ግዕዝ
Home Formaciones Libros Biblioteca Ge'ez Contacto
Sinaxario · Megabit

9 de Megabit

አመ፡፱፡ለመጋቢት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፱፡ለመጋቢት፡በዛቲ፡ዕለት፡ኮኑ፡ሰማዕተ፡ቅዱሳን፡እንድርያኖስ፡ወብእሲቱ፡ወአውሳብዮስ፡ወአርማ፡ወ፵፡ሰማዕታት።
2ወኰነንዎሙ፡ኵነኔ፡ዐቢየ፡በእንተ፡ስሙ፡ለእግዚእነ፡ኢየሱስ፡ክርስቶስ፡ሎቱ፡ስብሐት። በእንተ፡ዘአበዩ፡አምልኮ፡ጣዖት፡ዘወርቅ፡ወዘብሩር፡ወይቤሉ፡ንሕነሰ፡ሰጋድያን፡ለአምላከ፡ሰማይ፡ወምድር፡ኢየሱስ፡ክርስቶስ፡ሎቱ፡ስብሐት።
3ወእምድኅረዝ፡መተርዎሙ፡አርእስቲሆሙ፡በሰይፍ፡ወነሥኡ፡አክሊለ፡ስምዕ፡በመንግሥተ፡ሰማያት። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለእንድርያኖስ፡ወብእሲቱ፡በስንዕ፤ለአውሳብዮስ፡ወአርማ፡ካልእ፤ወዕደው፡፵፡ሱቱፋነ፡ገድል፡ወስምዕ።ይሥቅዩኒ፡በጸሎቶሙ፡ለብእሲ፡ጽሙእ፤አቅማሃ፡አትክልት፡ከመ፡ይሠቂ፡ነቅዕ።
4ወበዛቲ፡ዕለት፡ካዕበ፡ተዝካሮሙ፡ለ፳፻፡ለእለ፡ኮኑ፡ሰማዕተ፡ምስለ፡አባ፡ኖብ። በረከቶሙ፡ተሀሉ፡ምስሌነ፡ለዓለመ፡ዓለም፡ኣሜን።
5ወበዛቲ፡ዕለት፡ካዕበ፡አዕረፈ፡አብ፡ቅዱስ፡ወመስተጋድል፡ኩትን፡እምዐፀድ፡እንተ፡ስማ፡በንጣንዮስ፡እምብሔረ፡ሶርያ።
6ወኮኑ፡አበዊሁ፡ያመልኩ፡ከዋክብተ፡ወስመ፡አቡሁ፡ንስር፡ወስማ፡ለእሙ፡ቴዎድራ፡ወበመዋዕለ፡ስብከቶሙ፡ለሐዋርያት፡አምኑ፡በእግዚእነ፡ኢየሱስ፡ክርስቶስ፡ሎቱ፡ስብሐት።
7ወሶበ፡ልኅቀ፡ዝንቱ፡ቅዱስ፡አስተርአዩ፡እምኔሁ፡ተአምራት፡ወመክራት፡ንጽሕና፡ወየውሀት፡ወብዝኃ፡ምሕረት፡ወኵሎ፡ትምህርታተ፡ፈጸመ።
8ወፈቀዱ፡አበዊሁ፡ያስተዋስብዎ፡ውእቱኒ፡ኢፈቀደ፡ወአገበርዎ፡ወአስተዋሰብዎ፡ሎቱ፡ብእሲተ፡ዘእንበለ፡ፈቃዱ፡ወኢኮነ፡ዘይትራከብ፡ምስለ፡ብእሲቱ፡አኮ፡በእንተ፡ጸሊአ፡ሕገ፡ሰብሳብ፡ወአኮ፡በእንተ፡ድካመ፡ሥጋ፡አላ፡ይጸልኣ፡ለፍትወት።
9ወነበረ፡ምስለ፡ብእሲቱ፡ብዙኀ፡መዋዕለ፡እንዘ፡እሙንቱ፡ደናግል፡ወኮነ፡ያበዝኅ፡ጸሎተ፡ይስእል፡ወያስተበቍዕ፡እንዘ፡ይብል፡ኦ፡አምላክ፡ምርሐኒ፡ውስተ፡አእምሮትከ።
