Sinaxario · Meskerem
24 de Meskerem
አመ፡፳ወ፬፡ለመስከረም1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። አመ፡፳ወ፬፡ለመስከረም፡በዛቲ፡ዕለት፡አዕረፈ፡አብ፡ቅዱስ፡አባ፡ጎርጎርዮስ፡መነኮስ።
2ወዝንቱ፡ቅዱስ፡ወብፁዕ፡ኮነ፡እም፡ላዕላይ፡ግብፅ፡ወአበዊሁኒ፡ክርስቲያን፡ቅዱሳን፡ወጻድቃን፡ኄራን፡ወብዑላን፡ፈድፋደ፡ወብዙኅ፡ንዋዮሙ።
3ወመሀርዎ፡ለጎርጎርዮስ፡ወልዶሙ፡በኵሉ፡ትምህርት፡ሠናይ፡መንፈሳዊ፡ወሥጋዊ።
4ወእምዝ፡መሀርዎ፡ትምህርተ፡ጥበብ፡ወነገር፡ወመጻሕፍተ፡ቤተ፡ክርስቲያን፡ቅድስት፡ወወሰድዎ፡ኀበ፡ኣባ፡ይስሐቅ፡ኤጲስ፡ቆጶስ፡ዘሀገሮሙ፡ወኣንበረ፡ላዕሌሁ፡እዴሁ፡ወረሰዮ፡አናጕንስጢሰ።
5ወእምዝ፡ኃሠሠ፡አቡሁ፡ከመ፡ያስተዋስቦ፡ውእቱኒ፡ኣበየ፡ዘንተ፡ግብረ።
6ወእምድኅረዝ፡አቅረብዎ፡ካዕበ፡ኀበ፡ኤጲስ፡ቆጶስ፡ወሤሞ፡ዲያቆነ፡ፍጹመ። ወኵሎ፡አሚረ፡የሐውር፡ኀበ፡ኣባ፡ጳኵሚስ፡ወይትመሀር፡እምኔሁ፡ፍኖተ፡እግዚአብሔር፡ወነሥአ፡እምአበዊሁ፡ንዋየ፡ብዙኀ፡ወአቅረበ፡ኀበ፡አብ፡ቅዱስ፡ኣባ፡ጳኵሚስ፡ወሰአሎ፡ስእለተ፡ብዙኀ፡ከመ፡የሀብ፡ለእለ፡የሐንፁ፡አድባረ፡መነኮሳት፡ወተመጠዎ፡ወወሀቦሙ፡ለእለ፡የሐንፁ፡ቤተ፡ክርስቲያን፡ወማኅደረ፡መነኮሳት፡ለሱታፌ፡ዚአሁ፡ይኩኖ፡ለጎርጎርዮስ።
7ወእምድኅረዝ፡መነነ፡ኵሎ፡ዓለመ፡ወኵሎ፡ጥሪቶ፡ወተጋብአ፡ኀበ፡አባ፡ጳኵሚስ፡ወለብሰ፡አልባሰ፡ምንኵስና፡በእደ፡አባ፡ጳኵሚስ፡ወነበረ፡ኀቤሁ፡ወፃመወ፡በነፍሱ፡ወበሥጋሁ፡ወተጋደለ፡ተጋድሎ፡ዓቢየ፡በጾም፡ወበጸሎት፡በሰጊድ፡ወበትጋህ፡በትሕትና፡ወፍቅር፡ወበየውሃት።
8ወሶበ፡ይሬእይዎ፡ዘማውያን፡ይትሜሀሩ፡እምአርአያሁ፡ወአምሳሊሁ፡ወሥነ፡ኂሩቱ፡ፈሪሃ፡እግዚአብሔር፡ወየኀድጉ፡ግብሮሙ፡እኩየ፡ወይኔስሑ፡ወይከውኑ፡ንጹሐነ። ውእቱኒ፡ነበረ፡ኀበ፡አባ፡ጳኵሚስ፡፲ወ፫፡ዓመተ።
9ወሶበ፡መጽአ፡ቅዱስ፡አባ፡መቃርስ፡ኀበ፡አባ፡ጳኵሚስ፡ወነበረ፡ኀቤሁ፡ኅዳጠ፡መዋዕለ፡ወፈቀደ፡ይትመየጥ፡ኀበ፡ገዳመ፡አስቄጥስ፡ወሰአሎ፡ዝንቱ፡አብ፡ለአባ፡ጳኵሚስ፡ወይቤሎ፡ኅድገኒ፡ኦ፡አቡየ፡ከመ፡እሑር፡ምስለ፡ቅዱስ፡መቃርስ፡ኀበ፡ገዳመ፡አስቄጥስ፡ወፈነዎ፡በሰላም።
10ወሐዊሮ፡ምስለ፡አባ፡መቃርስ፡ነበረ፡ኀቤሁ፡ብዙኀ፡ዓመታተ።
11ወእምዝ፡ሰአሎ፡ለአባ፡መቃርስ፡ከመ፡ይኀድጎ፡ወይንበር፡ባሕቲቶ፡ውስተ፡ፆማዕት፡ወይቤሎ፡ግበር፡ዘፈቀድከ፡ወሖረ፡ውስተ፡ደብር፡ወወቀረ፡በዓተ፡ንስቲተ፡ወነበረ፡ውስቴታ፡፯ተ፡ዓመተ።
12ወኮነ፡ይመጽእ፡ኀበ፡ቅዱስ፡መቃርስ፡፪ተ፡ጊዜ፡ለለዓመት፤ አሐደ፡በበዓለ፡ልደት፡ስቡሕ፡ወካልእ፡በዕለተ፡ትንሣኤሁ፡ለእግዚእነ፡ወመድኃኒነ፡ኢየሱስ፡ክርስቶስ፡ሎቱ፡ስብሐት። ወይነሥእ፡እምሥጢራተ፡ቅድሳት፡ወይትመየጥ፡ኀበ፡በዓቱ፡ወአባ፡መቃርስኒ፡ይሴአሎ፡በእንተ፡ግብር፡ዘሎቱ፡ውእቱኒ፡ይከሥት፡ሎቱ፡ዘይረክቦ፡ወዘይሬኢ፡ኵሎ። ወኮነ፡አባ፡መቃርስ፡ይኤዝዞ፡በዘይገብር፡እምተጋድሎ፡ዘምንኵስና።
