋ፡በ፲ወ፪፻፡ዓመት፡ወተነበየ፡በመዋዕሊሁ፡ለዓሞፅ፡ንጉሥ፡ወልደ፡ምናሴ። ወኮነ፡ኵሉ፡መዋዕለ፡ሕይወቱ፡፻ወ፸፡ዓመት፣ በረከተ፡አምላኩ፡ተሀሉ፡ምስሌነ፡ለዓለመ፡ዓለሙ፡አሜን።
ሰላም፡ለዮናስ፡በከርሠ፡አንበሪ፡ዘኖመ።አምሳለ፡ክርስቶስ፡ይኩን፡ዘውስተ፡መቃብር፡ተኀትመ።እግዚአብሔር፡ይቤሎ፡ጊዜ፡በሐሩር፡ሐመ።ኢይሣሃላኑ፡ለነነዌ፡ወኢይምሕካኑ፡ፍጹመ።እንዘ፡አንተ፡ትምሕክ፡ዘኢተከልከ፡ሐምሐመ።
21ወበዛቲ፡ዕለት፡ተዝካሮሙ፡ለፎቃ፡ወዮሐንስ፡ወእንድራዎስ፡ወጴጥሮስ፡ወእንጦ፡ንዮስ፡ወጴጥሮስ፡ወጳውሎስ፡፡በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላመ፡ለዕፀ፡መስቀል፡ደመ፡መለኮት፡ዘተነዝኅ።እስመ፡ቈጽሰ፡ሕይወት፡አሥረዐ፡ወጽጌ፡አምሳል፡ንጹሐ።በዛቲ፡ዕለተ፡ብሔረ፡አግዓዚ፡ዘበጽሐ።ከመ፡ተመነየ፡ነጺሮ፡ዕለቶ፡ስቡሐ።ርእየሂ፡ወተፈሥሐ፡እስክንድር፡ብዙኅ።ሰላም፡ለክሙ፡ጽጉባነ፡ኦሪት፡ወወንጌል።እምአጥባዕተ፡መርዓት፡ክልኤ፡ከመ፡ዕጒለ፡መንታ፡ዘወይጠል።ሠናየ፡ጽጌ፡ኬፋ፡ወጥዑመ፡ፍሬ፡ሳውል።ይሠየም፡በክሣድየ፡ዐርዑትክሙ፡ቀሊል።ወይሰወጥ፡በአእናፍየ፡ጼናክሙ፡ኮል።ሰላም፡ለበርባራ፡ወለዮልያና፡አምሳላ።በዛቲ፡ዕለት፡ዘአስተርአየት፡ኃይላ።በክልኤ፡ዕደው፡ዘሰረቁ፡መጽሐፈ፡ገድላ።ፈደየቶ፡ለአሐዱ፡እንባዜ፡እምኀበ፡ማርያም፡ስኢላ።ወለዐይነ፡ቢጹ፡ካልዕ፡አጽለመት፡ጸዳላ።ድኅረ፡ኀለፈ፡ክረምት፡ወገብአ፡ዝናም፤እንተ፡አርአይከ፡እግዚኦ፡ጽጌያተ፡ገዳም፤አፈወ፡ሃይማኖት፡ነዓልድ፡ምስለ፡ፍሬ፡ምግባር፡ጥዑም፤አትግሃነ፡ለስብ፡ሐቲከ፡ከመ፡ትጋሆሙ፡አዳምለዕብስት፡ንህብ፡ወትግህት፡ቃሕም።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።