10ወናሁ፡አስተርአዮ፡ቅዱስ፡ሚካኤል፡በከመ፡ለቆርኔሌዎስ፡ወመሀሮ፡ሃይማኖተ፡እግዚእነ፡ኢየሱስ፡ክርስቶስ፡ሎቱ፡ስብሐት። ወአዘዞ፡ከመ፡ይሑር፡ኀበ፡፩ዱ፡እምሐዋርያት፡ወይጠመቅ፡ሖረ፡ወተጠምቀ፡ጥምቀተ፡ክርስትና፡ወተምህረ፡ሕገ፡ሃይማኖት፡ርትዕት፡ወተመጠወ፡ምሥጢራተ፡ዘመለኮት።
11ወኮነ፡ወትረ፡ይሰምዕ፡ትምህርቶ፡ለጳውሎስ፡ሐዋርያ፡ወበእንተዝ፡ተወሰከ፡ንጽሕና፡ወገቢረ፡ጽድቅ፡ወተፀምዶት፡ወየውሀት፡ወጸሎታተ፡ጾመ፡ወሰጊደ፡ወትጋሀ።
12ወወሀቦ፡እግዚእነ፡ገቢረ፡ተአምራት፡ወመክራት፡ወሥልጣነ፡ላዕለ፡ሰይጣናት።
13ወሰሐቦሙ፡ለአበዊሁ፡ወወሀቦሙ፡ትእምርታተ፡ወአብኦሙ፡ውስተ፡ሃይማኖተ፡እግዚእነ፡ኢየሱስ፡ክርስቶስ፡ሎቱ፡ስብሐት። ለብእሲቱኒ፡ወለአበዊሃኒ።
14ወሶበ፡ቦአ፡፩፡እምከሐድያን፡ውስተ፡ቤተ፡ጣዖት፡ከመ፡ይሡዕ፡ለሰይጣን፡ወአእሚሮ፡ዘንተ፡ቅዱስ፡ኩትን፡ፀርሐ፡ላዕለ፡ሰይጣን፡ወገሠፆ፡ወአዘዞ፡ከመ፡ይትአመን፡በቅድመ፡ሰብእ፡ከመ፡ውእቱ፡ሰይጣን፡ወኢኮነ፡አምላከ፡ወገብረ፡በከመ፡አዘዞ፡ወፀርሑ፡ኵሎሙ፡እለ፡ነበሩ፡ህየ፡እንዘ፡ይብሉ፡፩፡ውእቱ፡አምላኩ፡ለቅዱስ፡ኩትን፡ወአምኑ፡ወተጠምቁ፡በስሙ፡ለእግዚእነ።
15ወሶበ፡ሰምዐ፡ዜናሁ፡መኰንን፡ዘእምቀላውዴዎስ፡ቄሣር፡ፈነወ፡ሐራ፡ወአብጽሖ፡ኀቤሁ፡ወቅዱስኒ፡ሶበ፡በጽሐ፡ተአመነ፡በቅድመ፡መኰንን፡በእግዚእነ፡ኢየሱስ፡ክርስቶስ፡ሎቱ፡ስብሐት። ወአዘዘ፡ይቅሥፍዎ፡መቅሠፍተ፡ዐቢየ፡ወይእስርዎ፡ወገብሩ፡ቦቱ፡ዘንተ።
16ወሶበ፡ሰምዑ፡ሰብአ፡ሀገር፡ከመ፡ተኰነነ፡በኀበ፡መኰንን፡ሮፁ፡ወበጽሑ፡ኀቤሁ፡ወፈቀዱ፡ይቅትልዎ፡ለመኰንን፡በእንተ፡ፍቅሩ፡ለቅዱስ፡ኩትን፡ወጐየ፡መኰንን፡ወፈትሕዎ፡እማእሰሩ፡ወሐጸብዎ፡እምደሙ፡ወፆርዎ፡ኀበ፡ቤቱ።
17ወሐይወ፡ብዙኀ፡ዓመታተ፡ወአሥመሮ፡ለእግዚአብሔር፡ዘአፍቀሮ፡ፈድፋደ፡ወአዕረፈ፡በሰላም።
18ወእምድኅረዝ፡ሐነፁ፡መሃይምናን፡ቤተ፡ክርስቲያነ፡በስሙ፡ወአንበሩ፡ሥጋሁ፡ውስቴታ፡ወአርአየ፡እግዚእነ፡እምኔሁ፡ተአምራተ፡ወመንክራተ፡ብዙኀተ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለኩትን፡በእደ፡ሐዋርያት፡ዘተጠምቀ፤እምአምላከ፡ሰማይ፡ትእምርተ፡ከመ፡ተጠየቀ፤ሶበ፡አገበርዎ፡እንተ፡ሕሊናሁ፡ኢጽሕቀ፤ለፍትወተ፡ሥጋ፡ኢተሞዐ፡ወለሥምረቱ፡ኢወድቀ፤ምስለ፡ብእሲቱ፡ሰኪቦ፡ወአኮ፡ርኁቀ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።