13ወሶበ፡ተፈጸመ፡ሎቱ፡፳ወቱ፡ዓመት፡ውስተ፡ተጋድሎ፡ፈቀደ፡እግዚአብሔር፡ከመ፡ያዕርፎ፡እምፃማ፡ዝንቱ፡ዓለም፡ወፈነወ፡ሎቱ፡መልአኮ፡ወይቤሎ፡እምድኅረ፡፫ቱ፡ዕለት፡ትፈልስ፡እምዝንቱ፡ዓለም፡ኃላፊ፡ወትበውእ፡ውስተ፡ሕይወት፡ዘለዓለም።
14ወሶቤሃ፡ጸውዖሙ፡ቅዱስ፡ጎርጎርዮስ፡ለአዕሩግ፡ዘገዳመ፡አስቄጥስ፡ወተአምኆሙ፡ወሰአሎሙ፡ከመ፡ይዝክርዎ፤ ወእሙንቱኒ፡ካዕበ፡ሰአልዎ፡ከመ፡ይዝክሮሙ፡ኀበ፡እግዚአብሔር፡ወእምዝ፡አዕረፈ፡እምድኅረ፡፫ቱ፡ዕለት፡ወሖረ፡ውስተ፡ሕይወት፡ዘለዓለም። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለጎርጎርዮስ፡ለብድናጦስ፡አያዩ፤ውኂዘ፡መንፈስ፡ዘሰትየ፡ከመ፡ሐዋርያት፡ሰትዩ፤ሶበ፡ገደፈ፡ቅድሜሁ፡እስከነ፡ሲሳዩ፣ኵሎ፡ዘሎቱ፡ወዘአበዊሁ፡አጥረዩ፤ሥርዓተ፡ማኅበር፡ሐነፀ፡ጳኵሚስ፡በንዋዩ።
15ወበዛቲ፡ዕለት፡ኮነ፡ሰማዕተ፡ቅዱስ፡ብድራጦስ፡ዘእምሮወ፡አርድእት፡እለ፡ኀረዮሙ፡እግዚእነ፡ኢየሱስ፡ክርስቶስ፡ሎቱ፡ስብሐት።
16ወዝንቱ፡ቅዱስ፡ሐዋርያ፡እምውሉደ፡ልኂቃነ፡ሀገረ፡አቴና፡ወእምማእምራኒሃ፡ወአምነ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወተልእኮ፡ወሶበ፡ነሥአ፡እምጸጋ፡መንፈስ፡ቅዱስ፡ጰራቅሊጦስ፡በበዓለ፡፶፡ወሖረ፡ውስተ፡አህጉር፡ብዙኅ፡ወሰበከ፡በወ፡ንጌል፡ቅዱስ፡ወማሕየዊ።
17ወካዕበ፡ሰበከ፡ውስተ፡ሀገረ፡መግነክ፡ወአብርሃ፡አልባቢሆሙ፡በሃይማኖተ፡እግዚእነ፡ኢየሱስ፡ክርስቶስ፡ሎቱ፡ስብሐት። ወአጥመቆሙ፡ጥምቀተ፡ክርስትና፡ወመሀሮሙ፡ትእዛዛተ፡ወሥርዓታተ፡ቤተ፡ክርስቲያን፡ወሤመ፡ሎሙ፡ቀሳውስተ፡ወዲያቆናተ።
18ወእምዝ፡ወፅአ፡ኀበ፡ሀገረ፡አቴና፡ወሰበከ፡ውስቴታ፡በወንጌል፡ቅዱስ፡ወወገርዎ፡በአእባን፡ወኰነንዎ፡ኵነኔ፡ዓቢየ። ወእምድኅረዝ፡ወገርዎ፡ውስተ፡እሳት፡ወመጠወ፡ነፍሶ፡ወነሥአ፡አክሊለ፡ስምዕ፡በመንግሥተ፡ሰማያት፡በረከቱ፡ተሀሉ፡ምስሌነ፡ለዓለመ፡ዓለም፡አሜን።
19ወበዛቲ፡ዕለት፡ተዝካሮሙ፡ለቤትርዋ፡ወለታይን፡ሰማዕት፡ወዕረፍቱ፡ለአባ፡ገብርኤል፡ሊቀ፡ጳጳሳት፡ወቴዎድሮስ፡ወንስጥስዮስ፡ወንጥራሜልስ፡ወገድሉ፡ለቅዱስ፡አውሳኔዎስ፡ወዝያኖስ፡ወዮስጦስ፡ወአኀዊሁ፡እልሰርይ፡ወፍራጦስ፡ቆዝሞስ፡ወድምያኖስ፡በረከቶሙ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለአባ፡ሰላማ፡ዘደለዎ፡ተሰምዮ።መሥዋዕተ፡ልዑል፡ንጹሐ፡በእንተ፡ትሕትና፡በኢተዓብዮ።መንገለ፡ሀሎ፡ክርስቶስ፡ዘበላዕሉ፡ሐልዮ።በቤተ፡መቅደስ፡እንዘ፡ያወትር፡ጸልዮ።መልአከ፡ፍሥሓ፡ወሣህል፡ገብርኤል፡ተርእዮ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።